Ministri tal-aħbar tajba

ĠEĦOVA pprovdielna mudell perfett biex insegwu—Ibnu, Ġesù Kristu. (1 Pt. 2:21) Meta xi ħadd isir segwaċi tiegħu, dan l-​individwu jipprietka l-​aħbar tajba bħala wieħed mill-​ministri t’Alla. Ġesù indika li dan kellu jkun taʼ serħan spiritwali meta qal: “Ejjew għandi, intom ilkoll li mħabbtin u mgħobbijin, u jien inserraħkom. Ħudu l-​madmad tiegħi fuqkom u tgħallmu minni, għax jien ġwejjed u umli f’qalbi, u intom issibu serħan għal ruħkom.” (Mt. 11:28, 29) Il-​wegħda tiegħu qatt ma ddiżappuntat lil min wieġeb għal din l-​istedina!

² Bħala l-​Ministru Ewlieni t’Alla, Ġesù sejjaħ lil ċerti individwi biex ikunu segwaċi tiegħu. (Mt. 9:9; Ġw. 1:43) Hu ħarriġhom fil-​ministeru u bagħathom jagħmlu l-​istess xogħol li kien qed jagħmel hu. (Mt. 10:1–11:1; 20:28; Lq. 4:43) Iktar tard, hu bagħat 70 oħra biex jieħdu sehem fix-​xandir tal-​aħbar tajba dwar is-​Saltna t’Alla. (Lq. 10:1, 8-​11) Meta Ġesù bagħat lid-​dixxipli tiegħu, hu qalilhom: “Min jismaʼ lilkom jismaʼ lili. U min ma jagħtix kaskom ma jagħtix kasi. Iktar minn hekk, min ma jagħtix kasi ma jagħtix kas dak li bagħatni.” (Lq. 10:16) B’hekk, Ġesù saħaq fuq ir-​responsabbiltà serja li ngħatat lid-​dixxipli. Huma kellhom jirrappreżentaw lil Ġesù u lill-​Alla l-​Iktar Għoli! Dan kien se jkun minnu wkoll illum għal kull min iwieġeb għall-​istedina taʼ Ġesù: “Ejja kun segwaċi tiegħi.” (Lq. 18:22; 2 Kor. 2:17) Kull min iwieġeb għandu inkarigu divin biex jipprietka l-​aħbar tajba tas-​Saltna u jagħmel dixxipli.—Mt. 24:14; 28:19, 20.

³ Ladarba aċċettajna l-​istedina taʼ Ġesù li nsegwuh, aħna ġejna mberkin b’li nsiru nafu lil Alla Ġeħova u lil Ġesù Kristu. (Ġw. 17:3) Ġejna mgħallmin il-​mogħdijiet taʼ Ġeħova. Bl-​għajnuna tiegħu stajna nġeddu moħħna, nilbsu l-​personalità l-​ġdida, u nġibu l-​imġiba tagħna fi qbil mal-​livelli ġusti taʼ Ġeħova. (Rum. 12:1, 2; Efes. 4:22-​24; Kol. 3:9, 10) Apprezzament mill-​qalb qanqalna niddedikaw ruħna lil Ġeħova u nissimbolizzaw din id-​dedikazzjoni bil-​magħmudija fl-​ilma. Meta nitgħammdu niġu ordnati bħala ministri.

⁴ Dejjem żomm f’moħħok li s-​servizz lil Alla jrid jingħata b’idejn innoċenti u b’qalb safja. (Salm 24:3, 4; Is. 52:11; 2 Kor. 6:14–7:1) Permezz tal-​fidi f’Ġesù Kristu, ksibna kuxjenza nadifa. (Ebr. 10:19-​23, 35, 36; Riv. 7:9, 10, 14) L-​appostlu Pawlu wissa lill-​Kristjani biex jagħmlu kollox għall-​glorja t’Alla, sabiex ma jfixklu lil ħadd. L-​appostlu Pietru tkellem dwar il-​valur taʼ mġiba eżemplari biex uħud li ma jemmnux jintrebħu lejn il-​verità. (1 Kor. 10:31, 33; 1 Pt. 3:1) Kif tistaʼ tgħin lil xi ħadd jingħaqad magħna u jikkwalifika biex isir ministru tal-​aħbar tajba?

PUBBLIKATURI ĠODDA

⁵ Minn meta tibda tikkonduċi studju tal-​Bibbja maʼ xi ħadd interessat, inkuraġġih biex jitkellem m’oħrajn dwar dak li qed jitgħallem. Hu jistaʼ jitkellem maʼ qraba, ħbieb, sħabu fuq ix-​xogħol, u oħrajn fuq bażi informali. Dan huwa pass importanti biex ngħallmu lil nies ġodda jkunu segwaċi taʼ Ġesù Kristu bħala ministri tal-​aħbar tajba. (Mt. 9:9; Lq. 6:40) Hekk kif il-​wieħed il-​ġdid jikber spiritwalment u jsir iktar kapaċi jagħti xhieda informali, bla dubju hu se jesprimi x-​xewqa biex jipparteċipa fil-​ministeru tal-​għalqa.

JINTLAĦQU L-​ĦTIĠIJIET

⁶ Qabel ma tistieden lil xi ħadd joħroġ miegħek minn dar għal dar għall-​ewwel darba, għandek tkun ċert li jilħaq ċerti kwalifiki. Xi ħadd li joħroġ magħna fil-​ministeru tal-​għalqa jidentifika lilu nnifsu max-​Xhieda taʼ Ġeħova pubblikament. Dan ifisser li diġà ġab ħajtu fi qbil mal-​livelli ġusti taʼ Ġeħova u li jistaʼ jsir pubblikatur mhux mgħammed.

⁷ Hekk kif tistudja maʼ individwu u tiddiskuti l-​prinċipji tal-​Bibbja miegħu, aktarx ġejt konxju taċ-​ċirkustanzi tiegħu. Stajt innotajt li hu qed jgħix fi qbil maʼ dak li tgħallem. Imma hemm xi aspetti fil-​ħajja tal-​istudent li l-​anzjani jkunu jridu jiddiskutu magħkom it-​tnejn flimkien.

⁸ Il-​koordinatur tal-​ġemgħa tal-​anzjani se jagħmel arranġamenti biex żewġ anzjani (wieħed minnhom membru tal-​kumitat tas-​servizz) jiddiskutu dawn l-​affarijiet miegħek u mal-​istudent tal-​Bibbja. F’kongregazzjonijiet fejn hemm ftit anzjani, anzjan u qaddej ministerjali kapaċi jistgħu jagħmlu dan. L-​aħwa magħżulin għandhom jagħmlu l-​almu tagħhom biex jagħmlu din id-​diskussjoni mill-​iktar fis possibbli. Infatti, jekk isiru jafu dwar ix-​xewqa tal-​istudent f’laqgħa tal-​kongregazzjoni, jistaʼ jkun possibbli li jitkellmu miegħek u mal-​istudent tiegħek wara l-​laqgħa. L-​atmosfera għandha tkun rilassata. Qabel ma l-​istudent jistaʼ jiġi approvat bħala pubblikatur mhux mgħammed, għandu jkun qed jagħmel dan li ġej:

1. (1) Jemmen li l-​Bibbja hija l-​Kelma mnebbħa t’Alla.—2 Tim. 3:16.

2. (2) Jaf u jemmen it-​tagħlim bażiku tal-​Iskrittura ħalli meta jiġi mistoqsi, ikun jistaʼ jwieġeb fi qbil mal-​Bibbja u mhux skont tagħlim reliġjuż falz jew l-​ideat tiegħu stess.—Mt. 7:21-​23; 2 Tim. 2:15.

3. (3) Qed jobdi l-​kmand tal-​Bibbja biex jassoċja mal-​poplu taʼ Ġeħova fil-​laqgħat tal-​kongregazzjoni jekk jistaʼ jagħmel dan.—Salm 122:1; Ebr. 10:24, 25.

4. (4) Jaf x’tgħallem il-​Bibbja dwar l-​immoralità sesswali, inkluż l-​adulterju, il-​poligamija, u l-​omosesswalità, u qed jgħix fi qbil maʼ dan it-​tagħlim. Jekk l-​individwu qed jgħix maʼ xi ħadd tas-​sess oppost li mhux qarib, għandhom ikunu miżżewġin kif xieraq.—Mt. 19:9; 1 Kor. 6:9, 10; 1 Tim. 3:2, 12; Ebr. 13:4.

5. (5) Qed jobdi l-​projbizzjoni tal-​Bibbja dwar is-​sokor u hu ħieles minn kull użu mhux mediku taʼ sustanzi naturali jew sintetiċi li jagħmluh jiddependi minnhom jew li jeffettwawlu moħħu.—2 Kor. 7:1; Efes. 5:18; 1 Pt. 4:3, 4.

6. (6) Qed jara l-​importanza taʼ li jevita kumpanija ħażina.—1 Kor. 15:33.

7. (7) Qataʼ għalkollox is-​sħubija li kellu maʼ kull organizzazzjoni reliġjuża falza li setaʼ kien membru tagħha. Waqaf jattendi l-​laqgħat tagħhom u waqaf jappoġġa l-​attivitajiet tagħhom jew li jieħu sehem fihom.—2 Kor. 6:14-​18; Riv. 18:4.

8. (8) Ikun ħieles minn kull involviment fl-​affarijiet politiċi tad-​dinja.—Ġw. 6:15; 15:19; Ġak. 1:27.

9. (9) Jemmen u jgħix fi qbil maʼ dak li jgħid Isaija 2:4 dwar dak li jagħmlu l-​ġnus.

10. (10) Verament irid ikun wieħed mix-​Xhieda taʼ Ġeħova.—Salm 110:3.

⁹ Jekk l-​anzjani ma jkunux ċerti kif l-​istudent iħossu dwar kwalunkwe waħda minn dawn il-​punti, għandhom jistaqsuh, billi forsi jużaw l-​iskritturi ċitati hawn bħala bażi tad-​diskussjoni. Hu importanti li jifhem li dawk li jieħdu sehem fl-​attività taʼ ppritkar max-​Xhieda taʼ Ġeħova għandhom ikunu qed jgħixu fi qbil maʼ dawn il-​ħtiġijiet Skritturali. Dak li jgħid se jgħin lill-​anzjani jiddeterminaw jekk hu jafx x’inhu mistenni minnu u jekk jikkwalifikax sa livell raġunevoli biex jibda jipparteċipa fil-​ministeru tal-​għalqa.

¹⁰ Fil-​pront, l-​anzjani għandhom jinformaw lill-​istudent jekk jikkwalifikax. Ġeneralment, dan ikun jistaʼ jsir fil-​konklużjoni tad-​diskussjoni. Jekk jikkwalifika, l-​anzjani jistgħu kordjalment jilqgħu lill-​individwu bħala pubblikatur. (Rum. 15:7) Għandu jiġi inkuraġġit jibda jieħu sehem fil-​ministeru tal-​għalqa malajr kemm jistaʼ jkun u biex jimla rapport tas-​servizz tal-​għalqa fl-​aħħar tax-​xahar. L-​anzjani jistgħu jispjegaw li meta student tal-​Bibbja jikkwalifika bħala pubblikatur mhux mgħammed u jirrapporta s-​servizz tal-​għalqa għall-​ewwel darba, timtela Congregation’s Publisher Record f’ismu u titpoġġa fil-​fajl tal-​kongregazzjoni. L-​anzjani jiġbru din l-​informazzjoni personali mingħand il-​pubblikatur biex l-​organizzazzjoni tkun tistaʼ tieħu ħsieb l-​attivitajiet reliġjużi tax-​Xhieda taʼ Ġeħova madwar id-​dinja u biex il-​pubblikatur ikun jistaʼ jieħu sehem fl-​attivitajiet spiritwali u jirċievi sapport spiritwali. Barra minn hekk, l-​anzjani jistgħu jfakkru l-​pubblikaturi ġodda li kwalunkwe informazzjoni personali tiġi trattata skont il-​Policy globali tal-​protezzjoni tad-​data tax-​Xhieda taʼ Ġeħova li tinsab fuq jw.org.

¹¹ Li nsiru nafu aħjar lill-​pubblikatur il-​ġdid u li nuru interess persunali f’dak li jkun wettaq, nistgħu ninfluwenzaw u ninkuraġġixxu lill-​individwu. Dan jistaʼ jqanqlu biex jimla r-​rapporti tas-​servizz tal-​għalqa regolarment u biex jagħmel sforzi akbar biex jaqdi lil Ġeħova.—Flp. 2:4; Ebr. 13:2.

¹² Ladarba l-​anzjani jkunu ddeċidew li l-​istudent tal-​Bibbja jikkwalifika biex jipparteċipa fil-​ministeru tal-​għalqa, jistaʼ jingħata l-​kopja persunali tiegħu tal-​ktieb Organizzati biex nagħmlu r-​rieda taʼ Ġeħova. Wara li jirrapporta s-​servizz tal-​għalqa għall-​ewwel darba, isir avviż qasir lill-​kongregazzjoni li hu pubblikatur mhux mgħammed ġdid.

NGĦINU LIT-​TFAL

¹³ Tfal żgħar ukoll jistgħu jikkwalifikaw bħala pubblikaturi tal-​aħbar tajba. Ġesù laqaʼ lit-​tfal żgħar u berikhom. (Mt. 19:13-​15; 21:15, 16) Għalkemm il-​ġenituri huma primarjament responsabbli għat-​tfal tagħhom, oħrajn fil-​kongregazzjoni forsi jixtiequ jgħinu liż-​żgħar li jkunu motivati biex mill-​qalb jieħdu sehem fix-​xogħol tal-​ippritkar tas-​Saltna. Jekk int ġenitur, l-​eżempju mill-​aħjar tiegħek fil-​ministeru tal-​għalqa se jgħin ħafna biex jinkuraġġixxi lil uliedek ikunu żelużi fis-​servizz tagħhom lil Alla. Meta tifel li jkun eżemplari fl-​imġiba jitqanqal mill-​qalb biex jesprimi l-​fidi tiegħu m’oħrajn, liema għajnuna oħra tistaʼ tingħatalu?

¹⁴ Ikun xieraq li l-​ġenitur javviċina lil wieħed mill-​anzjani tal-​Kumitat tas-​Servizz tal-​Kongregazzjoni biex jiddiskuti jekk it-​tifel jikkwalifikax biex isir pubblikatur. Il-​koordinatur tal-​ġemgħa tal-​anzjani jagħmel arranġamenti biex żewġ anzjani (wieħed minnhom membru tal-​kumitat tas-​servizz) jiltaqgħu mat-​tifel u l-​ġenitur(i) jew maʼ min ikun qed irabbih. Jekk it-​tifel għandu għarfien bażiku tal-​verità tal-​Bibbja u juri li jrid jieħu sehem fil-​ministeru, dan jindika li jkun sar progress tajjeb. Wara li jikkunsidraw dawn il-​fatturi u oħrajn simili għal dawk li japplikaw għall-​adulti, iż-​żewġ anzjani jistgħu jiddeterminaw jekk it-​tifel jistax jiġi rikonoxxut bħala pubblikatur mhux mgħammed. (Lq. 6:45; Rum. 10:10) Meta jiltaqgħu maʼ tifel żgħir, ma jkunx hemm għalfejn jiġu diskussi wħud mill-​punti li ġeneralment jiġu diskussi maʼ adult imma li ovvjament ma japplikawx għat-​tfal.

¹⁵ Matul il-​laqgħa, l-​anzjani għandhom ifaħħru lit-​tifel għall-​progress li jkun għamel u jinkuraġġuh jagħmilha mira li jitgħammed. Ladarba bla dubju l-​ġenituri ħadmu iebes biex irawmu l-​verità f’qalb binhom, huma wkoll jixirqilhom it-​tifħir. Biex iħeġġu lill-​ġenituri jkomplu jgħinu lit-​tifel, l-​anzjani għandhom jitolbuhom jaqraw “Messaġġ lill-​ġenituri Kristjani” li jinsab f’paġni 179-​181.

DEDIKAZZJONI U MAGĦMUDIJA

¹⁶ Jekk sirt taf u tħobb lil Ġeħova billi lħaqt il-​ħtiġijiet divini u billi ħadt sehem fil-​ministeru tal-​għalqa, għandek bżonn issaħħaħ ir-​relazzjoni persunali tiegħek maʼ Ġeħova. Kif? Billi tiddedika ħajtek lilu bit-​talb u tissimbolizza dan bil-​magħmudija fl-​ilma.—Mt. 28:19, 20.

¹⁷ Id-​dedikazzjoni tfisser li xi ħaġa titwarrab għal skop sagru. Li tiddedika lilek innifsek lil Alla jfisser li tersaq lejh bit-​talb u twiegħed solennement li tuża ħajtek fis-​servizz tiegħu u li timxi fi triqatu. Ifisser li tagħtih devozzjoni esklużiva għal dejjem. (Dt. 5:9) Din hija kwistjoni persunali, privata. Ħadd ma jistaʼ jagħmel dan għalik.

¹⁸ Madankollu, mhux biżżejjed li fil-​privat tgħid lil Ġeħova li trid tkun tiegħu. Għandek turi lil ħaddieħor li għamilt dedikazzjoni lil Alla. Dan tagħmlu magħruf billi titgħammed fl-​ilma, bħalma għamel Ġesù. (1 Pt. 2:21; 3:21) Jekk int iddeċidejt li taqdi lil Ġeħova u trid titgħammed, x’għandek tagħmel? Għandek tgħarraf lill-​koordinatur tal-​ġemgħa tal-​anzjani bix-​xewqa tiegħek. Hu se jagħmel arranġamenti biex diversi anzjani jkellmuk biex ikunu ċerti li int tissodisfa l-​ħtiġijiet divini għall-​magħmudija. Għal iktar informazzjoni, jekk jogħġbok irrivedi “Messaġġ lill-​pubblikatur mhux mgħammed,” li jinsab f’paġni 182-184 taʼ din il-​pubblikazzjoni, u “Mistoqsijiet għal dawk li jixtiequ jitgħammdu,” li jinsabu f’paġni 185-207.

NIRRAPPORTAW IL-​PROGRESS TAL-​MINISTERU

¹⁹ Tul is-​snin, rapporti dwar l-​espansjoni tal-​qima pura madwar id-​dinja servew taʼ sors taʼ inkuraġġiment għall-​poplu taʼ Ġeħova. Mill-​ewwel darba li Ġesù Kristu qal lid-​dixxipli tiegħu li l-​aħbar tajba kellha tkun pritkata madwar l-​art kollha, il-​Kristjani veri kienu interessati ħafna li jkunu jafu kif dan kien se jitwettaq.—Mt. 28:19, 20; Mk. 13:10; Atti 1:8.

²⁰ Is-​segwaċi tal-​bidu taʼ Ġesù ħadu pjaċir jisimgħu rapporti dwar is-​suċċessi fix-​xogħol tal-​ippritkar. (Mk. 6:30) Il-​ktieb Bibliku tal-​Atti jgħidilna li madwar 120 persuna kienu preżenti meta l-​ispirtu qaddis tferraʼ fuq id-​dixxipli f’Pentekoste tas-​sena 33 WK. In-​numru taʼ dixxipli malajr kiber għal 3,000 u mbagħad għal 5,000. Sar rapport inkuraġġanti li “Ġeħova kompla jżid magħhom kuljum lil dawk li kienu qed jiġu salvati” u li “folla kbira taʼ qassisin bdew jobdu l-​fidi.” (Atti 1:15; 2:5-​11, 41, 47; 4:4; 6:7) Żgur li l-​aħbar dwar dawn iż-​żidiet ġabet inkuraġġiment kbir lid-​dixxipli! Min jaf kemm dawn ir-​rapporti eċċitanti tawhom spinta fix-​xogħol li ngħatalhom minn Alla, minkejja l-​persekuzzjoni ħarxa mxewxa mill-​mexxejja reliġjużi Lhud!

²¹ Madwar is-​sena 60-​61 WK, Pawlu rrapporta fl-​ittra tiegħu lill-​Kolossin li l-​aħbar tajba kienet “qed tagħmel il-​frott u toktor fid-​dinja kollha” u li kienet ġiet “pridkata fil-​ħolqien kollu li hu taħt is-​sema.” (Kol. 1:5, 6, 23) Il-​Kristjani tal-​bidu kienu ubbidjenti lejn il-​Kelma, u l-​ispirtu qaddis tahom il-​qawwa biex iwettqu x-​xogħol tremend tal-​ippritkar mad-​dinja kollha qabel tmiem is-​sistema Lhudija fis-​sena 70 WK. Kemm kien inkuraġġanti għal dawk il-​Kristjani leali li jisimgħu rapporti dwar dak li kien qed jitwettaq!

²² Bl-​istess mod, l-​organizzazzjoni taʼ Ġeħova fi żmienna tagħmel ħilitha biex iżżomm rekords tax-​xogħol li qed isir bi twettiq taʼ Mattew 24:14, li jgħid: “Din l-​aħbar tajba tas-​saltna tiġi pridkata fl-​art abitata kollha bħala xiehda lill-​ġnus kollha; u mbagħad jiġi t-​tmiem.” Bħala qaddejja dedikati t’Alla, għandna xogħol urġenti x’nagħmlu. Għandna nieħdu interess persunali biex naraw li l-​ministeru qed jitwettaq bir-​reqqa qabel ma jiġi t-​tmiem. Ġeħova se jagħmel ċert li dan ix-​xogħol jitlesta, u jekk ikollna sehem fih, se nirċievu l-​approvazzjoni taʼ Ġeħova.—Eżek. 3:18-​21.

IR-​RAPPORT PERSUNALI TIEGĦEK TAS-​SERVIZZ TAL-​GĦALQA

²³ X’għandna nirrapportaw eżattament? Il-​karta tal-​Field Service Report li tiġi provduta mill-​organizzazzjoni tindika x’informazzjoni trid titniżżel. Imma l-​kummenti ġenerali li ġejjin jistgħu jkunu t’għajnuna.

²⁴ Fil-​kolonna intitolata “Placements (Printed and Electronic),” niżżel in-​numru totali taʼ pubblikazzjonijiet, stampati jew elettroniċi, li ħallejt jew qsamt maʼ wħud li mhumiex Xhieda mgħammdin. Taħt “Video Showings,” niżżel kemm-​il darba wrejt wieħed mill-​vidjows tagħna lil xi ħadd.

²⁵ Meta tirrapporta “Return Visits” (Żjajjar lura), għodd in-​numru taʼ żjajjar li għamilt bl-​iskop li tkompli tqajjem l-​interess li ntwera qabel minn xi ħadd li mhux Xhud dedikat u mgħammed. Tistaʼ wkoll tagħmel żjara lura billi tmur inti personalment, tikteb ittra, tagħmel telefonata, tibgħat messaġġ bil-​mowbajl jew e-​mail, jew meta twassal xi letteratura. Kull darba li jsir studju tal-​Bibbja, tistaʼ tingħadd bħala żjara lura. Ġenitur jistaʼ jgħodd sa żjara lura waħda fil-​ġimgħa meta jikkonduċi l-​qima bħala familja u jkun hemm tifel jew tifla mhix mgħammda.

²⁶ Għalkemm studju tal-​Bibbja normalment isir kull ġimgħa, dan jiġi rapportat bħala studju wieħed biss fix-​xahar. Il-​pubblikaturi għandhom iniżżlu t-​total taʼ studji tal-​Bibbja differenti li saru matul ix-​xahar. Studji tal-​Bibbja li jingħaddu huma dawk li saru maʼ nies u li mhumiex Xhieda dedikati u mgħammdin. Tistaʼ wkoll tgħodd studju tal-​Bibbja taʼ ħu jew oħt inattiva bid-​direzzjoni taʼ membru mill-​kumitat tas-​servizz jew maʼ persuna li għadha kemm tgħammdet u li għadha ma spiċċatx il-​ktieb Għix Ħajja Ferħana għal Dejjem!

²⁷ Hu importanti li tagħmel rapport eżatt fil-​kolonna “Hours of Field Service” (Sigħat tas-​servizz tal-​għalqa). Bażikament, dan huwa l-​ħin li tqattaʼ tipparteċipa fil-​ministeru minn dar għal dar, tagħmel żjajjar lura, tikkonduċi studji tal-​Bibbja, jew inkella tagħti xhieda formali jew informali lil nies li mhumiex Xhieda dedikati u mgħammdin. Jekk żewġ pubblikaturi qed jaħdmu flimkien, it-​tnejn li huma jistgħu jgħoddu l-​ħin, imma wieħed minnhom biss jistaʼ jgħodd kwalunkwe żjajjar lura jew studji tal-​Bibbja li jsiru. Żewġ ġenituri li jaqsmu fit-​taħriġ taʼ wliedhom matul il-​lejla tal-​Qima Bħala Familja jistgħu jgħoddu sa siegħa fil-​ġimgħa. L-​aħwa rġiel jistgħu jgħoddu l-​ħin li jqattgħu jagħtu taħdita pubblika. Interpretu taʼ taħdita pubblika jistaʼ jgħodd il-​ħin ukoll. Hemm attivitajiet essenzjali li ma jingħaddx il-​ħin tagħhom, bħal li tlesti għas-​servizz tal-​għalqa, tattendi l-​laqgħa għas-​servizz tal-​għalqa, tagħmel il-​qadi, u affarijiet oħra.

²⁸ Kull pubblikatur għandu jsegwi l-​kuxjenza tiegħu mħarrġa fuq il-​Bibbja meta bit-​talb jiddetermina x’inhu perijodu taʼ għoti taʼ xhieda. Xi pubblikaturi jippritkaw fi nħawi ffollati bin-​nies, filwaqt li oħrajn jaħdmu f’territorji fejn jgħixu ftit nies u jkollhom jivvjaġġaw ftit mhux ħażin. It-​territorji jvarjaw; il-​pubblikaturi jvarjaw f’kif iqisu l-​ministeru tagħhom. Il-​Ġemgħa li Tiggverna ma timponix il-​kuxjenza tagħha fuq il-​kongregazzjoni madwar id-​dinja f’kif għandu jingħadd il-​ħin imqatta’ fis-​servizz tal-​għalqa, lanqas ma ġie maħtur xi ħadd ieħor biex jiġġudika f’din il-​ħaġa.—Mt. 6:1; 7:1; 1 Tim. 1:5.

²⁹ Il-​ħin li jitqattaʼ fis-​servizz tal-​għalqa għandu jiġi rapportat f’sigħat sħaħ. Eċċezzjoni għal dan issir meta pubblikatur ikun limitat ħafna minħabba età avanzata, ma jkunx jistaʼ joħroġ, ikun jgħix f’dar tax-​xjuħ bla ma jistaʼ joħroġ, jew ikun limitat b’mod ieħor. Pubblikatur bħal dan jistaʼ jirrapporta s-​servizz tal-​għalqa billi jgħodd kull 15-​il minuta. Anki jekk jagħti xhieda għal 15-​il minuta biss matul ix-​xahar, għandu jirrapporta dan il-​ħin. Hu jkompli jingħadd bħala pubblikatur regulari tas-​Saltna. Dan l-​arranġament japplika wkoll għal pubblikatur li jkun limitat temporanjament, forsi ma jkunx jistaʼ joħroġ mid-​dar għal xahar jew xahrejn minħabba marda serja jew korriment. Dan il-​provvediment isir biss għal dawk li huma limitati ħafna fl-​attività tagħhom. Il-​kumitat tas-​servizz se jiddetermina jekk pubblikatur jikkwalifikax għal dan l-​arranġament.

CONGREGATION’S PUBLISHER RECORD

³⁰ Ir-​rapport tas-​servizz tal-​għalqa individwali tiegħek għal kull xahar jitniżżel fil-​Congregation’s Publisher Record (ir-​rekord tal-​kongregazzjoni taʼ pubblikatur). Dawn ir-​rekords huma tal-​kongregazzjoni lokali. Jekk bi ħsiebek tbiddel il-​kongregazzjoni, kun ċert li tavża lill-​anzjani tiegħek. Is-​segretarju se jagħmel ċert li r-​rekords tiegħek jintbagħtu lill-​kongregazzjoni ġdida tiegħek. B’hekk, l-​anzjani se jkunu f’pożizzjoni aħjar biex jilqgħuk u jipprovdu sapport spiritwali. Jekk mhux se tkun fil-​kongregazzjoni tiegħek għal perijodu taʼ inqas minn tliet xhur, jekk jogħġbok kompli ibgħat ir-​rapporti tas-​servizz tal-​għalqa tiegħek lill-​kongregazzjoni tiegħek.

GĦALA NIRRAPPORTAW IS-​SERVIZZ TAL-​GĦALQA TAGĦNA

³¹ Ġieli tinsa titfaʼ r-​rapport tas-​servizz tal-​għalqa tiegħek? Bla dubju lkoll kemm aħna għandna bżonn tfakkiriet minn żmien għal żmien. Imma jekk nikkultivaw attitudni xierqa dwar li nirrapportaw u nifhmu għala huwa importanti li nagħmlu dan, jistaʼ jkun iktar faċli għalina li niftakru nirrapportaw is-​servizz tal-​għalqa tagħna.

³² Xi wħud staqsew: “Ladarba Ġeħova jaf x’qed nagħmel fis-​servizz tiegħu, għala hemm għalfejn nagħti rapport lill-​kongregazzjoni?” Veru, Ġeħova jaf x’qed nagħmlu, u jaf jekk is-​servizz tagħna hux b’ruħna kollha jew jekk hux ftit minn dak li aħna verament kapaċi nagħmlu. Madankollu, ftakar li Ġeħova niżżel fil-​Bibbja l-​għadd taʼ ġranet li Noè qattaʼ fl-​arka u l-​għadd taʼ snin li l-​Iżraelin ivvjaġġaw fix-​xagħri. Alla żamm kont tal-​għadd taʼ dawk li kienu leali kif ukoll taʼ dawk li m’obdewx. Hu niżżel il-​progress li bih kienet qed tintrebaħ l-​art taʼ Kangħan u dak li rnexxielhom iwettqu l-​imħallfin leali tal-​Iżrael. Iva, hu niżżel ħafna dettalji dwar l-​attivitajiet tal-​qaddejja tiegħu. Hu ispira dan ir-​rekord bil-​miktub dwar x’ġara, u b’hekk għamel ċar għalina l-​ħarsa tiegħu dwar li nżommu rekords eżatti.

³³ Il-​ġrajjiet storiċi mniżżlin fil-​Bibbja juru l-​eżattezza tar-​rapporti u r-​rekords li żammew in-​nies taʼ Ġeħova. F’ħafna każi, ma kienx ikollna l-​impatt sħiħ tar-​rakkont Bibliku li kieku ma sarx rapport taʼ numri speċifiċi. Ikkunsidra l-​eżempji li ġejjin: Ġenesi 46:27; Eżodu 12:37; Imħallfin 7:7; 2 Slaten 19:35; 2 Kronaki 14:9-​13; Ġwanni 6:10; 21:11; Atti 2:41; 19:19.

³⁴ Għalkemm ir-​rapporti tagħna ovvjament ma jinkludux kulma nagħmlu fil-​qima taʼ Ġeħova, iservu skop prattiku fl-​organizzazzjoni tiegħu. Fl-​ewwel seklu, meta l-​appostli rritornaw minn kampanja taʼ pritkar, huma rrakkontaw lil Ġesù “kulma kienu għamlu u għallmu.” (Mk. 6:30) Kultant, ir-​rapporti jistgħu jindikaw li ċerti aspetti tal-​ministeru tagħna jkollhom bżonn attenzjoni partikulari. Il-​figuri jistgħu juru li filwaqt li jkun sar progress f’ċerti attivitajiet, aspetti oħrajn—bħal żieda fil-​pubblikaturi u tkabbir—ikunu majnaw. Forsi hemm bżonn l-​inkuraġġiment jew hemm problemi li jridu jiġu solvuti. Indokraturi responsabbli se jieħdu nota tar-​rapporti u jagħmlu ħilithom biex jikkoreġu kwalunkwe kundizzjoni li tistaʼ tkun qed iżżomm lura l-​progress taʼ xi individwi jew tal-​kongregazzjoni inġenerali.

³⁵ Ir-​rapporti huma taʼ benefiċċju wkoll għall-​organizzazzjoni biex jiġi determinat eżattament fejn hemm iktar bżonn għal ħaddiema fl-​għalqa. Liema nħawi huma iktar produttivi? Fejn qed isir ftit progress? Liema pubblikazzjonijiet hemm bżonn biex jgħinu lin-​nies jitgħallmu l-​verità? Ir-​rapporti jgħinu lill-​organizzazzjoni biex tippjana bil-​quddiem il-​bżonnijiet għal-​letteratura f’partijiet differenti tad-​dinja u mbagħad biex tagħmel ċert li ma jkunx hemm nuqqas taʼ letteratura.

³⁶ Għall-​maġġuranza minna, ir-​rapporti jfissru inkuraġġiment. Ma niħdux pjaċir meta nisimgħu dwar ix-​xogħol li qed jagħmlu ħutna fl-​ippritkar tal-​aħbar tajba madwar id-​dinja? Rapporti dwar iż-​żieda jgħinuna jkollna ħarsa ġenerali dwar it-​tkabbir tal-​organizzazzjoni taʼ Ġeħova. L-​esperjenzi jmissulna qalbna u jimlewna biż-​żelu, u b’hekk iqanqluna jkollna sehem akbar fix-​xogħol tal-​ippritkar. (Atti 15:3) Il-​kooperazzjoni tagħna biex nimlew ir-​rapporti tas-​servizz tal-​għalqa hija importanti u turi li aħna konċernati għal ħutna kullimkien. B’din il-​ħaġa żgħira, aħna nuru s-​sottomissjoni tagħna lejn l-​arranġament organizzazzjonali taʼ Ġeħova.—Lq. 16:10; Ebr. 13:17.

NAGĦMLU MIRI PERSUNALI

³⁷ M’hemmx raġuni għala għandna noqogħdu nqabblu s-​servizz tal-​għalqa tagħna maʼ dak taʼ ħaddieħor. (Gal. 5:26; 6:4) Ċirkustanzi individwali jvarjaw. Mill-​banda l-​oħra, nistgħu niksbu ħafna ġid jekk nagħmlu miri persunali realistiċi bħala bażi biex nevalwaw il-​progress tagħna fil-​ministeru. Li nilħqu dawn il-​miri jistaʼ jagħtina s-​sodisfazzjon li jiġi meta nwettqu xi ħaġa.

³⁸ Hu ovvju li Ġeħova tabilħaqq qiegħed jgħaġġel il-​ġbir taʼ dawk li hu se jipproteġi matul it-​“tribulazzjoni l-​kbira.” Aħna qed ngħixu fiż-​żmien tat-​twettiq tal-​profezija taʼ Isaija: “Il-​wieħed ċkejken isir elf, u ż-​żgħir ġens setgħan. Jien innifsi, Ġeħova, se ngħaġġlu f’waqtu.” (Riv. 7:9, 14; Is. 60:22) Xi privileġġ hu li nkunu predikaturi tal-​aħbar tajba matul dawn l-​aħħar jiem taʼ importanza kbira!—Mt. 24:14.