Hemm X’Nitgħallmu mill-​Ewwel Koppja Umana

ALLA ħares lejn il-​pjaneta Art. Kien qed iħejjiha biex tiġi abitata mill-​bniedem. Hu ra li kulma kien qed jagħmel kien tajjeb. Fil-​fatt, meta għamel dan ix-​xogħol, hu ddikjara li kien “tajjeb ħafna.” (Ġenesi 1:​12, 18, 21, 25, 31) Madankollu, qabel wasal għal din il-​konklużjoni perfetta, Alla tkellem dwar xi ħaġa li ma ‘kinitx sewwa.’ M’għandniex xi ngħidu, dan ma jfissirx li Alla għamel xi ħaġa li ma kinitx perfetta, iżda sempliċement li l-​ħolqien tiegħu kien għadu mhux komplet. “M’hux sewwa li l-​bniedem jibqaʼ waħdu,” qal Jehovah. “Ħa nagħmillu għajnuna tgħodd għalih.”—Ġenesi 2:18.

Kien l-​iskop taʼ Jehovah li s-​soċjetà umana tgawdi ħajja eterna u tkun f’saħħitha, hienja, u tgħix fix-​xabaʼ f’ġenna taʼ l-​art. Missier l-​umanità kollha kien Adam. Martu, Eva, saret “omm il-​ħajjin kollha.” (Ġenesi 3:20) Għalkemm l-​art illum hi miżgħuda bin-​nisel tagħhom, li jgħodd il-​biljuni, il-​bnedmin ċertament li m’humiex perfetti.

L-istorja taʼ Adam u Eva hi magħrufa sew. Imma liema benefiċċju prattiku għandha għalina? X’nistgħu nitgħallmu mill-​esperjenzi taʼ l-​ewwel koppja umana?

“Raġel u Mara Ħalaqhom”

Meta Adam kien qed jagħti l-​ismijiet lill-​annimali, ra li kollha kellhom is-​sieħba tagħhom iżda hu ma kellux. Għalhekk, meta xeħet għajnejh fuq il-​ħlejqa sabiħa li Jehovah kien sawwar mill-​kustilja tiegħu, hu thenna. Waqt li rrealizza li hi kienet unikament parti minnu, Adam esklama: “Din hi għadma minn għadmi, u laħam minn laħmi, għalhekk tissejjaħ mara, għax mir-​raġel ittieħdet hi.”—Ġenesi 2:​18-23.

Ir-raġel kellu bżonn l-​“għajnuna.” Issa kellu dik l-​għajnuna li kienet taqbel preċiż miegħu. Eva kienet addattata perfettament biex tkun il-​kompliment taʼ Adam—f’li tieħu ħsieb l-​annimali u d-​dar tagħhom li kienet qisha ġnien, f’li tnissel it-​tfal, u f’li tipprovdi l-​inkuraġġiment u l-​appoġġ intellettwali taʼ sieħba vera.—Ġenesi 1:​26-30.

Jehovah pprovda dak kollu li l-​koppja setgħet tixtieq b’mod raġunevoli. Billi ħa lil Eva għand żewġha, u b’hekk poġġa s-​siġill tiegħu fuq l-​unjoni tagħhom, Alla sejjes l-​istituzzjonijiet taż-​żwieġ u l-​familja li bihom kellha tiġi organizzata s-​soċjetà. Ir-​rakkont tal-​Ġenesi jgħid hekk: “Raġel iħalli lil missieru u lil ommu u jingħaqad maʼ martu u jsiru ġisem wieħed.” U meta Jehovah bierek l-​ewwel koppja miżżewġa u qalilhom biex ikollhom it-​tfal, jidher ċar li hu kellu f’moħħu li kull tarbija titwieled ġo familja li jimpurtaha minnha, b’missier u omm li jieħdu ħsiebha.—Ġenesi 1:28; 2:24.

“Fuq Xbihat Alla”

Adam kien iben perfett t’Alla, magħmul fuq is-​“sura u x-​xbieha” Tiegħu. Imma ladarba “Alla huwa spirtu,” ix-​xebh ma setax ikun wieħed fiżiku. (Ġenesi 1:26; Ġwann 4:24) Ix-​xebh kien fil-​kwalitajiet li għamlu lill-​bniedem ferm superjuri mill-​annimali. Iva, il-​bniedem mill-​bidu kellu ġo fih il-​kwalitajiet taʼ l-​imħabba, l-​għerf, il-​qawwa u l-​ġustizzja. Hu kien mogħni bir-​rieda ħielsa u bil-​kapaċità li jkun spiritwali. Ġo fih kellu sens morali, jew kuxjenza, li setaʼ jgħinu jagħżel bejn it-​tajjeb u l-​ħażin. Il-​bniedem kellu kapaċità intellettwali, li permezz tagħha setaʼ jimmedita fuq ir-​raġuni għala jeżistu l-​bnedmin, jiġbor għarfien dwar il-​Ħallieq tiegħu, u jiżviluppa intimità maʼ dan il-​Wieħed. Imħejji b’dan kollu, Adam kellu dak kollu li kien meħtieġ biex iwettaq l-​irwol tiegħu bħala amministratur tax-​xogħol li Alla għamel fuq l-​art.

Eva Tidneb

Bla dubju, Adam malajr informa lil Eva dwar l-​unika projbizzjoni li Jehovah kien għamel: Huma setgħu jieħdu mill-​frott tas-​siġar kollha li kien hemm fid-​dar tagħhom li kienet qisha ġnien minbarra taʼ waħda—is-​siġra taʼ l-​għarfien tat-​tajjeb u tal-​ħażin. Ma kellhomx jieklu minnha, inkella kienu jmutu dakinhar stess.—Ġenesi 2:​16, 17.

Wara ftit taż-​żmien, qamet kwistjoni rigward il-​frotta projbita. Lejn Eva resaq serpent, li kien qed jiġi wżat minn spirtu inviżibbli bħala kelliemi. F’dik li dehret bħala innoċenza, is-​serpent staqsa: “Tassew li Alla qalilkom: ‘La tiklux mis-​siġar kollha tal-​ġnien’?” Eva wieġbet li setgħu jieklu l-​frott taʼ kull siġra minbarra taʼ waħda. Imma mbagħad is-​serpent ikkontradixxa lil Alla, billi qal lill-​mara: “Le, żgur ma tmutux. Imma Alla jaf li dak in-​nhar li tieklu minnu jinfetħu għajnejkom u ssiru bħal allat, li jafu t-​tajjeb u l-​ħażin.” Il-​mara bdiet tħares lejn is-​siġra projbita b’lenti differenti. “Is-​siġra kienet tajba għall-​ikel u tiġbdek fil-​għajn.” Imqarrqa għall-​aħħar, Eva kisret il-​liġi t’Alla.—Ġenesi 3:​1-6; 1 Timotju 2:14.

Eva kellha tidneb bilfors? Dażgur li le! Poġġi lilek innifsek fiż-​żarbun tagħha. Dak li qal is-​serpent mar għalkollox kontra dak li kienu qalu Alla u Adam. Kif kont tħossok int kieku ġie barrani u akkuża bid-​diżonestà lil xi ħadd li tħobbu u tafdah? Eva setgħet irreaġixxiet b’mod differenti, billi turi stmerrija u għadab, u saħansitra tirrifjuta li tismaʼ. Wara kollox, min kien is-​serpent biex jitfaʼ dubju fuq it-​tjieba t’Alla u fuq il-​kelma taʼ żewġha? Biex turi rispett lejn il-​prinċipju taʼ l-​istat taʼ kap, Eva kien imissha fittxet parir qabel ma ħadet kwalunkwe deċiżjoni. Hekk għandna nagħmlu aħna jekk qatt niġu preżentati b’xi informazzjoni li tkun kuntrarja għall-​istruzzjonijiet mogħtijin minn Alla. Madankollu, Eva fdat fil-​kliem tat-​Tentatur, billi xtaqet li tkun hi li tiddeċiedi għaliha nfisha x’kien tajjeb u x’kien ħażin. Iktar ma ħasbet fuq l-​idea, iktar bdiet togħġobha. Xi żball għamlet li żammet f’moħħha xewqa ħażina, minflok ma warrbitha minn moħħha jew iddiskutietha mal-​kap tal-​familja tagħha!—1 Korintin 11:3; Ġakbu 1:14, 15.

Adam Jagħti Widen għal Leħen Martu

Eva malajr ħajret lil Adam biex jissieħeb magħha fid-​dnub. Kif se nispjegawh il-​qbil fjakk tiegħu? (Ġenesi 3:​6, 17) Adam kellu quddiemu l-​kwistjoni lejn min kien se jibqaʼ leali. Kien se jobdi lill-​Ħallieq tiegħu, li kien tah kollox, inkluż il-​maħbuba sieħba tiegħu, Eva? Kien Adam se jfittex id-​direzzjoni t’Alla dwar x’kellu jagħmel issa? Jew kien se jissieħeb maʼ martu fid-​dnub tagħha? Adam kien jaf tajjeb ħafna li dak li ttamat li tikseb billi tiekol il-​frotta projbita kien biss illużjoni. L-​appostlu Pawlu kien ispirat biex jikteb hekk: “Ma kienx Adam li safaʼ mqarraq; kienet il-​mara li, wara li kienet mqarrqa, waqgħet fil-​ħtija.” (1 Timotju 2:14) Mela Adam għażel minn jeddu li jisfida lil Jehovah. Jidher ċar li l-​biżaʼ tiegħu li jinfired minn martu kien akbar mill-​fidi tiegħu fl-​abbiltà t’Alla li jirranġa s-​sitwazzjoni.

L-att taʼ Adam kien suwiċidali. Wassal ukoll għall-​qtil tan-​nisel kollu li Jehovah bi ħniena ħallieh ikun il-​missier tiegħu, ladarba lkoll kemm huma twieldu taħt il-​kundanna tal-​mewt kaġunata mid-​dnub. (Rumani 5:12) Kemm hi kbira l-​piena għad-​diżubbidjenza egoista!

Il-​Konsegwenzi tad-​Dnub

L-​effett immedjat tad-​dnub kien l-​għajb. Minflok ma ġrew itiru bil-​ferħ biex jitkellmu maʼ Jehovah, il-​koppja marru jistaħbew. (Ġenesi 3:8) Il-​ħbiberija tagħhom m’Alla spiċċat fix-​xejn. Meta ġew mistoqsijin dwar dak li kienu għamlu, huma ma wrew ebda rimors, għalkemm it-​tnejn li huma kienu konxji li kisru l-​liġi t’Alla. Billi kielu l-​frotta projbita, huma taw daharhom lit-​tjubija divina.

Bħala riżultat, Alla indika li l-​uġigħ tat-​tqala kien se jiżdied. Eva kellha tixxennaq għal żewġha, u hu kellu jiddominaha. L-​attentat tagħha biex taħtaf l-​indipendenza taħt idejha b’hekk irriżulta fl-​oppost preċiż. Adam issa kien se jiekol il-​prodott taʼ l-​art bl-​uġigħ. Minflok ma jxabbaʼ l-​ġuħ tiegħu mingħajr tbatija f’Għeden, kellu jissielet biex jaqlaʼ l-​għajxien sakemm imur lura lejn it-​trab li minnu kien issawwar.—Ġenesi 3:​16-19.

Finalment, Adam u Eva tkeċċew ’il barra mill-​ġnien taʼ Għeden. Jehovah qal: “Ara, il-​bniedem sar bħal wieħed minna, jagħraf il-​ġid u d-​deni: u issa, li ma jmurx imidd idu, u jieħu wkoll il-​frott mis-​siġra tal-​ħajja, u jiekol, u jgħix għal dejjem . . . ” “Is-​sentenza titħalla nofs leħja,” jinnota l-​istudjuż Gordon Wenham, u aħna jkollna nfornu l-​bqija tal-​ħsieb t’Alla—forsi, “ħa nkeċċih ’il barra mill-​ġnien.” Ġeneralment, kittieb tal-​Bibbja jirrapporta l-​ħsieb komplet t’Alla. Imma hawnhekk, ikompli Wenham, “il-​fatt li l-​konklużjoni tħalliet barra juri l-​ħeffa taʼ l-​azzjoni t’Alla. Lanqas laħaq spiċċa l-​kelma li ma tkeċċewx ’il barra mill-​ġnien.” (Ġenesi 3:22, 23, KŻ) B’din l-​azzjoni, il-​komunikazzjoni kollha li kien hemm bejn Jehovah u l-​ewwel koppja milli jidher waqfet.

Adam u Eva ma mitux fiżikament matul dak il-​jum taʼ 24 siegħa. Madankollu, mietu f’sens spiritwali. Peress li nqatgħu darba għal dejjem mis-​Sors tal-​ħajja, qabdu n-​niżla li kienet twassalhom għall-​mewt. Min jaf kemm ġarrbu mrar meta ħabbtu wiċċhom għall-​ewwel darba mal-​mewt meta t-​tieni iben tagħhom, Abel, inqatel minn Kajjin, l-​ewwel imwieled tagħhom!—Ġenesi 4:​1-16.

Wara dan, ftit li xejn huwa magħruf dwar l-​ewwel koppja umana. It-​tielet iben tagħhom, Set, twieled meta Adam kellu 130 sena. Adam miet 800 sena wara, fl-​età taʼ 930 sena, wara li kellu “ulied subjien u bniet.”—Ġenesi 4:25; 5:3-5.

Lezzjoni Għalina

Ir-​rakkont dwar l-​ewwel koppja miżżewġa mhux biss jirrivela x’kien li kkaġuna l-​kundizzjoni mwegħra tas-​soċjetà umana llum, imma wkoll jgħallem lezzjoni fundamentali. Li nippretendu li nkunu indipendenti minn Alla Jehovah huwa biss bluha. Dawk li huma verament għorrief jeżerċitaw fidi f’Jehovah u fil-​Kelma tiegħu, mhux f’dak li jaħsbu huma li huwa għarfien suffiċjenti. Jehovah jiddetermina x’inhu tajjeb u x’inhu ħażin, u bażikament, li tagħmel dak li hu sewwa jfisser li tobdih. Li tagħmel dak li hu ħażin ifisser li tikser il-​liġijiet tiegħu u tinjora l-​prinċipji tiegħu.

Alla offra u għadu joffri dak kollu li l-​bnedmin jistgħu possibbilment jixtiequ—ħajja taʼ dejjem, libertà, sodisfazzjon, hena, saħħa, sliem, riżq, u l-​iskoperta t’affarijiet ġodda. Madankollu, biex ingawdu dan kollu rridu nirrikonoxxu l-​fatt li aħna niddependu totalment minn Missierna tas-​sema, Jehovah.—Koħèlet 3:10-13; Isaija 55:​6-13.

[Kaxxa/Stampa f’paġna 26]

Adam u Eva​—Sempliċi Ħrafa?

It-​twemmin f’ġenna taʼ l-​art oriġinali li ntilfet minħabba d-​dnub kien mifrux sew fost il-​Babiloniżi, l-​Assirjani, l-​Eġizzjani, u oħrajn tal-​passat. F’ħafna rakkonti nsibu siġra tal-​ħajja li l-​frott tagħha kellu jagħti ħajja eterna lil dawk li jikluh. Għalhekk, l-​umanità tiftakar li xi ħaġa traġika seħħet f’Għeden.

Illum, ħafna jqisu r-​rakkont Bibliku taʼ Adam u Eva bħala sempliċi ħrafa. Madankollu, il-​biċċa l-​kbira tax-​xjenzati jirrikonoxxu li r-​razza umana hija familja waħda b’oriġini komuni. Ħafna teoloġi jsibuha impossibbli li jiċħdu l-​fatt li l-​effetti tad-​dnub oriġinali mwettaq minn antenat komuni kienu trasmessi lill-​umanità. It-​twemmin li l-​bniedem żviluppa minn iktar minn sors wieħed jobbligahom jgħidu li d-​dnub oriġinali twettaq minn diversi missirijiet tal-​qedem. Mill-​banda l-​oħra, dan kien iġagħalhom jiċħdu li Kristu, ‘l-​aħħar Adam,’ feda lill-​umanità. Imma Ġesù u d-​dixxipli tiegħu ma ħabbtux wiċċhom maʼ dilemma bħal din. Huma rrikonoxxew li r-​rakkont tal-​Ġenesi hu ġenwin.—1 Korintin 15:​22, 45; Ġenesi 1:27; 2:24; Mattew 19:​4, 5; Rumani 5:​12-19.