Nippreżentaw L-​Aħbar Tajba B’Sens T’Urġenza

¹ Aħna nuru l-​apprezzament profond tagħna lejn il-​wegħdi t’Alla dwar is-​Saltna billi nieħdu sehem b’qalb sħiħa fil-​ministeru Kristjan. Hemm bżonn li nipparteċipaw f’dan ix-​xogħol b’sens t’urġenza. Għala? Għaliex il-​ħaddiema huma ftit, it-​tmiem taʼ din is-​sistema mill-​agħar t’affarijiet qiegħed joqrob, u hemm involuti l-​ħajjiet taʼ dawk fit-​territorju tagħna. (Eżek. 3:​19; Matt. 9:​37, 38) Responsabbiltà kbira bħal din titlob minna l-​aħjar sforz fil-​ministeru. Kif nistgħu nuru sens t’urġenza rigward l-​attività tagħna fis-​servizz taʼ l-​għalqa? Billi nippreparaw preżentazzjonijiet tajbin minn qabel, billi nkunu diliġenti f’li nfittxu n-​nies kulfejn jistgħu jinstabu, billi nżommu rekord eżatt taʼ dawk kollha li juru interess billi mmorru lura fil-​pront biex inkomplu nibnu fuq dak l-​interess, u billi niftakru li, peress li hemm il-​ħajjiet involuti, għandna nieħdu l-​ministeru tagħna bis-​serjetà. Is-​suġġerimenti li ġejjin jistgħu jkunu t’għajnuna hekk kif nippreparaw biex nippreżentaw l-​aħbar tajba b’sens t’urġenza matul Frar. L-​offerta se tkun il-​ktieb L-​Aqwa Bniedem Li Qatt Għex.

² Jistaʼ jirnexxilek tibda konversazzjoni billi ssemmi fil-​qosor xi problemi li l-​komunità lokali qiegħda tiffaċċja, u mbagħad tistaʼ tgħid:

◼ “Kif taħseb int li dawn għandhom jeffettwawna bħala Kristjani? Il-​Bibbja tgħidilna biex nimitaw l-​eżempju stabbilit mill-​aqwa bniedem tad-​dinja. Għal min taħseb li qegħdin nirreferu?” Ħalli ħin għal tweġiba. Mur fil-​Werrej tal-​ktieb L-​Aqwa Bniedem u aqra paragrafi 1 u 4. Staqsi lill-​inkwilin jekk jaqbilx li Ġesù kien l-​aqwa bniedem li qatt għex. Imbagħad, mur fit-​titlu “Ibbenefika Billi Titgħallem Dwaru” u aqra l-​ewwel paragrafu. Jekk l-​inkwilin juri l-​interess, jistaʼ jkun xieraq li tfittex u taqra Ebrej 12:​2, 3. Offri l-​ktieb. Jekk l-​inkwilin jistaqsi dwar il-​ħlas, kun ċert li tispjega li x-​xogħol tagħna huwa appoġġjat minn donazzjonijiet minn madwar id-​dinja. Irranġa ħin konvenjenti biex terġaʼ tmur ħalli tkompli d-​diskursata.

³ Tistaʼ tkompli d-​diskussjoni taʼ l-​aħħar darba fuq Ebrej 12:​2, 3 b’din il-​preżentazzjoni qasira:

◼ “Fl-​aħħar żjara tiegħi, tkellimna dwar Ġesù bħala li hu l-​aqwa bniedem li qatt għex. Tiftakar li qrajna flimkien Ebrej 12:​2, 3? X’taħseb jekk nerġgħu naqraw dawk il-​versi mill-​ġdid? [Aqra] Innotajt li l-​appostlu Pawlu stedinna biex ‘nikkunsidraw mill-​qrib’ il-​ħajja taʼ Ġesù? Dan il-​ktieb ikopri l-​ġrajjiet kbar kollha fil-​ħajja taʼ Ġesù. Ħalli nurik kif nistgħu niksbu l-​iktar benefiċċju minn dan il-​ktieb.” Mur f’Kapitlu 1. Aqra l-​mistoqsijiet fl-​aħħar tal-​kapitlu u uri kif jistgħu jinstabu t-​tweġibiet billi wieħed jaqra l-​kapitlu u jfittex l-​iskritturi ċċitati. Offri li terġaʼ tmur il-​ġimgħa d-​dieħla biex tiddiskuti l-​kapitlu li jmiss u b’hekk tibda studju tal-​Bibbja fid-​dar.

⁴ Peress li ħafna huma mħassbin dwar il-​problemi li dejjem jikbru u li qiegħda tiffaċċja l-​umanità in ġenerali, tistaʼ tgħid xi ħaġa hekk fl-​ewwel żjara:

◼ “Kulmin niltaqaʼ miegħu hu mħasseb dwar il-​problemi li niffaċċjaw fil-​komunità tagħna. [Semmi xi ftit.] Għal għexur taʼ snin il-​politikanti wegħdu li jġibu soluzzjonijiet permanenti, u xi wħud ipprovaw jagħmlu hekk. Min taħseb li jistaʼ jipprovdi soluzzjoni li tirnexxi għal dawn il-​problemi? [Ħalli ħin għal tweġiba.] Ikunu kemm ikunu sinċieri dawn in-​nies, ħadd minnhom ma jistaʼ joffri t-​tama taʼ ħajja taʼ dejjem, hux tassew? Madankollu innota jekk jogħġbok x’jintqal fi Ġwann 17:3. [Aqra] Qatt ikkunsidrajt kif Ġesù wera l-​qawwa tiegħu meta kien fuq l-​art?” Mur f’kapitlu 23 u semmi fil-​qosor xi ftit mill-​mirakli taʼ Ġesù. Jekk jidher li hemm interess ġenwin, offri l-​ktieb, u irranġa biex terġaʼ tmur ħalli turi kif Ġesù kapaċi jsolvi problemi oħrajn li jeffettwaw lill-​umanità llum.

⁵ Jekk wegħedt li terġaʼ tmur biex tispjega kif Alla se jsolvi l-​problemi tal-​lum, tistaʼ tipprova dan il-​mod:

◼ “Għamilt sforz speċjali biex nerġaʼ niġi sabiex inkunu nistgħu nkomplu d-​diskussjoni tagħna dwar is-​soluzzjoni vera għall-​problemi li l-​umanità qiegħda tiffaċċja. Fl-​aħħar żjara tiegħi, rajna li Ġesù kellu l-​abbiltà li jfejjaq kull tip taʼ mard. Issa jekk jogħġbok innota x’tgħid il-​Bibbja dwar l-​istat taʼ ħakma tiegħu bħala sultan.” Aqra u spjega Isaija 9:​6, 7 u Rivelazzjoni 21:​3, 4. Billi tuża kapitlu addattat fil-​ktieb L-​Aqwa Bniedem jew billi turi l-​istampa f’paġni 4-5 tal-​ktieb Għarfien, uri kif se jkunu l-​kundizzjonijiet taħt l-​istat taʼ ħakma taʼ Kristu. Offri studju tal-​Bibbja u ipprova ibdieh dak il-​ħin stess.

⁶ B’tant nies interessati fl-​ambjent, tistaʼ tgħid xi ħaġa hekk biex tibda diskursata:

◼ “Sibna li kważi kulħadd imħasseb dwar it-​tniġġis taʼ l-​arja, l-​ilma, u l-​ikel li nieħdu. F’xi pajjiżi l-​qagħda taʼ l-​ambjent diġà hi taʼ periklu għall-​ħajja. Peress li Alla hu l-​Ħallieq taʼ l-​art, x’taħseb int li se jagħmel dwar dan? [Ħalli ħin għal tweġiba.] Il-​Bibbja tgħid li Alla se jitlob rendikont għall-​mod taʼ kif aħna nużaw il-​pjaneta. [Aqra Rivelazzjoni 11:18b.] Immaġina li tgħix fuq art li hi ħielsa mit-​tniġġis!” Iġbed l-​attenzjoni lejn il-​wegħda t’Alla għal Ġenna, kif indikat f’Rivelazzjoni 21:​3, 4. Uri l-​istampa f’kapitlu 133 tal-​ktieb L-​Aqwa Bniedem. Jekk l-​ammont taʼ interess jitlob dan, offri l-​ktieb u irranġa biex terġaʼ tmur. Agħti opportunità lill-​persuna biex tagħmel donazzjoni jekk tistaqsik kif jiġi appoġġjat ix-​xogħol tagħna madwar id-​dinja.

⁷ Meta tmur lura għand xi ħadd li wera interess fl-​art magħmula ġenna, tistaʼ tgħid:

◼ “Fl-​aħħar żjara tiegħi, qbilna li, biex tissolva l-​problema taʼ l-​art imniġġsa, Alla jkollu jindaħal fil-​kwistjonijiet tal-​bniedem. Imma tqum il-​mistoqsija, X’irridu nagħmlu biex nibqgħu ħajjin għal ġod-​dinja ġdida taʼ tjieba li se jagħmel Alla?” Aqra Ġwann 17:​3. Uri kif il-​ktieb L-​Aqwa Bniedem jgħin lil nies taʼ qalb onesta biex isiru jafu lil Alla u lil Ġesù Kristu. Stieden lill-​inkwilin biex japprofitta ruħu mill-​kors b’xejn tagħna taʼ studju mill-​Bibbja biex jikseb dan l-​għarfien speċjali.

⁸ Ftakar li għalkemm li noffru l-​ktieb L-​Aqwa Bniedem jistaʼ tabilħaqq jattira l-​interess taʼ ħafna nies, m’huwiex maħsub li nistudjaw dan il-​ktieb. Il-​mira tagħna għadha li nistabbilixxu studji tal-​Bibbja fid-​dar fil-​ktieb bażiku tagħna Għarfien Li Jwassal Għall-​Ħajja Taʼ Dejjem. Kemm hu taʼ privileġġ li nintużaw bħala ħaddiema tal-​ħsad fi żmienna u li nagħmlu xogħol taʼ ppridkar li jsalva l-​ħajjiet! Jalla lkoll kemm aħna nibqgħu biżlin f’li nippreżentaw l-​aħbar tajba b’sens t’urġenza, ‘billi nafu li l-​ħidma tagħna m’hijiex għalxejn.’​—1 Kor. 15:58.