L-​Irtirar mix-​Xogħol​—Bieb Miftuħ għal Iktar Attività?

¹ Ħafna nies li jaħdmu iebes iħarsu ’l quddiem għal dak iż-​żmien meta l-​irtirar mix-​xogħol jeħlishom mit-​taħbit u l-​pressjonijiet tax-​xogħol sekulari. Ħafna drabi, però, l-​irtirar mix-​xogħol iġib miegħu apatija, ħajja bla interess, u xjuħija qabel żmienha. Il-​fatt li ma jkollhomx xi ħaġa taʼ skop x’jagħmlu jistaʼ jħallihom joqogħdu jinkwetaw dwarhom infushom. Gazzetta Brażiljana rrapportat li impjegati rtirati minn fost il-​pubbliku lmentaw minħabba sensiela taʼ problemi li jvarjaw mill-​fatt li ‘ma jħossuhom kuntenti b’xejn, iħossuhom inċerti u m’humiex bżonnjużi, u li jibda jdejjaqhom kollox, sa problemi akbar bħad-​dipressjoni u li jħossu li ħajjithom m’għandha l-​ebda skop.’

² B’kuntrast, ħafna Kristjani jaraw din il-​fażi ġdida f’ħajjithom bħala bieb miftuħ għal iktar attività spiritwali. Wieħed ħu li beda x-​xogħol taʼ pijunier ġimagħtejn wara li għalaq 65 sena qal: “Qatt ma kelli perijodu f’ħajti li kien mimli b’daqstant barkiet bħalma kienu dawn l-​aħħar għaxar snin bħala pijunier.” Koppja kitbet: “L-​aqwa u l-​aħjar snin taʼ ħajjitna bdew meta bdejna x-​xogħol taʼ pijunier.” Iva, għal ħafna, l-​irtirar mix-​xogħol joffri opportunità tad-​deheb biex iżidu fil-​ministeru u jaħsdu ħafna barkiet mingħand Jehovah.

³ Ibqaʼ Ħabrieki u Produttiv: Ħafna li issa huma rtirati kibru mingħajr il-​ħafna kumditajiet li għandna llum u tgħallmu jaħdmu iebes minn mindu kienu żgħar ħafna. Minkejja li forsi ma baqgħalhomx is-​saħħa taʼ żgħożithom, xorta waħda għadhom ħaddiema produttivi ħafna. F’territorju taʼ fergħa minnhom, 22 fil-​mija mill-​pijunieri​—xi 20,000 ħu u oħt​—għandhom minn taʼ l-​inqas 60 sena. Dawn l-​uħud iktar avanzati jagħtu kontribut kbir fix-​xogħol taʼ l-​ippridkar. L-​esperjenza u l-​kwalitajiet spiritwali tagħhom jagħtu iktar saħħa lill-​kongregazzjonijiet fejn jaqdu.​—Ġak. 3:​17, 18.

⁴ Meta wieħed jibqaʼ bieżel fil-​ministeru Kristjan jistaʼ jkollu saħħa u kwalità taʼ ħajja aħjar. Oħt taʼ 84 sena li bdiet ix-​xogħol taʼ pijunier meta rtirat qalet: “Li jkolli ħafna studji tal-​Bibbja maʼ nies interessati għenni nibqaʼ attiva mentalment. Peress li m’għandix karozza, jien nimxi ħafna u dan iżommni f’saħħti.” Żewġ pijunieri miżżewġin li huma avanzati fl-​età qalu: “Dan is-​servizz iżommna f’saħħitna mentalment u fiżikament. Aħna dejjem inkunu flimkien, nidħqu ħafna u nieħdu pjaċir bil-​ħajja.”

⁵ Jaqdu Fejn Hemm il-​Bżonn: Xi aħwa Kristjani li huma rtirati u li għandhom ċirkustanzi finanzjarji favorevoli marru jaqdu fejn hemm iktar bżonn għal xandara tas-​Saltna. Oħrajn kabbru l-​ministeru tagħhom biex jaqdu f’qasam taʼ lingwa barranija. Bħall-​appostlu Pawlu, dawn il-​pubblikaturi żelużi ‘jagħmlu dan kollu minħabba l-​Evanġelju biex ikollhom sehem minnu’ maʼ oħrajn.​—1 Kor. 9:23.

⁶ Tnejn miżżewġin bdew ix-​xogħol taʼ pijunier wara li rabbew liż-​żewġ ulied subien tagħhom. Wara diversi snin fix-​xogħol taʼ pijunier, huma bdew jitgħallmu l-​lingwa Ċiniża. Issa li qabżu sew is-​70 sena, dan l-​aħħar kellhom il-​ferħ li jaraw il-​grupp biċ-​Ċiniż li kienu qed jaħdmu fih isir kongregazzjoni. Koppji bħal dawn kemm juru li huma verament barka!

⁷ L-​Ebda Rtirar mill-​Ministeru: Filwaqt li l-​maġġuranza tan-​nies fl-​aħħar mill-​aħħar jirtiraw mix-​xogħol sekulari tagħhom, m’hemm l-​ebda rtirar mis-​servizz t’Alla għal kwalunkwe Kristjan. Kulħadd irid jibqaʼ leali “sa l-​aħħar.” (Mt. 24:​13, 14) Ovvjament, minħabba l-​età avanzata, xi wħud m’humiex kapaċi jagħmlu daqskemm kienu jagħmlu qabel fis-​servizz taʼ Jehovah. Imma kemm hu inkuraġġanti li tarahom jagħmlu dak li jistgħu b’qalbhom kollha! Il-​Kelma t’Alla tiżgurahom li Jehovah mhux se jinsa dak li jagħmlu u l-​imħabba li juru għal ismu.​—​Lq. 21:​1-4; Lhud 6:​10.

⁸ Jekk int qiegħed toqrob l-​età biex tirtira, għalfejn ma tikkunsidrax bit-​talb kif tistaʼ tuża bl-​aħjar mod iċ-​ċirkustanzi mibdula tiegħek? Bl-​għajnuna divina, tistaʼ ssib li l-​irtirar mix-​xogħol jiftaħlek bieb għal iktar attività li ġġib tifħir lil Jehovah kif ukoll ħafna barkiet.​—Salm 148:​12, 13.