“M’Iniex Interessat”

¹ Din hija reazzjoni komuni għall-​messaġġ tagħna f’xi nħawi. X’se jgħinna nevitaw li naqtgħu qalbna meta niltaqgħu maʼ l-​apatija fit-​territorju? Kif jistaʼ jirnexxilna nqanqlu l-​interess fl-​aħbar tajba?

² Ibqaʼ Ferħan: Il-​fatt li niftakru għala ħafna nies għandhom l-​apatija se jgħinna nibqgħu ferħanin. Nies li ġew mgħallmin it-​teorija taʼ l-​evoluzzjoni jew li trabbew f’soċjetà li ma temminx f’Alla għandhom mnejn ma jqisux il-​Bibbja taʼ valur. Oħrajn forsi baqgħu diżappuntati bl-​ipokrisija li raw fir-​reliġjon. Għal xi wħud, l-​apatija tagħhom tistaʼ tirrifletti l-​frustrazzjoni u n-​nuqqas taʼ tama li għandhom. (Efes. 2:12) Xi wħud ‘ma jagħtux kas’ għax jinsabu mtaqqlin bl-​ansjetajiet tal-​ħajja.​—Mt. 24:​37-​39.

³ Minkejja r-​reazzjoni negattiva taʼ xi wħud, aħna jistaʼ jkollna l-​ferħ fil-​ministeru, għax nafu li l-​isforzi tagħna jigglorifikaw lil Ġeħova. (1 Pt. 4:​11) Iktar minn hekk, li nitkellmu dwar il-​verità, saħansitra maʼ dawk li għadhom ma japprezzawhiex, isaħħilna l-​fidi tagħna. Ejja nagħmlu ħilitna biex inqisu lin-​nies fit-​territorju bħalma jqishom Ġeħova. Hu ddispjaċieh għan-​nies taʼ Ninwè li ma kinux jafu “jagħżlu bejn il-​lemin u x-​xellug tagħhom.” (Ġona 4:11) Dawk li jgħixu fit-​territorju tagħna għandhom bżonn l-​aħbar tajba! Għalhekk, m’għandniex naqtgħu qalbna imma rridu nfittxu modi kif inqanqlu l-​interess fil-​messaġġ tal-​Bibbja.

⁴ Iddiskuti X’Qed Jinkwieta lin-​Nies Lokalment: Forsi tistaʼ ssemmi kwistjoni li qed tinkwieta lin-​nies lokalment fl-​introduzzjoni tiegħek u tistaqsi lill-​inkwilin biex jesprimi l-​ħarsa tiegħu. Agħtih widen hekk kif jitkellem, imbagħad urih il-​messaġġ taʼ faraġ mill-​Bibbja fi qbil maʼ dak li qed jinkwetah. Wara traġedja lokali, wieħed Xhud esprima f’kull bieb kemm kien dispjaċut sinċerament. “F’daqqa waħda, in-​nies bdew jitkellmu,” qal hu. “Kelli ħafna konversazzjonijiet mill-​aħjar dakinhar talli wrejt interess persunali f’dawk l-​uħud li kont qed inżur.”

⁵ Kull problema li qed tiffaċċja l-​umanità se tintemm permezz tas-​Saltna t’Alla. Ipprova ifhem liema waħda l-​iktar li tinkwieta lill-​inkwilin. Għandu mnejn iħallik tispjegalu l-​messaġġ taʼ tama mill-​Bibbja. Jekk le, forsi jkun lest li jismaʼ “darb’oħra.”—Atti 17:32.