Segwi l-​Eżempju li Ħalla Ġesù

1. Liema eżempju ħalla Ġesù?

¹ Meta nieħdu sehem fix-​xogħol taʼ li nagħmlu dixxipli, aħna għandna nżommu f’moħħna li l-​eżempju tagħna jistaʼ jħalli effett qawwi fuq dawk li josservawna. Ġesù għallem bil-​kliem u bl-​għemil. Dawk li osservawh setgħu jaraw iż-​żelu tiegħu, l-​imħabba tiegħu għan-​nies, ix-​xewqa li kellu u li żammitu ffokat fuq li jqaddes isem Missieru, u d-​determinazzjoni tiegħu biex iwettaq ir-​rieda taʼ Missieru.—1 Pt. 2:21.

2. B’liema modi jistaʼ l-​eżempju tagħna jeffettwa lil dawk li jaħdmu magħna fil-​ministeru?

² Waqt il-​Ministeru minn Dar għal Dar: L-​istess bħal fil-​każ taʼ Ġesù, l-​eżempju tagħna jeffettwa lil dawk li jkunu qed jaħdmu magħna. Pubblikaturi iktar ġodda u taʼ inqas esperjenza li jarawna nieħdu sehem bil-​ħeġġa fil-​ministeru se jaħsbu dwar il-​kwalità tas-​sehem tagħhom fix-​xogħol taʼ l-​ippridkar. Meta josservaw il-​ferħ tagħna u l-​interess ġenwin li nuru f’oħrajn, huma se jiġu mfakkrin fl-​importanza taʼ li juru kwalitajiet bħal dawn fil-​ministeru tagħhom. Meta jinnotaw kemm inħabirku biex nużaw l-​Iskrittura, nagħmlu żjajjar lura, u nikkonduċu studji tal-​Bibbja, huma se jitqanqlu biex jagħmlu l-​istess.

3. Kif jistaʼ l-​eżempju tagħna jgħallem lill-​istudenti tal-​Bibbja, u x’jistgħu jitgħallmu?

³ Meta Nikkonduċu Studji tal-​Bibbja: L-​istudenti tagħna tal-​Bibbja se jinnotaw b’mod speċjali l-​imġiba tagħna. Per eżempju, għalkemm għandna mnejn nispjegawlhom l-​importanza taʼ li jippreparaw għall-​istudju, ifittxu l-​iskritturi, u jimmarkaw il-​punti prinċipali, huma se jinnotaw jekk aħniex preparati. (Rum. 2:21) Jekk inkunu puntwali għall-​appuntament tagħna biex nistudjaw magħhom, huma se jkunu inqas inklinati li jħallu attivitajiet oħrajn itellfulhom l-​istudju tal-​Bibbja tagħhom. Ukoll, huma żgur li se jinnotaw l-​attitudni tagħna li nkunu lesti li nagħmlu sagrifiċċju għall-​ministeru u l-​fidi soda tagħna. Mhux taʼ b’xejn li l-​istudenti taʼ dawk li jsegwu mill-​qrib l-​eżempju taʼ Ġesù spiss isiru evanġelizzaturi żelużi u produttivi.

4. Meta nattendu l-​laqgħat tal-​kongregazzjoni, x’ngħallmu permezz taʼ l-​eżempju tagħna?

⁴ Meta Nattendu l-​Laqgħat tal-​Kongregazzjoni: Dawk kollha li jagħmlu parti millkongregazzjoni Kristjana għandhom sehem f’li jgħallmu bl-​eżempju fil-​laqgħat tal-​kongregazzjoni. Uħud interessati li jibdew jattendu l-​laqgħat jibbenefikaw mill-​eżempju tajjeb li josservaw fil-​kongregazzjoni. Huma se jinnotaw il-​fratellanza kollha mħabba, l-​unità Kristjana, u l-​ilbies u d-​dehra modesta. (Salm 133:1) L-​eżempju tagħna t’attendenza leali għal-​laqgħat tal-​kongregazzjoni u d-​dikjarazzjoni pubblika tal-​fidi tagħna waqt li nkunu hemm se jiġu notati wkoll. Wieħed li żar waħda mil-​laqgħat tagħna osserva kif tifla żgħira rnexxielha ssib malajr vers ċitat mill-​Bibbja tagħha stess u kemm kienet attenta hi u ssegwi l-​qari. L-​eżempju tagħha qanqlu biex jitlob għal studju tal-​Bibbja.

5. Għala qatt m’għandna nċekknu l-​valur taʼ l-​eżempju tagħna?

⁵ L-​Iskrittura tinkuraġġina biex nimitaw l-​eżempju pożittiv taʼ xulxin. (Flp. 3:17; Ebr. 13:7) Għalhekk, għandna niftakru li jekk insegwu mill-​qrib l-​eżempju li ħallielna Ġesù, oħrajn se josservawna u se jiġu influwenzati b’mod pożittiv. Meta nirrealizzaw dan, nistgħu nieħdu bis-​serjetà l-​kliem misjub fl-​1 Timotju 4:16: “Oqgħod attent il-​ħin kollu għalik innifsek u għat-​tagħlim tiegħek.”