ကျမ်းစာစောင် နံပါတ် ၁၉​—ဆာလံကျမ်း

ကျမ်းရေးသူ– ဒါဝိဒ်နှင့် အခြားပုဂ္ဂိုလ်များ

ရေးသားပြီးစီးချိန်– ဘီ.စီ.အီး. ၄၆၀ ခန့်

၁။ ဆာလံကျမ်းကားအဘယ်နည်း၊ ယင်းတွင် အဘယ်အရာပါဝင်သနည်း။

ဆာလံကျမ်းသည် ရှေးခေတ်ယေဟောဝါ၏စစ်မှန်သောဝတ်ပြုသူများအတွက် မှုတ်သွင်းခံသီချင်းစာအုပ်ဖြစ်ပြီး ယေရုရှလင်မြို့ရှိ ဘုရားသခင့်ဗိမာန်တော်တွင် လူထုလိုက် ယေဟောဝါဘုရားသခင်အား ဝတ်ပြုရာ၌ အတီးအမှုတ်တို့နှင့်သီဆိုရန် အပုဒ်ပေါင်း ၁၅၀ ပါသော ဓမ္မသီချင်း ခေါ် ဆာလံသီချင်းပေါင်းချုပ်စာအုပ်ဖြစ်သည်။ ဤဆာလံသီချင်းများသည် ယေဟောဝါအား ချီးမွမ်းခြင်းသီချင်းများဖြစ်သည့်အပြင် ကရုဏာပြပြီး ကယ်မသနားရန် တိုးလျှိုးအသနားခံဆုတောင်းချက်များပါဝင်သကဲ့သို့ ယုံကြည်စိတ်ချကိုးစားကြောင်း ထုတ်ဖော်ပြောဆိုချက်များလည်းပါဝင်သည်။ ယင်းတို့တွင် ကျေးဇူးတော်ချီးမွမ်းခြင်းများ၊ အထူးအားရရွှင်လန်းမှုများနှင့် အကြီးကျယ်ဆုံးရွှင်လန်းမှု ကြွေးကြော်ချက်များ အမြောက်အမြားပါဝင်သည်။ အချို့မှာ သမိုင်းအကျဉ်းများဖြစ်ပြီး ယေဟောဝါ၏ချစ်ကြင်နာမှုနှင့် ကိုယ်တော်၏ ကြီးမားသောလုပ်ဆောင်တော်မူချက်များကို အလေးထားသုံးသပ်ထားသည်။ ပရောဖက်ပြုချက်များစွာပါဝင်ပြီး ယင်းတို့အများအပြားမှာ ထူးခြားပြောင်မြောက်စွာ ပြည့်စုံခဲ့ပြီးဖြစ်သည်။ အကျိုးပြုပြီး ဆောက်တည်မှုဖြစ်စေသည့် ညွှန်ကြားချက်များစွာပါဝင်ပြီး ယင်းတို့အားလုံးကို စာဖတ်သူအား အလွန်တရာနက်နက်ရှိုင်းရှိုင်း လှုံ့ဆော်ပေးရန် အလွန်မြင့်သောစကားလုံးနှင့် ဥပစာအသုံးအနှုန်းတို့ဖြင့် ဖွဲ့နွဲ့သီကုံးထားသည်။ ဆာလံသီချင်းများသည် ကျွန်ုပ်တို့၏ရှေ့တွင် လှလှပပနှင့် စားချင့်စဖွယ်တည်ခင်းထားသော မြိန်ရေရှက်ရေသုံးဆောင်နိုင်သည့် ဝိညာဏစားပွဲကြီးပင်ဖြစ်သည်။

၂။ (က) ဆာလံကျမ်းကို အဘယ်အမည်ပေးထားသနည်း၊ အဘယ်အဓိပ္ပာယ်ဖြင့်နည်း။ (ခ) ဆာလံဆိုသည်မှာအဘယ်နည်း။

^၂ ဤကျမ်းအမည်၏ အဓိပ္ပာယ်ကားအဘယ်နည်း၊ ဆာလံကျမ်းကို မည်သူရေးခဲ့သနည်း။ ဟေဗြဲကျမ်းစာတွင် ဤကျမ်းကို “ချီးမွမ်းခြင်းကျမ်း” ဟုအဓိပ္ပာယ်ရှိသော စီးဖာတဟီလင် (Seʹpher Tehil·limʹ) သို့မဟုတ် “ချီးမွမ်းချက်များ” အဓိပ္ပာယ်ဆောင်သည့် တဟီလင် (Tehil·limʹ) ဟု ရိုးရိုးလေးခေါ်ဆိုကြသည်။ ဤစကားလုံးသည် ဆာလံ ၁၄၅ ၏ခေါင်းစဉ်တွင်တွေ့ရသော “ချီးမွမ်းမှုတစ်ခု” သို့မဟုတ် “ချီးမွမ်းခြင်းသီချင်း” ဟုအဓိပ္ပာယ်ရသောစကားလုံး တဟီလား (Tehil·lahʹ) ၏ ဗဟုဝုဒ်ကိန်းဖြစ်သည်။ ယေဟောဝါအားချီးမွမ်းခြင်းအကြောင်းကို အသားပေးဖော်ပြသည့်ကျမ်းဖြစ်သောကြောင့် “ချီးမွမ်းချက်များ” ဟူသောအမည်သည် အသင့်တော်ဆုံးဖြစ်၏။ “ဆာလံကျမ်း၊ [Psalms]” ဟူသောအမည်ကို တူရိယာများနှင့်သီဆိုသည့်သီချင်းများဟု အဓိပ္ပာယ်ရသော Psal·moiʹ ဟူသည့်စကားလုံးကိုအသုံးပြုထားသည့် ဂရိစက်ပ်တွားဂျင့်ကျမ်းမှ ယူထားခြင်းဖြစ်သည်။ ၎င်းစကားလုံးကို လုကာ ၂၀:၄၂ နှင့် တမန်တော် ၁:၂၀ ကဲ့သို့သော ခရစ်ယာန်ဂရိကျမ်းစောင်များတွင်လည်း အနှံ့အပြားတွေ့ရှိရသည်။ ဆာလံဆိုသည်မှာ ဘုရားသခင်အားချီးမွမ်းဝတ်ပြုရာတွင် အသုံးပြုသော ဓမ္မသီချင်း သို့မဟုတ် ကဗျာဖြစ်သည်။

၃။ ကျမ်းရေးသူများနှင့်ပတ်သက်၍ ခေါင်းစီးများက အဘယ်အရာဖော်ပြသနည်း။

^၃ ဆာလံသီချင်းအများအပြားတွင် ခေါင်းစီး သို့မဟုတ် ထိပ်စီးကမ္ပည်းများပါရှိပြီး ယင်းတို့က စပ်ဆိုသူ၏အမည်ကို ဖော်ပြလေ့ရှိသည်။ ခေါင်းစီးခုနစ်ဆယ့်သုံးခုသည် “ဣသရေလအမျိုး၌ ချိုမြိန်စွာသီချင်းဆိုသော” ဒါဝိဒ်၏နာမည်တပ်ထားသည်။ (၂ ရာ. ၂၃:၁) ဆာလံ ၂၊ ၇၂ နှင့် ၉၅ ကိုလည်း ဒါဝိဒ်ရေးခဲ့သည်မှာ သေချာသည်။ (တမန်တော် ၄:၂၅၊ ၂၆၊ ဆာလံ ၇၂:၂၀ နှင့် ဟေဗြဲ ၄:၇ ရှု။) ထို့ပြင် ဆာလံ ၁၀ သည်ဆာလံ ၉ ၏အဆက်ဖြစ်ပြီးဆာလံ ၇၁ သည် ၇၀ ၏အဆက်ဖြစ်သောကြောင့် ဒါဝိဒ်ရေးခဲ့သည်ဟု ယူမှတ်နိုင်သည်။ ဆာလံသီချင်းတစ်ဆယ့်နှစ်ပုဒ်တွင် အာသ၏အမည်ပါရှိပြီး အချို့တို့သည် အာသသေပြီး နောက်ပိုင်းအဖြစ်အပျက်များအကြောင်း ဖော်ပြထားခြင်းကြောင့် အာသ၏မိသားစုဝင်များလည်း ပါဝင်ရေးသားခဲ့ကြောင်းထင်ရှားသည်။ (ဆာ. ၇၉; ဆာ. ၈၀; ၅ ရာ. ၁၆:၄၊ ၅၊ ၇; ဧဇ. ၂:၄၁) ဆာလံဆယ့်တစ်ပုဒ်ကို ကောရ၏သားများရေးသားသည်ဟု တိုက်ရိုက်ဆိုထားသည်။ (၅ ရာ. ၆:၃၁-၃၈) ဆာလံ ၄၃ သည်ဆာလံ ၄၂ ၏အဆက်ဖြစ်သောကြောင့် ယင်းကျမ်းကိုလည်း ကောရ၏သားများရေးခဲ့သည်ဟု ယူမှတ်နိုင်သည်။ ဆာလံ ၈၈ ၏ထိပ်စီးကမ္ပည်းတွင် “ကောရ၏သားများ” ဟုဖော်ပြထားသည့်အပြင် ဟေမန်ရေးခဲ့ကြောင်းနှင့် ဆာလံ ၈၉ ကိုဧသန်ကရေးသည်ဟု အမည်နှင့်တကွဖော်ပြပါရှိသည်။ ဆာလံ ၉၀ ကို မောရှေရေးသည်ဟုယူမှတ်ရပြီး ဆာလံ ၉၁ သည်လည်း မောရှေပင် ဖြစ်နိုင်သည်။ ဆာလံ ၁၂၇ ကို ရှောလမုန်ရေးစပ်ခဲ့ခြင်းဖြစ်သည်။ ထို့ကြောင့် ဆာလံကျမ်းသုံးပုံနှစ်ပုံကျော်မှာ အခြားသူအသီးသီးရေးသားရာများဖြစ်သည်ဟု ယူမှတ်ရသည်။

၄။ ရေးသားထားချက်များအရ အဘယ်အချိန်ကာလကို ငုံမိသနည်း။

^၄ ဆာလံကျမ်းသည် ကျမ်းစာအုပ်တွင် အကြီးဆုံးကျမ်းတစ်စောင်ဖြစ်သည်။ ဆာလံကျမ်း ၉၀၊ ၁၂၆ နှင့် ၁၃၇ တို့ကိုထောက်ရှုခြင်းဖြင့် ဆာလံကျမ်းသည် အနည်းဆုံး မောရှေရေးသားချိန် (ဘီ.စီ.အီး. ၁၅၁၃-၁၄၇၃) မှသည် ဗာဗုလုန်မှပြည်တော်ပြန်ပြီးနောက်ပိုင်းနှင့် ဧဇရလက်ထက်ဖြစ်နိုင်သည့် (ဘီ.စီ.အီး. ၅၃၇-၄၆၀ ခန့်) အချိန်အထိ ကြာမြင့်သောကာလတစ်လျှောက် ရေးသားခဲ့သောကျမ်းဖြစ်သည်။ ထို့ကြောင့် ဤကျမ်းကို နှစ်ပေါင်းတစ်ထောင်ခန့်ကြာကြာ ရေးခဲ့သည်ဟုဆိုနိုင်သည်။ ကျမ်းတွင်ပါသောအကြောင်းများကို ငုံမိသည့်အချိန်သည် ပို၍ပင်ကြာရှည်သည်၊ ဖန်ဆင်းခြင်းနှင့် မိမိ၏ကျေးကျွန်များနှင့် ယေဟောဝါဆက်ဆံခဲ့သည့် သမိုင်းအကျဉ်းကာလမှ အစပြုကာ နောက်ဆုံးဆာလံရေးသည့်အချိန်အထိဖြစ်သည်။

၅။ (က) ဆာလံကျမ်းသည် ဖွဲ့စည်းစီစဉ်မှုကို မည်သို့ထင်ဟပ်ဖော်ပြသနည်း။ (ခ) ခေါင်းစီးများက အဘယ်ထပ်ဆင့်အချက်အလက်များကို ဖော်ပြသနည်း။ (ဂ) ဆာလံကျမ်းကိုဖတ်ရှုရာတွင် “စီးလာ” ဟူသောစကားလုံးကို အဘယ်ကြောင့် အသံထွက်ဖတ်ရန်မလိုသနည်း။

^၅ ဆာလံကျမ်းသည် စနစ်တကျဖွဲ့စည်းစီစဉ်မှုကို ရုပ်လုံးဖော်ပြသော ကျမ်းတစ်ကျမ်းဖြစ်သည်။ ဒါဝိဒ်ကိုယ်တိုင်က “အိုဘုရားသခင် သန့်ရှင်းရာဌာနသို့ ကိုယ်တော်ကြွတော်မူခြင်း၊ . . . ရှေ့၌ကား သီချင်းဆိုသောသူ၊ နောက်၌ကား စောင်းအမျိုးမျိုးကိုတီးသောသူ၊ အလယ်၌ကား ပတ်သာကိုတီးသောအပျိုတို့သည် လိုက်သွားကြပါ၏။ . . . ပရိသတ်အစည်းအဝေးတို့၌ ထာဝရအရှင်ဘုရားသခင်ကို ကောင်းချီးပေးကြလော့” ဟုရည်ညွှန်းဖော်ပြထားသည်။ (ဆာ. ၆၈:၂၄-၂၆) ထိပ်စီးကမ္ပည်းများအပြင် ကဗျာနှင့်ဂီတဝေါဟာရများစွာတွင် “ဒါရိုက်တာသို့” ဟူသောအသုံးအနှုန်း မကြာခဏပါရသည့်အကြောင်းရင်းကို ယင်းက ဖော်ပြသည်။ အချို့သောထိပ်စီးကမ္ပည်းများက ဆာလံတစ်ပုဒ်ကို အသုံးပြုပုံ သို့မဟုတ် ယင်း၏ရည်ရွယ်ချက်တို့ကို ရှင်းပြပေးထားပြီး ဂီတအသုံးပြုနည်းလမ်းညွှန်ချက်များကိုလည်း ဖော်ပြပေးသည်။ (ဆာလံ ၆၊ ၃၀၊ ၃၈၊ ၆၀၊ ၈၈၊ ၁၀၂ နှင့် ၁၂၀ တို့၏ ထိပ်စီးကမ္ပည်းများကိုရှု။) ဆာလံ ၁၈ နှင့် ၅၁ ကဲ့သို့သော ဒါဝိဒ်၏ဆာလံသီချင်း အနည်းဆုံး ၁၃ ပုဒ်တွင် ၎င်းတို့စပ်ဆိုရန် လှုံ့ဆော်ပေးခဲ့သော ဖြစ်ရပ်များကို အတိုချုပ်ဖော်ပြထားသည်။ ဆာလံသုံးဆယ့်လေးပုဒ်တွင် ထိပ်စီးကမ္ပည်းလုံးလုံးမပါပေ။ “စီးလာ” (“Seʹlah”) ဟူသောစာလုံးလေးကို အဓိကကျမ်းချက်ခေါင်းစီးများ၌ ၇၁ နေရာတွင်တွေ့ရသည်၊ ၎င်း၏အဓိပ္ပာယ်အတိအကျကိုမသိရသော်လည်း ဂီတ သို့မဟုတ် သီဆိုဖျော်ဖြေပွဲအတွက် ပညာရပ်ဆိုင်ရာဝေါဟာရဖြစ်သည်ဟု ယေဘုယျယူမှတ်ကြသည်။ အချို့သူများက ၎င်းသည် သီချင်းဆိုရာတွင် သို့မဟုတ် သီဆိုတီးမှုတ်မှုနှစ်မျိုးစလုံးတို့တွင် အသံမပြုဘဲစဉ်းစားဆင်ခြင်ရန်အတွက် ရပ်တန့်ရန်အချက်ပြဖြစ်သည်ဟု ဆိုကြသည်။ ထို့ကြောင့် ယင်းကို အသံထွက်ဖတ်ရန်မလိုပါ။

၆။ (က) ဆာလံကျမ်းကို အဘယ်စာအုပ်အတွဲများအဖြစ် ခွဲထားသနည်း။ (ခ) ဆာလံကျမ်းကို နောက်ဆုံးပုံစံအဖြစ် မည်သူစီစဉ်ပြုလုပ်ခဲ့ပုံရသနည်း။

^၆ ရှေးအချိန်ကတည်းက ဆာလံကျမ်းကို စာအုပ်ငါးအုပ် သို့မဟုတ် အတွဲငါးတွဲအဖြစ် ခွဲထားပြီး ၎င်းတို့မှာ (၁) ဆာလံ ၁-၄၁; (၂) ဆာလံ ၄၂-၇၂; (၃) ဆာလံ ၇၃-၈၉; (၄) ဆာလံ ၉၀-၁၀၆ (၅) ဆာလံ ၁၀၇-၁၅၀ တို့ဖြစ်သည်။ ထိုသီချင်းများအနက် ပထမသီချင်းပေါင်းချုပ်ကို ဒါဝိဒ်ပြုစုကြောင်းတွေ့ရသည်။ ယဇ်ပုရောဟိတ်ဖြစ်ပြီး ‘မောရှေ၏ပညတ္တိကျမ်းစာ၌ ကျွမ်းကျင်သောကျမ်းကူးဆရာ’ ဖြစ်သူဧဇရသည် ဆာလံကျမ်းကို ယခုနောက်ဆုံးပုံစံအဖြစ်ရောက်ဖို့ စီစဉ်ရန် ယေဟောဝါအသုံးပြုခဲ့သူတစ်ဦးဖြစ်သည်။—ဧဇ. ၇:၆။

၇။ ဆာလံကျမ်း၏ အခြားအဘယ်ထူးခြားချက်များသည် မှတ်သားစရာကောင်းသနည်း။

^၇ အဆင့်ဆင့်စုဆောင်းခဲ့ရခြင်းကြောင့် ဆာလံ ၁၄ နှင့် ၅၃; ၄၀:၁၃-၁၇ နှင့် ၇၀; ၅၇:၇-၁၁ နှင့် ၁၀၈:၁-၅ စသည်တို့ကဲ့သို့သော အချို့ဆာလံသီချင်းများသည် အခြားအပိုင်းများတွင် ထပ်၍ပါနေခြင်းဖြစ်ကြောင်း နားလည်နိုင်သည်။ ၎င်းအပိုင်းငါးပိုင်းစလုံးသည် ယေဟောဝါကိုကောင်းချီးပေးသောစကား သို့မဟုတ် ချီးမွမ်းသီချင်းများဖြင့် နိဂုံးချုပ်ထားသည်—ပထမလေးပိုင်းမှာ လူထု၏တုံ့ပြန်ချက်များပါရှိပြီး နောက်ဆုံးတစ်ပိုင်းမှာ ဆာလံ ၁၅၀ တစ်ခန်းလုံးဖြစ်သည်။—ဆာ. ၄၁:၁၃။a

၈။ ထိပ်စီး၊ နောက်စီးအက္ခရာယူစနစ်ဖြင့် သီကုံးစပ်ဆိုမှုကို ရှင်းလင်းဖော်ပြပါ။

^၈ ဆာလံသီချင်းကိုးခုကို အထူးပုံစံဖြင့် သီကုံးစပ်ဆိုထားသည်; ၎င်းတို့သည် အက္ခရာစဉ်အတိုင်းသီကုံးစပ်ဆိုထားသောကြောင့် ထိပ်စီး၊ နောက်စီးအက္ခရာယူစနစ် ဟုခေါ်သည်။ (ဆာလံ ၉၊ ၁၀၊ ၂၅၊ ၃၄၊ ၃၇၊ ၁၁၁၊ ၁၁၂၊ ၁၁၉ နှင့် ၁၄၅) ယင်းသီကုံးစပ်ဆိုမှုတွင် သီချင်းအပိုဒ်တစ်ခု၏ ဦးဆုံးအပိုဒ်ငယ် သို့မဟုတ် အပိုဒ်ငယ်များတွင် ဟေဗြဲအက္ခရာ၏ ပထမအက္ခရာ ʼaʹleph (א) နှင့်အစပြုပြီး နောက်အခန်းငယ်(များ)ကို ဒုတိယအက္ခရာ behth (ב) နှင့်အစပြုသည်၊ ထိုအတိုင်းပင်ဆက်သွားကာ ဟေဗြဲဗျည်းအက္ခရာအားလုံး သို့မဟုတ် အားလုံးနီးပါးကိုအသုံးပြုရေးစပ်ခြင်းဖြစ်သည်။ ၎င်းသည် မှတ်မိလွယ်ကူသည်—ဗိမာန်တော်သီချင်းသည်များသည် ဆာလံ ၁၁၉ ကဲ့သို့သော ရှည်လျားသောသီချင်းများအား အလွတ်မှတ်ရသည်ကို စဉ်းစားကြည့်ပါလေ! စိတ်ဝင်စားစရာမှာ ယေဟောဝါ၏နာမတော်အား ထိပ်စီး၊ နောက်စီးအက္ခရာယူစနစ်ကို ဆာလံ ၉၆:၁၁ တွင်တွေ့ရသည်။ ဟေဗြဲစာ၌ ထိုအခန်းငယ်၏ ပထမတစ်ဝက်တွင် စကားလုံးလေးလုံးပါဝင်ပြီး ထိုစကားလုံးများ၏ ထိပ်စီးအက္ခရာများကို ညာဘက်မှဘယ်ဘက်သို့ဖတ်ကြည့်သည့်အခါ တက်တြာဂရမ်မီတန်၏ ဟေဗြဲဗျည်းလေးလုံးဖြစ်သော ယဟဝဟ (יהוה) ဖြစ်သည်ကိုတွေ့ရသည်။

၉။ (က) ဆာလံကျမ်းများစွာသည် စိတ်နှလုံးကို တိုက်ရိုက်ထိမိစေရန် အဘယ်နောက်ခံအခြေအနေများက ဖြစ်စေသနည်း။ (ခ) ၎င်းတို့၏စွမ်းဆောင်နိုင်စွမ်းနှင့် လှပမှုကို အခြားအဘယ်အရာများကဖြစ်စေသနည်း။

^၉ ဤဓမ္မတေးကဗျာများကို ကာရန်မဲ့ ဟေဗြဲလင်္ကာပိုဒ်ဖြင့် ရေးစပ်ထားပြီးအမူပိုလွန်းခြင်းမရှိသော တင့်တယ်လှပသည့်ဟန်နှင့် ပြေပြစ်သော စဉ်းစားတွေးခေါ်မှုကိုဖြစ်ထွန်းစေသည်ကို တွေ့ရသည်။ စိတ်နှလုံးကို တိုက်ရိုက်ထိမိစေသည်။ ဆိုလိုချက်ကို ကွက်ကွက်ကွင်းကွင်း ရုပ်လုံးပေါ်စေသည်။ ရုပ်လုံးဖော်ပြထားသည့် တင်ပြစရာအကြောင်းနှင့် ပြင်းပြသောစိတ်လှုပ်ရှားမှု နှစ်ခုစလုံးတွင် အံ့ဖွယ်အတိမ်အနက်မှာ တစ်စိတ်တစ်ပိုင်းအနေနှင့် ဆာလံသီချင်းများစွာ၏နောက်ခံကို ဖော်ပြပေးသော ဒါဝိဒ်၏ထူးကဲသည့် ဘဝအတွေ့အကြုံများကြောင့် ဖြစ်သည်။ ဤကဲ့သို့ ဘဝအဖုံဖုံ—သိုးကျောင်းသားဘဝ၊ ဂေါလျက်ကိုယှဉ်သော တစ်ကိုယ်တော်စစ်သည်ဘဝ၊ နန်းတွင်းစောင်းသမားဘဝ၊ သစ္စာစောင့်သိသောမိတ်ဆွေများနှင့် သစ္စာဖောက်သူများအကြား ဝရမ်းပြေးဘဝ၊ အောင်နိုင်သူမင်းတရားကြီးဘဝ၊ ပြိုကွဲနေသည့်မိသားစု၏ ဒုက္ခ ဆင်းရဲခြင်းရောက်နေသော မေတ္တာရှိဖခင်ဘဝ၊ ကြီးလေးသောအပြစ်၏ခါးသီးမှုကို နှစ်ကြိမ်တိုင်ခံစားခဲ့ရသော်လည်း ယေဟောဝါအား စိတ်အားထက်သန်စွာဝတ်ပြုပြီး ကိုယ်တော်၏ပညတ်များကိုချစ်မြတ်နိုးသူဘဝစသည်ဖြင့် ကြုံရသူအလွန်နည်းသည်။ ထိုကဲ့သို့နောက်ခံဖြင့်စပ်ဆိုထားသော ဆာလံကျမ်းသည် လူတို့၏စိတ်လှုပ်ရှားမှုအမျိုးမျိုးအကြောင်း မလွတ်တမ်းဖော်ကျူးနိုင်သည်မှာ အဆန်းမဟုတ်ပါ! ၎င်း၏ခွန်အားနှင့် အနုအလှတို့ကို ပံ့ပိုးပေးသည့်အရာမှာ ဟေဗြဲလင်္ကာတွင် အလွန်ပေါ်လွင်သည့် လင်္ကာနှင့်ဆိုင်သောတူညီချက်များရှိခြင်းနှင့် အရေးအသားဟန်ပန်ကွဲပြားခြားနားခြင်းတို့ဖြစ်သည်။—ဆာ. ၁:၆; ၂၂:၂၀; ၄၂:၁; ၁၂၁:၃၊ ၄။

၁၀။ ဆာလံကျမ်း၏ကျမ်းစစ်ကျမ်းမှန်ဖြစ်မှုကို အဘယ်အရာကသက်သေထူသနည်း။

^၁၀ ယေဟောဝါအားချီးမွမ်းသော ဤရှေးသီချင်းကျမ်းသည် ကျန်ကျမ်းစာစောင်များနှင့် လုံးဝညီညွတ်ကိုက်ညီနေခြင်းက ကျမ်းစစ်ကျမ်းမှန်ဖြစ်ကြောင်း သက်သေသာဓက အလျှံပယ်ဖြစ်၏။ ဆာလံကျမ်းကို ခရစ်ယာန်ဂရိကျမ်းရေးသူများက များစွာကိုးကားခဲ့ကြသည်။ (ဆာ. ၅:၉ [ရော. ၃:၁၃]; ဆာ. ၁၀:၇ [ရော. ၃:၁၄]; ဆာ. ၂၄:၁ [၁ ကော. ၁၀:၂၆]; ဆာ. ၅၀:၁၄ [မ. ၅:၃၃]; ဆာ. ၇၈:၂၄ [ယော. ၆:၃၁]; ဆာ. ၁၀၂:၂၅-၂၇ [ဟေဗြဲ ၁:၁၀-၁၂]; ဆာ. ၁၁၂:၉ [၂ ကော. ၉:၉]) ဒါဝိဒ်ကိုယ်တိုင် သူ၏နောက်ဆုံးသီချင်းတွင် ဤသို့ဆိုခဲ့သည်– “ထာဝရဘုရား၏ဝိညာဉ်တော်သည် ငါ့အားဖြင့်မိန့်တော်မူ၏။ နှုတ်ကပါဌ်တော်သည် ငါ့လျှာ၌တည်၏။” ထိုဝိညာဉ်တော်မှာ ရှမွေလ သူ့အားဘိသိက်ပေးသောနေ့မှစ၍ သူ့အပေါ်သက်ရောက်ခဲ့သောဝိညာဉ်ဖြစ်သည်။ (၂ ရာ. ၂၃:၂; ၁ ရာ. ၁၆:၁၃) ထို့ပြင် တမန်တော်များကလည်း ဆာလံကျမ်းကိုကိုးကားခဲ့ကြသည်။ ပေတရုက “သန့်ရှင်းသောဝိညာဉ်တော်သည် ဒါဝိဒ်မင်း၏နှုတ်ဖြင့် ဗျာဒိတ်ထားတော်မူနှင့်သောကျမ်းစာချက်အတိုင်း” ဟု ရည်ညွှန်းဖော်ပြခဲ့ပြီး ဟေဗြဲအသင်းတော်ထံရေးသည့် စာရေးသူက ဆာလံကျမ်းမှ များစွာကိုးကားကာ ယင်းတို့ကို ဘုရားသခင်၏ မိန့်တော်မူချက်များ သို့မဟုတ် “သန့်ရှင်းသောဝိညာဉ်တော်မိန့်တော်မူသည်ကား” ဟူသောစကားလုံးများဖြင့် ဆာလံကျမ်းကို မိတ်ဆက်ပေးခဲ့ကြသည်။—တ. ၁:၁၆; ၄:၂၅; ဟေဗြဲ ၁:၅-၁၄; ၃:၇; ၅:၅၊ ၆။

၁၁။ ယေရှုကိုယ်တော်တိုင်၏ပြောဆိုချက်က မည်သို့ထပ်ဆင့်သက်သေထူသနည်း။

^၁၁ ကျမ်းစစ်ကျမ်းမှန်ဖြစ်ကြောင်း အခိုင်မာဆုံးထောက်ခံချက်အဖြစ် ရှင်ပြန်ထမြောက်ပြီးသောသခင်ယေရှုက တပည့်တော်များကို ပြောခဲ့သောဤစကားကို ကျွန်ုပ်တို့ကိုးကားကြသည်– “မောရှေ၏ပညတ္တိကျမ်းစာ၌လည်းကောင်း၊ ပရောဖက်တို့၏ကျမ်းစာ၌လည်းကောင်း၊ ဆာလံကျမ်းစာ၌လည်းကောင်း ငါ့ကိုရည်မှတ်၍ရေးထားသမျှသောအချက်တို့သည် ပြည့်စုံရမည်။” ဤတွင် ယေရှုသည် ဂျူးများလက်ခံထားပြီး ကောင်းကောင်းအကျွမ်းဝင်သည့်နည်းဖြင့် ဟေဗြဲကျမ်းစာတစ်ခုလုံးကို စုရုံးဖော်ပြနေခြင်းဖြစ်သည်။ ဆာလံကျမ်းနှင့်ပတ်သက်၍ ကိုယ်တော့်ဖော်ပြချက်သည် ဟေဂျီအိုဂရပ်ဖာ (သို့မဟုတ် သန့်ရှင်းသောရေးသားချက်များ) ဟုခေါ်သည့် ကျမ်းစာစောင်များ၏တတိယအုပ်စုတစ်ခုလုံးတွင်ပါဝင်သည်၊ ယင်းတွင် ဆာလံကျမ်းသည် ပထမဦးဆုံးစာအုပ်ဖြစ်သည်။ အစောပိုင်းနာရီအနည်းငယ်က ဧမောက်ရွာသို့သွားသောလမ်းတွင် လူနှစ်ဦးအား ‘ကျမ်းအားလုံးတွင် ကိုယ်တော်၏အကြောင်းနှင့်ပတ်သက်သည့်ကျမ်းပိုဒ်များကို ရှင်းပြ’ သည့်အခါ ကိုယ်တော့်မိန့်တော်မူချက်က ယင်းကို ခိုင်မာစေသည်။—လု. ၂၄:၂၇၊ ၄၄။

အဘယ်ကြောင့်အကျိုးရှိကြောင်း

၂၃။ (က) ဆာလံကျမ်းတွင် အဘယ်ရှင်သန်သည့်သတင်းတရားပါရှိသနည်း။ (ခ) ယေဟောဝါ၏နာမတော်နှင့် အချုပ်အခြာအာဏာသည် မည်သို့ချီးမြှောက်ခံရသနည်း။

^၂၃ နှစ်လိုဖွယ်ဖြစ်မှုနှင့် ရေးဟန်တွင် ဆိုစရာမရှိသောကြောင့် ဆာလံကျမ်းသည် မည်သည့်ဘာသာစကားတွင်မဆို ဂန္ထဝင်မြောက်စာပေအဝင်ဖြစ်ခဲ့သည်။ သို့ရာတွင် စာပေတစ်ခုဖြစ်ရုံထက်မကပါ။ စကြဝဠာအချုပ်အခြာအာဏာရှင် ယေဟောဝါဘုရားသခင်ကိုယ်တော်တိုင်ထံတော်မှသက်ရောက်သော ရှင်သန်သည့်သတင်းတရားပါရှိသည်။ ယင်းတို့က သမ္မာကျမ်းစာ၏အခြေခံသွန်သင်ချက်များကို နက်ရှိုင်းစွာထိုးထွင်းသိမြင်စေပြီး အဓိကအနေနှင့် ယင်း၏အာဘော်ရှင်သည် ယေဟောဝါဖြစ်ကြောင်း ဖော်ပြပြောဆိုသည်။ ကိုယ်တော်သည် စကြဝဠာနှင့် ယင်းစကြဝဠာတွင်ရှိအရာခပ်သိမ်းတို့ကို ဖန်ဆင်းသောအရှင်ဖြစ်တော်မူကြောင်း ရှင်းလင်းစွာဖော်ပြထားသည်။ (၈:၃-၉; ၉၀:၁၊ ၂; ၁၀၀:၃; ၁၀၄:၁-၅၊ ၂၄; ၁၃၉:၁၄) ဆာလံကျမ်းတွင် ယေဟောဝါဟူသောနာမတော်ကို အမှန်ပင် ချီးမြှင့်ထားပြီး အကြိမ်ပေါင်း ၇၀၀ ခန့်တွေ့ရသည်။ ထပ်ဆင့်၍ နာမတော်အတိုကောက်ဖြစ်သည့် “ဂျား” ဟူသောစကားလုံးကို အကြိမ်ပေါင်း ၄၃ ကြိမ်တွေ့ရသောကြောင့် ပျမ်းမျှခြင်းအားဖြင့် ဆာလံကျမ်းတစ်ကျမ်းလျှင် ဘုရားသခင့်နာမတော် ၅ ကြိမ်ပါရှိသည်။ ထို့ပြင် ယေဟောဝါကို အီလိုဟင်မ် သို့မဟုတ် ဘုရားသခင် ဟုအကြိမ်ပေါင်း ၃၅၀ ခန့်ဖော်ပြထား၏။ ဆာလံကျမ်းအမြောက်အမြား၌ ကိုယ်တော်ကို “အချုပ်အခြာအာဏာသခင်” ဟုဖော်ပြထားခြင်းဖြင့် ယေဟောဝါ၏ အမြင့်ဆုံးသောအုပ်စိုးမှုကို တင်ပြသည်။—၆၈:၂၀; ၆၉:၆၊ ကဘ; ၇၁:၅; ၇၃:၂၈; ၁၄၀:၇; ၁၄၁:၈။

၂၄။ ဆာလံကျမ်းတွင် သေမျိုးဖြစ်သောလူသားများနှင့်ပတ်သက်၍ အဘယ်အရာဆိုထားသနည်း၊ အဘယ်သြဝါဒကောင်းများကို ပေးထားသနည်း။

^၂၄ ထာဝရဘုရားသခင်နှင့်ဆန့်ကျင်လျက် သေမျိုးဖြစ်သောလူတို့သည် အပြစ်တရား၌မွေးဖွားလာကြောင်း၊ ကယ်တင်ရှင်တစ်ဦးလိုအပ်ကြောင်းဖော်ပြပြီး သူသည် သေဆုံးကာ လူသားတို့၏သာမန်သင်္ချိုင်း၊ ရှီးအိုးလ်သို့ရောက်ရှိ “ကြေမွ” သွားကြောင်း တင်ပြထား၏။ (၆:၄၊ ၅; ၄၉:၇-၂၀; ၅၁:၅၊ ၇; ၈၉:၄၈; ၉၀:၁-၅; ၁၁၅:၁၇; ၁၄၆:၄) ဆာလံကျမ်းက ဘုရားသခင့်ပညတ်တော်တို့ကိုစောင့်ရှောက်ပြီး ယေဟောဝါအားယုံကြည်အားထားရန်လိုကြောင်း အလေးအနက်ဖော်ပြ၏။ (၁:၁၊ ၂; ၆၂:၈; ၆၅:၅; ၇၇:၁၂; ၁၁၅:၁၁; ၁၁၈:၈; ၁၁၉:၉၇၊ ၁၀၅၊ ၁၆၅) ရောင့်တက်ခြင်းနှင့် ‘လျှို့ဝှက်အပြစ်’ တို့ကိုမလုပ်ရန်သတိပေးထားပြီး (၁၉:၁၂-၁၄; ၁၃၁:၁) ရိုးသားရန်၊ ကောင်းသောအပေါင်းအသင်းနှင့်ပေါင်းရန် အားပေးသည်။ (၁၅:၁-၅; ၂၆:၅; ၁၀၁:၅) ကောင်းသောအကျင့်ကြောင့် ယေဟောဝါ၏မျက်နှာသာတော်ခံစားနိုင်ကြောင်း တင်ပြသည်။ (၃၄:၁၃-၁၅; ၉၇:၁၀) ‘ကယ်တင်ခြင်းသည် ယေဟောဝါနှင့်စပ်ဆိုင်ပါ၏’ ဟုဆိုရာ၌ တောက်ပသောမျှော်လင့်ချက်ပေးပြီး ယင်းအချက်သည် ကိုယ်တော်ကိုကြောက်ရွံ့သူများအဖြစ်တွင် မှန်ကန်ကာ “သေဘေးမှကယ်လွှတ်” မည်ဖြစ်သည်။ (၃:၈; ၃၃:၁၉၊ သမ္မာ) ယင်းက ပရောဖက်ပြုချက်အပိုင်းကို ကျွန်ုပ်တို့အားဖော်ပြသည်။

၂၅။ (က) ဆာလံကျမ်းတွင် အဘယ်အကြောင်းအရာများ ပြည့်လုမတတ်ပါဝင်သနည်း။ (ခ) ပေတရုသည် သာ၍ကြီးမြတ်သောဒါဝိဒ်ကို မှတ်သားဖော်ပြရာတွင် ဆာလံကျမ်းကို မည်သို့အသုံးပြုခဲ့သနည်း။

^၂၅ ဆာလံကျမ်းသည် ယေရှုခရစ်ကို ‘ဒါဝိဒ်၏သား’ ဖြစ်ကြောင်းနှင့် ယေဟောဝါ၏ဘိသိက်ခံဘုရင်အနေနှင့် ကိုယ်တော်ပြုမည့်ကဏ္ဍတို့ကိုဖော်ပြထားသည့် ပရောဖက်ပြုချက်များနှင့်ပြည့်မတတ်ဖြစ်သည်။b (မ. ၁:၁) စီ.အီး. ၃၃ ပင်တေကုတ္တေပွဲနေ့၌ ခရစ်ယာန်အသင်းတော်တည်ထောင်လာသည့်အခါ သန့်ရှင်းသောဝိညာဉ်တော်သည် အဆိုပါပရောဖက်ပြုချက်များ ပြည့်စုံချက်နှင့်ပတ်သက်၍ တမန်တော်များအား ဉာဏ်အလင်းပေးခဲ့သည်။ ထိုနေ့၌ ပေတရုသည် သူ၏အလွန်ကောင်းမွန်သောဟောပြောချက်၏ အဓိကအချက်ကိုပေါ်လွင်စေရာတွင် ဆာလံကျမ်းကို အကြိမ်ကြိမ်ကိုးကားခဲ့သည်။ “နာဇရက်မြို့သားယေရှု” နှင့်ပတ်သက်၏။ နောက်ပိုင်းသူ့ဟောပြောချက်ကို ခရစ်တော်ယေရှုသည် သာ၍ကြီးမြတ်သောဒါဝိဒ်ဖြစ်ကြောင်း၊ ယေဟောဝါသည် ယေရှု၏ဝိညာဉ်ကိုဟေးဒီးစ်၌ပစ်မထားဘဲ သေခြင်းမှထမြောက်စေတော်မူခဲ့ကြောင်းကို သက်သေထူသည့် ဆာလံကျမ်းမှကိုးကားချက်များအားလုံးနီးပါးကို အခြေခံထားခြင်းဖြစ်သည်။ “ဒါဝိဒ်သည် ကောင်းကင်သို့မတက်သေး၊” သို့သော် ဆာလံ ၁၁၀:၁ တွင် သူကြိုဟောခဲ့သည့်အတိုင်း သူ၏သခင်သည်တက်၏။ ဒါဝိဒ်၏သခင်ကားမည်သူနည်း။ ပေတရုက “သင်တို့သည် လက်ဝါးကပ်တိုင်မှာကွပ်မျက်သောယေရှု” ဖြစ်၏ဟု နိဂုံးချုပ်စကားတွင် ထိထိမိမိအဖြေပေးခဲ့သည်!—တ. ၂:၁၄-၃၆; ဆာ. ၁၆:၈-၁၁; ၁၃၂:၁၁။

၂၆။ ပေတရု၏ဟောပြောချက်သည် အကျိုးပြုကြောင်း မည်သို့သက်သေထူခဲ့သနည်း။

^၂၆ ဆာလံကျမ်းပေါ်အခြေပြုသော ပေတရု၏ဟောပြောချက်သည် အကျိုးပြုခဲ့သလော။ ထိုနေ့တွင် လူပေါင်း ၃,၀၀၀ နှစ်ခြင်းခံပြီး ခရစ်ယာန်အသင်းတော်သားများဖြစ်လာသည့်အဖြစ်ကိုယ်နှိုက်က အဖြေဖြစ်သည်။—တ. ၂:၄၁။

၂၇။ “သန့်ရှင်းသောဝိညာဉ်တော်” သည် ဆာလံ ၂ ကိုမည်သို့အနက်ဖွင့်ပေးခဲ့သနည်း။

^၂၇ ၎င်းနောက်မကြာမီ အထူးစုဝေးမှုတစ်ခု၌ တပည့်တော်တို့သည် ဆာလံ ၂:၁၊ ၂ ကိုကိုးကားပြီး ယေဟောဝါထံအသနားခံခဲ့ကြသည်။ သူတို့က ယင်းကျမ်းချက်သည် ‘ဘုရားသခင့်ဘိသိက်ခံ၊ သန့်ရှင်းသောအစေအပါယေရှု’ ကို လောကီအုပ်စိုးသူများက စုပေါင်းဆန့်ကျင်ကြခြင်းဖြင့် ပြည့်စုံခဲ့သည်ဟုဆိုကြ၏။ မှတ်တမ်း၌ဆက်၍ဆိုထားသည်မှာ သူတို့သည် “သန့်ရှင်းသောဝိညာဉ်တော်နှင့်ပြည့်” ခဲ့ကြသည်။—တ. ၄:၂၃-၃၁။

၂၈။ (က) ပေါလုသည် ဆာလံကျမ်းကိုအသုံးပြုပြီး ဟေဗြဲအခန်းကြီး ၁ မှ ၃ တွင် အဘယ်အကြောင်းပြောဆိုထားသနည်း။ (ခ) မေလခိဇေဒက်နည်းတူယဇ်ပုရောဟိတ်အကြောင်း ပေါလုဆွေးနွေးပြောဆိုချက်အတွက် ဆာလံ ၁၁၀:၄ သည် အခြေခံအဖြစ် မည်သို့ထောက်ပံ့ပေးသနည်း။

^၂၈ ယခု ဟေဗြဲသြဝါဒစာကိုကြည့်ပါ။ ပထမအခန်းကြီးနှစ်ခန်းတွင် ဘုရားသခင်၏ ကောင်းကင်နန်းထိုင်သားတော်ဖြစ်သော ယေရှုသည် ကောင်းကင်တမန်များထက် သာ၍ကြီးမြတ်သည်နှင့်စပ်လျဉ်း၍ ဆာလံကျမ်းမှ ကိုးကားချက်များစွာကိုတွေ့ရ၏။ ပေါလုက ယေရှုတွင် အာဗြဟံ၏မျိုးနွယ်အဝင်ဖြစ်ပြီး “ကောင်းကင်ဘုံနှင့်စပ်ဆိုင်သော ခေါ်ဖိတ်တော်မူခြင်းကျေးဇူးကိုခံရသောသူ” တို့ဖြစ်သည့် “ညီအစ်ကို” များ၏အသင်းတော်ရှိကြောင်း ဆာလံ ၂၂:၂၂ နှင့် အခြားရည်ညွှန်းချက်များမှ တင်ပြခဲ့သည်။ (ဟေဗြဲ ၂:၁၀-၁၃၊ ၁၆; ၃:၁) ထို့နောက် ဟေဗြဲ ၆:၂၀ မှစ၍ အခန်းကြီး ၇ တိုင်အောင် “မေလခိဇေဒက်နည်းတူ ထာဝရယဇ်ပုရောဟိတ်မင်း” အဖြစ် ယေရှုထမ်းဆောင်ရသည့် ထပ်ဆင့်တာဝန်နှင့်ပတ်သက်၍ တမန်တော်က အကျယ်တဝင့်ဖော်ပြထားသည်။ ၎င်းသည် ဆာလံ ၁၁၀:၄ ၌ပါသော ဘုရားသခင်ကျိန်ဆိုခဲ့သည့် ကတိတော်ကိုရည်ညွှန်းသည်၊ ယေရှု၏ယဇ်ပုရောဟိတ်အဖြစ်တော်သည် အာရုန်၏ယဇ်ပုရောဟိတ်အဖြစ်ထက် သာလွန်ကြောင်းကို သက်သေထူရာတွင် ၎င်းကျမ်းချက်ကို ပေါလုကြိမ်ဖန်များစွာ ရည်ညွှန်းကိုးကားခဲ့သည်။ ယေရှုခရစ်သည် မြေကြီးပေါ်တွင်မဟုတ်ဘဲ ကောင်းကင်ပေါ်မှ “အစဉ်အမြဲတည်” သော ယဇ်ပုရောဟိတ်တစ်ဦးဖြစ်ကြောင်းနှင့်—ကိုယ်တော်၏ယဇ်ပုရောဟိတ်လုပ်ငန်းဆိုင်ရာ အကျိုးကျေးဇူးသည် ထာဝရတည်ရှိမည်—ဖြစ်ကြောင်း ယေဟောဝါ၏ကျိန်ဆိုတော်မူချက်ကို ပေါလုရှင်းပြသည်။—ဟေဗြဲ ၇:၃၊ ၁၅-၁၇၊ ၂၃-၂၈။

၂၉။ ဆာလံကျမ်းတွင်ဖော်ပြထားပြီး ဟေဗြဲ ၁၀:၅-၁၀ တွင်ရှင်းပြထားသည့်အတိုင်း အဘယ်ဘုရားဝတ်၌မွေ့လျော်သည့်စိတ်ဓာတ်ကို ကျွန်ုပ်တို့ဂရုပြုသင့်သနည်း။

^၂၉ ၎င်းအပြင် ဟေဗြဲ ၁၀:၅-၁၀ ၌ ယေရှုအတွက်ဘုရားသခင့်အလိုတော်ဖြစ်သော ပူဇော်သကာလမ်းစဉ်နှင့် ထိုအလိုတော်ကိုဆောင်ရွက်ရန် ကိုယ်တော်၏စိတ်ဆုံးဖြတ်မှုတို့အတွက် ယေရှု၏ကောင်းစွာသဘောပေါက်မှုကို ဖော်ပြထားသည်။ ၎င်းသည် ဆာလံ ၄၀:၆-၈ တွင်တွေ့ရသော ဒါဝိဒ်၏စကားများပေါ် အခြေခံ၏။ ဤစံနမူနာဖြစ်သော ဘုရားဝတ်၌မွေ့လျော်သည့်စိတ်ဓာတ်ကို ကျွန်ုပ်တို့အားလုံးဆင်ခြင်သုံးသပ်ပြီး အတုယူခြင်းဖြင့် အကျိုးများစွာရရှိကာ ဘုရားသခင့်မျက်နှာသာ ရရှိစေမည်ဖြစ်သည်။—ဆာ. ၁၁၆:၁၄-၁၉ ကိုလည်းရှု။

၃၀။ ယေရှု၏အသက်တာလမ်းစဉ်အသေးစိတ်အကြောင်းကို ဆာလံကျမ်းတွင် မည်သို့ကြိုဟောထားသနည်း၊ ယင်းမှနှစ်သိမ့်မှုကို ကိုယ်တော်မည်သို့ရယူခဲ့သနည်း။

^၃၀ နှက်တိုင်ပေါ် ပြင်းထန်သောစုံစမ်းနှောင့်ယှက်မှုကို အဆုံးစွန်ခံရပ်ခဲ့သော ယေရှု၏အသက်တာလမ်းစဉ်အကြောင်းကို ဆာလံကျမ်းတွင် အသေးစိတ်ကြိုဟောထားသည်။ ယင်းတို့ထဲတွင် ကိုယ်တော်သောက်ရန် ပုန်းရည်ကမ်းပေးခြင်း၊ အပေါ်ဝတ်ရုံကိုမဲချယူခြင်း၊ ကိုယ်တော်၏လက်ခြေများ ပြင်းစွာနာကျင်ခြင်း၊ လှောင်ပြောင်ခံရခြင်းနှင့် “အကျွန်ုပ်ဘုရား၊ အကျွန်ုပ်ဘုရား၊ အဘယ်ကြောင့်အကျွန်ုပ်ကိုစွန့်ပစ်တော်မူသနည်း” ဟူသောပြင်းထန်လှသည့် စိတ်ထိခိုက်နာကျင်မှုအကြောင်းများ ပါဝင်သည်။ (မ. ၂၇:၃၄၊ ၃၅၊ ၄၃၊ ၄၆; ဆာ. ၂၂:၁၊ ၇၊ ၈၊ ၁၄-၁၈; ၆၉:၂၀၊ ၂၁) ယောဟန် ၁၉:၂၃-၃၀ တွင်ဖော်ပြထားသည့်အတိုင်း ထိုအချိန်အတွင်း၌ပင် ဆာလံကျမ်းထဲတွင်ပါသော အရာအားလုံးသည် အသေးစိတ်ပြည့်စုံရမည်ကို ယေရှုသိထားကာ ထိုကျမ်းမှ နှစ်သိမ့်မှုနှင့်လမ်းညွှန်မှုတို့ကို ရယူခဲ့မည်ဖြစ်သည်။ မိမိ၏ထမြောက်ခြင်း၊ ချီးမြှောက်ခံရခြင်းနှင့်ပတ်သက်၍ ဆာလံကျမ်းတွင်ရေးသားထားသည်ကိုလည်း ကိုယ်တော်သိတော်မူခဲ့၏။ အသေခံတော်မမူမီ နောက်ဆုံးည၌ တမန်တော်များနှင့်အတူ “သီချင်း” သို့မဟုတ် ဆာလံသီချင်းကိုသီဆိုရာ၌ ကိုယ်တော်၏စိတ်ထဲတွင် အထက်ပါအချက်များရှိခဲ့မည်မှာ သေချာသည်။—မ. ၂၆:၃၀။

၃၁။ ဆာလံကျမ်းသည် နိုင်ငံတော်မျိုးနွယ်တော်နှင့် ယေရှု၏အသင်းတော်နှင့်ပတ်သက်၍ အဘယ်အရာကြိုဟောထားသနည်း။

^၃၁ ဆာလံကျမ်းက “ဒါဝိဒ်၏သား” နှင့်နိုင်ငံတော်မျိုးစေ့မှာ ခရစ်တော်ယေရှုဖြစ်ပြီး ယခု ကောင်းကင်ဇိအုန်တွင် ဘုရင်နှင့်ယဇ်ပုရောဟိတ်အဖြစ် ချီးမြှောက်ခံရကြောင်း ရှင်းလင်းစွာဖော်ပြ၏။ ယေဟောဝါ၏ ဤဘိသိက်ခံတွင်ပြည့်စုံခဲ့သော ခရစ်ယာန်ဂရိကျမ်းစာတွင်ကိုးကားထားသည့် ဆာလံကျမ်းမှ ကျမ်းပိုဒ်အားလုံး၏အသေးစိတ်ကိုဖော်ပြရန် နေရာရှိမည်မဟုတ်ပါ၊ သို့သော် ဤတွင် ဥပမာအနည်းငယ်ကို တင်ပြထားပါသည်– ဆာ. ၇၈:၂—မ. ၁၃:၃၁-၃၅; ဆာ. ၆၉:၄—ယော. ၁၅:၂၅; ဆာ. ၁၁၈:၂၂၊ ၂၃—မာ. ၁၂:၁၀၊ ၁၁ နှင့် တ. ၄:၁၁; ဆာ. ၃၄:၂၀—ယော. ၁၉:၃၃၊ ၃၆; ဆာ. ၄၅:၆၊ ၇—ဟေဗြဲ ၁:၈၊ ၉။ ထို့ပြင် ယေဟောဝါ၏နာမတော် ချီးမွမ်းခြင်းလုပ်ငန်းတွင်ပါဝင်ရန် တစ်ဦးချင်းစီအနေနှင့်မဟုတ်ဘဲ လူမျိုးအားလုံးမှ အုပ်စုလိုက်အနေနှင့် ဘုရားသခင့်မျက်နှာသာတော်သို့ ခေါ်ဆောင်ခံရသည့် ယေရှု၏နောက်တော်လိုက်အစစ်အမှန်တို့၏ အသင်းတော်အကြောင်းကိုလည်း ဆာလံကျမ်း၌ ကြိုတင်ရေးခဲ့သည်။—ဆာ. ၁၁၇:၁—ရော. ၁၅:၁၁; ဆာ. ၆၈:၁၈—ဧ. ၄:၈-၁၁; ဆာ. ၉၅:၇-၁၁—ဟေဗြဲ ၃:၇၊ ၈; ၄:၇။

၃၂။ (က) ဆာလံကျမ်းကို လေ့လာရာတွင် ယေဟောဝါ၏သင်္ကာယနကင်းရှင်းရေးနှင့် နိုင်ငံတော်ရည်ရွယ်ချက်များအကြောင်း အဘယ်အရာဖွင့်ပြသနည်း။ (ခ) ကိုယ်တော်၏ဘုရင်အဖြစ်တော်ကို နားလည်သဘောပေါက်ခြင်းက ကျွန်ုပ်တို့၏သစ္စာစောင့်သိမှုနှင့် ကျေးဇူးတင်လေးမြတ်မှုကို မည်သို့တင်ပြသင့်သနည်း။

^၃၂ ဆာလံကျမ်းကို ကျွန်ုပ်တို့လေ့လာသည့်အခါ ယေဟောဝါဘုရားသခင်သည် ကတိထားရာမျိုးနွယ်တော်၊ နိုင်ငံတော်အမွေခံအားဖြင့် မိမိ၏ဘုန်းထင်ရှားရေးနှင့် သင်္ကာယနကင်းရှင်းရေးအတွက် လုပ်ဆောင်တော်မူသော ကိုယ်တော်၏ဘုရင်အဖြစ်ကို ပို၍နားလည်သဘောပေါက်လာသည်။ ကျွန်ုပ်တို့သည် ‘ယေဟောဝါ၏ ဘုန်းတန်ခိုးအာနုဘော်တော်’ ၌ဝမ်းမြောက်ရွှင်လန်းသောသူ၊ “ဒါဝိဒ်၏ချီးမွမ်းသီချင်း” အဖြစ်ရည်ညွှန်းဖော်ပြခံရသော ဆာလံ ၁၄၅ တွင်ဖော်ပြထားသည့်သူများဖြစ်သော သစ္စာစောင့်သိသူများအဝင်ဖြစ်နိုင်ကြပါစေ– “နိုင်ငံတော်၏ဘုန်းကိုလည်းကောင်း၊ တန်ခိုးတော်ကိုလည်းကောင်း ဟောပြောမြွက်ဆိုသဖြင့် တန်ခိုးပါသောအမှုတော်များနှင့် နိုင်ငံတော်၏ဘုန်းအသရေများကို လူသားတို့အားဖော်ပြကြပါ၏။ ကိုယ်တော်၏နိုင်ငံတော်သည် နိစ္စထာဝရနိုင်ငံဖြစ်၍ အာဏာတော်သည် ကာလအစဉ်အဆက်တည်ရပါ၏။” (ဆာ. ၁၄၅:၅၊ ၁၁-၁၃) ပရောဖက်ပြုဆာလံကျမ်းတွင်ဖော်ပြထားသည့် ခရစ်တော်အားဖြင့်ဖြစ်သော ဘုန်းကျက်သရေနှင့်ပြည့်စုံသည့် တည်ထောင်ပြီးဖြစ်သော ဘုရားသခင့်နိုင်ငံတော်အကြောင်းကို လူမျိုးအပေါင်းရှိလူများသည် ယခုအချိန်၌ပင် သိရှိထားကြသည်။ နိုင်ငံတော်နှင့်နိုင်ငံတော်ဘုရင်အတွက် ကျွန်ုပ်တို့မည်မျှကျေးဇူးတင်သင့်သည်တကား! ဆာလံကျမ်း၏နိဂုံးစကားများသည် အလွန်ပင်လျောက်ပတ်လှပေသည်– “အသက်ရှိသောသူအပေါင်းတို့သည် ထာဝရဘုရားကိုချီးမွမ်းကြစေ။ ဟာလေလုယ!”—၁၅၀:၆။

[အောက်ခြေမှတ်ချက်များ]