သမ္မာကျမ်းစာ —ဖတ်ရှုရမည့်စာအုပ်တစ်အုပ်

သမ္မာကျမ်းစာအကြောင်း ပြောလာပြီဆိုလျှင် အထွတ်အထိပ်ပြေးသည့်အချက်များချည်းဖြစ်သည်။ ယင်းသည် သမိုင်းတစ်လျှောက်လုံးတွင် အများဆုံးထုတ်ဝေရသည့်စာအုပ်ဖြစ်သည်။ သမ္မာကျမ်းစာသည် ရှေးအကျဆုံး၊ ဘာသာပြန်ဆိုအခံရဆုံး၊ ကိုးကားအခံရဆုံး၊ ဩဇာအညောင်းဆုံး၊ လေးစားမှုအခံရဆုံးသော စာအုပ်ဖြစ်သည်။ ယင်းသည် အငြင်းအခုံဖြစ်စရာအကောင်းဆုံးသော စာအုပ်လည်း ဖြစ်နိုင်သည်။ ယင်းသည် ပိတ်ပင်မှု၊ မီးရှို့မှု၊ ပြင်းထန်သည့်ဆန့်ကျင်မှုများကို ကျော်လွှားလွတ်မြောက်လာခဲ့သည့် စာအုပ်တစ်အုပ်ဖြစ်သည်မှာ သေချာသည်။ သို့သော် ဝမ်းနည်းစရာကား သမ္မာကျမ်းစာအတွက် မည်သည့်အခါမျှမဟုတ်တော့သော အထွတ်အထိပ်တစ်ခုရှိသည်။ ယင်းကား သမ္မာကျမ်းစာသည် ဘယ်သောအခါမျှ ကမ္ဘာတွင် အများဆုံး ဖတ်ရှု သည့်စာအုပ် ဖြစ်လာဖွယ်ရာမရှိခြင်းပင်ဖြစ်သည်။

လူတို့သည် အိမ်ထဲတစ်နေရာရာတွင် သမ္မာကျမ်းစာရှိမည်ဖြစ်သော်လည်း ယင်းကို တကယ်တမ်းဖတ်ဖြစ်လောက်အောင် မိမိတို့မအားဟု လူအများယူမှတ်ကြသည်။ စာဖတ်ခြင်းသည် တစ်ချိန်က ရေပန်းစားသည့်အရာဖြစ်ခဲ့သည်။ သို့သော် ယခုအခါ လူအများစုသည် ရုပ်မြင်သံကြားကြည့်ခြင်း သို့မဟုတ် အခြားအရာတစ်ခုခုလုပ်နေခြင်းဖြင့် မိမိတို့၏အားလပ်ချိန်ကို အသုံးပြုရန် ပို၍နှစ်သက်ကြသည်။ စာဖတ်လေ့ရှိသူများပင် နက်နက်နဲနဲစဉ်းစားစရာမလိုသော အကြောင်းအရာများကို သာ၍ဖတ်လိုကြသည်။ သမ္မာကျမ်းစာဖတ်ရှုရာတွင် အာရုံစူးစိုက်ရန်လိုအပ်သည်။ သို့သော် လူအများစုတို့သည် မိမိတို့ဖတ်သည့်အရာအပေါ် အလေးအနက်အာရုံစူးစိုက်မှုမရှိကြတော့ချေ။

သို့သော် သမ္မာကျမ်းစာကို ကျွန်ုပ်တို့၏စာအုပ်စင်ပေါ်တွင် တင်ထားရုံသက်သက်နှင့် မပြီးချေ။ ယင်းကိုဖတ်ရှုရန် အကြောင်းကောင်းများရှိပေသည်။ အချက်အလက်အချို့ကို ဆင်ခြင်သုံးသပ်ကြည့်ပါ။

ယင်းကြာရှည်တည်လာသည်မှာ အဆန်းမဟုတ်ပါလေ!

“သမ္မာကျမ်းစာ” (ဘိုင်ဘယ်လ်) ဟူသောစကားလုံးသည် ဂရိဝေါဟာရ ဘစ်ဘလီယာ မှဆင်းသက်လာပြီး “စာအုပ်ငယ်များ” ဟူသောအဓိပ္ပာယ်ရှိသည်။ သမ္မာကျမ်းစာကို စာအုပ်များစွာဖြင့်ဖွဲ့စည်းထားကြောင်း—အချို့တို့သည် သိပ်မငယ်ကြောင်း ယင်းအချက်က ကျွန်ုပ်တို့ကို သတိပေးပေသည်တကား! ယင်းတို့ကို နှစ်ပေါင်းတစ်ထောင့်ခြောက်ရာကျော်ကာလကြာ ရေးသားခဲ့ရသည်။ စာရေးသူများသည် လူသားများဖြစ်စေကာမူ သူတို့သည် သာလွန်မြင့်မြတ်သည့် ပင်ရင်းတစ်နေရာမှ မှုတ်သွင်းခြင်းကို ခံခဲ့ကြရသည်။ ကျမ်းရေးသူတစ်ဦးဤသို့ပြောသည်– “အနာဂတ္တိစကားသည် လူ့အလိုအားဖြင့်ဖြစ်ဖူးသည်မဟုတ်။ ဘုရားသခင်၏သန့်ရှင်းသူတို့သည် သန့်ရှင်းသောဝိညာဉ်တော်၏ တိုက်တွန်းတော်မူခြင်းကိုခံရ၍ ဟောပြောကြ၏။” (၂ ပေတရု ၁:၂၁) ကျမ်းစာဆိုင်ရာပရောဖက်ပြုချက်များ၏ မှန်ကန်မှုသည် သမ္မာကျမ်းစာတစ်အုပ်လုံး၏ မှန်ကန်မှုပင်ဖြစ်သည်။ ဤဘုရားသခင့်မှုတ်သွင်းခံ “စာအုပ်ငယ်များ” သည် ယေဟောဝါဘုရားသခင်၏ အလွန်မြင့်မြတ်သောအကြံတော်များနှင့် ပြည့်လျက်ရှိသည်။ (ဟေရှာယ ၅၅:၉) သမ္မာကျမ်းစာဤမျှကြာရှည်တည်ရခြင်းသည် အဆန်းမဟုတ်ပါလေ!

သမ္မာကျမ်းစာသည် ဘုရားသခင့်ကျေးကျွန်များအတွက် အရေးအကြီးဆုံးသောစာအုပ် အမြဲဖြစ်လာခဲ့သည်။ သူတို့သည် ကျမ်းရေးသူတစ်ဦးဖြစ်သည့် တမန်တော်ပေါလုနှင့် သဘောချင်းတူညီကြသည်။ သူဤသို့ပြောခဲ့သည်– “ထိုကျမ်းစာရှိသမျှသည် ဘုရားသခင်မှုတ်သွင်းတော်မူသောအားဖြင့်ဖြစ်၍ . . . သွန်သင်ခြင်းကျေးဇူးများကို ပြုတတ်၏။” (၂ တိမောသေ ၃:၁၆) ထို့အတူ သမ္မာကျမ်းစာသည် ယနေ့ ယေဟောဝါသက်သေများ ယုံကြည်ခြင်း၏အခြေအမြစ်ဖြစ်သည်။ ယင်းက သူတို့၏အယူဝါဒများကို ပြဋ္ဌာန်းပေးပြီး သူတို့၏အကျင့်အကြံကို ထိန်းကွပ်ပေးသည်။ လူတိုင်းသည် ဘုရားသခင့်နှုတ်ကပါဌ်တော်၏ အပိုင်းတစ်ခုခုကို နေ့စဉ်ဖတ်ရှုပြီး ယင်းဆိုလိုသည့်အချက်များကို ကောင်းစွာဆင်ခြင်သုံးသပ်ရန် သူတို့ စိတ်နှလုံးအကြွင်းမဲ့ ထောက်ခံအားပေးကြသည်။—ဆာလံ ၁:၁-၃။

သမ္မာကျမ်းစာဖတ်ရှုသည့်အလေ့အထ

ကျမ်းစာဖတ်ရှုသည့်အလေ့အထသည် လွန်ခဲ့သည့်အချိန်များ၌ အကျိုးကျေးဇူးများဖြစ်ထွန်းစေခဲ့ပြီ။ ဣသရေလဘုရင်များသည် ပညတ်တော်များ—ယခု သမ္မာကျမ်းစာ၏ အရေးကြီးသည့်အစိတ်အပိုင်းတစ်ခု—ကို ကိုယ်ပိုင်လက်ရေးဖြင့် ကူးရေးပြီး မိမိတို့အတွက် ဘုရားသခင့်အလိုတော်ကို အမြဲတမ်းသတိပေးချက်အနေနှင့် နေ့စဉ်ဖတ်ရှုကြရသည်။ (တရားဟောရာ ၁၇:၁၈-၂၀) ယင်းသို့ပြုရန်ပျက်ကွက်ခြင်းက ဘုရင်များစွာတို့အား ကျရှုံးစေခဲ့သည်။

ကျမ်းစာလေ့လာခြင်း၏တန်ဖိုးကို အသက်ကြီးသူပရောဖက်ဒံယေလ၏ အဖြစ်အပျက်နှင့် ဥပမာပေးနိုင်သည်။ ဒံယေလသည် ဗာဗုလုန်သုံ့ပန်းဘဝတွင်ရှိစဉ် သူ့ခေတ်တွင်ရှိသည့် ကျမ်းစာ၏အစိတ်အပိုင်းများကို ကိုယ်ပိုင်လေ့လာမှုပြုခဲ့သောကြောင့် ယေရမိအားဖြင့်မှတ်တမ်းတင်ခဲ့သည့် ပရောဖက်ပြုချက်သည် ပြည့်စုံလုနီးပြီဖြစ်ကြောင်းကို ‘ကျမ်းစာအားဖြင့် ပိုင်းခြားသိမြင်’ နိုင်ခဲ့သည်။—ဒံယေလ ၉:၂။

ယေရှုမွေးဖွားသည့်အချိန်က “ဖြောင့်မတ်သောသူ၊ တရားကိုရိုသေသောသူ” ဖြစ်သည့် ရှုမောင်သည် ခရစ်တော်၊ သို့မဟုတ် မေရှိယဖြစ်လာမည့်သူကို ရှုမြင်ရန် ယုံကြည်စိတ်ချစွာဖြင့် မျှော်လင့်ခဲ့သည်။ ရှုမောင်သည် ခရစ်တော်ကိုမမြင်မီမသေရဟု ကတိပေးခြင်းခံထားရသည်။ သူငယ်ယေရှုကို လက်ထဲတွင်ပွေ့ချီထားစဉ် ဟေရှာယပရောဖက်ပြုချက်ကို ရည်ညွှန်းပြောဆိုခြင်းက ရှုမောင်သည် သူ့ခေတ်တွင်ရေးသားပြီးစီးထားသော ကျမ်းစာစောင်များကို ဂရုတစိုက်ဖတ်ရှုသူဖြစ်ကြောင်း ဖော်ပြသည်။—လုကာ ၂:၂၅-၃၂; ဟေရှာယ ၄၂:၆။

နှစ်ခြင်းဆရာယောဟန် ဟောပြောနေစဉ်အခါက မေရှိယကို “လူများတို့သည် မျှော်လင့်” နေကြသည်။ ယင်းက ဘာကိုညွှန်ပြသနည်း။ ဂျူးလူမျိုးထဲမှလူများစွာတို့သည် ကျမ်းစာတွင်မှတ်တမ်းတင်ထားသည့် မေရှိယဆိုင်ရာပရောဖက်ပြုချက်များနှင့် အကျွမ်းတဝင်ဖြစ်ကြောင်း တင်ပြသည်။ (လုကာ ၃:၁၅) ယင်းသည် စိတ်ဝင်စားဖွယ်ရာဖြစ်သည်။ အကြောင်းမှာ ထိုအချိန်က စာအုပ်များကို အလွယ်တကူမရနိုင်သောကြောင့်ဖြစ်သည်။ ကျမ်းစာစောင်များကို ဒုက္ခခံ၍ လက်ရေးဖြင့် ဂရုတစိုက်ကူးရေးရသောကြောင့် ယင်းတို့သည် တန်ဖိုးကြီးပြီး ရရှိရန်ခက်ခဲသည်။ လူတို့သည် ယင်းအကြောင်းအရာများနှင့် မည်သို့အကျွမ်းတဝင်ဖြစ်လာကြသနည်း။

အများအားဖြင့် လူထုရှေ့ဖတ်ပြခြင်းအားဖြင့် ဖြစ်သည်။ ဥပမာ၊ သတ်မှတ်ထားသည့်အချိန်တစ်ချိန်တွင် ဘုရားသခင်ပေးထားသည့် ပညတ်တော်တစ်ရပ်လုံးကို ဣသရေလလူထုကြီးအားဖတ်ပြရန် မောရှေအမိန့်ပေးခဲ့သည်။ (တရားဟောရာ ၃၁:၁၀-၁၃) စီ.အီး. ပထမရာစုနှစ်ရောက်သော် သမ္မာကျမ်းစာစောင်များကို လူထုရှေ့ဖတ်ခြင်းသည် အလွန်ကျယ်ပြန့်လာသည်။ တပည့်တော်ယာကုပ် ဤသို့မှတ်တမ်းတင်ထားသည်– “မောရှေ၏ပညတ္တိကျမ်းကို တရားဇရပ်၌ ဥပုသ်နေ့တိုင်းဖတ်ရွတ်သဖြင့် မောရှေ၏တရားကို ရှေးကာလမှစ၍ ခပ်သိမ်းသောမြို့တို့၌ ဟောပြောလေ့ရှိသည်။”—တမန်တော် ၁၅:၂၁

ယနေ့ ကိုယ်ပိုင်ကျမ်းစာအုပ်တစ်အုပ်ရှိရန် မခဲယဉ်းတော့ပါ။ အနည်းဆုံး ဤ “စာအုပ်ငယ်များ” မှ အချို့ကို ကမ္ဘာ့လူဦးရေ ၉၈ ရာခိုင်နှုန်း၏ ဘာသာစကားများဖြင့် ရရှိနိုင်ပြီဖြစ်သည်။ သို့ဖြစ်စေကာမူ လူများစွာတို့သည် မိမိတို့အား သမ္မာကျမ်းစာပြောလိုသည့်အရာများကို လေ့လာဆည်းပူးရန် စိတ်မဝင်စားကြခြင်းမှာ ဝမ်းနည်းစရာဖြစ်သည်။ ဤခေတ်ကို သိပ္ပံခေတ်ဟုပြောနိုင်သော်လည်း ဘုရားသခင့်နှုတ်ကပါဌ်တော်သမ္မာကျမ်းစာသည် သာလွန်ထူးကဲစွာ “သွန်သင်ခြင်းကျေးဇူးများကိုပြု” နေဆဲဖြစ်သည်။ ယင်းသည် စာရိတ္တ၊ လူသားချင်းဆက်ဆံရေးနှင့် အခြားသောကိစ္စရပ်များစွာတို့တွင် ကျန်းခံ့သည့်သြဝါဒကိုပေးသည်။ ထို့အပြင် သမ္မာကျမ်းစာသည် ငြိမ်းချမ်းသည့်အနာဂတ်ဆိုင်ရာ တစ်ခုတည်းသော သေချာသည့်မျှော်လင့်ချက်ကို ပေးသည်။

ယင်းကိုမှန်မှန်ဖတ်ပါ

ထို့ကြောင့် ယေဟောဝါသက်သေတို့သည် သမ္မာကျမ်းစာမှန်မှန်ဖတ်ရှုရန် အားပေးခြင်းကို မိမိတို့အလုပ်၏ ထူးခြားထင်ရှားသည့်အစိတ်အပိုင်းဖြစ်စေကြသည်။ ဘရွတ်ကလင်၊ နယူးယောက်ရှိ သူတို့၏ကမ္ဘာ့ဌာနချုပ်၏ စက်ရုံအဆောက်အအုံပေါ်တွင် စာလုံးကြီးဖြင့် “ဘုရားသခင့်နှုတ်ကပါဌ်တော်သမ္မာကျမ်းစာကို နေ့တိုင်းဖတ်ရှုပါ” ဟူသည့် တိုက်တွန်းချက်ကို ရေးထားသည်။ ဖြတ်သန်းသွားလာသူသန်းပေါင်းများစွာတို့သည် ထိုစာတန်းကိုမြင်ပြီး အတော်များများ ထိုအတိုင်းလုပ်ဆောင်ကြမည်ဟု မျှော်လင့်ပါသည်။

ကမ္ဘာတစ်ခွင်လုံးရှိ ယေဟောဝါသက်သေတို့၏ အသင်းတော် ၇၃,၀၀၀ ကျော်တို့တွင် သီအိုကရက်တစ်ဓမ္မအမှုကျောင်းအစီအစဉ်ကို အပတ်စဉ်ကျင်းပကြသည်။ ထိုအစီအစဉ်၏ အစိတ်အပိုင်းတစ်ခုမှာ ရွေးချယ်ထားသည့်ကျမ်းအစိတ်အပိုင်းတစ်ခုကို လူထုရှေ့ဖတ်ရှုခြင်းဖြစ်သည်။ တက်ရောက်သူအားလုံးကလည်း အပတ်စဉ် ကျမ်းစာအခန်းကြီးအနည်းငယ်ကို မိမိတို့အိမ်တွင် တစ်ဦးချင်းဖတ်ရှုရန် တာဝန်ရထားသည်။ ဤအစီအစဉ်အတိုင်း မှန်မှန်လိုက်လျှောက်သောသူသည် နောက်ဆုံး ကျမ်းစာတစ်အုပ်လုံးကို ဖတ်ဖြစ်သွားသည်။

ဤအစီအစဉ်သည် ဤကျောင်းတွင်အသုံးပြုသည့် သင်ရိုးစာအုပ်တစ်အုပ်နှင့်အညီဖြစ်သည်။ သီအိုကရက်တစ်အမှုဆောင်ကျောင်း လမ်းညွှန်စာအုပ် က ဤသို့ပြောထားသည်– “သင့်ကိုယ်ပိုင်ဇယားတွင် သမ္မာကျမ်းစာဖတ်ရှုရန်အချိန်ကို ပါဝင်စေသင့်သည်။ ယင်းကို အစမှအဆုံး တောက်လျှောက်ဖတ်ပြီးခြင်းသည် အလွန်အကျိုးကြီးပေသည်။ . . . သို့သော် သင့်ပန်းတိုင်မှာ အကြောင်းအရာကိုဖတ်ပြီးရုံမျှသာမဟုတ်ဘဲ ပြန်လည်သတိရနိုင်ရန်ဦးတည်ချက်ဖြင့် ယင်းကို ခြုံငုံသဘောပေါက်ရန် ဖြစ်သင့်သည်။ ယင်းပြောထားသည့်အရာကို ပြန်လည်ဆင်ခြင်သုံးသပ်နိုင်ရန် အချိန်ယူပါ။”

ယေဟောဝါသက်သေများထုတ်ဝေသည့် အခြားသောစာပေများသည်လည်း သမ္မာကျမ်းစာဖတ်ရှုခြင်းကို အလားတူအားပေးသည်။ ဥပမာ၊ ဤဂျာနယ်၏အဖော်အဖက်ဖြစ်သည့် နိုးလော့! မဂ္ဂဇင်းတွင် လူငယ်များအတွက် အောက်ပါအားပေးချက်ပါလာသည်– “ကျမ်းစာတစ်အုပ်လုံးကို တောက်လျှောက် . . . သင်ဖတ်ပြီးပြီလော။ ကျမ်းစာသည် ကြီးမားသည့်စာအုပ်တစ်အုပ်ဖြစ်သည်တော့ မှန်ပါသည်။ သို့သော် ယင်းကို အပိုင်းငယ်ကလေးများအဖြစ်စိတ်ဖြာပြီး ဖတ်ရှုကြည့်ပါ။ . . . ‘စိတ်ထားမြင့်မြတ်သော’ ဗေရိမြို့သားတို့သည် ‘ကျမ်းစာကို နေ့တိုင်း ဂရုတစိုက်ကြည့်ရှုစစ်ဆေး’ ကြသည်။ (တမန်တော် ၁၇:၁၁) တစ်ရက်လျှင် ၁၅ မိနစ်မျှသာ ဖတ်ရှုခြင်းအစီအစဉ်ကို နေ့စဉ်သင်လိုက်လျှောက်သွားလျှင် . . . တစ်နှစ်အတွင်း ကျမ်းစာတစ်အုပ်လုံးကို သင်ဖတ်ပြီးနိုင်သည်။” မှန်ပါသည်၊ မျက်မှောက်ခေတ်ခရစ်ယာန်များသည် ရှေးခေတ်ဘုရားကျေးကျွန်များနည်းတူ သမ္မာကျမ်းစာနှင့် လက်ပွန်းတတီးရှိသင့်သည်ဟု ယေဟောဝါသက်သေများက ယူမှတ်ကြသည်။

ယင်းအတွက်ရည်စူး၍ ယေဟောဝါသက်သေများသည် ၂၀ ရာစုလူထုရှေ့ကျမ်းစာဖတ်ခြင်း၏ အသွင်ကွဲတစ်မျိုးကို ထုတ်လုပ်ထားသည်။ ဘာသာစကားအတော်များများဖြင့် ကျမ်းစာတစ်အုပ်လုံးအတွက် ဖတ်ရှုသည့်အစီအစဉ်ကို အသံသွင်းကက်ဆက်ခွေများ ပြုလုပ်ထားသည်။ ယင်းသည် လူများစွာတို့အတွက် ကျမ်းစာဖတ်ရှုရန်အတားအဆီးများကို အောင်မြင်ကျော်လွှားစေသည်။ အချို့တို့က အိမ်တွင်အလုပ်လုပ်နေလျက်၊ ကားမောင်းလျက် သို့မဟုတ် အခြားအရာများစွာကိုလုပ်နေလျက်နှင့် ယင်းအသံသွင်းခွေများကို နားထောင်ကြသည်။ ကျမ်းစာဖတ်ရှုခြင်းကို အေးအေးဆေးဆေးထိုင်နားထောင်ပြီး သင့်ကျမ်းစာအုပ်တွင် လိုက်ဖတ်ခြင်းသည် နှစ်ခြိုက်ဖွယ်ဖြစ်သည်။

နေ့တိုင်းသမ္မာကျမ်းစာဖတ်ရှုခြင်းကို မလုပ်ရသေးလျှင် အလေ့အထလုပ်ကြည့်ပါလေ။ တစ်နေ့ချင်းအတွက် အချိန်များများစားစားမလိုပါ။ သို့သော် အကျိုးကျေးဇူးကြီးမားလှသည်။ အကြောင်းမှာ ကျမ်းစာကိုလက်တွေ့ကျင့်သုံးခြင်းက သင့်အား ပညာရှိရှိကျင့်ကြံစေပြီး ဝိညာဉ်ဆုကျေးဇူးကြွယ်ဝသည့်အသက်တာကို မွေ့လျော်စေမည်။ ရှေးအချိန်က ဣသရေလခေါင်းဆောင်ယောရှု အမိန့်ပေးခံရသည့်အတိုင်းလည်း သင်လုပ်ဆောင်မည်ဖြစ်သည်– “ထိုပညတ္တိကျမ်းစာ၌ ရေးထားသမျှအတိုင်းကျင့်မည်ဟု စောင့်ရှောက်ခြင်းအလိုငှာ ကျမ်းစာကို မဖတ်မရွတ်ဘဲမနေ၊ နေ့ညမပြတ်ကြည့်ရှုဖတ်ရွတ်ရမည်။ သို့ပြုလျှင် သင်သည် အကြံထမြောက်၍ အောင်မြင်လိမ့်မည်။”—ယောရှု ၁:၈။

သမ္မာကျမ်းစာ၏မှတ်တမ်းများသည် နာခံသူလူသားများအတွက် ယေဟောဝါ၏ မေတ္တာပြည့်ဝသောရည်ရွယ်ချက်များကို ဖော်ပြသည်။ ကိုယ်တော့်မှုတ်သွင်းခံနှုတ်ကပါဌ်တော်၏ တိကျမှန်ကန်သောအသိပညာသည် စစ်မှန်သောပျော်ရွှင်မှုနှင့် အံ့ချီးဖွယ်ကမ္ဘာသစ်တွင် အဆုံးမရှိကောင်းချီးများနှင့်ပြည့်ဝသည့် ပရဒိသုရှိအသက်တာကိုရရှိမည့် မျှော်လင့်ချက်တို့ကို ရရှိစေသည်။ (လုကာ ၂၃:၄၃; ၂ ပေတရု ၃:၁၃) သမ္မာကျမ်းစာဖတ်ရှုလေ့လာပြီး ထိုကောင်းမြတ်သည့်အသက်တာကို လက်လှမ်းယူနိုင်မည့်အခွင့်အရေးကို သင်လက်မလွတ်ပါစေနှင့်။