ဘုရားသခင် ကြားဝင်ဆောင်ရွက်ပေးမှု မည်သို့ပြုမည်ဟု  ကျွန်ုပ်တို့မျှော်လင့်နိုင်သနည်း

ဘီ.စီ.အီး. ရှစ်ရာစုတွင် အသက် ၃၉ နှစ်အရွယ်ရှိ ယုဒရှင်ဘုရင်ဟေဇကိသည် မိမိသေနာစွဲနေကြောင်း သိရှိခဲ့သည်။ ဟေဇကိသည် ထိုသတင်းကြောင့် ဝမ်းနည်းပက်လက်ဖြစ်သွားရာ မိမိ၏ရောဂါကိုပျောက်ကင်းစေဖို့ ဘုရားသခင်ထံ ဆုတောင်းအသနားခံခဲ့သည်။ ဘုရားသခင်က မိမိ၏ပရောဖက်မှတစ်ဆင့် “သင်၏[ဆုတောင်း]စကားကို ငါကြားပြီ။ သင်၏မျက်ရည်ကိုလည်း ငါမြင်ပြီ။ သင်၏အသက်၌ တစ်ဆယ့်ငါးနှစ်ကို ငါဆက်၍ပေးမည်” ဟုဖြေဆိုခဲ့သည်။—ဟေရှာယ ၃၈:၁-၅။

ဘုရားသခင်သည် အဆိုပါအခါသမယတွင် အဘယ်ကြောင့်ကြားဝင် ဆောင်ရွက်ပေးခဲ့သနည်း။ ရာစုနှစ်များအစောပိုင်းက ဖြောင့်မတ်သောဘုရင်ဒါဝိဒ်ကို ဘုရားသခင်က “သင်၏အမျိုးအနွယ်နှင့်၊ သင်၏နိုင်ငံသည် ငါ့ရှေ့မှာအစဉ်အမြဲတည်လိမ့်မည်။ သင်၏ရာဇပလ္လင်သည်လည်း အစဉ်အမြဲတည်လိမ့်မည်” ဟုကတိပြုခဲ့သည်။ မေရှိယသည် ဒါဝိဒ်၏မျိုးနွယ်မှ ဆင်းသက်လာမည်ဟုလည်း ဘုရားသခင်ဖော်ပြခဲ့သည်။ (၂ ဓမ္မရာဇဝင် ၇:၁၆; ဆာလံ ၈၉:၂၀၊ ၂၆-၂၉; ဟေရှာယ ၁၁:၁) ဟေဇကိဖျားနာချိန်တွင် သူ၌ သားမရှိသေးချေ။ ထို့ကြောင့် ဒါဝိဒ်မင်းဆက် ပြတ်သွားမည့်အန္တရာယ်ရှိနေသည်။ ဟေဇကိကိစ္စတွင် ဘုရားသခင့်ကြားဝင်ပေးမှုက မေရှိယပေါ်ထွန်းမည့်မျိုးနွယ်အား ထိန်းသိမ်းပေးသည့်အထူးရည်ရွယ်ချက်ကို ဖြစ်မြောက်စေခဲ့၏။

ယေဟောဝါသည် မိမိ၏ကတိတော်များပြည့်စုံစေရန် ခရစ်ယာန်ခေတ်မတိုင်မီတစ်လျှောက်တွင် မိမိ၏လူမျိုးတော်အတွက် မကြာခဏကြားဝင် ဆောင်ရွက်ပေးခဲ့သည်။ အီဂျစ်ပြည်တွင် ကျွန်ခံရသောဘဝမှ ဣသရေလလူမျိုး လွတ်မြောက်လာခြင်းနှင့်စပ်လျဉ်း၍ မောရှေ ဤသို့အတိအလင်းပြောခဲ့သည်– “ထာဝရဘုရားသည် သင့်ကိုချစ်သောကြောင့်လည်းကောင်း၊ သင်၏ဘိုးဘေးတို့အား ကျိန်ဆိုတော်မူသော အကျိန်ကိုမဖျက်လိုသောကြောင့်လည်းကောင်း . . . အားကြီးသောလက်တော်နှင့် သင့်ကိုရွေးနုတ်ဆောင်ယူခဲ့တော်မူပြီ။”—တရားဟောရာ ၇:၈။

ပထမရာစုတွင်လည်း ဘုရားသခင့်ကြားဝင်မှုသည် ကိုယ်တော်၏ရည်ရွယ်ချက်များကို ပြည့်စုံစေခဲ့သည်။ သာဓကအနေနှင့် ရှောလုအမည်ရှိသူ ဂျူးတစ်ဦးသည် ဒမာသက်မြို့သို့အသွား လမ်းတွင် အံ့ဖွယ်အဆင်းအာရုံတစ်ခုကို ရရှိခဲ့သည်၊ ခရစ်တော်၏တပည့်များကို နှိပ်စက်ညှဉ်းဆဲခြင်းမှ သူရပ်တန့်သွားစေဖို့ဖြစ်၏။ တမန်တော်ပေါလုဖြစ်လာသူ၏ ဘာသာပြောင်းလဲခြင်းသည် လူမျိုးခြားတို့ထံ သတင်းကောင်းပျံ့နှံ့သွားရန် အလွန်အရေးပါခဲ့သည်။—တမန်တော် ၉:၁-၁၆; ရောမ ၁၁:၁၃။

ကြားဝင်ခြင်း ဖြစ်ရိုးဖြစ်စဉ်လော

ဘုရားသခင့်ကြားဝင်မှုသည် ထုံးနည်းအတိုင်းလော၊ ဖြစ်ရိုးဖြစ်စဉ်နှင့် ကွဲလွဲသည့်အရာလော။ သမ္မာကျမ်းစာက ယင်းသည် ဖြစ်ရိုးဖြစ်စဉ်မဟုတ်ကြောင်း အတိအလင်းဖော်ပြသည်။ ဘုရားသခင်သည် ဟေဗြဲလူငယ်သုံးဦးကို မီးဖိုထဲ ကွပ်မျက်ခံရခြင်းမှ၊ ပရောဖက်ဒံယေလကို ခြင်္သေ့တွင်းထဲမှ ကယ်လွှတ်ခဲ့သော်လည်း အခြားသောပရောဖက်များကို သေခြင်းမှ မကာကွယ်ပေးခဲ့ပါ။ (၂ ရာဇဝင်ချုပ် ၂၄:၂၀၊ ၂၁; ဒံယေလ ၃:၂၁-၂၇; ၆:၁၆-၂၂; ဟေဗြဲ ၁၁:၃၇) ပေတရုသည် ဟေရုဒ်အဂြိပ္ပ ၁ အကျဉ်းချထားသောထောင်ထဲမှ အံ့ဖွယ်နည်းဖြင့် လွတ်မြောက်ခဲ့သည်။ သို့တိုင် အဆိုပါမင်းကြီးက တမန်တော်ယာကုပ်ကို သေဒဏ်ပေးခဲ့ရာ ၎င်းရာဇဝတ်မှုကို တားဆီးဖို့ ဘုရားသခင်ကြားဝင် ဆောင်ရွက်မပေးခဲ့ချေ။ (တမန်တော် ၁၂:၁-၁၁) ဘုရားသခင်သည် လူနာများကိုကုသရန်နှင့် သေလွန်သူများကို ထမြောက်စေရန်ပင် တမန်တော်များကို တန်ခိုးပေးသနားသော်လည်း တမန်တော်ပေါလုကို ဖိစီးနေသော ရောဂါဝေဒနာတစ်မျိုးဖြစ်ကောင်းဖြစ်မည့် “ကိုယ်၌စူးသောဆူးကို” ဖယ်ရှားရန် ကိုယ်တော်သဘောမတူခဲ့ပါ။—၂ ကောရိန္သု ၁၂:၇-၉; တမန်တော် ၉:၃၂-၄၁; ၁ ကောရိန္သု ၁၂:၂၈။

ရောမဧကရာဇ်နီရိုက ခရစ်တော်၏တပည့်များအပေါ် နှိပ်စက်ညှဉ်းပန်းမှုလှိုင်းလုံးကြီး ကျရောက်စေခြင်းကို ဘုရားသခင် ကြားဝင်၍မတားဆီးပေးခဲ့ချေ။ ခရစ်ယာန်များသည် အပြင်းအထန်နှိပ်စက်ညှဉ်းပန်းခံခဲ့ရ၊ အရှင်လတ်လတ်မီးရှို့ခံခဲ့ရပြီး သားရဲတိရစ္ဆာန်များအစာဖြစ်ခဲ့ကြရသည်။ သို့သော် ဤအတိုက်အခံပြုမှုက အစောပိုင်းခရစ်ယာန်များကို အံ့အားမသင့်စေခဲ့သည်နည်းတူ ဘုရားသခင်တည်ရှိကြောင်း သူတို့၏ယုံကြည်မှုကိုလည်း လုံးဝအားမနည်းစေခဲ့ချေ။ အမှန်မှာ မိမိ၏တပည့်များသည် တရားရုံးများရှေ့ ရောက်မည်ဖြစ်ကြောင်း၊ မိမိတို့ယုံကြည်ခြင်းအတွက် ဆင်းရဲဝေဒနာခံရပြီး သေဖို့ပင် အသင့်ရှိသင့်ကြောင်း ယေရှုသတိပေးခဲ့သည်။—မဿဲ ၁၀:၁၇-၂၂။

ဘုရားသခင်သည် အတိတ်ကပြုလုပ်ခဲ့သည့်နည်းတူ ယနေ့ မိမိ၏ကျေးကျွန်များကို အန္တရာယ်ရှိသည့်အခြေအနေများမှ အမှန်ကယ်လွှတ်နိုင်ပါသည်၊ မိမိတို့ကို ကိုယ်တော်ကာကွယ်ပေးခဲ့သည်ဟု ယူမှတ်သူများကို ဝေဖန်အကဲဖြတ်စရာမဟုတ်ပါ။ သို့သော် အဆိုပါကိစ္စများတွင် ဘုရားသခင်ကြားဝင်ခဲ့၊ မဝင်ခဲ့ဆိုသည်ကို အခိုင်အမာပြောဖို့ခက်သည်။ တူလူ့စ်မြို့ပေါက်ကွဲမှုတွင် ယေဟောဝါ၏တည်ကြည်သောကျေးကျွန် အတော်များများ ဒဏ်ရာရခဲ့ကြရ၏၊ ထောင်နှင့်ချီသောသစ္စာရှိခရစ်ယာန်များသည် နာဇီနှင့် ကွန်မြူနစ်စခန်းများတွင် သို့မဟုတ် အခြားကြေကွဲဖွယ်ဖြစ်ရပ်များကြောင့် သေဆုံးခဲ့ရာတွင် ဘုရားသခင်၏ ကြားဝင်ကာကွယ်မှုမခံခဲ့ရချေ။ ဘုရားသခင်သည် မျက်နှာသာရသူအားလုံးအတွက် အဘယ်ကြောင့် စနစ်တကျကြားဝင်ဆောင်ရွက်မပေးသနည်း။—ဒံယေလ ၃:၁၇၊ ၁၈။

‘အချိန်နှင့်ကြိုတင်မမြင်ရသောဖြစ်ပျက်မှု’

ရုတ်တရက်ကပ်ဆိုက်သောအခါ မည်သူမဆိုဘေးဒဏ်ခံရနိုင်ဖွယ်ရှိ၏၊ ဘုရားသခင်အပေါ် တည်ကြည်မှုရှိခြင်းနှင့် မဆိုင်ပါ။ တူလူ့စ်မြို့ ပေါက်ကွဲမှုတွင် အပြစ်မဲ့သူ လူ ၃၀ သေဆုံးခဲ့ပြီး ရာနှင့်ချီဒဏ်ရာရခဲ့သော်လည်း အလဲန်းနှင့် လေးလီယံတို့လွတ်မြောက်ခဲ့ကြသည်။ ထိုထက်မက လူပေါင်း ထောင်သောင်းချီ၍ ရာဇဝတ်မှုဒဏ်၊ မဆင်မခြင်မောင်းနှင်မှုဒဏ် သို့မဟုတ် စစ်ဘေးဒဏ်များကိုခံရကြ၏၊ ဤသူတို့၏အကြောင်းမလှမှုသည် ဘုရားသခင်ကြောင့်ဟု မဆိုနိုင်ပါ။ ခပ်သိမ်းသောသူတို့၌ ‘အချိန်နှင့်ကြိုတင်မမြင်ရသောဖြစ်ပျက်မှုများ ဖြစ်တတ်၏’ ဟုသမ္မာကျမ်းစာက သတိပေးထားပါသည်။—ဒေ. ၉:၁၁၊ ကဘ။

ထို့အပြင် ဖျားနာခြင်း၊ အသက်ကြီးရင့်လာခြင်းနှင့် သေခြင်းတို့ကို လူတို့ကြုံတွေ့ကြရသည်။ ဘုရားသခင်သည် မိမိတို့အသက်ကို အံ့ဖွယ်နည်းဖြင့်ကယ်ခဲ့သည်ဟု ယူဆသူများ၊ မမျှော်လင့်ဘဲ ပြန်ကျန်းမာလာခြင်းသည် ကိုယ်တော့်ကြောင့်ဟု ယူမှတ်သူများပင် နောက်ဆုံးတွင် သေရကြသည်။ ဖျားနာခြင်းနှင့် သေခြင်းမရှိ၊ လူတို့၏မျက်စိမှ ‘မျက်ရည်ရှိသမျှကို သုတ်တော်မူ’ မည့်အချိန်သည် အနာဂတ်တွင်ဖြစ်၏။—ဗျာ. ၂၁:၁-၄။

ထိုသို့ဖြစ်ပျက်ရန် တစ်ခါတစ်ရံ ကြားဝင်ဆောင်ရွက်ပေးခြင်းထက် သာ၍ကြီးမားကျယ်ပြန့်သော ကြားဝင်ဆောင်ရွက်မှုလိုအပ်သည်။ သမ္မာကျမ်းစာက ‘ယေဟောဝါ၏နေ့ကြီး’ အကြောင်း ဖော်ပြသည်။ (ဇေဖနိ ၁:၁၄၊ ကဘ) ကြီးမားကျယ်ပြန့်သော ဤကြားဝင်ဆောင်ရွက်မှုတွင် ဘုရားသခင်သည် ဆိုးသွမ်းမှုဟူသ၍ကို ဖယ်ရှားပစ်မည်။ လူအပေါင်းသည် စုံလင်သောအခြေအနေများအောက် ထာဝစဉ်အသက်ရှင်ဖို့ အခွင့်အလမ်းရရှိကြပါလိမ့်မည်၊ ထိုအခါ “အရင်ဖြစ်ဖူးသောအရာများကိုသတိမရ၊ မှတ်မိတော့မည်မဟုတ်။” (ဟေရှာယ ၆၅:၁၇၊ သမ္မာ) သေလွန်သူများပင် အသက်ပြန်ရှင်လာကြမည်ဖြစ်ရာ လူတို့၏ အကြီးမားဆုံးဝမ်းနည်းပူဆွေးမှုမရှိတော့ဘဲ ပြောင်းပြန်အခြေအနေသာ ရှိလာပါလိမ့်မည်။ (ယောဟန် ၅:၂၈၊ ၂၉) ထိုအခါ ဘုရားသခင်၏ အဆုံးမဲ့မေတ္တာနှင့် ကောင်းမြတ်ခြင်းတို့ကြောင့် လူ့ပြဿနာများအားလုံး အပြီးသတ် ဖြေရှင်းပေးပြီးသား ဖြစ်ပါလိမ့်မည်။

ယနေ့ ဘုရားသခင်ကြားဝင်ဆောင်ရွက်ပုံ

သို့သော် ဤသို့ဆိုသောကြောင့် ဖန်ဆင်းခံရသူများ ဝေဒနာခံစားနေရခြင်းကို လောလောဆယ်အချိန်တွင် ဘုရားသခင်လက်ပိုက်ကြည့်နေသည်ဟု မဆိုလိုပါ။ ယနေ့ လူမျိုးမရွေး၊ လူမှုရေးနောက်ခံမရွေး လူအပေါင်း ဘုရားသခင်ကို သိကျွမ်းလာပြီး ကိုယ်တော်နှင့် နှစ်ကိုယ်ကြားဆက်ဆံရေးရှိနိုင်ကြဖို့ အခွင့်အလမ်းကို ကိုယ်တော်ကမ်းလှမ်းနေတော်မူ၏။ (၁ တိမောသေ ၂:၃၊ ၄) ၎င်းအစီအစဉ်ကို ယေရှုဤသို့ထုတ်ဖော်ပြောဆိုခဲ့သည်– “ငါ့ကိုစေလွှတ်တော်မူသော ခမည်းတော်သည် သွေးဆောင်တော်မမူလျှင်၊ အဘယ်သူမျှ ငါ့ထံသို့မလာနိုင်။” (ယောဟန် ၆:၄၄) ဘုရားသခင်သည် စိတ်ရိုးဖြောင့်သူတို့ကို ကိုယ်တော်၏ကျေးကျွန်များ ကမ္ဘာတစ်ဝန်းတွင်ကြေညာနေသော နိုင်ငံတော်သတင်းအားဖြင့် သွေးဆောင်တော်မူ၏။

ထို့ပြင် ဘုရားသခင့်လမ်းပြမှု ခံယူလိုသူတို့ကို ကိုယ်တော်တိုင် လမ်းညွှန်ပေးတော်မူ၏။ ဘုရားသခင်သည် သန့်ရှင်းသောဝိညာဉ်တော်အားဖြင့် အလိုတော်ကိုနားလည်စေပြီး ကိုယ်တော်တောင်းဆိုရာတို့ကို လက်တွေ့ကျင့်သုံးနိုင်ကြစေရန် ‘သူတို့၏စိတ်နှလုံးကိုဖွင့်ပေး’ လျက်ရှိသည်။ (တမန်တော် ၁၆:၁၄) ဘုရားသခင်သည် ကိုယ်တော့်ကိုလည်းကောင်း၊ ကိုယ်တော်၏နှုတ်မြွက်စကားတော်နှင့် ကိုယ်တော်၏ရည်ရွယ်ချက်များကိုလည်းကောင်း သိရှိခွင့်ပေးခြင်းအားဖြင့် ကျွန်ုပ်တို့တစ်ယောက်စီကို မေတ္တာပါပါ စိတ်ဝင်စားကြောင်း သက်သေပြတော်မူ၏။—ယောဟန် ၁၇:၃။

နောက်ဆုံးအနေဖြင့် ဘုရားသခင်သည် မျက်မှောက်ခေတ်တွင် မိမိ၏ကျေးကျွန်များကို အံ့ဖွယ်နည်းဖြင့်လွတ်မြောက်စေသည်မဟုတ်ဘဲ သူတို့ကြုံတွေ့နေကြရသော မည်သည့်အခြေအနေမျိုးကိုမဆို ခံရပ်နိုင်ဖို့ သန့်ရှင်းသောဝိညာဉ်တော်နှင့် ‘သာမန်ထက်ထူးကဲသော တန်ခိုးတော်’ ကိုပေးခြင်းဖြင့် ထောက်မတော်မူ၏။ (၂ ကောရိန္သု ၄:၇၊ ကဘ) တမန်တော်ပေါလုက “ငါ့ကိုခွန်အားနှင့် ပြည့်စုံစေတော်မူသောအရှင် [ယေဟောဝါဘုရားသခင်] အားဖြင့် ခပ်သိမ်းသောအမှုကို ငါတတ်စွမ်းနိုင်၏” ဟုရေးသားခဲ့သည်။—ဖိလိပ္ပိ ၄:၁၃၊ သမ္မာ။

ထို့ကြောင့် ကျွန်ုပ်တို့သည် အသက်ရှင်ရသည့်အတွက်၊ ဆင်းရဲခြင်းဝေဒနာကင်းသည့် ကမ္ဘာတွင် ထာဝစဉ်အသက်ရှင်ဖို့မျှော်လင့်ချက် ကမ်းလှမ်းပေးသည့်အတွက် ဘုရားသခင်ကို နေ့စဉ်ကျေးဇူးတင်စရာအကြောင်း များစွာရှိသည်။ “ငါ၌ ထာဝရဘုရားပြုတော်မူသော ကျေးဇူးအလုံးစုံတို့ကို အဘယ်သို့ဆပ်ရမည်နည်း” ဟုဆာလံဆရာမေးခဲ့သည်။ “ကယ်တင်ခြင်းခွက်ဖလားကိုကိုင်ယူ၍ ထာဝရဘုရား၏နာမတော်ကို [ဆုတောင်း] မည်။” (ဆာလံ ၁၁၆:၁၂၊ ၁၃) ဤမဂ္ဂဇင်းကို မှန်မှန်ဖတ်ရှုခြင်းက ဘုရားသခင်ပြုလုပ်ခဲ့သည့်အရာများ၊ ပြုလုပ်နေသောအရာများနှင့် ပြုလုပ်ပေးမည့်အရာတို့ကို သင့်အား သိနားလည်စေမည်ဖြစ်ပြီး လောလောဆယ်ပင် သင်ပျော်ရွှင်နိုင်မည်ဖြစ်၍ အနာဂတ်အတွက် ခိုင်ခံ့သောမျှော်လင့်ချက် ရှိစေနိုင်ပါလိမ့်မည်။—၁ တိမောသေ ၄:၈။

[စာမျက်နှာ ၆ ပါ အကျဉ်းဖော်ပြချက်]

“အရင်ဖြစ်ဖူးသောအရာများကို သတိမရ၊ မှတ်မိတော့မည် မဟုတ်။”—ဟေရှာယ ၆၅:၁၇၊ သမ္မာ။

[စာမျက်နှာ ၅ ပါ ရုပ်ပုံ]

ကျမ်းစာခေတ်တွင် ကျောက်ခဲနှင့် ဇာခရိအား ပေါက်သတ်ခြင်းကို ယေဟောဝါမတားဆီးခဲ့ . . .

အပြစ်မဲ့သူများကို ဟေရုဒ်သိမ်းရုံးသတ်ဖြတ်ခြင်းကိုလည်း မတားဆီးခဲ့

[စာမျက်နှာ ၇ ပါ ရုပ်ပုံ]

ဆင်းရဲခြင်းဝေဒနာ မရှိတော့မည့်အချိန် ရောက်လုနီးပြီ; သေလွန်သူများပင် ပြန်ရှင်လာကြလိမ့်မည်