ထိရောက်သောကျမ်းစာသင်အံမှုများအားဖြင့် နှလုံးထိမိစေခြင်း

^၁ ခမည်းတော်အလိုတော်ဆောင်ရွက်ခြင်း၌ ယေရှုပျော်မွေ့သည့်ပြင် သူတစ်ပါးလည်းဆောင်ရွက်နိုင်ရန် ဝမ်းမြောက်ဝမ်းသာကူညီပေးတော်မူခဲ့သည်။ (ဆာ၊ ၄၀:၈။ မ၊ ၉:၃၇၊ ၃၈။ ၁၁:၂၈-၃၀) သတင်းတရားပေးရုံမျှနှင့် ယေရှုကျေနပ်မနေပါ။ သတင်းကောင်းဟောပြောခြင်းလုပ်ငန်းတွင် အခြားသူများ ကျွန်ုပ်တို့နှင့်အတူပါဝင်စေရန် ကျွန်ုပ်တို့ကျမ်းစာသင်သားများ၏နှလုံးကို ထိမိစေရမည်။ ဤသို့ပြုရာတွင် စာအုပ်တစ်အုပ်ကို မေးဖြေပြုလုပ်ရုံမကပါဝင်သည်။ နှလုံးထိမိစေရန် သင်သား၏သဘောကိုထည့်တွက်၍ ကြိုတင်ပြင်ဆင်ပေးရန်လိုအပ်သည်။

^၂ သူတစ်ပါးအကျိုးကို ယေရှုလိုလားခဲ့သည်။ သူတို့ကြည့်မြင်ပုံကို သူထည့်စဉ်းစားသည်။ ခက်ခဲသောအကြောင်းများကို ဥပမာများသုံးခြင်းဖြင့် နားလည်ရလွယ်ကူစေသည်။ (မ၊ အခန်း ၅-၇) သူတို့ရင်ဆိုင်ရမည့်ပြဿနာများကို ကြိုမြင်ကာ ယေရှုသည် လျောက်ပတ်စွာဆုံးမပေးသည်။ (မာ၊ ၉:၃၃-၃၇) ကိုယ်တော်၏ပရိသတ်သည် သူ၏သွန်သင်ချက်ကို ချက်ချင်းသဘောမပေါက်နိုင်ကြသောအခါ သူပြောလိုသောအကြောင်းကို စိတ်ရှည်လက်ရှည်ဥပမာပေး၍ရှင်းပြခဲ့သည်။ (မ၊ ၁၆:၅-၁၂) ယေရှုနည်းတူ သူတစ်ပါးအကျိုးနက်ရှိုင်းစွာလိုလားစိတ်ရှိပါက ‘ငါသာသင်သားဖြစ်လျှင် သင်အံနေသည့်အကြောင်းကို သဘောပေါက်နားလည်ကာ လှုံ့ဆော်တိုက်တွန်းခံရရန် ဘာကိုသိဖို့လိုမည်နည်း’ ဟုကိုယ်ကိုယ်ကိုမေးရန် တိုက်တွန်းခံသင့်သည်။​—၁၉၇၁ Yearbook၊ စာမျက်နှာ ၂၄၆-၇ ကိုသတိပြုပါ။

ကျမ်းစာကိုပေါ်လွင်စေ

^၃ သက်သေခံချက်ကို လွယ်ကူစွာလက်သင့်ခံနိုင်သည်ကားအဘယ်နည်းဟု မောင်နှံစုံတစ်စုံအားမေးခဲ့ရာ သူတို့က “ကျမ်းစာထဲပါရှိနေသည့်အတွက်ကြောင့်” ဟုဖြေဆိုသည်။ မှန်ပေသည်၊ ဘုရားသခင့်နှုတ်ကပါဌ်တော်သည် နှလုံးကိုထိမိသည်။ (ဟေ၊ ၄:၁၂) ယင်းကို မကြာခဏကိုးကား၍ အပိုဒ်များပါကျမ်းချက်များကို အသုံးပြုပါ။ လမ်းစဉ်တစ်ခုသည် အဘယ်ကြောင့် ပညာရှိသည်၊ မိုက်မဲရသည့်အကြောင်း သင်သားနားလည်ရန်ကူညီပေးပါ။ ဘုရားသခင့်ပညတ်တော်များကို နာခံခြင်းသည် သူ့အားမည်သို့အကျိုးပြုမည့်အကြောင်း သွေးဆောင်ဆင်ခြင်ပေးပါ။​—ကင်းမျှော်စင် ၁၉၈၅၊ ဩဂုတ်လ ၁ ရက်ထုတ်၊ စာမျက်နှာ ၁၆၊ ၁၇ ကိုကြည့်ပါ။

^၄ သမ္မာကျမ်းစာကိုပေါ်လွင်စေရန်Reasoning စာအုပ်အသုံးပြုခြင်းသည် အလွန်ထိရောက်ကြောင်း တွေ့ရှိခဲ့ကြပြီ။ ဥပမာ၊ ထာဝစဉ်အသက်ရှင်စာအုပ် စာမျက်နှာ ၁၂၄၊ အပိုဒ် ၁၃ ကိုသုံးသပ်စဉ် ဘုရားသခင်သည်ကောင်းကင်တွင် မိမိနှင့်အတူကလေးများကိုခေါ်ထားလိုသဖြင့်ကလေးများသေရသည်ဟု ဓမ္မဆရာများအဘယ်ကြောင့်ပြောရကြောင်း အိမ်ရှင်မေးမြန်းပေမည်။ Reasoning စာအုပ် စာမျက်နှာ ၉၉ ပါ “နို့စို့သူငယ်များ အဘယ်ကြောင့်သေရသနည်း” အကြောင်းက မိသားစုအစီအစဉ်ကို ယေဟောဝါမပျက်စီးစေလိုကြောင်း အလေးအနက်ဖေါ်ပြသည်။ ဤအကြောင်းအရာသည် လူသားကိုယေဟောဝါချစ်မြတ်နိုးကြောင်း မေးမြန်းလိုသူအား စိတ်ချစေပေမည်။

မေးခွန်းများမေး

^၅ မေးခွန်းများကို ထိရောက်စွာအသုံးပြုခြင်းအားဖြင့် လူတို့အားယေရှုစဉ်းစားဆင်ခြင်တတ်စေသည်။ (မ၊ ၁၇:၂၄-၂၇) သင်သား၏အဖြေမှ သူမည်မျှတတ်သိနေကြောင်း၊ ကျမ်းစာနှင့်ဆိုင်သော မည်သည့်ကြည့်မြင်ချက်များကို သူဆက်ခံယူထားနေကြောင်း သိနိုင်ပေသည်။ ဆေးလိပ်သောက်တတ်သည့်အကျင့်ကို သူကြိုးစားဖျက်နေပေမည်။ ထာဝစဉ်အသက်ရှင်စာအုပ်အခန်း ၂၇ ပါအကြောင်းနှင့် ၁၉၈၉ ဇူလိုင် ၈ ရက်ထုတ် Awake! စာမျက်နှာ ၁၃-၁၆ ပါအကြောင်းများကိုလည်း သူနှင့်သုံးသပ်ပြီးပြီဖြစ်မည်။ ဆေးလိပ်ဖြတ်ဖို့လိုကြောင်း သူသိရှိနေမည်။ သို့ရာတွင် အဘယ်ကြောင့်ဖြတ်ဖို့သင့်ကြောင်း သူကောင်းစွာသဘောပေါက်ပါသလော။ သင်ဤသို့မေးအံ့။ “အကယ်၍ သင်ယခုချက်ချင်းဖြတ်လိုက်၍ သင့်မိတ်ဆွေများကကဲ့ရဲ့မည်ဆိုလျှင် မည်သို့သဘောရမည်နည်း။ သင်ဘာလုပ်မည်နည်း။”

^၆ သို့သော် သတိထားစရာရှိသည်။ တစ်ခါတစ်ရံ ဤကဲ့သို့သောမေးခွန်းများမေးလိုက်၍ သင့်အားအံ့သြစရာ၊ စိတ်ပျက်စရာအဖြေများရကောင်းရမည်။ ထိုအခါမည်သို့ဖြစ်မည်နည်း။ စိတ်ထိခိုက်စရာအကြောင်းဖြစ်နေပါက အမှန်ကိုမရမကတောင်းဆိုမည့်အစား “အခုနေပါစေအုံး။ ဆက်လေ့လာစို့။ နောက်မှဤအကြောင်းဆက်ဆွေးနွေးစို့” ဟုပြောနိုင်သည်။ သို့မဟုတ် “စဉ်းစားစရာဘဲနော်” ဟူ၍ပြောနိုင်သည်။ (ယော၊ ၁၆:၁၂) ယင်းကိစ္စကို သင်သားမည်သို့သဘောထားကြောင်းသိရှိထားရာ ဆက်တိုးတက်နိုင်ရန် သူ့အတွက်အကူအညီဖြစ်စေမည့်အကြောင်းကို ပြင်ဆင်နိုင်မည်။ နှလုံးကိုလှုံ့ဆော်ပေးနိုင်ရန်ကြိုးစားသင့်သည်။ ဝိညာဉ်ရေးဘက်သူ့အားတိုးတက်စေဖို့ ယေဟောဝါအားကူညီပေးပါရန် ဆုတောင်းပေးသင့်သည်။​—၁ ကော၊ ၃:၅-၉။

^၇ ကျမ်းစာသင်အံမှုကျင်းပသည့်အခါ သုံးသပ်နေသည့်အကြောင်းအရာကို သင်သားနှင့်အချိန်ယူပြီး အမြဲဆင်ခြင်ပေးပါ။ သူအထူးလိုအပ်သည့်အရာကိုဖြည့်စွက်ပေးရန် သင့်သွန်သင်နည်းကို ပြုပြင်ပြောင်းလဲပေးပါ။ ယေဟောဝါရှင်၊ သမ္မာကျမ်းစာနှင့် ယေဟောဝါ၏အဖွဲ့အစည်းကိုနက်ရှိုင်းစွာ တန်ဖိုးထားမြတ်နိုးမှုရှိလာရန် ကြိုးစားပေးပါ။ ထိရောက်သောကျမ်းစာသင်အံမှုများ ကြိုးစားကျင်းပပေးခြင်းအားဖြင့် ခရစ်တော်တပည့်များဖြစ်လာစေရန် သူတစ်ပါးကိုအတတ်နိုင်ဆုံးကူညီပေးကြစို့။​—တ၊ ၂:၄၁-၄၆။