နွေရာသီအတွင်း သီအိုကရက်တစ် လုပ်ငန်းများကိုအဆက်မပြတ် လုပ်ဆောင်လေ

^၁ နွေရာသီတွင် လုပ်ငန်းကိုင်ငန်း အမျိုးမျိုးဆောင်ရွက်ခွင့် ရရှိကြသည်။ ခြေခင်းလက်ခင်းသာချိန်ကို အခွင့်အရေးယူကာ တစ်မူထူးခြားသည့် စိတ်ဖျော်ဖြေရာလုပ်ငန်းတစ်ခုခုကို လုပ်ကိုင်လိုသူများသည်။ သို့ရာတွင် ကျွန်ုပ်တို့၏ သီအိုကရက်တစ် လုပ်ရိုးလုပ်စဉ် မပျက်စီးစေရန် သတိပြုဖို့လိုပါသည်။—ဖိ. ၃:၁၆။

^၂ အထူးအစည်းအဝေးနေ့နှင့် တိုက်နယ်အစည်းအဝေး တက်ခဲ့ကြ၍ ပျော်ရွှင်ခဲ့ကြပြီ။ ယခုဆိုလျှင် ကြီးမြတ်သော စံနမူနာရှင် ယေရှုခရစ်တော်နောက် အနီးကပ်လိုက်လျှောက်ရန် အသင့်ရှိကြပြီ။ နိုင်ငံတော်ကို ရှေ့ဦးစွာဆက်၍ ရှာနေနိုင်သည့်နည်းကိုလည်း သွန်သင်ခံခဲ့ကြပြီ။ အဖွဲ့အစည်းအားဖြင့် မေတ္တာရှင် ဘုရားသခင် ပြင်ဆင်ပေးတော်မူသော ဤစည်းဝေးပွဲများသည် ကျွန်ုပ်တို့အသက်တာအပေါ် များစွာအကျိုးပြုသည်။ တတ်သိခဲ့သမျှကို အသုံးပြုသင့်ပါသည်။ မည်သည့်အရာကိုမဆို စဉ်းစား၊ စီစဉ်၊ လုပ်ကိုင်သည့်အခါ ယေရှုနှင့် ကိုယ်တော်၏ နိုင်ငံတော်ကို ဆက်၍ ရှေ့ဦးထားကြစို့။

^၃ ကျောင်းပိတ်ချိန်အတွင်း၊ အစရှိသောအချိန်တွင် အချိန်ပိုရှိမည်ဆိုလျှင် ဓမ္မအမှု၌ တိုးချဲ့ပါဝင်မည်ဟု စဉ်းစားခဲ့ဖူးပါသလော။ ကျောင်းပိတ်ချိန်သည် အရန်ရှေ့ဆောင်ရန် အခန့်သင့်အချိန်ဖြစ်ကြောင်း တွေ့ရှိသူ များစွာရှိပါသည်။ ယင်းသည် မှန်မှန်ရှေ့ဆောင်အဖြစ် လုပ်ဆောင်ခွင့်ကို လမ်းဖွင့်ပေးသည်။ ဓမ္မအမှုတွင် တစ်ရက်လုံး အတူတကွ ပါဝင်ခြင်းအားဖြင့် ပျော်ရွှင်မှုအစစ်အမှန်ကို မိသားစုလိုက် ခံစားနိုင်ပါသည်။ မည်သို့ရှိစေကာမူ လုပ်ငန်းတော်၌ သင့်အချိန်ကို တိုးများစေနိုင်မည်လော။ ခြေခင်းလက်ခင်းသာ၍ နေ့တာရှည်လာသည့်အတွက်လည်း ညနေခင်း သက်သေခံလုပ်ငန်း၌ ပါဝင်ခြင်းဖြင့် ပို၍အကျိုးကျေးဇူးများ ခံစားနိုင်သည်။

^၄ အကူအညီ ပိုလိုအပ်သောနေရာတွင် အသင်နှင့်တွဲ၍ တစ်ပတ်နှစ်ပတ် အမှုဆောင်ရွက်လိုသူများ သင့်အသင်းတော်တွင် ရှိကောင်းရှိမည်။ သင့်အုပ်စုတွင် လူနည်းစုသာ ရှိမည်ဆိုလျှင် အနီးအနားရှိ အသင်းတော်မှ ကြေညာသူများသည် သင်နှင့်အတူ လိုက်သွားလိုပေမည်။ ခရီးဝေးဝေးမသွားနိုင်ပါက သင့်အကူအညီကို တန်ဖိုးထားမည့် အနီးအနားရှိ အသင်းတော်တစ်ခုကို တိုက်နယ်ကြီးကြပ်မှူး အကြံပြုနိုင်ပါလိမ့်မည်။

^၅ အပန်းဖြေ ခရီးထွက်ရန် သင်စီစဉ်နေပါသလော။ သို့ဖြစ်လျှင် သင်လည်ပတ်ရောက်ရှိမည့်နေရာတွင် စည်းဝေးများတက်ရန် အစီအစဉ်ရှိသလော။ ထိုဒေသရှိ ညီအစ်ကိုများနှင့်အတူ လယ်ကွင်းလုပ်ငန်းတွင် ပါဝင်ခြင်းကော။ သင့်ခရီးစဉ်တွင် ဤအစီအစဉ်များ ထည့်သွင်းပေးခြင်းအားဖြင့် သင့်အတွက်သာမက အခြားသူများအတွက်ပါ အကျိုးဖြစ်ထွန်းစေမည်။ (ရော. ၁:၁၁၊ ၁၂) ထို့ပြင် ခရီးသွားလာစဉ် အလွတ်သဘောသက်သေခံနိုင်မည်လော။ သင့်ကျမ်းစာအပြင် စာပေစာတမ်းများ အလုံအလောက်ယူဆောင်သွားပါ။ အားလပ်ချိန်ကို ဖတ်ရှုစရာတို့အား အလျင်မီဖတ်ပြီးရန်နှင့် ကျမ်းစာလေ့လာရန်အသုံးပြုပါ။ ဝမ်းစာရှာရေးမှ ရံဖန်ရံခါ အပန်းဖြေအနားယူဖို့လိုသည်မှန်သော်လည်း ယေဟောဝါအမှုတော်ထမ်းခြင်းမှ အနားမယူလိုကြပါ။ သင်တို့၏မှတ်တမ်းများကို ထည့်ပေါင်းနိုင်ရန်အတွက်လည်း မိမိအသင်းတော်များထံ မှတ်တမ်းများကို ချက်ချင်းပို့ပေးပါ။

^၆ အသင်းတော်လုပ်ငန်းများ စည်းစနစ်ကျနစွာရှိစေရန် အကြီးအကဲများ နိုးကြားလျက်နေသင့်သည်။ အကြီးအကဲ သို့မဟုတ် ဓမ္မအမှုထမ်း တစ်ဦးတစ်ယောက်သည် ခရီးထွက်မည်ဆိုလျှင် သူတို့၏တာဝန်များကို အခြားသူများဆောင်ရွက်ပေးရန် စီစဉ်ထားသင့်သည်။ ဤညီအစ်ကိုများသည် အဘယ်အချိန်တွင် ရပ်ဝေး၌ရှိနေမည့်အကြောင်း ဦးစီးကြီးကြပ်မှူးအား ကြိုတင်အကြောင်းကြားထားလျှင် သင့်တော်သော အစီအစဉ်များကို ပြုပြင်ပေးနိုင်ရန် အကူအညီဖြစ်ပါလိမ့်မည်။

^၇ မှန်ပါသည်။ နွေရာသီသည် အလွန်အလုပ်များသောအချိန် ဖြစ်နိုင်သည်။ သို့သော် နိုင်ငံတော်လုပ်ငန်း၌ ပါဝင်ခြင်း သင့်လုပ်ရိုးလုပ်စဉ်ကို အာရုံလွင့်ပါးရာတို့က လွယ်လင့်တကူ ပျက်ပြားသွားစေနိုင်သည်။ နွေရာသီအချိန်ကို အခွင့်အရေးယူ ဆောင်ရွက်ပါ။ သင်ဦးစားထားရမည့် အကျိုးရှိသော ဝိဉာဉ်ရေးရာများကို ခန့်ခွဲပြီးနောက် ယင်းတို့ကို စွဲမြဲစွာဆောင်ရွက်ပါလေ။—ဖိ. ၁:၁၀။