¿Keniuj uelis tikinpaleuiskej akin kipiaj se kokolis itech inintanemilil?

¿Toni kijtosneki?

Keman se akin kuali iuan timouikaj kipia se kokolis itech itanemilil, xa amo tikmatij toni tikchiuaskej. Sayoj ke, uelis tiknextiskej ke tiktasojtaj keman tikpaleuiskej maj kiixnamiki ikokolis.

¿Keniuj uelis tikinpaleuiskej?

“Moneki niman nantekakiskej” (SANTIAGO 1:19).

Se taman kemej uelis tikpaleuis akin kuali iuan timouika, yejua kuali tikakis keman kinekis tajtos. Amo xikonnemili ke nochipa moneki tikonnankilis nochi tein mitsontajtanis, ta tein okachi moneki yejua maj kiita ke tikonkaki uan ke ika tionmotekipachoua. Xikontemo tikonmatis keyej ijkon momachilia uan amo xikonijijto, xikonelnamiki ke kemansa kijtos tein amo kinekia uan satepan xa amo kuali momachilis (Job 6:2, 3).

“Xikinyolseuikan akin semi tayokoxtokej” (1 TESALONICENSES 5:14).

Xa akin kuali iuan tionmouika semi motekipachoua oso kinemilia ke amo teyi chiujkej. Yejua ika xikonnexti ke ika tionmotekipachoua, ijkon maski amo tikonmatis toni tikoniluis uelis tikonyolchikauas.

“Akin yekmelauj totasojikniuj nochipa techtasojta” (PROVERBIOS 17:17).

Xikonilui ke tikonneki tikonpaleuis. Amo xikonnemili ke tikonmatia toni uelis tikonchiuas, ta xikontajtani keniuj uelis tikonpaleuis. Xa akin kuali iuan tionmouika amo kimati keniuj mitsoniluis keniuj uelis tikonpaleuis. Komo ijkon panoua, xikonilui seki taman tein uelis nankisenchiuaskej, kemej nanyaskej nannemitiuij. No uelis tikontakouitiuj, tikonpaleuis ika tachipaualis ompa kalijtik oso okseki taman (Gálatas 6:2).

“Amo xiyolijsiuikan” (1 TESALONICENSES 5:14).

Xa akin kuali iuan tionmouika amo semi kinekis tajtos. Sayoj ke, xikonelnamikti ke nochipa iuan tionyetos keman kinekis tajtos. Kemej mokokoua xa kijtos oso kichiuas teisa tein mitsonyolxokolis, xa nankixtalijkaj nankichiuaskej teisa sayoj ke satepan amo kinekiok oso kualanis. Keman tikonpaleuis akin kuali iuan tionmouika amo xionyolijsiui uan xikontemo tikonmatis keyej ijkon momachilia (Proverbios 18:24).

Tein tikonchiuas uelis semi tapaleuis

“Nimochikaua niknextilis se akin kuali iuan nimouika, ke nochipa uelis nikpaleuis keman monekis. Nikmati ke amo nochipa uelis nikpaleuis ika ouijkayomej tein kipia, sayoj ke nochipa nikaki keman nechiluia keniuj momachilia. Miakpa nejon kipaleuia maj kuali momachili” (Farrah,a se akin kuali iuan mouika kipia depresión clínica, trastornos alimentarios uan de ansiedad).

“Se akin kuali iuan nimouika nochipa kiita ke nochi kuali kisas uan kinextia ke nechtasojta. Se tonal nechyoleuak maj nitakuati ichan, kemej kuali nimomachilij nietos iuan, nikiluij keniuj nimomachiliaya. ¡Nejon semi nechyolchikauak!” (Ha-eun, kipia depresión clínica).

“Semi moneki maj amo se yolijsiui, keman nosiuatsin kichiua teisa tein amo nikuelita. Nimochikaua nikelnamikis ke amo itajtakol, ta ke mokokoua. Nejin nechpaleuia maj amo nikualani iuan uan maj nikajsikamati” (Jacob, isiuatsin kipia depresión clínica).

“Nosiuatsin semi nechpaleuia uan nechyolchikaua, keman peua semi nimotekipachoua amo nechchikaujkauia maj nikchiua teisa tein amo nikneki. Uan kemansa amo kichiuaok tein kinekia, semi kualtakat uan nochipa kitemoua keniuj nechpaleuis. ¡Semi nikpatiuita!” (Enrico, kipia trastorno de ansiedad).