Tanojnots 42

Se asna tajtoj

¿IKSA tikakini maj tajto se asno? Amo, ¿melauj? Tapialmej amo tajtouaj. Sayoj ika Biblia kijtoua ika se asna tajtoj. Tikitatij keniuj mochiuak.

Balac, tein tekiuajtia Moab, kinimouiliaya israelitas porin yaya kalakitijya itech tal tein pouia Canaán. Yejika kitatitauij se takat tamatkej tein motokaytij Balaam, maj kintejtelchiuani israelitas. Balac kiiluij ika kimakaskia miak tomin, uan yejika Balaam mopantalij itech iasna uan yajki kiitato Balac.

Jiova amo kinekia maj Balaam kintejtelchiuani israelitas. Yejika kititanik se ángel ika se ueyak espada, maj moketsani ojti uan maj kitsakuiliani Balaam. Balaam amo kiitaya ángel, sayoj ika iasna kemaj kiitaya. Yejika kitemouaya keniuj kitayoualuis ángel, uan kemej amo uelik, okachi kuali motekak ojti. Balaam tel kualanik, uan kiuijuitekik ika se kuouit.

Ompa Jiova kichiuak maj tajto asna, uan maj kitajtaniani Balaam: ‘¿Toni nimitschiuilij yejika tinechuijuiteki?’

Balaam kinankilij: ‘Tinechpinaujtij. ¡Komo nikpiaskia se espada, nimitsmiktiskia!’

Asna kitajtanij: ‘¿Ipa ijkon nimitschiuani?’

Balaam tanankilij: ‘Amo keman’.

Ompa Jiova kichiuak maj Balaam kiitani ángel tein ijkatoya ojti maktoya se espada. Ángel kitajtanij: ‘¿Keyej tikuijuitekik moasna? Nimitstsakuiliko amo xikintejtelchiuati israelitas. Komo moasna amo nechtalkauiskia, nimitsmiktiskia, sayoj ika yej amo teyi nikchiuiliskia’.

Balaam kinankilij: ‘Nitajtakoj. Amo nikmatia ox tiyetoya nikan ojti’. Ángel kitakauilij maj pano, uan Balaam yajki kiitato Balac. Uan kisentokaya kitemouaya keniuj kintejtelchiuas israelitas, sayoj ika Jiova kichiuak maj expa kintatiochiuiani.

Números 21:21-35; 22:1-40; 23:1-30; 24:1-25.