¿Katiyejua amaixmej uelis kinpaleuis akin amo kineltokaj Dios oso Biblia?
1. ¿Keyej sekin xa amo kinekiskej momachtiskej amaix Tamachtia Biblia?
1 Achto ke aksa mochiuas itekitikauj Dios, moneki momachtis tein tamachtia Biblia. Sayoj ke, sekin akin amo pouij itech se taneltokalis kampa kijtouaj ke kichiuaj kemej Cristo amo kineltokaj ke Biblia iTajtol Dios. Oksekin amo kineltokaj Dios nion kipoujkaitaj Biblia. Yejuan xa amo kinekiskej momachtiskej amaix Tamachtia Biblia. ¿Katiyejua amaixmej tapaleuianij? Maj tikitakan keniuj uelis tikchiuaskej ijkon kemej kichiuanij seki tokniuan itech 20 uejueyi altepemej.
2. Komo aksa techiluia ke amo kineltoka Dios, ¿toni moneki tikchiuaskej uan keyej?
2 Akin amo kineltokaj Dios. Komo aksa techiluia ke amo kineltoka Dios, moneki tikmatiskej keyej ijkon tanemilia. ¿Kineltoka ke nemilis iselti peuak? ¿Amo takuaujtamatiok porin kiita ke mochiua tein amo kuali kampa nemi oso kiita ke amo kuali monejnemiltiaj itech taneltokalismej? ¿Ualeua itech se altepet kampa tel miakej amo kineltokaj Dios? ¿Yejua se aksa akin amo keman kiitani ke moneki kineltokas Dios? Miakej tanojnotsanij kiitaj ke keman kitajtaniaj “¿Nochipa ijkon tiontanemiliani?”, yejua kijtoua tein kinemilia. Sayoj ke moneki maj kuali tikakikan uan maj amo tiktakotonaltikan, ta achto moneki tikajsikamatiskej keyej amo kineltoka Dios uan ijkon tikmatiskej keniuj uelis tikpaleuiskej taltikpaknenkej. Sayoj ijkon tikmatiskej toni tikijtoskej uan katiyejua amaix uelis tikauiliskej (Prov. 18:13).
3. ¿Keniuj tiknextiaj ke tikpoujkaitaj taltikpaknenkej uan tein kineltoka?
3 Keman iuan titajtoskej, maj tiknextikan ke tikpoujkaitaj tein kinemilia. Itech altepet Estados Unidos motemakak nejin tanemilil: “Semi moneki maj tikpoujkaitakan taneltokalis tein kipiaj oksekin. Amo tikiluiskej ke amo kuali yetok tein kinemilia, ta okachi kuali maj tikchiuilikan netajtanilmej tein kipaleuis maj tanemili uan maj iselti kiajsikamati tein moneki”. Yejua nejon tein kichiua se tokniuj takalpanojkej. Satepan ke kikaki tein kijtoua taltikpaknenkej, kitajtania: “¿Kemansa tikonnemiliani itech nejin okse taman?”. Uan satepan kisentoka tajtoua.
4. ¿Toni moneki tikelnamikiskej keman tikinnojnotsaskej budistas?
4 Budistas amo kineltokaj ke nemi Dios. Keman tajtouaj iniuan, seki tanojnotsanij kayomej Gran Bretaña kinpaleuiani kitekitiltiskej amaix Cómo hallar paz y felicidad duraderas. Satepan keman kiitaj tepitsin tamachtilis tein kiualkui itech yekinika páginas, kiitaj tamachtilis tein itokay “¿Existe un Creador todopoderoso?”. Okse tonal kiitaj tamachtilis tein itokay “Una guía para toda la humanidad”. Ompa, komo kiitaj ke ueli, kinextiliaj amaix Tamachtia Biblia uan kiiluiaj taltikpaknenkej: “Maski tejuatsin amo tikonneltoka Dios, tionmomachtis Biblia semi mitsonpaleuis, porin kiualkui kuali tayolmajxitilis”. Se tokniuj akin tekiti kemej precursor itech tajtol chino ompa Estados Unidos kijtoj: “Kampa titanojnotsaj kiuelitaj taixtajtoltiskej, yejua ika keman oksepa timokepaj tikinitatij akin kiselijkej se amaix, yejuan kiixtajtoltijkejya nochi. Sayoj ke miakej amo kiajsikamatij toni se nemachtil ika Biblia. Yejua ika keman yekinika nikinkalpanoua nechpaktia nikinnextilis amaix Kuali tanauatilmej, tein chijchiujtok kemej uelis se tajtos iniuan taltikpakneminij”. Se tokniuj takalpanojkej itech circuito itech tajtol chino ompa Estados Unidos kijtoua ke no uelis se kinnextilis amaix Tamachtia Biblia keman yekinika tikinkalpanotij. Sayoj ke, xa okachi kuali maj tipeuakan itech capítulo 2, kampa kinextia toni ika tajtoua Biblia, uan amo maj tipeuakan itech capítulo 1, kampa kijtoua keniuj tamati Dios.
5. ¿Keyej moneki amo tiyolijsiuiskej?
5 Se taltikpaknenkej amo niman takuaujtamatis iuan Dios, yejua ika moneki amo tiyolijsiuiskej. Keman yekinika tikalpanoskej aksa xa amo uelis niman tikchiuaskej maj kineltoka ke nemi se Dios. Sayoj ke, satepan keman miakpa tikalpanoskej, xa uelis peuas kinemilis ke nemi Dios oso kiajsikamatis keyej oksekin itech taneltokaj.
6. ¿Keyej sekin kiixtopeuaj tein kijtoua Biblia?
6 Akin amo kinekij kimatiskej tein kijtoua Biblia oso amo itech taneltokaj. Kemansa tikinajsij akin kineltokaj Dios sayoj ke amo kineltokaj ke Biblia kipia itanemililuan Dios, yejua ika amo kinekij kimatiskej tein kijtoua. Nejin panoua itech altepemej kampa miakej amo pouij itech se taneltokalis kampa kijtouaj ke kichiuaj kemej Cristo uan kinemiliaj ke sayoj kiixtajtoltiaj akin kijtouaj ke kitojtokaj Cristo. No ijkon panoua itech okseki altepemej kampa kijtouaj ke kitojtokaj Cristo, yejuan kiitaj ke amo teyi kinpaleuia iTajtol Dios. ¿Toni uelis tikchiuaskej maj kinekikan kimatiskej okachi tein kijtoua Biblia uan maj kiselikan se nemachtil ika amaix Tamachtia Biblia?
7. ¿Keniuj uelis tikchiuaskej maj taltikpakneminij kinekikan kimatiskej okachi tein kijtoua Biblia?
7 Se amat tein kijkuilojkej itech sucursal ompa Grecia, kijtoua: “Akin amo kinekij kimatiskej tein kijtoua Biblia okachi uelis tikinpaleuiskej komo tiktapouaj uan tikinnextiliaj tein ompa kijtoua. Miakej tanojnotsanij kiitanij ke iTajtol Dios okachi kinpaleuia taltikpakneminij ke okseki taman tein yejuan uelis kijtoskej (Heb. 4:12). Keman kiitaj itokay Dios itech Biblia kichiua maj okachi miakej kinekikan kimatiskej tein kijtoua”. Uan itech sucursal tein moajsi itech altepet India moijkuiloj: “Hindúes okachi kinekij kimatiskej keman kikakij ke Biblia kijtoua keyej nikan tinemij uan toni panoua keman timomikiliaj. No kinyolpaktia kimatiskej ke Dios motenkaua kichiuas maj amo xexeliujtokan xolalmej uan maj amo onka tachikoitalis”. Se tajtos ika tein kintekipachoua taltikpakneminij kinpaleuia tanojnotsanij maj kitekitiltikan Biblia uan maj kinextikan tein kichiuas iTekiuajyo Dios.
8. ¿Toni uelis tikiluiskej akin amo kineltoka Biblia porin kiitani ke itech taneltokalismej kichiuaj tein amo kuali?
8 Komo aksa amo kineltoka Biblia porin kiitani ke itech taneltokalis tein amo melauak kichiuaj tein amo kuali, moneki tikiluiskej ke tein yejuan tamachtiaj uan tein kichiuaj amo mouika iuan tein kijtoua iTajtol Dios. Itech sucursal tein moajsi itech altepet India moijkuiloj: “Kemansa moneki tikxeloskej tein kijtoua Biblia uan tein kijtouaj itech taneltokalis tein amo melauak”. No moijkuiloj ke hindúes kimoujkaitaj keman kiitaj tamachtilis 4 itech amaix ¿Qué propósito tiene la vida? ¿Cómo descubrirlo?, kampa kinextia keniuj taneltokalismej kiajxitilianij miak taman tein amo melauak oso kinekinij kipoloskej iTajtol Dios. Se precursor kayot Brasil kiniluia taltikpakneminij: “Miakej kiixtalianij kiitaskej tein tamachtia Biblia ika se kuali tanemilil, uan nejon amo kijtosneki ke pouiskej itech se taneltokalis. ¿Keyej amo no ijkon tikonchiua? Xa tikonajsis tein amo tikonchiaya”.
9. ¿Keyej moneki maj amo timosenkauakan komo aksa techiluia ke amo kineki kimatis tein kijtoua Biblia?
9 Jiova kiita ininyolo taltikpakneminij (1 Sam. 16:7; Prov. 21:2). Uan kinpaleuia akin kipiaj kuali ininyolo maj motokikan itech taneltokalis tein melauak (Juan 6:44). Miakej amo kiixmatiaj Dios nion momachtiayaj Biblia. Tekit tein tikchiuaj itech tanojnotsalis uelis kinpaleuis miakej maj “makisakan” uan maj ijkon “kajsikamatikij in melauak Tajtoltsin de Dios” (1 Tim. 2:4). Yejua ika, komo aksa techiluia ke amo kineki kimatis tein kijtoua Biblia, maj amo timosenkauakan. Ika amaixmej tein tikpiaj, maj tiktemokan se tein uelis kipaleuis maj kineki kimatis okachi. Satepan, xa uelis tikuiskej amaix tein ika titamachtiaj: amaix ¿Toni yekmelauj tamachtia Biblia?
[Recuadro itech página 4]
Keniuj uelis tikinpaleuiskej akin amo kineltokaj Dios
• Uelis tikmatiskej keyej aksa amo kineltoka Dios komo tiktajtaniaj: “¿Nochipa ijkon tiontanemiliani?”.
• Komo budista, maj tiknextilikan amaix Cómo hallar paz y felicidad duraderas, páginas 9 hasta 12.
• Komo kineltoka ke nemilis iselti peuak, maj tikuikan semej nejin nepaleuilmej:
Tamachtilismej “¿Casualidad o diseño?”, tein moajsij itech ¡Despertad!
Video Las maravillas de la creación revelan la gloria de Dios
Tamachtilis 4 tein moajsi itech amaix Cómo lograr una vida llena de satisfacción, uan amaixmej ¿Es la vida obra de un Creador? uan El origen de la vida. Cinco cuestiones dignas de análisis
• Komo amo takuaujtamatiok iuan Dios porin kiita ke mochiua tein amo kuali uan onkak tajyouilis, maj tikuikan semej nejin amaixmej:
¿Existe un Creador que se interese por nosotros?, capítulo 10
¿De veras se interesa Dios por nosotros?, tamachtilis 6 uan amaix ¿Qué propósito tiene la vida? ¿Cómo descubrirlo?, tamachtilis 6
• Niman keman tikitaskej ke taltikpaknenkej peua tepitsin kineltoka ke nemi Dios, uelis tiknextiliskej amaix Tamachtia Biblia. Xa tapaleuis maj tipeuakan itech capítulo 2 oso okse tamachtilis tein yejua kinekis.
[Recuadro itech página 5]
Keniuj uelis tikinpaleuiskej akin amo kineltokaj Biblia
• Maj tikitakan capítulo 17 uan 18 itech amaix La vida... ¿cómo se presentó aquí? ¿Por evolución, o por creación?
• Komo taltikpaknenkej hindú, maj tikuikan amaix ¿Por qué debemos adorar a Dios con amor y verdad?
• Komo judío, uelis tikuiskej páginas 3 hasta 11 itech amaix ¿Habrá algún día un mundo sin guerra? (amo mokixtiaok itech español).
• Maj tiknextikan ke komo tiktojtokaj itanauatiluan Dios semi tapaleuia. Yejua ika uelis tikuiskej semej nejin nepaleuilmej:
Tamachtilismej “Ayuda para las familias”, tein moajsij itech ¡Despertad!
Video La Biblia: el poder que ejerce en su vida
Tamachtilismej 9 uan 11 itech amaix Kuali tanauatilmej tein Dios kitemaka, página 22 hasta 26 itech amaix Un libro para todo el mundo (amo mokixtiaok itech español) uan tamachtilis 2 itech amaix Cómo lograr una vida llena de satisfacción
Komo budista, maj tikitakan página 3 hasta 7 itech amaix El camino de la paz y la felicidad
Komo musulmán, maj tikitakan tamachtilis 3 itech amaix La fe verdadera, la puerta a una vida feliz
Komo kampa titanojnotsaj kiixtopeuaj Biblia, xa okachi kuali yeskia maj amo tikiluikan kani tikixtijkej tayolmajxitilis tein tikiluiskej keman yekinika tikalpanoskej
• Maj tikiluikan keniuj mochiuani tein achtook kijtojka Biblia. Uan uelis tikuiskej nejin nepaleuilmej:
Video La Biblia: historia exacta, profecía confiable
Páginas 27 hasta 29 itech amaix Un libro para todo el mundo (amo mokixtiaok itech español)
• Niman keman tikitaskej ke taltikpaknenkej kineki kimatis tein kijtoua Biblia itech seki taman, uelis tiknextiliskej amaix Tamachtia Biblia.
[Recuadro itech página 6]
Komo aksa kijtoua: “Amo nikneltoka Dios”
• Uelis tiktajtaniskej: “¿Tikonmati toni nechpaleuij maj nikneltoka ke nemi se Dios?”. Ompa maj tiknextikan seki taman tein kijtoua amaix Razonamiento, páginas 87 hasta 89. No uelis timotenkauaskej ke tikuikiliskej se amaix tein tejuan techpaleuij.
• Uelis titajtaniskej: “Uan komo nemiskia se Dios, ¿toni kualneskayomej tikonnemilia ke monekiskia kinextis?”. Keman kintajtaniaj nejin, miakej tanankiliaj ke Dios monekiskia kinextis melaujkayot, amo techikoitas, maj yolkuali uan teiknelijkej. Maj tiknextilikan ika Biblia ke Dios kemaj kipia nejon kualneskayomej. (Xa uelis tikitaskej amaix Tamachtia Biblia itech capítulo 1 uan tipeuaskej timomachtiskej itech párrafo 6.)
Komo aksa kijtoua: “Amo nikneltoka Biblia”
• Uelis titanankiliskej: “Miakej tanemiliaj kemej tejuatsin. Sekin kijtouaj ke Biblia kiixnamiki tein kiajsinij tamatinij oso ke amo tapaleuia itech nejin tonalmej. Sayoj ke ¿kemansa tikonixtajtoltiani Biblia? [Maj tikauakan maj tanankili. Ompa maj iuan tikitakan tamachtilis 3, párrafo 1 uan 2 itech amaix Cómo lograr una vida llena de satisfacción.] Okse tonal nikuelitaskia nimitsonnextilis ika nejin amaix seki tamachtilis tein semi kuali tein kipia Biblia”.
• Oso tikijtoskej: “Miakej no ijkon techiluianij. Sayoj ke nikuelitaskia nimitsonnextilis se tajkuilol tein nikmoujkaitak [maj tikixtajtoltikan Job 26:7 oso Isaías 40:22, tein kinextia ke Biblia mouika ika tein kiajsinij tamatinij]. Biblia no kipia miak tamachtilismej tein semi kinpaleuia kalyetouanij. Nikuelitaskia niualas okse tonal uan nimitsonnextilis se taman”.
• Okse taman: “Niktasojkamati tein tikonijtoua. Uan komo Dios kichiuani maj moijkuilo se amaix, ¿toni tamachtilis tikonnemilia ke monekiskia kipias?”. Ompa maj tiknextilikan itech Biblia se taman tein mouika ika tein kijtoj.