Jesús se tayekankatiopixkat akin semi teiknelia

1, 2. 1) ¿Keyej Jehová kiualtitanik iKoneuj nikan taltikpak? 2) ¿Toni tikitaskej itech nejin tamachtilis? (Hebreos 5:​7-9).

KEMEJ dos mil xiujmejya, Jehová kiualtitanik nikan taltikpak iKoneuj akin semi kitasojtaya. ¿Keyej? Para kinmakixtis nochin den tajtakol uan mikilis uan para kiixpolos nochi tein Satanás kichiuani (Juan 3:16; 1 Juan 3:8). Uan no, Jehová kimatia ke tein kipanoskia Jesús nikan taltikpak kipaleuiskia maj mochiua se tel kuali tayekankatiopixkat akin semi teiknelia uan teajsikamati. Jesús mochiuak tayekankatiopixkat itech xiuit 29, tepitsin satepan ke moauij.a

² Itech nejin tamachtilis tikitaskej keniuj tein Jesús kipanok keman yetoya nikan taltikpak kipaleuij maj mochiua okachi kuali tayekankatiopixkat uan maj teikneli. Komo tikajsikamatij nejin techpaleuis maj okachi timotokikan iuan Jehová uan maj tiktataujtikan, okachiok keman timoyolkokojtoskej porin titajtakolchiujkej (xikonlero Hebreos 5:​7-9).

IKONEUJ JEHOVÁ AKIN OKACHI KITASOJTA UALAJ NIKAN TALTIKPAK

3, 4. ¿Keniuj mopatak kemej nemia Jesús keman ualaj nikan taltikpak?

³ Kemansa mopata kemej tinemij, xa moneki tinemitiuij okseko uan moneki tikinkauaskej tochankauan uan totasojikniuan. Ipa ouij keman mopata kemej se nemi, sayoj ke tein Jesús monekia kikauas okachi ouij katka. Yejua yekinika ángel akin kichijchiujkej uan akin kipiaya okachi chikaualis. Ne iluikak, Jehová okachi kitasojtaya Jesús uan yejua yolpakia tekitis iuan iTajtsin (Sal. 16:11; Prov. 8:30). Sayoj ke, Filipenses 2:7 kinextia ke “kikauak nochi tein kipiaya” uan nemiko nikan taltikpak iniuan tajtakolejkej.

⁴ Uan no, maj tiknemilikan keniuj nemik Jesús nikan taltikpak. Ichankauan katkaj pobres, tikmatij nejin porin itatuan sayoj uelik kitemaktijkej ome tototsitsin itech templo keman yejua yolik (Lev. 12:8; Luc. 2:24). Uan no, tekiuaj Herodes kitemoj kimiktis keman kimatik ke yolkaya Jesús. Yejua ika yajkej Egipto para maj amo teyi kichiuilianij (Mat. 2:​13, 15). Tel taman katka kemej Jesús nemia nikan taltikpak uan kemej nemia ne iluikak.

5. ¿Toni kiitak Jesús keman yetoya nikan taltikpak, uan keniuj nejon kipaleuij maj mochiua okachi kuali tayekankatiopixkat? (No xikonita taixkopin).

⁵ Keman yetoya nikan taltikpak, Jesús kiitak keniuj miakej tajyouiayaj. Kimatik keniuj se momachilia keman momikilia akin tiktasojtaj, yejua kiitak keniuj momikilijkej miakej akin kinixmatik, kemej itakpatat, José. Keman tanojnotstinemia kiitak keniuj tajyouiayaj akin kipiayaj lepra, akin amo tachiayaj, akin amo uelia nejnemiaj oso akin momikilijka se ininkonetsin uan semi kinikneliaya (Mat. 9:​2, 6; 15:30; 20:34; Mar. 1:​40, 41; Luc. 7:13). Keman yetoya ne iluikak ipa kiitaya keniuj miakej tajyouiayaj, sayoj ke keman ualaj nikan taltikpak okachi kiajsikamatik keniuj se momachilia keman se tajyouia (Is. 53:4). Tein kipanok kipaleuij maj okachi kiajsikamati keniuj miakej momachiliaj porin kipiaj ouijkayomej. Ijkon kemej tejuan, Jesús no siouik, motekipachoj uan tayokoyak.

JESÚS KINEXTIJ KE TEAJSIKAMATI

6. ¿Toni technextilia tein tanauatijkej Isaías kijtojka? (Isaías 42:3).

⁶ Keman tanojnotstinemia, Jesús kinajsikamatia akin kintajyouiltiayaj, uan ijkon mochiuak tein Isaías kijkuilojka ke mochiuaskia. Itech amatajkuilolmej tein moijkuilojka itech hebreo, kemansa kijtoua ke akin semi takuaujtamatij iuan Jehová tamatij kemej uejueyi koujmej oso kemej se tal kampa kualtsin taxochiyojtok (Sal. 92:12; Is. 61:3; Jer. 31:12). Sayoj ke akin pobres uan akin kinchiuiliaj tein amo kuali tamatij kemej akat oso sakat ikoujyo tein kelpachiujtok uan imecha se candil tein tekit xotatok, tein oksekin kiitaj ke amo teyi kualtia (xikonlero Isaías 42:3). Ika tein kijtoj, Isaías kinextij ke Jesús semi kintasojtaskia uan kinikneliskia akin oksekin kinitayaj ke amo teyi chiuanimej.

7, 8. ¿Keniuj Jesús kichiuak tein Isaías kijtojka?

⁷ Mateo kinextij ke Jesús kichiuak tein kijtojka tanauatijkej Isaías: “Amo kikotonas akat tein kelpachiujtok nion kiseuis imecha se candil tein tekit xotatok” (Mat. 12:20). Milagros tein Jesús kichiuak semi kinpaleuij akin kinchiuiliayaj tein amo kuali uan akin kinemiliayaj ke amo keman kuali yetoskiajok. Maj ika titanemilikan takat akin kipiaya lepra. Yejua xa kinemiliaya ke amo keman pajtiskiaok uan ke amo ueliskiaok motokis iniuan ichankauan uan itasojikniuan (Luc. 5:​12, 13). Jesús no kiixmatik se takat akin amo uelia takakia uan amo uelia yektajtouaya. Xikonnemili keniuj momachiliaya keman kiitaya ke oksekin kualtsin monojnotsayaj uan yejua amo kinajsikamatia (Mar. 7:​32, 33). Sayoj ke no kinpanouaya okse taman.

⁸ Keman Jesús yetoya nikan taltikpak, miakej judíos kineltokayaj ke keman aksa kikuia se taman kokolis oso ijkon yolia, katka porin semi tajtakolchiujka yejua oso itatuan (Juan 9:2). Yejua ika kinixtopeuayaj akin mokokouayaj oso yolkaj ika se kokolis. Sayoj ke Jesús kinpajtij uan kinnextilij ke Dios motekipachouaya por yejuan, uan ijkon mochiuak tein Isaías kijtojka. ¿Toni techmachtia nejin?

9. ¿Keniuj kinextia Hebreos 4:​15, 16 ke Jesús teiknelia?

⁹ (Xikonlero Hebreos 4:​15, 16). Uelis tikyekmatiskej ke Jesús techiknelia tinochin. Itech griego tajtol “techiknelia” kijtosneki keman se kimachilia tein oksekin kimachiliaj keman moyolkokojtokej oso tayokoxtokej. Uan itech Hebreos 10:34 Pablo no kikuik nejin tajtol keman kijtoj ke moneki tikinikneliskej akin tsaktokej. Keman tiklerouaj itech Biblia keniuj Jesús kinpaleuij oksekin, tikitaj ke yejua semi kinikneliaya. Amo kinpajtiaya porin ijkon monekia kichiuas, ta porin yekmelauj motekipachouaya por yejuan uan kinekia kinpaleuis. Yejua nejon panok iuan se takat akin kipiaya lepra. Maski Jesús ueliskia kipajtis de uejka, amo ijkon kichiuak ta kikitskij para kipajtis. Xa miak xiujmejya amo akin ijkon kichiujtoya. Uan no, keman kipajtij takat akin amo uelia takakia, kiuikak okseko kampa amo akin yetoskia. No xikonnemili tein panok keman se siuat akin tajtakolchiujka uan moyolpatakaya, kimetspajpakak Jesús ika iixayo. Se fariseo amo kuali kiitak, sayoj ke Jesús kitenpaleuij uan kichikaujkanojnotsak fariseo (Mat. 8:3; Mar. 7:33; Luc. 7:44). Jesús amo keman kinixtopeuak akin kipiayaj se kokolis nion akin tajtakolchiujkaj. Ta kinekia maj kuali iuan mouikakan uan kinnextiliaya ke kintasojtaya. Uan uelis tikyekmatiskej ke no techiknelis.

TIKCHIUAJ KEMEJ TOTAYEKANKATIOPIXKAUJ

10. ¿Keniuj ueli tikinpaleuiaj maj motokikan iuan Jehová akin amo ueli takakij oso tachiaj? (No xikonita taixkopimej).

¹⁰ Kemej tiknekij tikchiuaskej kemej Jesús, timochikauaj tikinnextiliskej oksekin ke tikintasojtaj, tikinajsikamatij uan tikinikneliaj (1 Ped. 2:21; 3:8). Maski amo ueli tikinpajtiaj akin amo ueli takakij oso amo tachiaj, ueli tikinpaleuiaj maj motokikan iuan Jehová. Yejua ika tikpiaj amaixmej itech panoua 100 tataman tajtolmej de señas. Uan no tikpiaj amaixmej itech braille itech panoua 60 tataman tajtolmej, uan tikpiaj videos itech panoua 100 tataman tajtolmej kampa aksa kijtojtiuj toni nesi. Ijkon akin amo ueli takakij uan amo ueli tachiaj ueli motokiaj iuan Jehová uan iKonetsin.

11. ¿Keniuj inechikol Jehová kichiua kemej Jesús? (Hechos 2:​5-7, 33; no xikonita taixkopimej).

¹¹ Satepan ke Jesús oksepa nemik, kinmakak imomachtijkauan ichikaualis Dios para maj kinixmatiltikan kuali tanauatilmej “itech inintajtol” akin yajkaj itech iluit tein monotsa Pentecostés (xikonlero Hechos 2:​5-7, 33). Inechikol Dios no kitemoua kinpaleuis maj kiixmatikan Jehová akin seseko kayomej. Yejua ika, kikixtia amaixmej itech panoua 100 tataman tajtolmej maski amo miakej tajtouaj se tajtol. Uan ijkon panoua ika seki tajtolmej tein mokuij ompa América. Inechikol Jehová kitajtolkepani amaixmej itech panoua 160 nejon tajtolmej para maj miakej ueli kiixmatikan kuali tanauatilmej. Uan no, kemej tajtol romaní (oso gitano) tataman kemej motajtoua, toamaixuan motajtolkepaj itech panoua 20 tataman de nejon tajtol. Uan nejin kinpaleuiani miakej maj kimatikan tein Biblia tamachtia.

12. ¿Toni okseki taman kichiua inechikol Jehová?

¹² Inechikol Jehová amo sayoj kinpaleuia oksekin maj kiixmatikan Dios, ta no kinpaleuia akin tajyouiaj keman mochiuaj tetsaujmej. Miakej tokniuan motemakaj kinpaleuiskej akin tajyouiaj. Inechikol Jehová no kichijchiua kalmej kampa miakej uelis okachi momachtiskej ke Dios semi kintasojta.

TOTAYEKANKATIOPIXKAUJ TECHPALEUIA TISEJSEMEJ

13. ¿Keniuj techpaleuia Jesús?

¹³ Jesús se kuali ichkatajpixkej, yejua ika kiita maj tikpiakan nochi tein moneki para kuali timouikaskej iuan Jehová (Juan 10:14; Efes. 4:7). Kemansa tikpiaj miak ouijkayomej uan uelis timomachiliskej kemej se akat tein kelpachiujtok oso kemej se candil tein tekit xotatok. Xa ijkon timomachiliaj porin tikpiaj se kokolis, porin tikchiujkej tein amo kuali oso timokualantijkej iuan se tokniuj. Keman techpanoua nejon, xa sayoj timoyolkokouaj uan amo itech titanemiliajok tein tikchiaj maj mochiua. Sayoj ke Jesús kimati nochi tein techpanoua uan kiajsikamati keniuj timomachiliaj. Yejua ika kineki techpaleuis, uan uelis kikuis ichikaualis Dios para techyolchikauas (Juan 16:7; Tito 3:6). No uelis kichiuas maj tayekananij uan okseki tokniuan techyolchikauakan uan techpaleuikan (Efes. 4:8).

14. ¿Toni techpaleuis maj amo timosenkauakan?

¹⁴ Komo timoyolkokojtokej uan tiknekij timosenkauaskej, maj itech titanemilikan tein Jesús kichiua kemej tayekankatiopixkat. Maj tikelnamikikan ke Jehová amo sayoj kiualtitanik Jesús nikan taltikpak para maj techmakixtiki, ta no para maj okachi kiajsikamati ouijkayomej tein tikpiaj. Keman tel amo kuali timomachiliaj porin timotajtakolmakaj oso porin tikchiuasnekij tein amo kuali, Jesús niman techpaleuia ‘itech hora keman okachi moneki’ (Heb. 4:​15, 16).

15. ¿Toni kipaleuij se tokniuj takat maj mokepa itech nechikol?

¹⁵ Jesús no kinpaleuia itekitikauan Dios maj ueli kinajsikan uan kinpaleuikan maj mokepakan akin kikaujkej Jehová (Mat. 18:​12, 13). Maj tikitakan tein kipanok Stefano.b Yejua kikalankixtijkej de nechikol uan 12 xiujmej satepan kiixtalij oksepa monechikos iniuan tokniuan. Yejua kijtoua: “Nipinauaya nikalakis itech Kali kampa tiMosentiliaj, sayoj ke niknekia oksepa niktekitilis Jehová iniuan tokniuan. Tayekananij akin nechnojnotskej kichiujkej maj kuali nimomachili. Kemansa semi nimotayokoltiaya porin nikaujka Jehová uan niknekia nimosenkauas. Sayoj ke tokniuan nechelnamiktijkej ke Jehová uan Jesús kinekiaj maj nimochikauani oksepa nimokepas. Keman oksepa nipouik itech nechikol, nochin tokniuan kuali techselijkej nejua uan nochankauan. Satepan nosiuatsin peuak momachtia Biblia uan axkan tiksentekitiliaj Jehová”. Totayekankatiopixkauj akin semi techtasojta semi yolpaki keman kiita ke nochin tokniuan kinpaleuiaj maj mokepakan itech nechikol akin moyolpatakejya.

16. ¿Keyej semi timotasojkamatij maj tikpiakan se tayekankatiopixkat akin kuali techajsikamati?

¹⁶ Keman Jesús yetoya nikan taltikpak kinpaleuij tel miakej keman okachi kinpolouaya. Uan tejuan no uelis tikneltokaskej ke nochipa techpaleuis keman monekis. Uan itech xochital techpaleuis maj tajtakol amo techtajyouiltiok uan maj amo titajtakolejkejok. Semi tiktasojkamatiliaj toDios Jehová, porin semi techtasojta uan techiknelia uan yejua ika kiixtalij Jesús kemej tayekankatiopixkat akin kuali techajsikamati.