Maj tiyolyemankej kemej Jehová

1. ¿Keyej se kimojkaita maj Jehová yolyemanik?

KEMAN ininka titanemiliaj tekiuanij, xa ipa tikijtoskiaj ke moueyimatij. Sayoj ke Jehová akin kipia nochi chikaualis semi yolyemanik (Sal. 113:​5-8). Amo akin tel yolyemanik kemej Jehová, yejua nion tepitsin moueyimati. Itech nejin tamachtilis tikitaskej naui taman tein kichiua uan itech sejse tikitaskej keniuj kinextia ke semi yolyemanik. No tikitaskej keniuj Jesús katka yolyemanik kemej iTajtsin. Nochi nejin techpaleuis maj okachi timotokikan iuan Jehová uan maj timochikauakan tiyeskij okachi tiyolyemankej.

JEHOVÁ NOCHIPA TECHKAKI

2. ¿Toni techmachtia de Jehová tein kijtoua Salmo 62:8? (No xikonita taixkopin).

² Semi teouijmaka se tajtos iniuan akin moueyimatij. Yejuan kintajyouiltiaj oksekin porin kinemiliaj ke okachi ueyichiuanimej, uan yejua ika amo akin kineki iniuan mouikas. Sayoj ke Jehová amo ijkon kichiua. Kemej yolyemanik, amo techouijmaka tiktataujtiskej uan kineki maj tikiluikan nochi tein tiknemiliaj uan tikmachiliaj (xikonlero Salmo 62:8). Ijkon kemej se tepopaj kineki kikakis tein kintekipachoua ikoneuan, Jehová no semi kineki techkakis keman tiktataujtiaj. Hasta kichiuak maj seki netataujtilmej moijkuilouanij itech Biblia tein kinextia ke semi kineki techkakis (Jos. 10:​12-14; 1 Sam. 1:​10-18). Sayoj ke, ¿toni uelis tikchiuaskej komo kemansa tiknemiliaj ke amo technamiki maj tiktataujtikan Jehová porin miakpa timopolouanij?

3. ¿Keniuj tikmatij ke Jehová kineki maj nochipa tiktataujtikan?

³ Uelis tiktataujtiskej Jehová maski tikmachiliskej ke amo technamiki maj techtasojta. ¿Keniuj tikmatij? Ika tein Jesús kijtoj keman ika tajtoj tekonetsin akin poliujtoya. Yejua kijtoj ke se tepopaj akin semi tetasojta, kipiaya se iokichpil akin kimachiliaya ke amo kinamikia maj oksepa kiselianij kemej ininchankauj porin kichiujka miak taman tein amo kuali. ¿Toni kichiuak tepopaj keman iokichpil mokepak ichan? Keman kiitak, “tsikuinteuak kinamikito, kinauaj uan kimakak se beso porin semi kitasojtaya” (Luc. 15:​17-20). Jehová tamati kemej nejon tepopaj. Keman tiktataujtiaj porin tikchiujkej tein amo kuali uan timotayokoltijtokej oso techtekipachoua teisa, yejua kuali techkaki (Lam. 3:​19, 20). Kemej Jehová semi techiknelia, kemej yeskia tsikuini para techyolseuis, techiluis ke semi techtasojta uan ke techtapojpoluijya (Is. 57:15). Yejua miakpa kichiua maj techyolseuikan tayekananij, tochankauan uan totasojikniuan akin no kitasojtaj (Sant. 5:​14, 15). Jehová techpaleuia porin kineki maj tiksentokakan kuali iuan timouikakan.

4. ¿Keyej miakej amo kinouijmakaya motokiskej iuan Jesús?

⁴ Jesús kichiua kemej iTajtsin. Jesús yolyemanik kemej Jehová. Yejua ika keman yetoya nikan taltikpak, oksekin amo kinouijmakaya iuan motokiskej. Amo kimouiliayaj kitajtaniskej tein kinekiaj kimatiskej (Mar. 4:​10, 11). Uan keman Jesús teisa kintajtaniaya yejuan kijtouayaj tein kinemiliayaj (Mat. 16:​13-16). Uan keman mopolouayaj, amo kimouiliayaj maj kualani porin kimatiaj ke katka yolkuali iniuan, kinajsikamatia uan amo yolijsiuia (Mat. 17:​24-27). Kemej Jesús senkis kichiuaya kemej iTajtsin, kinpaleuij imomachtijkauan maj okachi kiixmatinij Jehová (Juan 14:9). Kimatkej ke Jehová yolyemanik uan kineki maj iuan se motoki, amo kemej taixyekananij itech taneltokalis akin tel amo yolkualmej katkaj uan tel moueyimatiaj.

5. ¿Keyej komo tiyolyemankej oksekin amo kinouijmakas touan mouikaskej?

⁵ ¿Keniuj uelis tikchiuaskej kemej Jehová? Keman timochikauaj tiyeskij tiyolyemankej, oksekin amo kinouijmaka touan tajtoskej. Komo timoueyimatij, xa peuas tikinnexikoluiskej oksekin, tiknemiliskej ke tejuan okachi tikmatij uan amo titetapojpoluiskej keman techchiuiliskej tein amo kuali. Nejon kichiuas maj amo akin kinekiok touan mouikas. Sayoj ke komo tiyolyemankej tiyeskij tikualtakamej iniuan oksekin, amo tiyolijsiuiskej uan titetapojpoluiskej, ijkon oksekin kinekiskej touan mouikaskej (Col. 3:​12-14). Tayekananij okachiok moneki kiitaskej maj tokniuan itech nechikol kuali momachilikan keman kinnojnotsaskej. Uan para uelis kichiuaskej nejon, moneki nochipa yetoskej iniuan tokniuan. Yejua ika nochipa keman ueliskej, tayekananij moneki touan monechikoskej uan amo sayoj moconectaroskej. Uan mochikauaskej yaskej tanojnotsatiuij kajkalpan iniuan tokniuan. Ijkon yejuan okachi kinixmatiskej tayekananij uan kinekiskej iniuan tajtoskej keman monekis maj kinpaleuikan.

JEHOVÁ KIPATA TEIN KIXTALIA KOMO KIITA KE UELI

6, 7. Xikonijto kemanian Jehová kichiuak tein itekitikauan kitataujtijkej.

⁶ Akin moueyimatij kinemiliaj ke kimatij toni okachi tapaleuia uan amo kipataj tein kinemiliaj. Sayoj ke Jehová akin nochipa kimati toni okachi kuali, amo ijkon kichiua. Kemej yolyemanik, kikaki tein oksekin kijtouaj uan komo ueli hasta kipata tein kiixtalia. Maj itech titanemilikan tein kichiuak Jehová keman Míriam iuan Aarón peuak kijijtouaj ininikniuj Moisés, tel amo kuali yetoya nejon porin yejua kijtouaya tein Dios kimatiltiaya. Jehová tel kualanik iuan Míriam porin yejua kijijtojtoya, yejua ika kitatsakuiltij ika lepra. Sayoj ke Aarón kitataujtij Moisés maj kipaleui Míriam, uan satepan Moisés kitataujtij Jehová maj kipajti. ¿Toni kichiuak Dios? Yejua amo kisentokak kitatsakuiltij kemej kiixtalijka porin amo moueyimati. Kemej yolyemanik, kikakik Moisés uan kipajtij Míriam (Núm. 12:​1-15).

⁷ No tikitaj ke Jehová yolyemanik keman tiknemiliaj keniuj kinankilij tekiuaj Ezequías. Jehová kititanka tanauatijkej Isaías maj kiluiti ke momikiliskia. Yejua ika Ezequías semi mochoktij uan kitataujtij Jehová maj kipajti. Yejua kuali kikakik inetataujtil Ezequías uan kiluij ke nemiskiaok 15 xiujmej (2 Rey. 20:​1, 5, 6). Kemej Jehová semi yolyemanik, techkaki uan kipata tein kiixtalia komo kiita ke ueli.

8. ¿Keniuj Jesús kitemoj kinpaleuis oksekin maski miakej kijtouayaj ke amo ueliskia? (Marcos 3:​1-6).

⁸ Jesús kichiua kemej iTajtsin. Keman yetoya nikan taltikpak, nochipa keman uelik kinpaleuij oksekin. Ijkon kichiuak keman itech tonal sábado kinpajtij akin mokokouayaj maski taixyekananij itech taneltokalis kijtouayaj ke amo ueliskia mochiuas (xikonlero Marcos 3:​1-6). Uan axkan ika tanauatil tein kipia kemej taixyekankej itech nechikol, no ijkon tepaleuia uan teiknelia. Komo aksa tel tajtakolchiua, Jesús amo yolijsiui uan kichia maj moyolpata (Apoc. 2:​2-5).

9. ¿Keniuj uelis tikchiuaskej kemej Jehová uan amo tiktemoskej maj nochipa mochiua tein tiknemiliaj? (No xikonita taixkopimej).

⁹ ¿Keniuj uelis tikchiuaskej kemej Jehová? Tejuan no moneki titanemiliskej uan tikchiuaskej kemej Jehová akin amo kitemoua maj nochipa mochiua tein kinemilia (Sant. 3:17). Tetatmej akin kichiuaj kemej Jehová amo kichiaj maj ininkoneuan kichiuakan tein amo ueliskej. Jacob katka se kuali tepopaj porin inintech tanemilij ikoneuan (Génesis 33:​12-14). Uan no, tetatmej akin yolyemankej uan teajsikamatij amo kijtouaj ke se ininkoneuj okachi ueli kichiua teisa ke okse. Tayekananij amo no moneki kitemoskej maj nochipa mochiua tein kinemiliaj. Se tayekankej amo kijtos maj mochiua tein yejua kinemilia, ta kinpaleuis okseki tayekananij maj mochiua tein kiixtaliaj komo amo kitapanauilia tein kijtoua Biblia (1 Tim. 3:​2, 3). Uan tinochin moneki timochikauaskej tikajsikamatiskej tein oksekin kinemiliaj maski amo tanemiliskej kemej tejuan (Rom. 14:1). Tisejsemej timochikauaj ‘amo tiktemoskej maj nochipa mochiua tein tiknemiliaj’ (Filip. 4:5).

JEHOVÁ AMO YOLIJSIUI

10. ¿Keniuj kinextiani Jehová ke amo yolijsiui?

¹⁰ Xa tikitanij ke akin moueyimatij tel yolijsiuij uan amo kiuelitaj mochiaskej. Jehová amo ijkon kichiua, yejua nion tepitsin yolijsiui. Keman Noé nemia, kijtoj ke mochiaskia 120 xiujmej para kinixpolos akin amo yolkualmej (Gén. 6:3). Yejua ika Noé uelikok kiniskaltij ikoneuan uan kichijchiuak arca iniuan ichankauan. Satepan, Jehová kuali kikakik Abrahán keman kitajtanij ox kiixpoloskia Sodoma uan Gomorra. Aksa akin moueyimati xa kiluiskia Abrahán: “¿Tiknemilia ke amo nikmati toni nikchiuas yejua ika tinechtatsintokia?”. Sayoj ke Jehová amo ijkon kichiuak porin yejua yolyemanik uan amo yolijsiui (Gén. 18:​20-33).

11. Kemej kijtoua 2 Pedro 3:​9, ¿keyej Jehová amo yolijsiui?

¹¹ Axkan Jehová no kinextijtok ke amo yolijsiui. Yejua kichixtok tonal tein kiixtalij para kiixpolos nochi tein amo kuali. ¿Keyej amo yolijsiui? “Porin amo kineki maj nion akin ixpoliui, ta maj nochin moyolpatakan” (xikonlero 2 Pedro 3:9). Maj itech titanemilikan keniuj tel miakejya mochiujkej itasojikniuan Jehová porin yejua amo yolijsiui, uan tiknekij maj tel miakejok kiixmatikan. Sayoj ke Jehová amo nochipa mochixtos. Maski tetasojta, amo nochipa kinkauas maj kichiuakan tein yejuan kinekij porin kinixpolos akin amo yolkualmej (Hab. 2:3).

12. ¿Keniuj Jesús kichiua kemej Jehová uan amo no yolijsiui?

¹² Jesús kichiua kemej iTajtsin. Tel miak xiujmejya Jesús kinextiani ke kichiua kemej Jehová uan amo no yolijsiui. Kiitani keniuj Satanás kitakajkayauiliani Dios uan tejuan (Gén. 3:​4, 5; Job 1:11; Apoc. 12:10). No kiitani keniuj miakej semi tajyouiaj. Xionmonemili keniuj Jesús kitelneki “kitauejuelouilis in Amokuali” (1 Juan 3:8). Kemej semi yolyemanik, nejon kipaleuiani maj mochia hasta keman Jehová kiluis ke uelisya kiixpolos nochi tein kichiujtok in Amokuali. Yejua kimati ke sayoj Jehová kinamiki kiixtalis nejon (Hech. 1:7).

13. ¿Kemanian Jesús kinextij ke amo yolijsiuia iniuan itatitaniluan, uan keyej?

¹³ Keman Jesús yetoya nikan taltikpak, no kinextij ke amo yolijsiuia iniuan itatitaniluan. Keman kiitaya ke miakpa motajtolteuiayaj porin kijtouayaj akoni katka okachi ueyichiujkej, amo kinemilij ke amo keman mopataskiaj. Jesús kisentokak kinextij ke nion tepitsin yolijsiuia (Luc. 9:46; 22:​24-27). Yejua kimatia ke ueliskia mochiuaskej okachi yolyemankej. Uan tejuan, ¿no miakpa tikchiuanij teisa tein ika timopolouanij? Komo ijkon, xa semi tiktasojkamatij maj toTekiuaj semi techajsikamati uan maj amo moueyimati.

14. ¿Toni techpaleuis maj amo tiyolijsiuikan?

¹⁴ ¿Keniuj uelis tikchiuaskej kemej Jehová? Moneki ‘titanemiliskej kemej Cristo’, komo ijkon tikchiuaj okachi titanemiliskej uan tikchiuaskej kemej Jehová (1 Cor. 2:16). Sayoj ke, ¿keniuj uelis titanemiliskej kemej Jesús? Semi moneki maj tiklerokan Biblia kampa ika tajtoua tein kichiuak. Satepan, maj tikxelokan tiempo para itech titanemiliskej tein Jesús kichiuak uan keyej ijkon kichiuak. No semi moneki maj tiktajtanikan Jehová maj techpaleui maj tiyolyemankej kemej Jesús uan maj amo tiyolijsiuikan. Keman okachi titanemiliskej kemej Cristo, okachi tikchiuaskej kemej Dios uan amo tiyolijsiuiskej iniuan tokniuan, uan no uelis tikajsikamatiskej ke ipa yolik yeski titanemiliskej uan tikchiuaskej kemej Jehová (Mat. 18:​26-30, 35).

JEHOVÁ KINITA AKIN YOLYEMANKEJ

15. Xikonijto keniuj Jehová kinextia ke kinpatiuita akin yolyemankej (Salmo 138:6).

¹⁵ (Xikonlero Salmo 138:6). Maj tiknemilikan nejin, Jehová akin okachi ueyichiujkej kinpatiuita akin yolyemankej. Desde ne uejkaujya, Jehová kinmakani seki tekimej akin oksekin amo kinchiuayaj cuenta. Xa sekin amo semi tikinixmatij, sayoj ke Jehová kichiuak maj Biblia ininka tajto. Jehová kichiuak maj Moisés kijkuilouani itokay Débora. Yejua kinpaleuij ichankauan Isaac uan Jacob kemej 125 xiujmej. Maski amo semi tikmatij tein kipanok nejin siuatsin, Jehová kichiuak maj Moisés kijkuilo se taman tein kinextia ke Jacob uan ichankauan semi kitasojtayaj (Gén. 24:59; 35:​8, nota). Uan miak xiujmej satepan, Jehová kiixtalij David akin katka se ichkatajpixkej para maj mochiuani tekiuaj de Israel (2 Sam. 22:​1, 36). Tepitsin satepan ke Jesús yolik, Dios kichiuak maj se ángel kinmatiltiani seki ichkatajpianij ke yolkaya ompa Belén akin satepan mochiuaskia Mesías. Uan yejuan akin Jehová yekinika kinmatiltij nejon (Luc. 2:​8-11). Uan keman José uan María kiuikakej Jesús itech templo, Jehová kichiuak maj Simeón uan Ana akin katkaj xiuejkejya kiitanij iKoneuj (Luc. 2:​25-30, 36-38). Nochi nejin kinextia ke “maski Jehová ueyichiujkej, kiita akin yolyemanik”.

16. ¿Keniuj Jesús kichiuak kemej iTajtsin?

¹⁶ Jesús kichiua kemej iTajtsin. Jesús no kichiuak kemej iTajtsin keman kinpatiuitak akin kinixtopeuayaj. Kinmachtij de iTaixyekanalis Dios akin “amo ueyichiuanimej katkaj uan amo semi taixmatiaj” (Hech. 4:13; Mat. 11:25). Jesús no kinpajtij akin mokokouayaj uan kemej kinpajtij kimachilijkej ke kintasojtayaj uan kinpoujkaitayaj (Luc. 5:13). Achto ke kimiktiskiaj kinmetspajpakak itatitaniluan, nejon sayoj kichiuayaj takeualmej (Juan 13:5). Uan achto ke yaskia iluikak, kinnauatij imomachtijkauan uan tejuan no maj tikchiuakan se tekit tein motelneki: maj tikinpaleuikan oksekin para maj ueli nemikan nochipaya (Mat. 28:​19, 20).

17. ¿Keniuj uelis tikchiuaskej kemej Jehová? (No xikonita taixkopin).

¹⁷ ¿Keniuj uelis tikchiuaskej kemej Jehová? Tiknextiaj ke titetasojtaj uan titepoujkaitaj keman nochin tikintapouiaj kuali tanauatilmej maski okseko kayomej, taman ixtamatij uan komo motelmachtijkej oso amo. No tikchiuaj kemej Jehová keman tikintasojtaj uan tikinpoujkaitaj tokniuan maski tikpiaj okachi tekimej itech nechikol oso okachi ueli tikchiuaj miak taman ke yejuan (Filip. 2:3). Jehová semi yolpaki keman kiita ke nochipa tiyolyemankej uan ke achto tejuan tiknextiaj ke titepoujkaitaj uan titetasojtaj (Sof. 3:12; Rom. 12:10).

18. ¿Keyej tikonneki tikonnextis ke tionyolyemanik kemej Jehová?

¹⁸ Komo timochikauaj tiyeskij tiyolyemankej kemej Jehová, oksekin amo kinouijmakas touan tajtoskej, amo tiktemoskej maj nochipa mochiua tein tiknemiliaj uan amo tiyolijsiuiskej. No tikintasojtaskej uan tikinpoujkaitaskej oksekin ijkon kemej Jehová kichiua. Uan xikonelnamiki ke komo timochikauaj tiyeskij okachi tiyolyemankej kemej Jehová, yejua okachi techpatiuitas (Is. 43:4).