Ma tikneltokakan Jehová kuali tlen kipejpena kichiua

1, 2. (1) ¿Tleka miakej amo kinneltokiliaj akinmej tlanauatiaj? (2) ¿Tlen timomachtiskej?

AXKAN miakej amo kinneltokiliaj akinmej tlanauatiaj. ¿Tleka? Porque kintlaliaj tlanauatilmej tlen san kinpaleuiaj akinmej kipiaj tomin uan akinmej amo, san tlajyouiaj, ik non, Biblia kijtoua: “San nochipa motlajyouiltiaj ijkuak san yejuan monauatiaj” (Ecl. 8:9). Uan miakej noijki tlen kinyekana inreligión kichiuaj tlen amo kuali, ik non, miakej ayakmo kineltokaj toTajtsin Dios. Ik non, moneki tikinpaleuiskej akinmej tikinmachtiaj ma tlaneltokakan itech toTajtsin Dios uan akinmej ye okintlali ma techyekanakan.

² Amo san akinmej tikinmachtiaj moneki kineltokaskej Jehová uan ialtepe. Akinmej yitikpiaj miak xiuitl tiktekichiuiliaj Jehová moneki tikneltokaskej ye nochipa kichiua tlen kuali porque xamo satepan uelis techpanos seki tlamantli tlen kichiuas ayakmo ma titlaneltokakan. Ma tikitakan eyi tlamantli: se, ijkuak tiktlajtoltiaj itech Biblia tlen yiuejkika opanok, ome, ijkuak ialtepe Jehová techiluia ken tikchiuaskej seki tlamantli uan eyi, ijkuak satepan itlaj techpanos.

IJKUAK TIKTLAJTOLTIAJ BIBLIA MA TIKNELTOKAKAN JEHOVÁ KICHIUA TLEN KUALI

3. ¿Tleka tlen tiktlajtoltiaj itech Biblia uelis kichiuas ayakmo tikneltokakan Jehová?

³ Ijkuak tiktlajtoltiaj Biblia xamo timotlajtlaniaj tleka Jehová okintlapojpolui sekimej uan oksekimej amo. Itech amochtli Números Jehová otlanauati ma kimiktikan se israelita porque okololo kuauitl tonal sábado. Pero itech Segundo libro de Samuel kijtoua David oauilnenki uan otemikti pero Jehová okitlapojpolui (Núm. 15:32, 35; 2 Sam. 12:9, 13). Xamo timotlajtlaniaj: “¿Tleka Jehová okitlapojpolui David uan okse tlakatl amo?”.

4. ¿Ken techpaleuia Génesis 18:20, 21 uan Deuteronomio 10:17 ma tikneltokakan Jehová kichiua tlen kuali?

⁴ Ualeua Biblia amo kijtoua nochi tlen opanok. David melauak omoyolkopki (Sal. 51:2-4). Pero ¿tlakatl israelita melauak omoyolkopki? ¿Nochipa ijkon okichiuaya? ¿Yokiluijkaj tlen kipanoskia? Biblia amo kijtoua pero ma tikneltokakan Jehová nochipa kichiua tlen kuali (Deut. 32:4). Tejuan nochipa timotlapololtiaj porque titechikoitaj uan tikkakij tlen kijtouaj oksekimej pero Jehová kita nochi tlen panoua (xiktlajtolti Génesis 18:20, 21; Deuteronomio 10:17). Ijkuak okachi tikixmatiskej Jehová uan tlen technauatia, tikneltokaskej kuali tlen kipejpena kichiua. Tla ijkuak tiktlajtoltiaj Biblia amo tikajsikamatij seki tlamantli, ma tikneltokakan Jehová nochi kuali tlen kipejpena kichiua (Sal. 145:17).

5. ¿Tleka amo kuali titlaixkomakaj? (Noijki xikita recuadro “Amo kuali titlaixkomakaj porque titlajtlakolejkej”).

⁵ Tejuan titlajtlakolejkej, ik non, amo kuali titlaixkomakaj. ToTajtsin Dios otechchijchi ken ye, ik non, amo techpaktia ijkuak oksekimej kinchiuiliaj tlen amo kuali (Gén. 1:26). Pero ken titlajtlakolejkej amo kuali titlaixkomakaj, maski tikijtoskej tikmatij nochi tlen opanok. Ma tikilnamikikan tlen okipanok Jonás, sapanoua okualanki porque Jehová okintlapojpolui ninivitas (Jon. 3:10-4:1). Jehová okintlapojpolui uan omomakixtijkej ciento veinte mil uan ijkon omotak Jonás omotlapololti, amo Jehová.

6. ¿Tleka Jehová amo moneki ma techilui tlen mokuayejyekoua kichiuas?

⁶ Jehová amo moneki techiluis tleka kichiua tlen mokuayejyekoua. Yiuejkika Jehová okinkauili sekimej itekipanojkauan ma kijtokan tlen uelis kichiuaskia (Gén. 18:25; Jon. 4:2, 3). Uan ualeua okinmiluiaya tleka okichiuaya tlen omokuayejyekouaya (Jon. 4:10, 11). Pero ye amo moneki techiluis tleka kichiua seki tlamantli. Ye otechchijchi, ik non, amo moneki techiluis kox uelis kichiuas itlaj noso amo (Is. 40:13, 14; 55:9).

MA TIKNELTOKAKAN JEHOVÁ IJKUAK IALTEPE TECHILUIA KEN TIKCHIUASKEJ SEKI TLAMANTLI

7. ¿Akinmej ualeua oui tikinneltokiliskej uan tleka?

⁷ Tikneltokaj Jehová nochipa kichiua tlen kuali pero xamo tikitaj oui tikinneltokiliskej akinmej ye okintlali. Xamo tikijtoskej kox kichiuaj tlen Jehová kineki noso tlen yejuan mokuayejyekouaj. Xamo yiuejkika ijkon okinpanok sekimej. Ma tikitakan tlen otimomachtijkej itech párrafo eyi. Xamo se ifamiliar tlakatl tlen amo otetlakamatki sábado omokuayejyeko kox Moisés achto okitlajtlani Jehová para kijtoskia ma kimiktikan. Xamo noijki ijkon omotlajtlani se iyolikni Urías. David oauilnenki iuan isiua Urías, iyolikni uelis omokuayejyeko xamo David amo okimiktijkej porque okatka tekiua. Amo uelis tikijtoskej tikneltokaj Jehová tla amo tikinneltokiliaj akinmej ye okintlali ma techyekanakan.

8. ¿Axkan ken mochiua tlen kijtoua Hechos 16:4, 5?

⁸ Axkan Jehová techyekana ika “tlakeuali yolmelajki uan ixtlamatki” (Mat. 24:45, TNM). Ijkon ken itech achto siglo, tokniuan tlen pouij itech Cuerpo Gobernante ika tlayekankej kinyekanaj tokniuan ma tetlapouikan (xiktlajtolti Hechos 16:4, 5). Tlayekankej kinmiluiaj tokniuan tlen inmiuan monechikouaj tlen moneki kichiuaskej uan tla tejuan tikintlakamatij, tikteititiskej Jehová kichiua nochi tlen kuali.

9. ¿Keman tikitaskej oui tikintlakamatiskej tlayekankej uan tleka?

⁹ Xamo ualeua tikitaj oui tikchiuaskej tlen kipejpenaj tlayekankej. Axkan yomopatlak seki tlamantli itech tlanechikolmej uan itech circuitos. Para kuali motekitiltiskej kalmej kanin monechikouaj tokniuan, tlayekankej kinmiluiaj sekimej tokniuan ma tlapaleuitij itech okse tlanechikol. Tla ijkon techiluiskej, xamo oui tikinkajteuaskej tofamiliares uan toyolikniuan. ¿Jehová kinmiluia tlayekankej kanin moneki yaskej tokniuan? Amo. Xamo, ik non, tikitaj oui tikintlakamatiskej tlayekankej pero Jehová kineltoka kuali kipejpenaskej tlen kichiuaskej tokniuan uan tejuan noijki moneki timokuayejyekoskej ken Jehová.b

10. Ijkon ken kijtoua Hebreos 13:17, ¿tleka moneki tikintlakamatiskej tlayekankej?

¹⁰ ¿Tleka moneki tikintlakamatiskej tlayekankej maski ualeua amo techpaktia tlen kipejpenaj? Porque tla tikintlakamatij, kuali timouikaskej iuan tokniuan (Efes. 4:2, 3). Noijki tla tiyolyamankej uan tikintlakamatij tlayekankej, tokniuan kuali yetoskej (xiktlajtolti Hebreos 13:17). Ijkon tikteititiaj tikneltokaj Jehová kuali tlen kichiua porque ye okintlali tlayekankej ma techmaluikan (Hech. 20:28).

11. ¿Tlen techpaleuis ma tikneltokakan kuali techyekanaj tlayekankej?

¹¹ ¿Tlen techpaleuis ma tikneltokakan kuali techyekanaj tlayekankej? Ma tikilnamikikan yejuan kiluiaj Jehová ma kinmaka iespíritu santo ijkuak itlaj kipejpenaj kichiuaskej. Noijki kichiuaj tlen kijtouaj principios bíblicos uan kichiuaj ijkon ken kijtoua ialtepe Jehová. Kinekij kiyolpaktiskej Jehová uan kinmaluiskej tokniuan. Yejuan kimatij ye kita ken kinmaluiaj itekipanojkauan (1 Ped. 5:2, 3). Miakej amo mouikaj porque techikoitaj, kipiaj inreligión uan mokajkalakiaj itech política pero tejuan kuali timouikaj porque tiktekichiuiliaj Jehová. ¡Non kiteititia ye techteochiua!

12. ¿Tlen moneki motlajtlaniskej tlayekankej para kimatiskej kox melauak omoyolkopki akin otlajtlakolchi?

¹² Jehová okinnauati tlayekankej ma kinmaluikan tokniuan tlen inmiuan monechikouaj para ma yetokan chipauakej ixpan Jehová. Ik non, tla se tokni tlajtlakolchiua, Jehová kinkauilia tlayekankej ma kitakan kox ok uelis yetos iuan tokniuan. Achto moneki kitaskej kox melauak moyolkopa, ik non, moneki motlajtlaniskej: “¿Melauak yomoyolkopki? ¿Yokiteititi ayakmo kineki tlajtlakolchiuas? ¿Ayakmo mouika iuan akinmej okichijkej ma tlajtlakolchiua?”. Tlayekankej moneki motlatlaujtiskej, momachtiskej tlen kijtoua Biblia uan moneki kitaskej tlen mokuayejyekoua akin otlajtlakolchi, ijkon kitaskej kox ok uelis mouikas iuan tokniuan. Tla amo moyolkopa, moneki kikixtiskej itech tlanechikol (1 Cor. 5:11-13).

13. ¿Xamo tlen tikijtoskej tla kikixtiaj itech tlanechikol se tofamiliar noso se toyolikni?

¹³ Tla akin kikixtiaj itech tlanechikol amo se toyolikni noso amo se tofamiliar, xamo amitlaj tikijtouaj. Pero tla akin iuan timouikaj kikixtiaj, xamo tikijtoskej amo kuali tlen okichijkej tlayekankej, amo okitakej nochi tlen opanok noso xamo timokuayejyekoskej amo otlaixkomakakej ijkon ken Jehová kineki. ¿Tlen techpaleuis kuali ma tikitakan tlen kipejpenaj kichiuaj tlayekankej?

14. ¿Tlen moneki tikilnamikiskej ijkuak tlayekankej kikixtiaj itech tlanechikol se tofamiliar noso se toyolikni?

¹⁴ Jehová kineki kuali ma yetokan tokniuan uan noijki akin otlajtlakolchi, ik non, kijtoua ma kikixtikan akin amo moyolkopa uan ijkon amo kinmijtlakos oksekimej (Gál. 5:9). Tla amo kikixtiaj, xamo amo kitas sapanoua tlajtlakoli tlen okichi, amo kipatlas ken mokuayejyekoua uan amo mochijchikauas para oksepa ma mouika iuan Jehová (Ecl. 8:11). Moneki tikneltokaskej tlayekankej achto kuali kitaj kox moneki kikixtiskej akin tlajtlakolchiua. Ijkon ken jueces tlen okatkaj itech altepetl Israel, tlayekankej tlaixkomakaj ken Jehová kineki (2 Crón. 19:6, 7).

TLA AXKAN TIKNELTOKAJ JEHOVÁ, SATEPAN NOIJKI IJKON TIKCHIUASKEJ

15. ¿Tleka moneki axkan tikneltokaskej Jehová kuali techyekana?

¹⁵ Ayakmo miak poliui yitlamis nochi tlen amo kuali, ik non, axkan moneki tikneltokaskej Jehová kichiua nochi kuali. Ijkuak yetos ueyi tlajyouilistli xamo techiluiskej ma tikchiuakan seki tlamantli tlen motas amo techpaleuis. Jehová amo techtlapouis pero kichiuas akinmej techyekanaj ma techiluikan tlen moneki tikchiuaskej. Ijkuak ijkon panos amo moneki timokuayejyekoskej: “¿Jehová ijkon nechiluia noso san tlen mokuayejyekouaj tlayekankej?”. ¿Ijkuakon tikneltokiliskej Jehová uan ialtepe? Tikintlakamatiskej ijkuak peuas ueyi tlajyouilistli tla axkan san niman ijkon tikchiuaj (Luc. 16:10).

16. ¿Ken tikteititiskej satepan melauak tikneltokaj Jehová kuali kipejpena tlen kichiua?

¹⁶ Ma timokuayejyekokan tlen tikchiuaskej ijkuak Jehová nochtin kinmixkomakas. Axkan tiknekij akinmej amo kitekichiuiliaj Jehová uan tofamiliares ma kitekichiuilikan. Jehová yokitlali Jesús para ma kijto tlen kinpanos tlaltikpaktlakamej ijkuak uits Armagedón (Mat. 25:31-33; 2 Tes. 1:7-9). Tejuan amo tikmatij akinmej kinmakixtis Jehová uan akinmej amo (Mat. 25:34, 41, 46). ¿Tikneltokaskej Jehová kuali okipejpenki tlen kichiuas? Axkan moneki okachi tikneltokiliskej uan satepan noijki moneki ijkon tikchiuaskej.

17. ¿Tlen panos satepan porque Jehová kuali kipejpena tlen kichiua?

¹⁷ Ma timokuayejyekokan ken tiyetoskej itech xochitlali, ¿ken timomachiliskej ijkuak tikitaskej Jehová kuali okipejpenki tlen okijto kichiuas? Akinmej amo melauak kiueyichiuaj toTajtsin Dios, akinmej tlanemakaj uan tekiuajkej ayakmo yetoskej, ik non, ayakmo titlajyouiskej. Ayakmo timokokoskej, ayakmo motas yitikpiaj miak xiuitl uan ayakmo tiixpoliuiskej. Satanás uan amo kuali ejekamej kintsakuaskej mil xiuitl (Apoc. 20:2, 3). Sapanoua tiyolpakiskej tla nochipa tikneltokaj Jehová kuali tlen kipejpena kichiua.

18. Ijkon ken kijtoua Números 11:4-6 uan 21:5, ¿tlen techmachtia tlen okichijkej israelitas?

¹⁸ Ijkuak tlaltikpak yetos se xochitlali, ¿melauak tikteititiskej tikneltokaj Jehová kuali kipejpenas tlen kichiuas? Ma tikilnamikikan tlen okichijkej israelitas ijkuak ye okinmakixti ompa Egipto. Sekimej okilnamikiayaj tlen okikuayaj uan amo omotlasojkamatkej okipiayaj maná (xiktlajtolti Números 11:4-6; 21:5). ¿Kox ijkon tikchiuaskej ijkuak panos ueyi tlajyouilistli? Xamo moneki titekipanoskej miak para ma mochiua tlaltikpak se xochitlali pero xamo amo tikpiaskej seki tlamantli uan oui tikitaskej. ¿Tiktlasojkamatiliskej tlen techmakas Jehová? Tla axkan tiktlasojkamatiliaj tlen techmaka, satepan noijki tiktlasojkamatiliskej.

19. ¿Tlen okachi ipati otikitakej itech nin tlamachtil?

¹⁹ Moneki tikneltokaskej Jehová nochipa kuali kipejpena tlen kichiua. Uan noijki moneki tikinneltokiliskej akinmej ye okinpejpenki nikan tlaltikpak ma techyekanakan. Ma tikilnamiktokan tlen okijto Jehová ika profeta Isaías: “Nanyetoskej chikauakej tla nanmoyolseuijtokej uan nantlaneltokaj” (Is. 30:15).