मलाकि

१ एउटा घोषणा:

मलाकिमार्फत* इस्राएललाई यहोवाको वचन:

२ यहोवा भन्‍नुहुन्छ, “मैले तिमीहरूलाई प्रेम गरेको छु।”+

तर तिमीहरू भन्छौ: “तपाईँले हामीलाई कसरी प्रेम गर्नुभएको छ?”

यहोवा घोषणा गर्नुहुन्छ, “के एसाव याकुबको दाइ थिएन र?+ तर मैले याकुबलाई प्रेम गरेँ ३ अनि एसावलाई भने घृणा गरेँ।+ मैले उसका पहाडहरूलाई उजाड पारिदिएँ+ र उसको पुर्ख्यौली जमिनलाई स्यालहरू बस्ने ठाउँ बनाइदिएँ।”+

४ “एदोमले* यसो भनेको छ, ‘हामी चकनाचुर भएका छौँ तर हामी फर्कनेछौँ र भत्केका कुराहरूलाई फेरि बनाउनेछौँ।’ तर सेनाहरूका यहोवा यसो भन्‍नुहुन्छ, ‘तिनीहरूले बनाउनेछन्‌ तर म भत्काइदिनेछु। अनि तिनीहरू “दुष्टहरूको इलाका” र “यहोवा परमेश्‍वरले कहिल्यै नमेटिने सराप दिनुभएको जाति” भनेर चिनिनेछन्‌।+ ५ यो तिमीहरूले आफ्नै आँखाले देख्नेछौ र यसो भन्‍नेछौ: “इस्राएलमा यहोवाको महिमा होस्‌।”’”

६ “उहाँको नामको अपमान गर्ने पुजारीहरूलाई सेनाहरूका यहोवा यसो भन्‍नुहुन्छ, ‘छोराले आफ्नो बुबाको आदर गर्छ+ र दासले आफ्नो मालिकको आदर गर्छ। म बुबा हुँ भने+ मेरो आदर गरेको खोइ?+ म मालिक हुँ भने मेरो डर* मानेको खोइ?’+

“‘तर तिमीहरू भन्छौ: “हामीले कसरी तपाईँको नामको अपमान गरेका छौँ र?”’

७ “‘मेरो वेदीमा दूषित खाना* चढाएर।’

“‘अनि तिमीहरू भन्छौ: “हामीले तपाईँलाई कसरी दूषित बनाएका छौँ र?”’

“‘“यहोवाको टेबुल+ घिनलाग्दो छ” भनेर। ८ तिमीहरू अन्धो पशु बलि चढाउन ल्याउँछौ अनि भन्छौ: “यसमा कुनै खोट छैन।” लङ्‌गडो वा रोगी पशु ल्याउँछौ अनि भन्छौ: “यसमा कुनै खोट छैन।”’”+

“त्यस्तो पशु तिमीहरूका राज्यपाललाई एक चोटि दिई हेर त। के तिनी तिमीहरूसँग खुसी हुनेछन्‌ वा तिमीहरूलाई निगाह देखाउनेछन्‌?” सेनाहरूका यहोवा भन्‍नुहुन्छ।

९ “अब, परमेश्‍वरलाई बिन्ती गरेर उहाँलाई मनाई हेर। उहाँले तिमीहरूको हातबाट त्यस्ता भेटीहरू ग्रहण गरेर तिमीहरूमाथि अनुग्रह देखाउनुहोला र?” सेनाहरूका यहोवा भन्‍नुहुन्छ।

१० “अनि तिमीहरूमध्ये को ढोका* बन्द गर्न राजी छौ?+ किनकि तिमीहरू त दाम नलिई मेरो वेदीमा आगोसमेत बाल्दैनौ।+ म तिमीहरूसित पटक्कै खुसी छैनँ। अनि तिमीहरूले चढाएको भेटीदेखि म प्रसन्‍न छैनँ।”+

११ “पूर्वदेखि पश्‍चिमसम्म* जातिजातिमाझ मेरो नाम महान्‌ हुनेछ।+ सबै ठाउँमा मानिसहरूले मेरो नाम लिएर निष्खोट भेटीहरू चढाउनेछन्‌ अनि माथिसम्म धुवाँ उठ्‌नेगरि तिनीहरूले बलि चढाउनेछन्‌। किनकि जातिजातिमाझ मेरो नाम महान्‌ हुनेछ,”+ सेनाहरूका यहोवा भन्‍नुहुन्छ।

१२ “तर तिमीहरूले यसो भनेर यसको* अपमान गरिरहेका छौ,+ ‘यहोवाको टेबुल दूषित छ अनि यसमा भएका फल, खानेकुरा घिनलाग्दा छन्‌।’+ १३ अनि तिमीहरू नाकको पोरा फुलाउँदै खिसी गर्छौ र यसो भन्छौ, ‘उफ! कत्ति थकाइलाग्दो!’” सेनाहरूका यहोवा भन्‍नुहुन्छ। “अनि तिमीहरू चोरेको, लङ्‌गडो र रोगी पशुहरू ल्याउँछौ। हो, तिमीहरू त्यस्ता पशुहरू भेटी चढाउन ल्याउँछौ! के म ती ग्रहण गरूँ?”+ यहोवा भन्‍नुहुन्छ।

१४ “आफ्नो बगालमा खोटरहित पशु* हुँदाहुँदै आफ्नो भाकल पूरा गर्न खोट भएको पशु यहोवालाई चढाउने धूर्त मानिस श्रापित होस्‌। किनकि म महान्‌ राजा हुँ+ र जातिजातिमाझ मेरो नामले आश्‍चर्य र भय जगाउनेछ,”+ सेनाहरूका यहोवा भन्‍नुहुन्छ।

२ “अब हे पुजारीहरू हो, यो आज्ञा तिमीहरूको लागि हो।+ २ यदि तिमीहरूले मेरा आज्ञाहरू पालन गरेनौ र मेरो नामको महिमा गर्नमा मन लगाएनौ भने,” सेनाहरूका यहोवा भन्‍नुहुन्छ, “म तिमीहरूमाथि सराप पठाउनेछु+ अनि तिमीहरूले पाएका आशिष्‌हरूलाई सरापमा परिणत गरिदिनेछु।+ हो, मैले आशिष्‌लाई सरापमा परिणत गरिदिएको छु किनकि तिमीहरूले मेरा आज्ञाहरूमा मन लगाएनौ।”

३ “हेर! तिमीहरूले छरेको बिउलाई म तिमीहरूकै कारण नाश गरिदिनेछु।*+ अनि म तिमीहरूको अनुहारमा गोबर फ्याँकिदिनेछु, हो, तिमीहरूले चाडको बेला बलि चढाएका जनावरहरूको गोबर। अनि तिमीहरूलाई त्यससँगसँगै उठाएर लगिनेछ।* ४ त्यसपछि लेविसित मैले गरेको करार कायम रहिरहोस्‌ भनेर मैले नै तिमीहरूलाई यो आज्ञा दिएको हुँ भनी तिमीहरूले थाह पाउनेछौ,”+ सेनाहरूका यहोवा भन्‍नुहुन्छ।

५ “मैले तिनीसित गरेको करारले गर्दा तिनले जीवन र शान्ति पाए। तिनले मेरो डर मानून्‌* भनेर मैले तिनलाई यो आशिष्‌ दिएँ। तिनले मेरो डर माने र मेरो नामको आदर गरे। ६ तिनको मुखमा सत्यको व्यवस्था* थियो+ र तिनको ओठमा कुनै छल पाइएन। तिनी मसित शान्तिमा रहे र मसित इमानदार भई हिँडे+ अनि तिनले थुप्रैलाई गलत बाटोबाट फर्काए। ७ पुजारीको ओठले ज्ञानको रक्षा गर्नुपर्छ अनि मानिसहरूले तिनको मुखबाट व्यवस्थाका कुराहरू* सिक्नुपर्छ+ किनकि तिनी सेनाहरूका यहोवाका सन्देशवाहक हुन्‌।

८ “तर तिमीहरू आफै भने सही मार्गबाट तर्किएका छौ। तिमीहरूले गर्दा धेरै जना व्यवस्था पालन गर्नबाट चुकेका छन्‌।*+ लेविसित मैले गरेको करारलाई तिमीहरूले तोडेका छौ,”+ सेनाहरूका यहोवा भन्‍नुहुन्छ। ९ “त्यसकारण म तिमीहरूलाई सबै मानिसको नजरमा नीच र तुच्छ तुल्याइदिनेछु किनकि तिमीहरू मेरो मार्गबाट तर्कियौ अनि व्यवस्था लागू गर्दा पक्षपात गऱ्‍यौ।”+

१० “हामी सबैका बुबा एउटै हुनुहुन्‍न र?+ हामीलाई बनाउनुहुने परमेश्‍वर एउटै हुनुहुन्‍न र? त्यसोभए हामी किन एकअर्कालाई छल गरेर+ हाम्रा पुर्खाहरूले गरेको करार तोडिरहेका छौँ? ११ यहुदाले छल गरेको छ अनि इस्राएल र यरुसलेममा एउटा घिनलाग्दो काम गरिएको छ; यहुदाले यहोवा परमेश्‍वरको अपमान गरेको छ, जसले पवित्र कुरालाई* प्रेम गर्नुहुन्छ।+ अनि उसले पराई देवताको छोरीलाई आफ्नी दुलही बनाएर ल्याएको छ।+ १२ त्यसो गर्नेजति सबैलाई यहोवा परमेश्‍वरले याकुबको पालबाट निकालिदिनुहुनेछ, चाहे त्यो जोसुकै होस्‌। उसले सेनाहरूका यहोवाको लागि भेटी चढाउने गरेकै भए पनि ऊ निकालिनेछ।”+

१३ “अनि तिमीहरूले गरेको अर्को एउटा कामले गर्दा पनि यहोवाको वेदी आँसु, रोदन र सुस्केराले भरिएको छ; यही कारणले गर्दा उहाँले तिमीहरूको भेटीलाई वास्ता गर्न छोड्‌नुभएको छ र तिमीहरूले चढाएको कुनै पनि कुरा उहाँ ग्रहण गर्नुहुन्‍न।+ १४ अनि तिमीहरू भन्छौ, ‘हामीले त्यस्तो के गऱ्‍यौँ र?’ तिमीहरूले बैँसमा बिहे गरेको आफ्नी पत्नीलाई विश्‍वासघात गऱ्‍यौ र यहोवा परमेश्‍वर यसको साक्षी हुनुहुन्छ। तिमीहरूले आफ्नी सहयोगी, आफ्नी पत्नीलाई धोका दियौ, जससित तिमीहरूले करार गरेका थियौ।*+ १५ तर केहीले भने त्यसो गरेनन्‌ किनकि तिनीहरूमा अझै परमेश्‍वरको पवित्र शक्‍ति थियो। अनि तिनीहरू केको पर्खाइमा थिए? तिनीहरू परमेश्‍वरको सन्तानको पर्खाइमा थिए। त्यसैले तिमीहरू आफ्नो मनलाई बरालिन नदेओ र आफूले बैँसमा बिहे गरेको पत्नीलाई धोका नदेओ। १६ किनकि म सम्बन्धविच्छेदलाई घृणा गर्छु,”*+ इस्राएलका परमेश्‍वर यहोवा भन्‍नुहुन्छ, “अनि हिंसा गर्नेलाई* पनि घृणा गर्छु,” सेनाहरूका यहोवा भन्‍नुहुन्छ। “आफ्नो मनलाई बरालिन नदेओ अनि तिमीहरूले धोका नदेओ।+

१७ “तिमीहरूले बोलेको सुनेर यहोवा परमेश्‍वर वाक्कै हुनुभएको छ।+ तर तिमीहरू भन्छौ, ‘हामीले कसरी उहाँलाई वाक्कै पाऱ्‍यौँ र?’ तिमीहरूले यसो भन्यौ, ‘दुष्ट काम गर्ने सबै जना यहोवा परमेश्‍वरको दृष्टिमा असल छन्‌ अनि तिनीहरूलाई देखेर उहाँ खुसी हुनुहुन्छ।’+ अनि यसो पनि भन्यौ, ‘न्यायका परमेश्‍वर खोइ कहाँ छन्‌?’”

३ “हेर! म मेरो दूतलाई पठाउँदै छु अनि तिनले मेरो अघिअघि बाटो तयार पार्नेछन्‌।+ अनि साँचो प्रभु, जसलाई तिमीहरूले खोजिरहेका छौ, तिनी अचानक मन्दिरमा आउनेछन्‌+ र करारका दूत पनि आउनेछन्‌, जसको तिमीहरूले खुसीसाथ प्रतीक्षा गरिरहेका छौ। हेर! तिनी पक्कै आउनेछन्‌,” सेनाहरूका यहोवा भन्‍नुहुन्छ।

२ “तर तिनी आउने दिनमा को टिक्न सक्छ अनि तिनी देखा पर्दा को उभिन सक्छ? किनकि तिनी धातु खार्ने आगोजस्तै र धोबीको साबुनजस्तै+ हुनेछन्‌। ३ चाँदी खार्ने र शुद्ध पार्ने मानिसले जस्तै तिनले लेविका सन्तानलाई शुद्ध पार्नेछन्‌;+ तिनले तिनीहरूलाई सुन र चाँदीलाई जस्तै खार्नेछन्‌ र तिनीहरू यहोवाको लागि यस्ता मानिसहरू बन्‍नेछन्‌, जसले साँचो मनले भेटी चढाउँछन्‌। ४ अनि पहिलेपहिले जस्तै, प्राचीन समयमा जस्तै यहुदा र यरुसलेमको भेटी देखेर यहोवा परमेश्‍वर प्रसन्‍न हुनुहुनेछ।+

५ “न्याय गर्न म तिमीहरूको नजिक आउनेछु र तान्त्रिकहरू,+ व्यभिचार* गर्नेहरू, झूटो शपथ खानेहरू+ अनि ज्यालादारी कामदार, विधवा र अनाथलाई* ठग्नेहरू+ अनि विदेशीलाई मदत गर्न इन्कार गर्नेहरूविरुद्ध*+ म चाँडै सजाय सुनाउनेछु। यिनीहरूले मेरो डर पटक्कै मानेका छैनन्‌,” सेनाहरूका यहोवा भन्‍नुहुन्छ।

६ “किनकि म यहोवा हुँ, म कहिल्यै परिवर्तन हुन्‍नँ।+ अनि तिमीहरू याकुबका सन्तान हौ, त्यसैले तिमीहरूको अस्तित्व अहिलेसम्म मेटिएको छैन। ७ तिमीहरूका पुर्खाहरूको समयदेखि तिमीहरूले मेरा नीतिनियम तोड्‌दै आएका छौ, ती पालन गरेका छैनौ।+ मकहाँ फर्क र म तिमीहरूकहाँ फर्कनेछु,”+ सेनाहरूका यहोवा भन्‍नुहुन्छ।

तर तिमीहरू भन्छौ: “हामी कसरी तपाईँकहाँ फर्कने?”

८ “के मानिसले परमेश्‍वरलाई लुट्‌न सक्छ? तर तिमीहरूले मलाई लुटिरहेका छौ।”

अनि तिमीहरू भन्छौ: “हामीले तपाईँलाई कसरी लुट्यौँ र?

“दशांश* र अनुदान नदिएर। ९ तिमीहरू श्रापित नै हौ* किनकि तिमीहरू मलाई लुट्‌दै छौ, हो, पूरै राष्ट्रले मलाई लुट्‌दै छ। १० सबै दशांश भण्डारमा ल्याओ+ र मेरो घरमा भोजन होस्‌।+ मलाई जाँचेर हेर,” सेनाहरूका यहोवा भन्‍नुहुन्छ, “म आकाशका पानीका बाँधहरू खोलेर+ तिमीहरूलाई कुनै कुराको कमी नै नहुनेगरि आशिष्‌ बर्साउँछु कि बर्साउँदिनँ, हेर।”+

११ “सखाप पार्नेहरूलाई* म तिमीहरूको खातिर हप्काउनेछु अनि तिनीहरूले तिमीहरूको जमिनको उब्जनी खतम पार्नेछैनन्‌ र तिमीहरूका अङ्‌गुरका बोटहरू रित्तो हुनेछैनन्‌,”+ सेनाहरूका यहोवा भन्‍नुहुन्छ।

१२ “सबै राष्ट्रले तिमीहरूलाई आनन्दित भन्‍नेछन्‌+ किनकि तिमीहरूको देश खुसीको कारण बन्‍नेछ,” सेनाहरूका यहोवा भन्‍नुहुन्छ।

१३ यहोवा परमेश्‍वर भन्‍नुहुन्छ, “तिमीहरूले मविरुद्ध कडा शब्दहरू बोलेका छौ।”

तर तिमीहरू भन्छौ: “हामीले तपाईँविरुद्ध के कुरा गरेका छौँ र?”+

१४ “तिमीहरू भन्छौ, ‘परमेश्‍वरको सेवा गरेर केही फाइदा छैन।+ सेनाहरूका यहोवाको आज्ञा पालन गरेर अनि उहाँ समक्ष आफ्नो पापको लागि दुःखी भएर हामीलाई के फाइदा भएको छ र? १५ बरु हामी त अहङ्‌कारी मानिसहरू आनन्दित भएको देख्छौँ। अनि दुष्ट काम गर्नेहरू सफल भएका छन्‌।+ तिनीहरू परमेश्‍वरको परीक्षा गर्ने आँट गर्छन्‌ र सजाय नपाई उम्कन्छन्‌।’”

१६ तब यहोवा परमेश्‍वरको भय मान्‍नेहरूले आपसमा कुरा गरे, प्रत्येकले आफ्नो साथीसित कुरा गरे अनि यहोवा परमेश्‍वरले तिनीहरूको कुरा ध्यान दिएर सुनिरहनुभयो। यहोवा परमेश्‍वरको भय मान्‍नेहरू र उहाँको नामबारे सोच्नेहरूका* लागि+ उहाँको सामुन्‍ने सम्झनाको एउटा पुस्तक लेखियो।+

१७ सेनाहरूका यहोवा भन्‍नुहुन्छ, “अनि त्यस दिन म तिनीहरूलाई आफ्नो विशेष* सम्पत्ति बनाउनेछु+ र तिनीहरू मेरा हुनेछन्‌।+ अनि जसरी बुबाले आफ्नो आज्ञाकारी छोरामाथि टिठाउँछ, त्यसरी नै म तिनीहरूमाथि टिठाउनेछु।+ १८ तिमीहरूले फेरि धर्मी र दुष्ट मानिसबीच अनि परमेश्‍वरको सेवा गर्ने र नगर्ने मानिसबीचको भिन्‍नता देख्नेछौ।”+

४ “हेर! आगोको भट्टीझैँ दन्कँदै त्यो दिन आउँदै छ।+ त्यो दिन अहङ्‌कारीहरू र दुष्ट काम गर्नेहरू सबै ठोसाजस्तै हुनेछन्‌। आउँदै गरेको त्यस दिनले तिनीहरूलाई निश्‍चय नै भस्म पार्नेछ, हाँगा र जरा केही बाँकी रहनेछैन,” सेनाहरूका यहोवा भन्‍नुहुन्छ। २ “तर मेरो नामको आदर गर्ने* तिमीहरूमाथि धार्मिकताको* सूर्य उदाउनेछ र त्यसका किरणहरूले* तिमीहरूलाई निको पार्नेछ र मोटाघाटा बाछाहरूजस्तै तिमीहरू बुर्लुकबुर्लुक उफ्रनेछौ।”

३ “तिमीहरूले दुष्टहरूलाई खुट्टाले कुल्चनेछौ किनकि मैले कदम चाल्ने दिनमा तिमीहरूका लागि तिनीहरू पैतालामुनिको धुलोसरह हुनेछन्‌,” सेनाहरूका यहोवा भन्‍नुहुन्छ।

४ “मेरो सेवक मोसाको व्यवस्थाको सम्झना गर, ती नीतिनियम र ऐनकानुन, जुन सारा इस्राएलको लागि मैले होरेबमा दिएको थिएँ।+

५ “हेर! यहोवाको महान्‌ र आश्‍चर्यलाग्दो दिन आउनुअघि+ म तिमीहरूकहाँ भविष्यवक्‍ता एलियालाई पठाउँदै छु।+ ६ अनि तिनले बुबाहरूको मन छोराहरूतर्फ+ र छोराहरूको मन बुबाहरूतर्फ फर्काइदिनेछन्‌। नत्र त म आएर पृथ्वीलाई प्रहार गर्नेछु र सर्वनाश गर्नेछु।”

(हिब्रू-अरामी धर्मशास्त्र यहीँ समाप्त हुन्छ र यसपछि ख्रिष्टियन ग्रीक धर्मशास्त्र सुरु हुन्छ)