के तपाईंलाई परमेश्वरको पनि हाम्रोजस्तै भावनाहरू छन् जस्तो लाग्छ?
“मसीही हुन तपाईंले परमेश्वरमाथि विश्वास गर्नैपर्छ भन्ने छैन। . . . अहिले हाम्रो समयमा धार्मिक सोचाइसम्बन्धी एउटा नयाँ क्रान्ति भइरहेको छ। पहिलेदेखि चल्दै आएको परिपाटी जस्तो नभएर २१ औं शताब्दीमा परमेश्वर र चर्चबीच कुनै सम्बन्ध हुनेछैन” भनी बेलाइती विश्वविद्यालयका वरिष्ठ पादरीले भने। तिनी सी अफ फेथ आन्दोलनको पक्षमा बोलिरहेका थिए। यस्तो सोचाइलाई कम्तीमा पनि सय जना बेलाइती पादरीहरूले समर्थन गर्छन्। यी “मसीही नास्तिकहरू” धर्म मानिसको सृष्टि हो र एक जना सदस्यले भनेझैं परमेश्वर केवल “एउटा धारणा” हो भन्छन्। तिनीहरूको सोचाइअनुसार अलौकिक परमेश्वरको धारणा पटक्कै मिल्दैन।
सन् १९६० को दशकमा “परमेश्वरको अस्तित्व छैन” भन्ने नारा लोकप्रिय थियो। यस्तो टेढो विचारले १९ औं शताब्दीका जर्मन दार्शनिक फ्रेडरिक निशेको विचारधारा झल्काउँछ र यसले गर्दा थुप्रै युवाहरूले मनमानी गरी जीवन बिताउन, विवाह नगरी विपरीत लिंगका व्यक्तिसित बस्न र नैतिक रोकटोकबिना लागू पदार्थको दुर्व्यसन गर्न निहुँ पाए। तर के यस्तो स्वतन्त्रताले फ्लावर चिल्ड्रेन भनिने ती १९६० दशकका मानिसहरूलाई अझ सन्तोषजनक आनन्दमय जीवन बिताउन मदत गऱ्यो त?
सोही दशकमा एंगलिकन विशप जोन ए. टि. रबिन्सनले आफ्नो विवादास्पद पुस्तक परमेश्वरसित इमानदार (अंग्रेजी) प्रकाशित गरे। परमेश्वर “केवल मानव जीवनको एउटा गहन पक्षबाहेक” अरू केही होइन भनी तिनले भनेको हुँदा सँगी पादरीहरूले आलोचना गरे। धर्मविज्ञानका प्राध्यापक किथ वार्डले यस्तो प्रश्न गरे: “के परमेश्वरमाथि विश्वास गर्नु भनेको अहिले बुद्धिमान्हरूले त्यागिसकेको पुरानो अन्धविश्वास मात्र हो?” आफ्नो प्रश्नको जवाफ दिंदै यसो भने, “अहिले धर्म भन्नु नै परमेश्वरबारे परम्परागत विचारधाराको पुनः ज्ञान लिनु हो।”
दुःखकष्ट र हाम्रोजस्तै भावनाहरू भएको परमेश्वर
हाम्रोजस्तै भावनाहरू भएको परमेश्वर हुनुहुन्छ भनी विश्वास गर्ने थुप्रै मानिसहरूलाई आपत्विपत् र दुःखकष्ट देख्दा यी सबै हुनुको कारण बुझ्न गाह्रो लाग्छ। उदाहरणका लागि, मार्च १९९६ मा डनब्लेन, स्कटल्याण्डमा १६ जना बच्चाहरूलगायत तिनीहरूका शिक्षिकालाई गोली हानी मारियो। उक्त घटनाले विचलित भएकी एउटी आइमाईले यसो भनिन्: “परमेश्वरको इच्छा के हो म बुझ्नै सक्दिनँ।” त्यस घटनाप्रतिको वेदना बच्चाहरूको स्कूलबाहिर फूलको गुच्छासहित राखिएको कार्डमा व्यक्त गरिएको थियो। त्यस कार्डमा एउटै मात्र शब्द थियो, “किन?” यसको जवाफमा डनब्लेन चर्चका पादरीले भने: “यसको कुनै जवाफ छैन। यस्तो किन हुनुपरेको, हामी केही भन्न सक्दैनौं।”
सोही वर्षको अन्ततिर, चर्च अफ इंगल्याण्डका लोकप्रिय जवान पादरीको निर्मम हत्या गरियो। चर्च टाइम्स-ले रिपोर्ट गरेअनुसार चकित मण्डलीले लिभरपुलका आर्कडिकनले यसो भनेका सुने, “यस्तो समयमा हामी यति भावविह्वल हुन्छौं कि परमेश्वरलाई यस्तो किन हुन्छ भनी सोध्नुबाहेक अरू केही गर्न सक्दैनौं।” यस पादरीले पनि हाम्रोजस्तै भावनाहरू भएको परमेश्वरबाट कुनै सान्त्वनादायी वचन पाएनन्।
त्यसोभए, हामी कुन कुरामा विश्वास गर्ने त? हाम्रोजस्तै भावनाहरू भएको परमेश्वर हुनुहुन्छ भनी विश्वास गर्नु तर्कसंगत छ। माथि उठाइएका जोडदार प्रश्नहरूका जवाफ त्यसैमा आधारित छ। अर्को लेखमा प्रस्तुत गरिएको प्रमाणहरू केलाउन हामी तपाईंलाई आमन्त्रित गर्छौं।
पृष्ठ ३-मा भएका चित्र]
कार्डमा सोधिएको थियो, “किन?”
[स्रोत]
NEWSTEAM No. 278468/Sipa Press