पाको उमेरमा तपाईँ कसरी वैवाहिक सम्बन्धलाई जोगाउन सक्नुहुन्छ?

सन्‌ १९९० देखि २०१५ बीच अमेरिकामा ५० वर्ष वा सोभन्दा माथिका विवाहित जोडीको सम्बन्धविच्छेदको दर पहिलाभन्दा दोब्बर भएको थियो। अनि ६५ वर्षभन्दा माथिका विवाहित जोडीको सम्बन्धविच्छेदको दर भने तेब्बर भएको थियो। पाको उमेरकाहरूको सम्बन्धविच्छेद हुनुको कारण के हो? यसले तपाईँको वैवाहिक सम्बन्धलाई असर गर्न नदिन के गर्न सक्नुहुन्छ?

यस लेखमा

• पाको उमेरकाहरूको सम्बन्धविच्छेद हुनुको कारण के हो?

• तपाईँ के गर्न सक्नुहुन्छ?

• छलफलका लागि सुझावहरू

पाको उमेरकाहरूको सम्बन्धविच्छेद हुनुको कारण के हो?

• विवाह गरेको लामो समय भइसकेका दम्पत्तिहरूको सम्बन्धविच्छेद हुनुको एउटा मुख्य कारण उनीहरूबीचको सम्बन्ध चिसिँदै गएकोले हो। समयको दौडान केही श्रीमान-श्रीमतीको रूची फरक-फरक हुँदै जान्छ अनि दुवै जना सहमत हुने कुराहरू सिमित हुन सक्छ। केही दम्पतीले भने लामो समयसम्म आमाबुबाको भूमिका पूरा गर्दागर्दै एकअर्काबीचको सम्बन्धमा ध्यानै दिन नसकेको कुरा छोराछोरी छुट्टै बस्न थालेपछि मात्र याद गर्न सक्छन्‌।

• हालैका दशकहरूमा विज्ञ भनाउँदाहरूले दम्पतीहरूलाई आफ्नै इच्छा र आवश्‍यकतामा ध्यान दिनुपर्छ भन्‍ने गर्छन्‌। यीमध्ये कुनै प्रश्‍नको जवाफ नकारात्मक आउँछ भने सम्बन्धविच्छेद गर्न सकिन्छ भनेर तिनीहरू बताउने गर्छन्‌। जस्तै: ‘के म आफ्नो वैवाहिक जीवनदेखि खुसी छु?’ ‘के यसले मलाई असल व्यक्‍ति बन्‍न मदत गर्दै छ?’ ‘के मेरो जोडीले मेरो भावनात्मक आवश्‍यकता बुझ्छन्‌ र ती पूरा गरिदिन्छन्‌?’ हिजोआज आफ्नो लागि जे सही छ त्यही गर्नुपर्छ भन्‍ने सोचाइ व्याप्त छ।

• आजकल सम्बन्धविच्छेद गर्नुलाई मानिसहरू सामान्य ठान्छन्‌। समाजशास्त्री एरिक क्लाइनेन्बर्ग लेख्छन्‌: “केही समयअघि यदि कोही आफ्नो विवाहित जोडीसित खुसी छैन र उसले सम्बन्धविच्छेद गर्न चाहन्छ भने त्यसको लागि उचित कारण दिनुपर्थ्यो। तर अहिले भने यसको ठीक उल्टो छ। यदि तपाईँ आफ्नो जोडीसित खुसी हुनुहुन्‍न भने तपाईँले तिनीसित बस्नको लागि चाहिँ उचित कारण दिनुपर्छ। यस्तो हुनुको कारण आफ्नो लागि जे महत्त्वपूर्ण छ, त्यही गर्नुपर्छ भन्‍ने मानिसहरूको सोचाइले गर्दा हो।”a

सम्बन्धविच्छेद गरेपछि एउटा समस्या हटेको जस्तो लागे तापनि त्यसले नयाँ समस्या निम्त्याउँछ। उदाहरणको लागि, एउटा अध्ययनले देखाएअनुसार “पाको उमेरकाहरूले सम्बन्धविच्छेद गर्दा प्रायजसो आर्थिक समस्या झेल्नुपर्ने हुन्छ। यसमा अझ विशेषगरि महिलाहरू पर्छन्‌।”

विचार गर्नुपर्ने कुरा यति मात्र त होइन। सम्बन्धविच्छेद नगर्नुहोस्‌ किताब यसो भन्छ, “तपाईँको व्यक्‍तित्व पुरानै भएकोले तपाईँले नयाँ जीवनको सुरुवात गर्नुभए तापनि त्यसबाट खासै फरक परिणामको आशा भने गर्न सक्नुहुन्‍न।” सोही किताब अझै यसो भन्छ: “आफ्नो जीवनसाथीसित कुरा गर्ने तरिका प्रभावकारी थिएन भने यस विषयमा उन्‍नति गर्न तपाईँले कस्तो कदम चाल्नुभयो? मनमुटाव हुँदा त्यसलाई सुल्झाउने तरिकामा तपाईँले कस्तो परिवर्तन गर्नुभयो?”b

तपाईँ के गर्न सक्नुहुन्छ?

• परिवर्तनलाई स्विकार्नुहोस्‌। वैवाहिक सम्बन्धमा उतारचढाव आउनु स्वभाविकै हो। तपाईँका छोराछोरी छुट्टै बस्न थालेकोले अथवा तपाईँहरूको रुचि फरक-फरक भएकोले आफ्नो जीवनसाथीसितको सम्बन्धमा परिवर्तन आएको हुनसक्छ। विगतको कुरामा घोरिनुको सट्टा अहिलेको सम्बन्धलाई कसरी सुधार्न सकिन्छ भनेर सोच्नुहोस्‌।

  

  बाइबलको सिद्धान्त: “उहिले-उहिलेका दिन किन अहिलेका भन्दा राम्रा थिए भनेर नसोध। किनकि यसरी सोध्नु बुद्धिमानी होइन।”—उपदेशक ७:१०.

• जीवनसाथीसित घनिष्ठ भइरहनुहोस्‌। के तपाईँ जीवनसाथीको नयाँ रुचिलाई आफ्नो रुचि बनाउन तयार हुनुहुन्छ? वा आफूलाई मन पर्ने कुरामा जीवनसाथीको पनि रुचि विकास गर्न मदत गर्न सक्नुहुन्छ कि? तपाईँहरू दुवै जनालाई मन पर्ने केही नयाँ कुरा गर्न अथवा सिक्न सक्नुहुन्छ कि? तपाईँहरूको उद्देश्‍य भनेको सँगै समय बिताउने हुनुपर्छ। यसो गर्दा तपाईँहरू एउटै कोठामा बस्ने साथी मात्र नभई जीवनसाथीजस्तै महसुस गर्न सक्नुहुनेछ।

  

  बाइबलको सिद्धान्त: “हरेकले आफ्नो होइन तर अर्को मानिसको फाइदा खोज्ने गरोस्‌।”—१ कोरिन्थी १०:२४.

• एकअर्कासित राम्रो व्यवहार गर्नुहोस्‌। समय बित्दै जाँदा एकअर्कालाई देखाउने कोमल स्नेह कम हुन नदिनुहोस्‌। आफ्नो जीवनसाथीसित आदरपूर्वक बोल्नुहोस्‌। अनि डेटिङ गर्दा तपाईँहरूले एकअर्कासित जस्तो व्यवहार गर्नुहुन्थ्यो, त्यस्तै व्यवहार गर्ने प्रयास गर्नुहोस्‌। “कृपया” र “धन्यवाद” भन्‍नुहोस्‌। दिनदिनै माया देखाउनुहोस्‌ र जीवनसाथीले तपाईँको लागि गरिदिएका कुराहरूको लागि कृतज्ञता व्यक्‍त गर्नुहोस्‌।

  

  बाइबलको सिद्धान्त: “एकअर्काप्रति दयालु होओ अनि कोमलताले भरिएको करुणा देखाओ।”—एफिसी ४:३२.

• विगतका मीठा पलहरू सम्झनुहोस्‌। तपाईँहरूको विवाहको फोटो एल्बम अथवा अरू बेला एकअर्कासित खिचेका फोटोहरू सँगै हेर्नुहोस्‌। यसो गर्दा जीवनसाथीप्रतिको माया र आदर बढाउँदै लैजान सक्नुहुनेछ।

  

  बाइबलको सिद्धान्त: “तिमीहरू हरेकले आ-आफ्नी पत्नीलाई आफैलाई जस्तै प्रेम गर्नुपर्छ अनि पत्नीले पनि आफ्नो पतिको गहिरो आदर गर्नुपर्छ।”—एफिसी ५:३३.