Yotango kAatessalonika

5 Aamwatate, inatu pumbwa oku mú nyolela sha kombinga yethimbo nomathimbomumvo, uuna iinima mbyoka tayi ka ningwa. 2 Oshoka ne yene omu shi shi nawa kutya esiku lyaJehova otali ya naanaa ongomufuthi te ya uusiku. 3 Manga taya ti kutya, “Opu na ombili negameno!” nena ohaluka, ehanagulo otali ya adha, ngaashi owala omusimba ta adhika koshitheta, noitaya ka vula nando okuya ontuku. 4 Ihe ne, aamwatate, kamu li momilema, opo andola esiku ndyoka li mú adhe ombaadhilila ngaashi aafuthi haya adhika kuuyelele wetango, 5 oshoka amuhe oyana* yuuyelele noyana yomutenya. Tse katu shi aantu yuusiku, nenge yomomilema.

6 Onkee ano inatu kaleni twa kotha, ngaashi yalwe haya ningi, ihe natu kaleni twa tonata notwa kotoka. 7 Oshoka mboka haya kotha ohaya kotha uusiku, naamboka haya kolwa ohaya kolwa uusiku. 8 Ihe tse, mboka yomomutenya, natu tsikile okukala aanandunge, nokuzala oshipapa shopontulo sheitaalo noshohole nosho wo egala lyosheela onga etegameno lyehupitho, 9 molwaashoka Kalunga ine tu hogolola e tu geele, ihe oku tu hupithe okupitila mOmuwa gwetu, Jesus Kristus. 10 Jesus okwa si omolwetu, opo tu kale pamwe naye, kutya nduno otwa adhika twa tonata, nenge otwa kotha.* 11 Onkee ano tsikileni okutsaathana omukumo* nokutungathana, ngaashi owala hamu shi ningi.

12 Aamwatate, otatu mú indile mu simaneke mboka haya longo nuudhiginini mokati keni, nohaye mú kwatele komeho, noku mú kumagidha mOmuwa; 13 nomu kale mu ya hole, nomwe ya lenga omolwiilonga yawo. Kaleni mu na ombili mokati keni. 14 Kakele kaashono, aamwatate, otatu mú ladhipike mu pukulule* mboka kaaye na elandulathano, mu hekeleke mboka ya polimana,* mu yambidhidhe mboka ya nkundipala nokutala onteni ayehe. 15 Shilipalekeni kutya kapu na ngoka ta galulile mukwawo uuwinayi, ihe lalakaneneni okulongelathana uuwanawa, ne mu shi ningile wo aantu ayehe yalwe.

16 Kaleni aluhe mwa nyanyukwa. 17 Galikaneni aluhe. 18 Kaleni hamu pandula mukehe shimwe. Oshinima shono osho Kalunga a hala aalanduli yaKristus Jesus ya ninge. 19 Inamu dhima omulilo gwombepo.* 20 Inamu kala mwa dhina omahunganeko. 21 Konakoneni iinima ayihe; dhiginineni shoka oshiwanawa. 22 Ikalekeni kokule nuuwinayi woludhi kehe.

23 Kalunga kombili ne mú yapule ye mwene thiluthilu. Aamwatate, ombepo, omwenyo nomalutu geni naga kale kaage na nando oshipo shasha noga yogoka, sigo opokukala po kOmuwa gwetu Jesus Kristus. 24 Ngoka te mú ithana oku li omudhiginini, note ke shi ninga shili.

25 Aamwatate, tsikileni oku tu galikanena.

26 Kundeni aamwatate ayehe moku ya hupita pahole.

27 Otandi mú kumagidha medhina lyOmuwa, ontumwafo ndjika yi leshelwe aamwatate ayehe.

28 Uuwanawahenda wOmuwa gwetu Jesus Kristus nawu kale pamwe nane.