KAaefeso
4 Onkee ano ngame, ngoka ndi li mondholongo omolwOmuwa, otandi mú indile mu ihumbate metsokumwe naashoka mwa ithanenwa, 2 mu kale mu na eifupipiko, omwenyo omwaanawa, ontalanteni nomu kale hamu idhidhimikilathana pahole; 3 omwa hanganithwa kombepo ondjapuki, onkee ano lalakaneneni okukala mwa hangana nokukala mu na ombili mokati keni. 4 Opu na owala olutu lumwe nombepo yimwe, ngaashi owala pu na etegameno limwe, ndyoka mwa ithanenwa. 5 Omuwa gumwe, eitaalo limwe neninginitho limwe. 6 Kalunga, He yaayehe, ngoka e li omupangeli gwaayihe, ha wilike iinima ayihe, noha kala mwaayihe, naye gumwe.
7 Kehe gumwe gwomutse okwa ulukilwa uuwanawahenda, na Kristus oye a pa kehe gumwe gwomutse omagano ngoka. 8 Oshoka okwa nyolwa taku ti: “Sho a londo a yi pombanda, okwa faalela oonkwatwa; okwa gandja aalumentu ye li omagano.” 9 Uutumbulilo ‘okwa londo’ owa hala okutya ngiini, naasho wo taku tiwa okwa londoloka e ye kombanda yevi, osha hala okutya ngiini? 10 Ngoka a londoloka e ye kombanda yevi oye wo a londo a yi megulu, opo iinima ayihe yi vule okugwanithwa.
11 Aalumentu, mboka a gandja, yamwe aayapostoli, yamwe aahunganeki, yamwe aauvithi,* yamwe aasita nayamwe aalongi; 12 okwe ya gandja, opo ya kwathele* aayapuki, ya ende mondjila ya uka, ya yakule yalwe, noya tunge olutu lwaKristus,* 13 sigo atuhe twa hangana meitaalo, nokukala tu na ontseyo yashili kombinga yOmuna gwaKalunga, tu koke pambepo, sigo oosho tatu ulike thiluthilu uukwatya wa fa waKristus. 14 Onkee ano inatu kaleni we ngaashi aanona, mboka haya tengatengithwa ya fa owato, ndjoka hayi tengatengithwa komakuthikuthi, nohaya falwafalwa kombepo kehe yomalongo giifundja gaantu, mboka taya pukitha yakwawo noku ya tegela oomwigo. 15 Natu kale hatu popi oshili nokuulika ohole, opo tu vule okukoka pambepo miinima ayihe, mbyoka yi li metsokumwe naKristus, ngoka e li omutse. 16 Okupitila muye, iilyo ayihe yolutu oya tulwa kumwe, ya kwatathana pomatsakaneno, nohayi longele kumwe, opo oshilyo kehe shi gwanithe po oshilonga shasho. Ngele iilyo ayihe otayi longo nawa, olutu ohalu koko nawa, notalu ka itunga pahole.
17 Onkee ano otandi mú lombwele, notandi mú kumagidha mOmuwa, kaamu ihumbate ngaashi aantu yomiigwana haya ihumbata, mboka haya landula omadhiladhilo gawo omawinayi.* 18 Oye li momilema pamadhiladhilo, nokaye na etegameno lyomwenyo, ngoka Kalunga ta ka gandja, molwaashoka kaye na ko nasha, noya kukutika omitima dhawo. 19 Oya vuka lela mokwaa na omikalo, haya yono nopwaa na uuhwenge,* notaya longo kehe shimwe oshiwinayi kaaye na eidhiliko.
20 Ihe omu shi shi kutya Kristus hasho e li ngaaka, 21 ngele omwa uva nomwa longwa oshili, ndjoka Jesus a li a longo. 22 Omwa longwa mu ihule omuntu gweni omukulu, oshoka omwa li mwa landula omikalo dheni dhonale, ndhoka inaadhi yogoka, sho mwa li mwa igandja mu vulike komahalo geni. 23 Tsikileni okulundulula omukalo gweni gwokudhiladhila,* 24 nomu zale omuntu omupe, ngoka a shitwa metsokumwe nehalo lyaKalunga muuyuuki nomuudhiginini washili.
25 Onkee ano sho ngashingeyi mwa etha po iifundja, kehe gumwe gwomune na kale ta lombwele mukwawo oshili, molwaashoka otu li iilyo yolutu lumwe. 26 Geyeni, ihe inamu yona; inamu etha etango li ningine mwa geya; 27 inamu pa Ondiyapoli ompito. 28 Ngoka ha yaka ina yaka we, ihe na longe nuudhiginini iilonga iiwanawa niikaha ye, opo a vule okukwathela ngoka e li mompumbwe. 29 Momakana geni inamu za nando oohapu oombwinayi,* ihe popyeni owala ndhoka oombwanawa tadhi tungu, ngaashi sha pumbiwa, opo mboka taya pulakene kune ya mone mo uuwanawa. 30 Shimwe ishewe, inamu nikitha oluhodhi* ombepo ondjapuki yaKalunga, oshoka oyo mwa ndhindhilikithwa nayo, opo mu hupithwe okupitila mekuliloyambo.
31 Ethii po uutondwe woludhi kehe, ongeyo, omagandambadhi, omalaka omawinayi nosho wo uuwinayi kehe. 32 Ihe kaleni hamu kenukilathana, hamu silathana ohenda, hamu dhiminathana po, ngaashi owala Kalunga e mú dhimina po nehalo ewanawa okupitila muKristus.