Ongiini Okwiilonga Oshili Kombinga Yoheli Kwe Ku Guma?
MBOKA haya longo kutya oheli ehala moka hamu hepekelwa aantu ohaya popi iifundja yinyanyalitha kombinga yaJehova Kalunga nomaukwatya ge. Dhoshili, Ombiimbeli otayi popi kutya Kalunga ota ka hanagula po aakolokoshi. (2 Aatessalonika 1:6-9) Ihe nonando oshi li pauyuuki kuKalunga oku ya geela, hasho lela a hala okuninga.
Kalunga ke shi omukwanyanya noiha kwatele onkone. Okwa pula nokuli a ti: “Ondi nyanyukilwe ando eso lyomukeenakalunga?” (Hesekiel 18:23) Ngele Kalunga iha nyanyukilwa eso lyomukeenakalunga, ongiini ta nyanyukilwa sigo aluhe oku mu tala ta hepekwa?
Uukwatya waKalunga wa tongomana owo ohole. (1 Johannes 4:8) Odhoshili kutya “OMUWA oku na ombili naantu ayehe, oku na ohenda naayihe mbyoka e yi shita.” (Episalomi 145:9) Kalunga okwa hala wo tu kale tu mu hole nomutima aguhe.—Mateus 22:35-38.
Mbela oto longele Kalunga molwaashoka wa tila oheli nenge omolwaashoka wu mu hole?
Elongo kutya aantu ohaya hepekwa moheli otali humitha komeho uumbanda wokutila Kalunga. Mekondjithathano naashoka, omuntu ngoka ti ilongo oshili kombinga yaKalunga nokukala e mu hole oha kala e na etilosimaneko lyu uka. Episalomi 111:10 otali yelitha tali ti: “Okutila OMUWA okwo ekota lyuunongo; OMUWA ota nongeke ayehe mboka haa vulika kuye.” Okutila Kalunga kaku shi uumbanda wokukakama, ihe oko etilosimaneko lyokusimaneka Omushiti. Ohaku tu ningitha tu kale twa tila oku mu geyitha.
Tala nkene okwiilonga oshili kombinga yoheli kwa kwathela Kathleen gwoomvula 32, ngoka a li ha longitha iingangamithi. Okwa li e hole iituthi, elongithonkondo, oluhondelo noka li e na ko nasha naye mwene. Okwa ti: “Onda li ndi wete kutya ohandi monitha okamwandjekadhona komvula yimwe iihuna nonda li ndi ipula tandi ti: ‘Omolwashike handi ka ningile ngeyi? Otandi ka pya moheli.’” Kathleen okwa li a kambadhala okweetha po iingangamithi, ihe ine shi pondola. Okwa ti: “Onda hala okukala omuntu omwaanawa, ihe kehe shimwe monkalamwenyo yandje nomuuyuni osha li shiyemateka. Onda li ndi wete nda fa itaandi vulu okukala omuntu omwaanawa.”
Kathleen okwa li a tsakaneke Oonzapo dhaJehova. Okwa ti: “Onda li ndi ilongo kutya kaku na oheli. Shoka shi li mOmanyolo osha yelela ndje nawa. Onda li ndu uvite nda manguluka lela sho nda tseya kutya itandi ka pya moheli.” Okwa li wo i ilongo kutya Kalunga oku uvaneka kutya aantu otaya vulu okukala nomwenyo kombanda yevi hoka taku ka kala kaaku na aakolokoshi. (Episalomi 37:10, 11, 29; Lukas 23:43) Okwa gwedha ko a ti: “Ngashingeyi ondi na etegameno lyashili, oku ka kala nomwenyo sigo aluhe mOparadisa.”
Mbela sho Kathleen inaa tila we oku ka pya moheli, ote ke etha po ngaa okulongitha iingangamithi? Okwa hokolola a ti: “Uuna nda kwatwa kehalo enene lyokulongitha iingangamithi, onda li handi galikana Jehova Kalunga a kwathele ndje. Onda li handi dhiladhila nkene ha tala ko iilonga mbyoka ya nyata nokanda li nda hala oku mu geyitha. Okwa yamukula omagalikano gandje.” (2 Aakorinto 7:1) Etilosimaneko ndika lyokwaahageyitha Kalunga olyo lya li lya kwathele Kathleen e ethe po okulongitha iingangamithi.
Shoka tashi ke tu kwathela tu longe ehalo lyaKalunga osho okukokeka ohole yokuhola Kalunga nokukala hatu mu tila opo tu kale twa nyanyukwa, ihe hakukala twa tila oku ka pya moheli. Omupisalomi okwa nyola a ti: “Omunelago okehe ngoka [ha] tila Omuwa note ende noondjila dhe.”—Episalomi 128:1, OB-1954.
[Oshimpungu/Ethano pepandja 9]
OOLYE TAYA KA ZA MOSHAASI?
Oshitya shOshigreka Gehenna shoka sha tolokwa mOombiimbeli dhOshindonga ‘oheli,’ otashi ulike kehanagulo lyaaluhe nopwaahe na etegameno lyeyumuko. Mekondjithathano naashoka, mboka ye li moshaasi nenge moHades mOshigreka oye na etegameno lyeyumuko.
Konima sho Jesus a si e ta yumudhwa, omuyapostoli Petrus okwa li a shilipaleke aapulakeni ye kutya Jesus ‘ine ethelwa moshaasi.’ (Iilonga 2:27, 31, 32, OB-1954; Episalomi 16:10) Oshitya shoka sha tolokwa oshaasi movelise ndjika osho oshitya shOshigreka Hades. Ihe Jesus haye awike a yumudhwa moHades kuKalunga.
Shi na ko nasha neyumuko, Ombiimbeli otayi ti: “Eso noshaasi oya gandja wo aasi mboka ya li mo.” (Ehololo 20:13, 14) Opo “oshaasi” shi kale owala, Kalunga ota ka yumudha mboka ye li mo a tala ko ya gwana okuyumudhwa. (Johannes 5:28, 29; Iilonga 24:15) Kashi shi tuu etegameno ewanawa okumona aaholike yetu taya yumudhwa moombila! Jehova Kalunga ngoka omunahole lela ote ke shi ninga.