Kala omunandunge—Konga “ewiliko kaanandunge”

Olundji onkalamwenyo ohayi yelekanithwa nomweendifuta. Uunongo waantu owa ngambekwa noitawu vulu okukwathela aantu ya pondole monkalamwenyo. Oyendji yomutse otwa li twi iyadha miikungulu yuupyakadhi monkalamweyo yetu. (Eps. 107:23, 27) Omolwashike onkalamwenyo tayi yelekanithwa nomweendifuta?

Nalenale osha li sha nika oshiponga okweenda mefuta ngele ku na ontseyo yoku shi ninga. Opo wu ye mo, owa li wu na okwiilonga kugumwe ngoka e shi okudhuga nawa owato, ye oku na ontseyo oyindji yokweenda mefuta. (Iil. 27:9-11) Aathaneki yonale oya kala haya ulike kutya omudhugi gwowato okwa simana sho haye mu thaneke omunene e vule ooyakwawo. Ngele omuntu ta yi mefuta oshikando shotango, osha nika oshiponga. Oku na okukala e shi oonyothi, onkalo yombepo nosho wo iinima yilwe mbyoka e na okutala kuyo. Ombiimbeli otayi popi aathayili yamwe ye li “oonkulungulela,” oshitya shoka sha pambathana nokukala “omunandunge.”—Hes. 27:8.

Omaupyakadhi monkalamwenyo kunena oga fa omaudhigu ngoka ga li haga tsakanekwa kaaendifuta pethimbo lyonale. Oshike tashi ke tu kwathela tu pondole?

OPENI TATU VULU OKWAADHA ‘EWILIKO LYOPANDUNGE’?

Onkalamwenyo oya fa omuntu ta thayila mefuta. Ombiimbeli otayi popi oshili sho tayi ti: ‘Omayeletumbulo otaga gwedhele kontseyo yaanongo nokugandja ewiliko kaanandunge.’ (Omayel. 1:5, 6) Uutumbulilo wOshihebeli mboka wa tolokwa “ewiliko kaanandunge” otawu hokolola iilonga yomuwiliki gwosikepa gwonale ngaashi okukwatela komeho nokugandja ewiliko noondunge.

Otatu vulu okulikola ‘ewiliko lyopandunge’ nokwiilonga “okuthayila” nomupondo monkalamwenyo ndjika tu li ya fa efuta. Otu na okweetha “uunongo,” ‘euvoko’ nosho wo ‘oondunge’ yi longele kumwe ngaashi tashi popiwa mOmayeletumbulo. (Omayel. 1:2-6; 2:1-9) Otu na okukala hatu kongo ewiliko lyaKalunga, molwaashoka nokuli naakaanakalunga oye na ewiliko lyawo, nonando itali ya kwatha sha.—Omayel. 12:5.

Osha simanenena tu kale hatu konakona Oohapu dhaKalunga nuupenda. Ngele tatu shi ningi, otatu ka likola ontseyo oyindji kombinga yaKalunga nosho wo yOmwana ngoka e na uukwatya wa fa waHe. (Joh. 14:9) Pokugongala kehe kwopaKriste ohatu mono po omayele ngoka tage tu kwathele. Shimwe ishewe, otatu vulu okulandula iiholelwa yayalwe nosho wo yaavali yetu.—Omayel. 23:22.

NINGA OMALONGEKIDHO KUYELE

Otwa pumbwa ‘ewiliko lyopandunge’ uuna twi iyadha muudhigu monkalamwenyo yetu. Ngele otwa limbililwa kutya natu ninge shike uuna tu li muupyakadhi, otashi vulu oku tu ehameka noonkondo noku tu etela oshiponga.—Jak. 1:5, 6.

Uutumbulilo ‘ewiliko lyopandunge’ ohawu vulu wo okulongithwa miita. Ombiimbeli otayi ti: ‘Kewiliko lyomayele owu na okuhinga iita, naapukululi oyendji ohaye eta esindano.’—Omayel. 20:18; 24:6, OB-1954.

Otwa pumbwa tu kale twi ilongekidha okukondjitha iinima mbyoka hayi vulu okunkundipaleka eitaalo lyetu, ngaashi naanaa omuwiliki omunamayele ti ilongekidhile iita. (Omayel. 22:3) Pashiholelwa, uuna wa mono iilonga iipe nenge to yelwa miilonga yeni, otashi vulika wa pumbwa okutokola kutya oto ka ninga po shike. Oshi li pandunge wu dhiladhile kofuto, ethimbo ndyoka to ka longitha okuya kiilonga nokuza ko nosho wo iinima yilwe. Ihe ipula wo omapulo ngaka: Mbela iilonga mbyoka oyi li ompinge nomakotampango gOmbiimbeli? Otayi ka guma ngiini omaipyakidhilo gandje gopaKriste?—Luk. 14:28-30.

Omumwameme Loretta, oku na iilonga iiwanawa mehangano limwe hali landitha iikulya. Ehangano ndyoka olya li lya tembukile kehala epe. Loretta okwa li a pewa ondondo ya simana. Aawiliki yalyo oya li ye mu lombwele taya ti: “Ndjika oyo ompito ombwanawa lela kungoye. Kehala hoka oku na Oshinyanga shUukwaniilwa.” Ihe Loretta okwa li a hala okukaleka onkalamwenyo ye paunathangwa, opo a longele Omushiti gwe ethimbo olindji. Okwa li a mono kutya ondondo ndjoka ta pewa otayi ka mana po ethimbo lye lyomaipyakidhilo gopaKriste. Loretta okwa li e etha po iilonga mbyoka. Omuwiliki gwehangano okwa li e mu lombwele kutya oye owala omuniilonga ngoka ya hala noonkondo a kale mehangano lyawo. Loretta ngashingeyi ota longo e li omukokolindjila gwondjigilile uule womimvo 20 lwaampono. Oku na uushili kutya sho a kongo ‘ewiliko lyopandunge’ oshe mu etela iizemo iiwanawa, molwaashoka okwa ninga oshinima shoka shi li metsokumwe nomayele ngoka ge li mOohapu dhaKalunga. Okwa koleke ekwatathano lye naJehova, nokwa kwathela aantu oyendji yi ilonge oshili yOmbiimbeli.

‘Ewiliko lyopandunge’ olya pumbiwa lela megumbo. Ohashi kutha ethimbo ele okuputudha aanona. Ehogololo ndyoka aavali taya ningi miinima yopambepo noyopamaliko otali vulu okuguma onakuyiwa yaayehe megumbo. (Omayel. 22:6) Oshi li nawa omuvali kehe Omukriste i ipule ta ti: ‘Mbela ohandi longo ngaa aamwandje ya hedhe popepi naJehova, oshinima shoka tashi ke ya kwathela uuna ya koka? Onkalamwenyo yandje otayi ya kwathele ngaa ya kale ya gwanenwa nokukala taya gandja eitulomo kuukalele wopaKriste?’—1 Tim. 6:6-10, 18, 19.

Omaliko nenge iinima mbyoka hayi lalakanenwa olundji muuyuni ihayi eta enyanyu lyashili. Omukwaniilwa Salomo okwe shi imonena ye mwene. Okwa nwetha mo a nyole ta ti: “Ondi shi shi kutya mboka haa tila Kalunga oye li nawa, oshoka haye mu tila.” (Omuuv. 8:12) Shoka otashi ulike shili kutya okukonga “ewiliko kaanandunge” okwa kankamena kOohapu dhaKalunga noku li metsokumwe nadho.—2 Tim. 3:16, 17.

[Ethano pepandja 30]

Omudhugi gwowato okwa li ha thanekwa omunene e vule ooyakwawo, shoka tashi ulike esimano lyondondo ye

[Edhina lyomuthaneki]

Su concessione del Ministero per i Beni e le Attività Culturali. Ethano ndika ino li ninga nando okopi nenge wu li pilintithe momukalo gwontumba.