Iileshomwa moka mwa za omayamukulo gomapulo ngoka ge li mokafo Onkalamwenyo yopaKriste niilonga yetu yokuuvitha
2-8 NOVOMBA
OMALIKO OKUZA MOOHAPU DHAKALUNGA | EKSODUS 39–40
“Moses okwa landula nawa omalombwelo”
(Eksodus 39:32) Iilonga ayihe yetsalihangano oya hulithwa ya pu. Aaisraeli oya gwanitha ashihe shoka Omuwa a lombwele Moses.
Jehova oku ku shi ngaa?
13 Mepingathano naashono, Moses okwa li “omulumentu omwiifupipiki e vule aantu ayehe kombanda yevi.” (Num. 12:3) Okwa li e shi u ulike sho a tokola toko a landule ewiliko lyaJehova. (Eks. 7:6; 40:16) Ombiimbeli inayi popya kutya olundji Moses okwa li ha kala ta tsu ondumbo naJehova nenge a kale a geya molwaashoka e na okulandula omalombwelo gaJehova. Pashiholelwa, Jehova okwa li a gandja omalombwelo nkene etsalihangano li na okutungwa, okwa popi kombinga yuunima uushona ngaashi omalwaala goongodhi nosho wo kutya oombululu ngapi dhi na okukala komalapi gotenda. (Eks. 26:1-6) Ngele omutonateli gwopantu mehangano ohe ku pe omalombwelo ga kwatela mo uunima owundji, omathimbo gamwe otashi vulika wu kale wu wete te ku ningile nayi. Jehova oku li omutonateli a gwanenena ngoka ha pe aapiya ye iinakugwanithwa nehalo ewanawa nokwe yi inekela. Uuna ta gandja omalombwelo ogendji, ohe shi ningi netompelo ewanawa. Moses ka li e wete Jehova te mu ningile nayi sho e mu pe omalombwelo ngoka noka li e wete a fa te mu thiminike nenge a fa ta ngambeke emanguluko lye. Pehala lyaashono, Moses okwa li a shilipaleke kutya aaniilonga ayehe otaya “gwanitha ashihe shoka” Kalunga e ya lombwele. (Eks. 39:32) Moses ka li tuu shili omwiifupipiki! Okwa li e wete kutya iilonga oyaJehova, nosho wo kutya okwa li owala ta longithwa kuye opo iilonga mbyoka yi longwe.
(Eksodus 39:43) Moses okwa konakona ayihe nokwa mono kutya oya ningwa, naanaa ngaashi Omuwa a gandjele oshipango shoku yi longa. Moses okwe ya laleke nuuyamba.
(Eksodus 40:1, 2) Omuwa okwa lombwele Moses e ta ti: 2 “Mesiku lyotango lyomwedhi gwotango thikameka etsalihangano.
(Eksodus 40:16) Moses okwa gwanitha ayihe, ngaashi Omuwa a popi.
Owu li ngaa omudhiginini miinima ayihe?
3 Aahebeli 3:5 otaya ti: “Moses okwa li [“omudhiginini,” NW.]” Oshike sha ningi omuhunganeki Moses a kale omudhiginini? Sho a li a tungu etsalihangano, okwa “gwanitha ayihe, ngaashi Omuwa a popi.” (Eksodus 40:16) Tu li aalongeli yaJehova, ohatu ulike uudhiginini mokuvulika kuye sho tatu mu longele. Shoka osha kwatela mo thiluthilu okukakatela kwetu uudhiginini kuJehova nonando otu li muudhigu nenge tatu tsakaneke omamakelo ga kwata miiti. Ihe okusinda omayeleko omanene hasho owala tashi ulike kutya otu li aadhiginini. Jesus okwa ti: “Ngoka ti inekelwa miinima iishona, oti inekelwa wo miinima iinene; naangoka omufundja miinima iishona, oye wo omufundja miinima iinene.” (Lukas 16:10) Otu na okukala aadhiginini nokuli nomiinima mbyoka tayi monika iishona.
Konga omaliko mOmbiimbeli
(Eksodus 39:34) esiikilo lyiipa yoonzi oondumentu ya tethwa iitiligane; esiikilo lyiipa yoongombefuta; etopolitho lyokushiga;
it-2-E ep. 884, okat. 3
Oshipa shombwa yomomeya
Nkene Aaisraeli ya li ye yi mono. Ngele oshitya tachash shoka sha longithwa mOmbiimbeli otashi ulike koludhi lwontumba lwombwa yomomeya, otashi vulika pu holoke epulo kutya Aaisraeli oya li ya mono ngiini iipa yoombwa dhomomeya. Nonando oombwa dhomomeya ohadhi kala unene kiitopolwa yaArctic noyaAntarctic hoka omeya haga ningi iikangwa, dhimwe odhi hole okukala kiitopolwa mbyoka ya pupyala. Kunena oombwa dhimwe dhomomeya ohadhi kala mEfuta lyoPokati, nosho wo momeya ngoka ga pupyala. Muule womimvo omathele dha ka pita, aantu oya dhipaga oombwa odhindji e tadhi ningi po lela oonshona, nopethimbo lyOmbiimbeli iinamwenyo mbika otashi vulika ya li hayi kala oyindji mEfuta lyoPokati nomEfuta Etiligane. Embo limwe li li mOshiingilisa lyaCalmet lyomomumvo 1832, Dictionary of the Holy Bible (ep. 139) ota li ti: “Kuuntuntu owundji uushona womEfuta Etiligane, momudhingoloko gwoshitopolwa peninsula shaSinai, oku na oombwa dhomomeya.” — Tala wo embo The Tabernacle’s Typical Teaching, lya nyolwa kuA. J. Pollock, moLondon, ep. 47.
(Eksodus 40:34) Oshikogo osha kwidhidhike etsalihangano, neadhimo lyOmuwa olye li udhitha.
w15-E 7/15 ep. 21, okat. 1
Oshi na ngaa oshilonga ngele iilonga yoye ohayi ndhindhilikwa kuyalwe?
Sho etsalihangano lya pu okutungwa, oshikogo osha “kwidhidhike etsalihangano, neadhimo lyOmuwa olye li udhitha.” (Eks. 40:34) Kasha li tuu sha ulike kutya Jehova okwe li panda! Sho to dhiladhila, Bezalel naOholiab oya li yu uvite ngiini pompito ndjono? Nonando omadhina gawo kaga li ga nyolwa ko kiinima mbyono ya ninga, oye na okukala ya li yu uvite ombili sho ya mono kutya Kalunga okwa yambeka oonkambadhala dhawo. (Omayel. 10:22) Momimvo ndhono dha ka landula ko, oshi na okukala sha li sha nyanyudha omitima dhawo sho iinima yawo mbyoka ya li ya ningi ya tsikile okulongithwa miilonga yaJehova. Sho taya ka yumudhwa muuyuni uupe, Bezalel naOholiab itaya ka kala tuu ya kumwa okuuva kutya etsalihangano olya li lya longithwa melongelokalunga lyashili uule womimvo 500!
Elesho lyOmbiimbeli
(Eksodus 39:1-21) Oya tungu oonguwo dhuuyambi noongodhi oombulau, oombwilili noontiliganembwilili, dhi zalwe kaayambi, sho taa ka yakula mEhala lyuuyapuki. Oya tungile Aaron oonguwo, ngaashi Omuwa a lombwele Moses. 2 Oya tungu omapepenguwo noongodhi dhoshingoli, noongodhi oombulau, oombwilili noontiliganembwilili nonoongodhi dholiina ombwanawa. 3 Oya ndanda oshingoli, sigo sha pepuka noonkondo noye shi kondo oondali noku dhi tungila mumwe noongodhi oombulau, oombwilili noontiliganembwilili nonoongodhi dholiina. 4 Oya ningile omapepenguwo omakwi gaali ge ga kwatakanitha koombinga adhihe mbali. 5 Ekwamo olya ningwa moshiyata shomapepenguwo nolya kwatakanithwa kugo, ngaashi Omuwa a lombwele Moses. 6 Oya longo omamanya gaoniks e taye ga tula muundambo woshingoli; omadhina gaana yaJakob omulongo nayaali oga li ga takelwa mo nuunkulungu. 7 Oye ga tula komakwi gomapepenguwo, ga kalele po omazimo omulongo nagaali gaIsrael, naanaa ngaashi Omuwa a lombwele Moses. 8 Oya tungu oshipapa shomontulo moshiyata shimwe nomapepenguwo: sha tungikika noongodhi dhoshingoli, noongodhi oombulau, oombwilili noontiliganembwilili nonoongodhi dha dhingwa dholiina ontokele. 9 Osha li shi na oonkotso ne, sha gonywa, uule washo oshitine sholundya, osho wo omutamo. 10 Oya tula mo omikweyo ne dhomamanya gondilo: momukweyo gwotango oya tula mo ospineli, otopasi nosmaragdi; 11 momukweyo omutiyali orubini, osafire nojaspes; 12 momukweyo omutitatu oturkoisi, oagate noametiste; 13 momukweyo omutine oberil, okarnelia nojasper. Oga li ga dhamithwa muundambo woshingoli. 14 Pamwaalu gwaana yaJakob omamanya oga li omulongo nagaali, kehe limwe lyokukalela po ezimo limwe padhina ndyoka lya takelwa mo. 15 Koshipapa shomontulo oya ningile ko uulyenge woshingoli sho shene wa dhingwa nawa wa fa oongodhi. 16 Oya hambula uulinga uyali woshingoli e taye u tula koonkotso dhopombanda dhoshipapa shomontulo. 17 Kuulinga mboka uyali oya mangele ko oongodhi dhoshingoli. 18 Oondungu oonkwawo dhadho oye dhi mangele komapando gaali e taye ga mangele ishewe komakwi gomapepenguwo, kombinga yokomeho. 19 Oya hambula ishewe uulinga uyali woshingoli e taye u tula koonkotso mbali dhokohi dhoshipapa shomontulo, koongenge dhomeni dha gama pomapepenguwo. 20 Oya hambula po ishewe uulinga woshingoli e taye u tula koondungu dhopevi dhopontulo dhomakwi agehe gaali gomapepenguwo, popepi nomuhondjo kombanda yekwamo lyuulenga. 21 Oya mangele uulinga woshipapa shomontulo kuulinga womapepenguwo nongodhi ombulau, opo oshipapa shomontulo shi kankame kombanda yekwamo noitashi dhituluka we. Ashihe osha ningwa, ngaashi Omuwa a lombwele Moses.
9-15 NOVOMBA
OMALIKO OKUZA MOOHAPU DHAKALUNGA | LEVITIKUS 1–3
“Elalakano lyokugandja omayambo”
(Levitikus 1:3) Nenge ota yamba ongombe ye efikilondjambo, na ete ongombe ondumentu yaa na oshipo. Ne yi ete posheelo shetsalihangano, opo Omuwa e yi taambe nohokwe.
(Levitikus 2:1) Ngele oku na omuntu ta yambele Omuwa ondjambo yiikulya, na ete uusila womunziya. Ne u nothele omagadhi gooholivi nokugwedha po iitsinino.
(Levitikus 2:12) Iinima mbika otayi vulu okweetelwa Omuwa moondjambo dhoshipe, ihe inayi lungunithilwa koshiyambelo.
it-2-E ep. 525
Omayambo
Omafikilondjambo. Omafikilondjambo agehe oga li haga gandjwa kuKalunga, naku ga gandja kali ha kutha po oshitopolwa sha sha. (Yelekanitha Aatok 11:30, 31, 39, 40.) Uuna Omuisraeli ta gandja eyambo molwaashoka a yona, omathimbo gamwe okwa li wo ha gandja efikilondjambo. Momukalo ngoka, omuntu ngoka ta gandja efikilondjambo ndyoka okwa li ti indile Jehova a taambe eyonondjambo lye, nenge a ulike kutya okwe li taamba ko. Ngaashi “efikilondjambo,” Jesus Kristus okwi igandja i ihwapo.
it-2-E ep. 528, okat. 4
Omayambo
Oondjambo dhiikulya. Oondjambo dhiikulya odha li hadhi gandjwa pamwe nomakwatathanondjambo, omafikilondjambo, omayonondjambo nosho wo oshipe nomathimbo gamwe odha li hadhi gandjwa odho adhike. (Eks 29:40-42; Lev 23:10-13, 15-18; Num 15:8, 9, 22-24; 28:9, 10, 20, 26-28; ontop 29) Shika osha li tashi ulike kutya Kalunga oha yambeke lela aantu nohe ya pe uuyamba owundji. Oga li haga gandjwa pamwe nomagadhi niitsinino. Oondjambo dhiikulya odha li dhi na okukala uusila womunziya, iilya ya yaywa, iikwiila ya mbumbwakana nenge uukwiila wa pepuka wa mbakwa, ya pya poshikangwa nenge mombiga. Iikulyandjambo yimwe oya li hayi tulwa koshiyambelo shomafikilondjambo, yimwe oya li hayi liwa kaayambi omanga omakwatathanondjambo naku ga gandja okwa li he ga li. (Lev 6:14-23; 7:11-13; Num 18:8-11) Oondjambo dhiikulya kadha li hadhi tulwa koshiyambelo dha tulwa efulika nenge “omagadhi goonyushi” (anuwa onyiki yoonkwiyu nenge omeya giiyimati) ngoka haga vulu okufula. — Lev 2:1-16.
(Levitikus 3:1) Uuna omuntu ta yamba ekwatathanondjambo te li kutha miimuna ye, na ete ongombe ondumentu nenge ondema yaa na oshipo.
it-2-E ep. 526, okat. 1
Omayambo
Omakwatathanondjambo (nenge omayambo gombili). Omakwatathanondjambo ngoka ga li ga hokiwa kuJehova, oga li haga ulike kutya naku ga gandja oku na ombili naye. Omuntu ngoka naanegumbo ye oya li haya li omayambo ngoka (pamuthigululwakalo, mehale lyetsalihangano omwa li mwa dhikwa omatsali ge li meni lyomalapi ngoka ga li ga dhingoloka ehale; motempeli omwa li omala gokulila). Omuyambi ngoka ta kwatele komeho okwa li ha pewa oshitopolwa, naayambi mboka taya longo esiku ndyoka, oshitopolwa oshikwawo. Jehova okwa li ha kala a hokwa ezimba ewanawa lyomakagadhi ngoka taga lungunithwa koshiyambelo. Ombinzi, ndjoka ya li yi lile po omwenyo, oya li ha yi pewa Kalunga onga ye. Kungawo, aayambi naalongelikalunga nosho wo Jehova oya li ya fa taya li pamwe, shoka sha li tashi ulike kutya oye na ombili naye. Omuntu ngoka a li omayambo a nyata (onyata kehe ya popiwa mOmpango) nenge ngoka a li onyama ndjoka konima yethimbo ndyoka ya li yi na okuliwa (pethimbo lyuupyu oya li hayi tameke okwoola) okwa li ha dhimwa mo maantu ye. Okwa li a nyateke nenge inaa simaneka iikulya mbyoka, oshoka okwe yi li a nyata nenge a li shoka sha talika ko sho ola kuJehova Kalunga, noina ulika kutya okwa simaneka iinima iiyapuki. — Lev 7:16-21; 19:5-8.
Konga omaliko mOmbiimbeli
(Levitikus 2:13) Toya ondjambo kehe yiikulya nomongwa, oshoka omongwa otagu kalele po ehangano pokati keni naKalunga. (Ou na okutoya oondjambo dhoye adhihe nomongwa.)
(Hesekiel 43:24) ngoye u dhi etele ndje. Aayambi otaye dhi gundu omongwa e taye dhi fikile ndje omayambo.
Omanenedhiladhilo okuza membo lyaLevitikus
2:13 — Omolwashike “ondjambo kehe” ya li yi na okweetwa nomongwa? Shoka kasha li hashi ningwa okutoyaleka omayambo. Muuyuni awuhe, omongwa ohagu longithwa okukeelela oshinima kaashi yonuke. Otashi vulika gwa li hagu toyalekithwa omayambo oshoka otagu thaneke emanguluko keyonuko nenge kokwoola.
(Levitikus 3:17) Kape na Omuisraeli ta li omakagadhi nenge ombinzi; eutho ndika nali dhigininwe kAaisraeli sigo aluhe shaa mpoka ye li.
it-1-E ep. 813
Omakagadhi
Omolwashike ga li ga longithwa pampango? Kohi yehangano lyOmpango, ombinzi nomakagadhi oya li ya talika ko kutya oyaJehova owala. Ombinzi oyi na omwenyo, ngoka Jehova oye owala ha vulu oku gu gandja, onkee ombinzi oye. (Lev 17:11, 14) Omakagadhi oga li ga talika ko ge li oshitopolwa oshiwanawa lela konyama yoshinamwenyo. Okuyamba omakagadhi goshinamwenyo okwa li haku ulike kutya naku ga gandja okwa tala ko kutya iitopolwa mbyoka iiwanawa oyaJehova, ngoka ha gandja iinima lela oyindji, nosha li hashi ulike kutya okwa hala okupa Kalunga shoka sha dhenga mbanda. Molwaashoka osha li tashi thaneke kAaisraeli taya pe Jehova shoka sha dhenga mbanda moku mu longela, oku mu longela momukalo ngoka okwa popiwa kutya olwithi talu tsina koshiyambelo onga ‘iikulya’ noku li “ezimba lya nika nawa” kuye. (Lev 3:11, 16) Onkee okulya omakagadhi, okwa li okulongitha nayi oshinima shoka sha yapulilwa Jehova Kalunga, nokuyona kuYe. Omuntu ngoka a li omakagadhi okwa li ha dhipagwa. Nonando omakagadhi kaga li ga fa ombinzi, oga li haga vulu okulongithwa miinima yilwe, uuna oshinamwenyo shi isila nenge sha dhipagwa koshilikama. — Lev 7:23-25.
Omanenedhiladhilo okuza membo lyaLevitikus
3:17. Molwaashoka omakagadhi oga li ga talika ko ge li oshitopolwa oshiwanawa lela, sho ga li gi indikwa okuliwa, osha yela kutya osha ningitha Aaisraeli ya mone kutya Jehova oku na okupewa shoka sha dhenga mbanda. (Genesis 45:18) Shoka otashi tu dhimbulukitha kutya otu na okupa Jehova shoka sha dhenga mbanda. — Omayeletumbulo 3:9, 10; Aakolossa 3:23, 24.
Elesho lyOmbiimbeli
(Levitikus 1:1-17) Omuwa okwa li metsalihangano e ti ithana Moses nokwe mu pe omautho ngaka 2 Aaisraeli ye na oku ga gwanitha uuna taa yamba omafikilondjambo. Ngele oku na ngoka ta yamba oshimuna, na yambe ongombe nenge onzi nenge oshikombo. 3 Nenge ota yamba ongombe ye efikilondjambo, na ete ongombe ondumentu yaa na oshipo. Ne yi ete posheelo shetsalihangano, opo Omuwa e yi taambe nohokwe. 4 Na tenteke oshikaha she komutse gwayo, notayi taambwa yi ninge efikilondjambo lyokukutha po oondjo dhe. 5 Ongombe ne yi tselele mpoka koshipala shOmuwa, naana yaAaron aayambi naa gandje ombinzi yayo kOmuwa e taye yi shashamine koombinga ne dhoshiyambelo shoka shi li posheelo shetsalihangano. 6 Na yuye oshimuna e te shi tete iintimbu. 7 Aayambi naa tule iikuni koshiyambelo e taye yi tomeke. 8 Iintimbu naye yi tule momulilo pamwe nomutse noofu. 9 Naa yoge iikwamela nomagulu momeya. Omuyambi na lungunithe iinima mbika ayihe koshiyambelo. Ndika olyo efikilondjambo li na ezimba lya nika nawa notali opalele Omuwa. 10 Omuntu ngele ota yamba onzi nenge oshikombo, nashi kale oshilumentu shaa na oshipo. 11 Ne shi dhipagele kuumbangalantu woshiyambelo koshipala shOmuwa, naayambi naa shashamine oshiyambelo ashihe nombinzi yasho. 12 Na tete onyama iintimbu, nomuyambi ne yi tule pamwe nomutse noofu dhasho piikuni mbyoka yi li momulilo koshiyambelo. 13 Na yoge iikwamela momeya, omuyambi note yi pe Omuwa efikilondjambo e te yi lungunithile po ayihe koshiyambelo. Olyo efikilondjambo li na ezimba lya nika nawa notali opalele Omuwa. 14 Ngele oku na omuntu ta yambele Omuwa efikilondjambo lyondhila, nali kale lyonguti nenge lyokangutyona. 15 Omuyambi ne yi fale koshiyambelo e te yi thingonona othingo e ta lungunitha omutse gwayo koshiyambelo. Ombinzi yayo nayi ndondithilwe molumbumbu lwoshiyambelo. 16 Ne yi kuthe oshikutunino nomalwenya e te yi umbile pelunda lyomutoko lwokuuzilo woshiyambelo. 17 Ne yi tandule olumana, ewawa li kale kombinga kehe pwaa naa okuteta ewawa, noyi lungunithilwe ayihe kombanda yiikuni koshiyambelo. Olyo efikilondjambo li na ezimba lya nika nawa notali opalele Omuwa.
16-22 NOVOMBA
OMALIKO OKUZA MOOHAPU DHAKALUNGA | LEVITIKUS 4–5
“Pa Jehova shoka sha dhenga mbanda”
(Levitikus 5:5, 6) Uuna omuntu e na ondjo, ne yi hempulule 6 nokweetela Omuwa onzi onkiintu nenge oshikombo oshikiintu, shi ninge eyonondjambo lyokufuta ondjo ye. Omuyambi na yambele ondjo yomuntu nguka.
it-2-E ep. 527, okat. 9
Omayambo
Omayonondjambo. Omayonondjambo oga li wo haga gandjwa molweyono, oshoka ondjo kehe oya kwatela mo eyono. Oga li haga gandjwa omolwomayono gontumba ngoka ga ningitha omuntu a kale e na ondjo, noga li ga yooloka ko kashona koondjondjambo dhilwe oshoka odha li hadhi ningitha omuntu a kale ishewe e na uuthemba wontumba. Otashi vulika omuntu a yono kuJehova nenge koshigwana she oshiyapuki. Eyonondjambo olya li hali gandjwa opo omuntu a dhiminwe po kuJehova molwaashoka a yono kuYe, nenge opo omuntu ngoka i iyela ombedhi a kale ishewe ngaashi a li nale nopo kaa geelwe omolweyono lye. — Yelekanitha Jes 53:10.
(Levitikus 5:7) Omuntu ngele ita vulu okumona onzi nenge oshikombo, na etele Omuwa ofuto yondjo ye oonguti mbali, nenge uungutyona uyali, yimwe omolweyonondjambo nonkwawo omolwefikilondjambo.
w09-E 6/1 ep. 26, okat. 3
Jehova ohe tu yaalele omolwomangambeko getu
Shi na ko nasha nondjaalela yaJehova, Ompango oya ti: “Omuntu ngele ita vulu okumona onzi nenge oshikombo, na etele Omuwa ofuto yondjo ye oonguti mbali, nenge uungutyona uyali.” (Ovelise 7) Uutumbulilo “ngele omuntu ita vulu okumona” otawu vulu wo okutolokwa “ngele oshikaha she itashi vulu okwaadha.” Ngele Omwiisraeli okwa li a hepa itaa vulu okugandja onzi, Kalunga okwa li ha kala a nyanyukwa okutaamba shoka ta vulu okugandja, ano oonguti mbali nenge uungutyona uyali.
(Levitikus 5:11) Ngele omuntu ita vulu okumona oonguti mbali, nenge uungutyona uyali, na ete omakopi gaali guusila womunziya, u ninge eyonondjambo. Ina tula mo tuu nando omagadhi gooholivi nenge iitsinino, molwashoka eyonondjambo.
w09-E 6/1 ep. 26, okat. 4
Jehova ohe tu yaalele omolwomangambeko getu
Ongiini ngele omuntu kali e na oonguti mbali nenge uungutyona uyali? Ompango oya ti: ‘Na ete [uukopi uuhetatu nenge omugoyi] wuusila womunziya, u ninge eyonondjambo.’ (Ovelise 11) Kwaamboka ya hepa noonkondo, Jehova okwa li e ya etha ya gandje eyonondjambo kaali na ombinzi. MuIsraeli, oluhepo kalwa li lwa keelele aantu ya mone eyambeko lyokukwatakanithwa naKalunga nenge uuthembahenda wokupanga ombili naye.
Konga omaliko mOmbiimbeli
(Levitikus 5:1) Ngele oku na omuntu ti ithanwa kombala, a gandje uumbangi mompangu, ihe ita gandja uumbangi waashoka a uva nenge a mona, oye ta humbata iilanduliko.
Ilonga sha kaapiya yaJehova aadhiginini mboka ya li ko
14 Nangoye oto vulu okukala omudhiginini kuJehova. Oto vulu wo okukala omudhiginini kuyalwe moku ya kenukila. Pashiholelwa, otashi vulika wu na uushili kutya omumwatate gwontumba okwa yona eyono lya kwata miiti. Ngele oku li kuume koye kopothingo nenge gwaandjeni, otashi vulika wu mwenene oshinima shoka. Owu shi wo kutya shoka sha simanenena okukala omudhiginini kuJehova. Ngaashi owala Natan, kenukila omumwaho ngoka, ihe kala omudhiginini kuJehova. Owu na okulombwela omumwaho ngoka a ka hokololele aakuluntugongalo oshinima shoka nziyanziya, opo a kwathelwe. Ngele ye ita yi ko, nena ongoye wu ya ko wu ke ya lombwele. Shono otashi ulike kutya owu li omudhiginini kuJehova. Shimwe ishewe, otashi ulike kutya owu na olukeno nomumwaho, molwaashoka aakuluntugongalo otaye ke mu kwathela a kale e na natango ekwatathano ewanawa naJehova. Otaye ke shi ninga momukalo gwombili taya popi nelaka etalala. — Lesha Levitikus 5:1; Aagalati 6:1.
(Levitikus 5:15, 16) Ngele oku na ngoka ta yono mokwaashiwo inaa gandja iigandjwa ya yapulilwa Omuwa, na ete ondjondjambo kOmuwa, onzi ondumentu yaa na oshipo nenge oshikombo oshilumentu shaa na oshipo. Ondjundo yoshimuna nayi uthwe pandjele yiimaliwa hayi longithwa motempeli. 16 Omuntu ota futu shoka a li e na okufuta e ta gwedha po oshititano. Ne yi pe omuyambi, nomuyambi ota yamba oshimuna omolweyono lyomuntu ngoka, oye nota dhiminwa po.
it-1-E ep. 1130, okat. 2
Uuyapuki
Iinamwenyo niilikolomwa. Osheeli shongombe, shonzi noshoshikombo oya li ya talwa ko iiyapuki kuJehova nokaya li yi na okushunithwa. Oya li yi na okuyambwa, noshitopolwa shimwe osha li hashi yi kaayambi. (Num 18:17-19) Oshipe noshitimulongo oya li iiyapuki nosho wo omayambo nomagano agehe ngoka ga li gi ikalekelwa ga longithwe metsalihangano. (Eks 28:38) Iinima ayihe mbyoka oya li iiyapuki kuJehova nokaya li hayi talwa ko inaayi simana nenge yi longithwe momukalo moka kaayi na okulongithwa nenge kaagu shi gwesimaneko. Oshiholelwa shimwe, ompango yi na ko nasha noshitimulongo. Ngele omuntu gwontumba okwa li i ikalekele oshitopolwa a kale he shi gandja shi li oshitimulongo, ngaashi iilya, ihe ye nenge gumwe gwomegumbo lye okwe yi kutha po kaashi shi owina e yi longithe megumbo, ngaashi oku yi teleka, omuntu ngoka okwa li e na ondjo yokutaaguluka ompango yaKalunga yi na ko nasha niinima iiyapuki. Ompango oya li tayi ti kutya omuntu ngoka oku na okufuta shoka a li e na okufuta kwa gwedhwa oopelesenda 20, kakele kokugandja onzi yomoonzi dhe yi li eyambo. Shoka osha li hashi ningitha aantu ya kale ya simaneka noonkondo iinima iiyapuki yaJehova. — Lev 5:14-16.
Elesho lyOmbiimbeli
(Levitikus 4:27–5:4) Ngele nani gumwe gwomaantu yowala ta yono e ta pogola kiipango yOmuwa mokwaashiwo, 28 nena shampa tuu a dhimbulula eyono lye, na ete ondjambo ye yoshikombo oshikiintu shaa na oshipo. 29 Na tenteke oshikaha she komutse gwasho e te shi dhipagele kuumbangalantu woshiyambelo, hoka haku dhipagelwa iimuna yomafikilondjambo. 30 Omuyambi na yaye omune gwe mombinzi yoshikombo e te yi gogo kooniga dhoshiyambelo e ta tile ombinzi onkwawo pekota lyoshiyambelo. 31 Nena na kuthe oofu adhihe, ngaashi oofu hadhi kuthwa koshimuna sha dhipagelwa ekwatathanondjambo, e te dhi lungunithile koshiyambelo, opo dhi gandje ezimba lya nika nawa tali opalele Omuwa. Pahedhi ndjika omuyambi ota yamba omolweyono lyomuntu ngoka, oye nota dhiminwa po. 32 Omuntu ngele ote eta onzi yeyonondjambo, nayi kale onkiintu yaa na oshipo. 33 Ota tenteke oshikaha she komutse gwayo e te yi dhipagele kuumbangalantu woshiyambelo, hoka iimuna yomafikilondjambo hayi dhipagelwa. 34 Omuyambi na yaye omunwe gwe mombinzi yonzi e te yi gogo kooniga dhoshiyambelo; ombinzi onkwawo te yi tile pekota lyoshiyambelo. 35 Nena na kuthe oofu adhihe, naanaa ngaashi oofu hadhi kuthwa konzi ya dhipagelwa ekwatathanondjambo, e te dhi lungunithile koshiyambelo kombanda yomafikilondjambo ga yambelwa Omuwa. Pahedhi ndjika omuyambi ota yamba omolweyono lyomuntu ngoka, oye nota dhiminwa po.
5 Ngele oku na omuntu ti ithanwa kombala, a gandje uumbangi mompangu, ihe ita gandja uumbangi waashoka a uva nenge a mona, oye ta humbata iilanduliko. 2 Ngele oku na ngoka ta gumu sha sha nyata mokwaashiwo, ngaashi oshimuna shi isila, ota kala a nyata nomunandjo, sigo a dhimbulula shoka a ningi. 3 Ngele oku na ngoka ta gumathana nomuntu a nyata ye ke shi shi, ota ka kala e na ondjo, sigo a dhimbulula shoka a ningi. 4 Ngele oku na omuntu ta gana muuhasha, kashi na mbudhi kutya egano olyashike, ota kala e na ondjo, sigo a dhimbulula shoka a ningi.
23-29 NOVOMBA
OMALIKO OKUZA MOOHAPU DHAKALUNGA | LEVITIKUS 6–7
“Okuulika olupandu”
(Levitikus 7:11, 12) Omautho taga landula ogekwatathanondjambo tali yambelwa Omuwa. 12 Ngele omuntu te li etele Kalunga omolwepandulo, na yambe pamwe noshimuna shepandulo ondjambo yiikwiila inaayi tulwa efulika yomaludhi ngaka: iikwiila ya mbumbwakana ya ningwa nuusila womunziya wa lungilwa momagadhi gooholivi, uukwiila wa pepuka wa gwayekwa omagadhi gooholivi, nuukuki wa ningwa nuusila womunziya wa lungilwa momagadhi gooholivi.
Iiyilongomwa mbyoka tatu vulu okwiilonga membo lyaLevitikus
9 Oshiilongomwa oshitiyali: Ohatu longele Jehova, molwaashoka otwe mu pandula. Opo tu shi tse omuthindo, natu taleni kombinga yomakwatathanondjambo, oshinima shilwe shoka sha li sha simana mokulongela Kalunga kwashili muIsraeli shonale. Membo lyaLevitikus otatu ilongo mo kutya Aaisraeli oya li haya vulu okugandja ekwatathanondjambo, “omolwepandulo.” (Lev. 7:11-13, 16-18) Omuntu okwa li ha gandja eyambo ndyoka, molwaashoka a hala oku li gandja, ihe hamolwaashoka e na oku li gandja. Onkee ano, shoka osha li hashi ulike kutya okwe li gandja pahalo lye mwene, molwaashoka oku hole Kalunga ke, Jehova. Onyama yoshimuna shoka sha yambwa, oya li hayi liwa po komuntu ngoka e shi yamba, pamwe nuukwanegumbo we nosho wo aayambi. Ihe iitopolwa yimwe yoshimuna shoka sha yambwa, oya li hayi pewa Jehova oye awike. Iitopolwa mbyoka oyini?
(Levitikus 7:13-15) Na yambe ano iikwiila inaayi tulwa efulika pamwe noshimuna she shepandulo. 14 Na ete oshikwiila shimwe sholudhi kehe kOmuwa; otashi ningi shomuyambi ngoka ta shashamine ombinzi yoshimuna shekwatathanondjambo koshiyambelo. 15 Onyama yoshimuna nayi liwe esiku ndyoka ya yambwa; inapu hupithilwa yangula.
w00 9/1 ep. 9, okat. 15
Omayambo ngoka ga hokiwa kuKalunga
15 Eyambo ekwawo lyehalo ewanawa olyo ekwatathanondjambo ndyoka tali hokololwa muLevitikus ontopolwa 3. Edhina ndyoka otali vulu wo okutolokwa “eyambo lyombili.” MOshihebeli, oshitya “ombili” otashi ulike oshindji shi vulithe owala pokukala kaapu na iita nomapiyagano. “MOmbiimbeli osho tashi ti ngaaka nosho wo onkalo nenge ekwatathano lyombili naKalunga, ehepuluko, enyanyu nelago,” embo Studies in the Mosaic Institutions osho tali ti ngaaka. Ano omakwatathanondjambo osho ga li haga yambwa ngaaka, hakushilipaleka ombili naKalunga, ngaashi oku mu mbilipaleka, ihe okuulika olupandu nenge okutyapula omolwonkalo ya yambekwa yombili naKalunga ndjoka hayi nyanyukilwa kwaamboka ya hokiwa kuye. Aayambi nosho wo nakuyamba oya li haya li omayambo ngoka konima sho ombinzi nomakagadhi ga yambelwa Jehova. (Levitikus 3:17; 7:16-21; 19:5-8) Momukalo omwaanawa nogwopathaneko, nakuyamba, aayambi naJehova Kalunga oya li taya li pamwe, shoka tashi ulike ekwatathano lyombili ndyoka li li pokati kawo.
(Levitikus 7:20) ihe shaa ngoka te yi li a nyata, na dhimwe mo maantu yaKalunga.
w00 9/1 ep. 13, okat. 8
Omahambelelondjambo ngoka taga hokiwa kuJehova
8 Ongiini shi na ko nasha nomuntu ngoka ta gandja eyambo? Ompango oya popya kutya kehe ngoka ta holoka koshipala shaJehova oku na okukala a yogoka nokee na oshipo. Ngoka e na oshipo kutya nduno omolwetompelo lyashike, okwa li e na okuyamba eyonondjambo nenge ondjondjambo tango, opo a kaleke po ishewe omuthika gwe gwa yogoka koshipala shaJehova opo efikilondjambo nenge ekwatathanondjambo lye li taambiwe ko kuYe. (Levitikus 5:1-6, 15, 17) Onkee ano, mbela otu wete ngaa kutya osha simana okukala twa yogoka koshipala shaJehova? Ngele otwa hala Kalunga a taambe ko iilonga yetu yoku mu longela, otu na okukala hatu endelele okwoopaleka etaaguluko kehe twa ninga lyoompango dhaKalunga. Otu na okukala hatu endelele okulongitha uupitilo mboka wa gandjwa kuKalunga u li ekwatho, ano “aakuluntu yegongalo” nosho wo “eyambo lyokudhima po oondjo dhetu,” Jesus Kristus. — Jakob 5:14; 1 Johannes 2:1, 2.
Konga omaliko mOmbiimbeli
(Levitikus 6:13) Omulilo nagu kale aluhe gwa tema koshiyambelo, inagu dhima!
it-1-E ep. 833, okat. 1
Omulilo
Nkene gwa li hagu longithwa metsalihangano nomotempeli. Omulilo ngoka gwa li hagu longithwa melongelokalunga ogwa ka kala hagu longithwa metsalihangano nokonima omotempeli. Ongula kehe naasho taku wiwile, omuyambi omukuluntu okwa li ha ka fika iitsinino koshiyambelo. (Eks 30:7, 8) Ompango yaKalunga oya li tayi ti kutya omulilo nagu kale aluhe gwa tema koshiyambelo. (Lev 6:12, 13) Aajuda pamuthigululwakalo gwawo ohaya ti kutya omulilo ngoka gwa li hagu kala koshiyambelo, ogwa li hagu temwa kuKalunga pashikumithalonga, nonando aantu oyendji osho ye shi tala ko ngawo, uuyelele mboka kawu mo mOmanyolo. Shi ikolelela komalombwelo gotango ngoka Jehova a li a pe Moses, aana yaAaron oya li ye na ‘okutula iikuni koshiyambelo e taye yi tomeke,’ manga inaa ya tula ko omayambo. (Lev 1:7, 8) Okonima owala yokulangekwa po kwaayambi yomezimo lyaAaron, nokonima sho omafikilondjambo gokulangekwa po ga gandjwa, omulilo gwa zi kuJehova, tashi vulika gwa zi moshikogo shi li kombanda yetsalihangano, gwa lungunitha po omayambo ngoka ga li koshiyambelo. Mokutala kwaashono, omulilo ngoka ogwe ya po pashikumithalonga, ihe inagu temwa niikuni koshiyambelo, e tagu “lungunitha po efikilondjambo noofu koshiyambelo.” Onkee ano omulilo ngoka gwa kala gwa tema koshiyambelo, otashi vulika ngoka gwa zi kuJehova naangoka oko gwa adhika. (Lev 8:14–9:24) Sha faathana, omulilo ngoka gwa zi kuJehova pashikumithalonga ogwa li gwa lungunitha po omayambo konima owala sho Salomo a galikana peyapulo lyotempeli. — 2Ondjal 7:1; tala wo Aatok 6:21; 1Aak 18:21-39; 1Ondjal 21:26 moka mu na iiholelwa yilwe yankene Jehova a li a longitha omulilo pashikumithalonga sho a li ta taamba ko omayambo gaapiya ye.
(Levitikus 6:25) a pe Aaron noyana omautho geyonondjambo. Oshimuna sheyonondjambo otashi dhipagelwa kuumbangalantu woshiyambelo, hoka haku dhipagelwa iimuna yomafikilondjambo. Shika osho ondjambo ondjapukilela.
si-E ep. 27, okat. 15
Embo lyOmbiimbeli eti-3 — Levitikus
15 (3) Eyonondjambo olya li ha li gandjwa uuna omayono ga ningwa kaashi shi owina, nenge uuna omayono ga ningwa papuko. Oshinamwenyo shoka sha li hashi yambwa osha li hashi kala shi ikolelela komuntu ngoka ta dhiminwa po, ngaashi omuyambi, aantu ayehe, elenga, nenge omuntu gwowala. Eyonondjambo olya li na okugandjwa, kalya li lya fa omafikilondjambo nomakwatathanondjambo. — 4:1-35; 6:24-30.
Elesho lyOmbiimbeli
(Levitikus 6:1-18) Omuwa okwa pe Moses omautho ngaka. 2 Ondjambo nayi yambwe, shampa gumwe a yono kOmuwa, ongele mokutinda okushunitha shoka Omuisraeli a thigile po sha fa ombambyona nenge sha yakelwe nenge moku mu kotokela 3 nenge a fundju molwoshinima sha kana ye ta gana ta ti, ine shi mona. 4-5 Uuna omuntu ta yono pamukalo nguka, na fute shoka e na, molwashoka ke li moshili. Esiku ndyoka ta monika ondjo, oku na okufuta mwene gwiinima ofuto yu udha mwa gwedhwa oshititano. 6 Ne ete komuyambi ondjondjambo ye, yi yambelwe Omuwa: onzi ondumentu yaa na oshipo nenge oshikombo oshilumentu shaa na oshipo, pamuthika gwondjele. 7 Omuyambi ota yamba omolweyono lyomuntu ngoka, oye nota dhiminwa po. 8 Omuwa okwa lombwele Moses 9 a gandje kuAaron noyana omautho gomidhidhindjambo taga landula. Efikilondjambo nali kale koshiyambelo momulilo tali pi uusiku auhe, sigo otaku shi. 10 Nena omuyambi na zale eguyo lye lyoliina nombulukweya yoliina e ta yuku po omutoko gwa li koshiyambelo e te gu tula pooha dhoshiyambelo. 11 Nena ota lundulula omizalo dhe e ta fala omutoko pondje yontanda pehala lya yogoka. 12 Omulilo nagu kale gwa tema koshiyambelo, inagu pitikwa gu dhime. Ongula kehe omuyambi na hohe iikuni mugwo e ta longekidha efikilondjambo nokulungunitha oofu dhekwatathanondjambo kombanda yalyo. 13 Omulilo nagu kale aluhe gwa tema koshiyambelo, inagu dhima! 14 Omautho gondjambo yiikulya ogo ngaka. Aana yaAaron naa ete ondjambo yiikulya kOmuwa komeho goshiyambelo. 15 Omuyambi na kuthe mo ombinga yokuyambelwa koshiyambelo, oyo eke lyu udha lyuusila womunziya u na omagadhi gooholivi niitsinino ayihe yi li mo, e te yi lungunithile koshiyambelo, li ninge ezimba lya nika nawa tali opalele Omuwa. 16-17 Oshihupe otashi liwa po kaayambi. Otashi ningwa moshikwiila inaashi tulwa efulika e tashi lilwa pehala eyapuki, omehale lyetsalihangano. Omuwa okwe shi pa aayambi, shi ninge oshitopolwa shoondjambo dhiikulya. Osho oshiyapukilela sha faathana nomayonondjambo noondjondjambo. 18 Aana yaAaron ayehe aalumentu oye na oku shi lya. Osho oshipewa shawo shaaluhe shoondjambo dhiikulya ya yapulilwa Omuwa. Kehe ngoka te shi gumu, ota kala omuyapuki.
30 NOVOMBA–6 DESEMBA
OMALIKO OKUZA MOOHAPU DHAKALUNGA | LEVITIKUS 8–9
“Shoka tashi ulike kutya Jehova oha yambeke aantu”
(Levitikus 8:6-9) Moses okwa hedhitha Aaron noyana komeho e te ya yogo nawa nomeya. 7 Okwa zaleke Aaron ohema neguyo nekwamo mombunda ye. Okwe mu zaleke omapepenguwo e te ga mangele ko nepaya lyago lyomombunda. 8 Okwe mu zaleke oshipapa shomontulo e ta tula mo Urim naThummin. 9 Okwe mu zaleke egala komutse nokomeho galyo okwa tula ko epapa lyoshingoli, endhindhiliko eyapuki lyeyapulo, naanaa ngaashi Omuwa a lombwele Moses.
(Levitikus 8:12) Okwa yapula Aaron, sho e mu tile omagadhi momutse nokwe mu gwayeke.
it-1-E ep. 1207
Eyapulo
Moses okwa li a yogo Aaron noyanamati Nadab, Abihu, Eleasar naltamar (nenge e ya lombwele yi iyoge yoyene) moshiyaha shoshikushu shoka sha li shi li mehale, e ta zaleke Aaron oonguwo dhomuyambi omukuluntu. (Num 3:2, 3) Aaron okwa zalekwa oonguwo oombwanawa, ndhoka dha li tadhi ulike kutya ota ka longa iilonga ya tya ngiini nosho wo iinakugwanithwa mbyoka ta ka kala e na. Konima yaashono, Moses okwa gwayeke etsalihangano, oshitaafula niinima yasho ayihe, oshiyambelo shomafikilondjambo noshiyaha shokwiiyogela niikwanipangitho yasho. Kungawo iinima mbyoka oya ningi iiyapuki, yi itulilwa yi longithwe owala miilonga yaKalunga. Hugunina, Moses okwa gwayeke Aaron, sho e mu tile omagadhi momutse. — Lev 8:6-12; Eks 30:22-33; Eps 133:2.
(Levitikus 9:1-5) Esiku limwe sho lya piti po, omisindilo dheyapulo sho dha tsakanithwa, Moses okwi ithana Aaron noyana naawiliki yAaisraeli. 2 Okwa ti kuAaron: “Ikuthila ongombe ondumentu yomutanda nonzi ondumentu yaa na oshipo, u yi yambele Omuwa, ongombe oyeyonondjambo nonzi oyefikilondjambo. 3 Nena lombwela Aaisraeli ya kuthe oshikombo oshilumentu shi ninge eyonondjambo, ontana yomumvo gumwe nonzigona yomumvo gumwe yaa na oshipo yi ninge efikilondjambo, 4 nongombe ondumentu nonzi ondumentu yi ninge ekwatathanondjambo. Naa yi yambele Omuwa pamwe nondjambo yiikulya mwa tulwa omagadhi. Naye shi ninge, oshoka Omuwa ote ya ihololele nena.” 5 Oye eta kosheelo shetsalihangano ashihe shoka Moses e ya lombwele, negongalo alihe olya gongala li simaneke Omuwa.
it-1-E ep. 1208, okat. 8
Eyapulo
Mesiku etihetatu, aayambi ya longekidhwa nawa noya yapulilwa oshilonga shawo, (inaaya kwathelwa kuMoses) oya ningi ekwatathanondjambo lyoshigwana shaIsraeli oshikando shotango, unene tuu molwaashoka sha li sha pumbwa okuyogolwa, hamolwaashoka owala sho sha yono omolwokwaahagwanenena, ihe naasho wo opo owala sha li inaashi vulika sho sha galikana ontana yoshingoli, oshinima shoka sha li she shi ningitha shi geelwe kuJehova. (Lev 9:1-7; Eks 32:1-10) Pehulilo lyeyakulo ndika lyotango lya ningwa kaayambi mboka ya yapulwa, Jehova okwa ulike kutya okwe ya pitika nokwe ya taamba ko ya longe iilonga mbyoka mokutuma omulilo pashikumithalonga, nokaapu na omalimbililo gwa zi moshikogo shoka sha li kombanda yetsalihangano, ngoka gwa lungunitha po omayambo agehe ngoka ga li koshiyambelo. — Lev 9:23, 24.
(Levitikus 9:23, 24) Moses naAaron oya yi metsalihangano, naasho ya zi mo, oya laleke oshigwana nuuyamba, neadhimo lyOmuwa olya holokele oshigwana ashihe. 24 Ohaluka Omuwa a tumu omulilo, nogwa lungunitha po efikilondjambo noofu koshiyambelo. Aantu sho ye shi mono, oya ligola e taa tsu iipala yawo mevi.
Iiyilongomwa mbyoka tatu vulu okwiilonga membo lyaLevitikus
13 Oshiilongomwa oshitine: Jehova oha yambeke oshitopolwa shehangano lye shokombanda yevi. Natu tale shoka sha li sha ningwa po mo 1512 K.E.N., sho etsalihangano lya li lya thikamekwa pondundu Sinai. (Eks. 40:17) Moses okwa li a kwatele komeho oshituthi, moka Aaron noyanamati ya li ya langekwa po ye li aayambi. Oshigwana shaIsraeli osha li sha gongala, opo shi tale sho aayambi taya gandja omayambo gawo gotango giinamwenyo. (Lev. 9:1-5) Jehova okwa li a ulike ngiini kutya okwa hokwa aayambi mboka opo ya langekwa po? Manga Aaron naMoses ya li taya yambeke aantu, Jehova okwa tumu omulilo gu lungunithe po eyambo ndyoka li li koshiyambelo. — Lesha Levitikus 9:23, 24.
Konga omaliko mOmbiimbeli
(Levitikus 8:6) Moses okwa hedhitha Aaron noyana komeho e te ya yogo nawa nomeya.
Omolwashike tu na okukala aayapuki?
6 Oshitegelelwa kutya aasaaseri yaIsraeli oya li ye na okukala ya yogoka palutu, oshi na eityo shili koshigwana shaJehova kunena. Olundji mboka hatu konakona nayo Ombiimbeli ohaya ndhindhilike uuyogoki womahala getu gokugongalela nosho wo omizalo dhetu dha yela nodho opala. Ihe nonando ongawo, eiyopaleko lyaasaaseri otali tu kwathele tu mone kutya kehe ngoka ta londo kondundu ondeendeka, opo a ka longele Jehova oku na okukala e na ‘omadhiladhilo ga yela.’ (Lesha Omapisalomi 24:3, 4; Jes. 2:2, 3.) Iilonga yetu iiyapuki mbyoka hatu longele Kalunga oyi na okulongwa nomadhiladhilo ga yela, nomwenyo gwa yela nosho wo nomalutu ga yela. Shika otashi pula tu ikonakone paumwene pandjigilile. Otashi vulika nokuli twa pumbwa okuninga omalunduluko omanene, opo tu kale twa yogoka. (2 Kor. 13:5) Pashiholelwa, omuntu ngoka a ninginithwa noha talele owina omathano giipala oku na okwiipula ta ti: ‘Mbela otandi ulike ngaa kutya ngame omuyapuki?’ Konima yokwiipula ngawo, okwa pumbwa oku ka konga ekwatho, opo a hulithe po okutala omathano giipala, hoka ku li oshinima oshiwinayi lela. — Jak. 5:14.
(Levitikus 8:14-17) Moses okwe eta po ongombe ondumentu yeyonondjambo, Aaron noyana noya tenteke iikaha yawo komutse gwayo. 15 Moses okwe yi tsele e ta kutha ombinzi e te yi gwayeke kooniga dhoshiyambelo, opo e shi yapule. Ombinzi onkwawo okwe yi tile pekota lyoshiyambelo. Pahedhi ndjika okwe shi yapula noku shi yelitha. 16 Moses okwa kutha omakagadhi agehe kiikwamela, ekalokwa lyokehuli, iitiyanathigo niinkene yayo e te yi lungunithile koshiyambelo. 17 Ihe onyama yongombe, ekunka nehoho okwe yi fala e te yi lungunithile pondje yontanda, naanaa ngaashi Omuwa a lombwele Moses.
it-2-E ep. 437, okat. 3
Moses
Kalunga okwa li a tula po Moses a ninge omupokati gwehangano lyOmpango nAaisraeli, ondondo ndjoka kaapu na nando omuntu a li e yi pewa kuKalunga kakele kuJesus Kristus, Omupokati gwehangano epe. Moses okwa li a shashamine embo lyehangano nombinzi yiinamwenyo mbyoka ya li ya yambwa (ehangano ndyoka Jehova a li a hangana noshigwana she). Okwa leshele aantu membo lyehangano, mboka ya yamukula ya ti: “Otatu vulika kOmuwa e tatu ningi ashihe sho ta ti.” (Eks 24:3-8; Heb 9:19) Moses moshilonga she e li Omupokati, okwa li e na uuthembahenda wokutonatela iilonga yokutunga etsalihangano noyokuninga iikwaniipangitho yamo, shi ikolelela komalombwelo ngoka a li a pewa kuKalunga. Okwa li wo e na okulangeka po aayambi moshilonga shawo, okugwayeka etsalihangano nosho wo Aaron omuyambi omukuluntu nomugwayo gwi ikalekelwa gwomagadhi giinima ya lungilwa mumwe. Okwa li wo a tonatele iilonga yotango mbyoka ya li tayi longwa kaayambi ya yapulwa, opo ya li ya langekwa po. — Eks ontop 25-29; Lev ontop 8, 9.
Elesho lyOmbiimbeli
(Levitikus 8:31–9:7) Moses okwa lombwele Aaron noyana e ta ti: “Faleni onyama ndjika posheelo shetsalihangano, mu yi pake po ne mu yi lile mpoka pamwe niikwiila yomontungwa yoondjambo dheyapulo, naanaa ngaashi Omuwa a ti. 32 Lungunitheni onyama kehe nenge oshikwiila tashi hupu ko. 33 Inamu za po posheelo shetsalihangano omasiku gaheyali, sigo omisindilo dheyapulo lyeni dha pu thiluthilu. 34 Omuwa oye e tu lombwele, tu ninge shoka twa longo nena, opo oondjo dheni dhi dhimwe po. 35 Omasiku gaheyali, uusiku nomutenya, omu na okukala posheelo shetsalihangano tamu longo shoka Omuwa a ti nashi longwe. Ngele itamu shi ningi, otamu si. Osho Omuwa a lombwele ndje.” 36 Aaron noyana oya gwanitha ayihe mbyoka Omuwa e ya lombwelitha kuMoses.
9 Esiku limwe sho lya piti po, omisindilo dheyapulo sho dha tsakanithwa, Moses okwi ithana Aaron noyana naawiliki yAaisraeli. 2 Okwa ti kuAaron: “Ikuthila ongombe ondumentu yomutanda nonzi ondumentu yaa na oshipo, u yi yambele Omuwa, ongombe oyeyonondjambo nonzi oyefikilondjambo. 3 Nena lombwela Aaisraeli ya kuthe oshikombo oshilumentu shi ninge eyonondjambo, ontana yomumvo gumwe nonzigona yomumvo gumwe yaa na oshipo yi ninge efikilondjambo, 4 nongombe ondumentu nonzi ondumentu yi ninge ekwatathanondjambo. Naa yi yambele Omuwa pamwe nondjambo yiikulya mwa tulwa omagadhi. Naye shi ninge, oshoka Omuwa ote ya ihololele nena.” 5 Oye eta kosheelo shetsalihangano ashihe shoka Moses e ya lombwele, negongalo alihe olya gongala li simaneke Omuwa. 6 Moses okwa ti: “Osho Omuwa e mu lombwele mu shi ninge, opo eadhimo lyOmuwa li mu holokele.” 7 Nena okwa lombwele Aaron e ta ti: “Inda koshiyambelo u ka yambe eyonondjambo nefikilondjambo gokukutha po oondjo dhoye noondjo dhoshigwana. Yamba oondjambo ndhika, dhi kuthe po oondjo dhoshigwana, ngashika Omuwa a popi.”