Ulika kutya owa pandula shoka Jehova e ku pa

JEHOVA oku hole okugandja. (Jakob 1:17) Otu shi iwetele miinima ayihe mbyoka a shita. Egulu okwe li udhitha oonyothi, nevi okwe li udha niimeno yo opala. — Episalomi 65:12, 13; 147:7, 8; 148:3, 4.

Omunyoli gumwe gwEpisalomi 104 okwa li a pandula Jehova noonkondo omolwiinima ayihe a shita. Shika oshe mu inyengitha a nyole ehambelelondjimbo. Uuna to lesha episalomi ndyoka, mbela nangoye oho kala wa pandula ngaashi ye? Okwa ti: “Onda hala okwiimbila Omuwa omasiku gandje agehe; onda hala okuhambelela Kalunga kandje, manga ndi na omwenyo.” (Episalomi 104:33) Mbela nangoye osho wa hala okuninga ngawo?

OSHIHOLELWA SHA SHIGA KO SHOKUGANDJA

Jehova okwa hala natse tu kale tu hole okugandja ngaashi ye. Okwe tu pa wo omatompelo omawanawa goku shi ninga. Okwa nwetha mo omuyapostoli Paulus a nyole ngeyi: “Kumagidha aayamba yeliko lyokombanda yevi, yaa inenepeke yo yaa inekele iinima mbyoka tayi hulu po, ihe naa inekele Kalunga ngoka he tu pe iinima ayihe kee na uuluya. Ya kumagidhila okulonga uuwanawa, ya ninge aayamba yiilonga iiwanawa, haa gandja nohaa topolele yalwe momaliko gawo. Osho ngeyi otayi igongelele eliko ndyoka tali ka ninga ekankameno lya kola konakuyiwa. Nena otaa vulu okwiimonena okukalamwenyo kwashili.” — 1 Timoteus 6:17-19.

Montumwafo ye ontiyali ndjoka a nyolele Aakorinto, Paulus okwe ya yelithile kutya oye na okugandja netompelo lini. Okwa ti: “Kehe gumwe na gandje, ngaashi eiyuvo lye tali mu lombwele, hanokungungutula nenge kethiminiko. Oshoka Kalunga oku hole ngoka ta gandja nenyanyu.” (2 Aakorinto 9:7) Olye tatu kwathele ngele otu hole okugandja? Paulus okwa ti kutya otatu kwathele yakwetu moompumbwe dhawo. Ihe okwa ti wo kutya otatu ikwatha tse yene, oshoka Jehova ote tu yambeke. — 2 Aakorinto 9:11-14.

Opo nduno konima sho Paulus a popi oohapu ndhoka, okwe ya pe uumbangi wa shiga ko kutya Jehova oku hole okugandja, sho a ti: “Kalunga na hambelelwe omolwomagano ge kaage shi kutumbulwa!” (2 Aakorinto 9:15) ‘Momagano ge kaage shi kutumbulwa’ omwa kwatelwa ashihe shoka e tu pa okupitila muJesus Kristus. Kape na iitya ya gwana okuyelitha ongushu yomagano ngoka.

Ongiini tatu vulu okuulika kutya otwa pandula Jehova naJesus omolwaashihe shoka ye tu ningila notaye ke tu ningila? Omukalo gumwe, omokulongitha ethimbo lyetu, oonkondo dhetu niiniwe yetu tu longele Jehova nokukwathela aantu ooyakwetu ye mu tseye. Shika otatu vulu oku shi ninga, kutya nduno tse aayamba nenge oohepele. — 1 Ondjalulo 22:14; 29:3-5; Lukas 21:1-4.

Omikalo moka yamwe haya ambidhidha iilonga yomuuyuni awuhe

Ngaashi owala pethimbo lyomuyapostoli Paulus, oyendji kunena ohaya “pungula” oshimaliwa nenge ya tokole kutya otaya kala haya tula iimaliwa yi thike peni mokaketha kegongalo hoka ka nyolwa “Omayambidhidho gIilonga yomUuyuni Awuhe.” (1 Kor. 16:2) Omwedhi kehe, omagongalo ohaga tumine iimaliwa mbyoka koshitayimbelewa shOonzapo dhaJehova shoka hashi tonatele iilonga moshilongo shawo. Oto vulu wo okutumina omayambidhidho goye shu ukilila kehangano lyopaveta lyOonzapo dhaJehova moshilongo moka wu li. Ngele edhina lyehangano ndyoka ku li shi, ninga ekwatathano noshitayimbelewa shoka hashi tonatele iilonga moshilongo sheni. Oondjukithi dhiitayimbelewa otadhi adhika ko-www.jw.org/ng. Omayambidhidho ngoka to vulu okutuma shu ukilila ongaashi ngaka taga landula mpaka:

OMAYAMBIDHIDHO NGOKA TAGA VULU OKUTUMWA GO GENEGENE

Okutuma oshimaliwa okupitila mombaanga, nenge nokakalata kehe kombaanga. Miitayimbelewa yimwe shika otashi vulu okuningwa ko-jw.org nenge okupitila kehala lyontumba lyokointaneta.
Iimaliwa koomuma, iikwamalyenge nenge iinima yilwe yongushu. Yi tuma pamwe nontumwafo ndjoka tayi ulike kutya iimaliwa nenge iinima mbyoka oyi li omayambidhidho.

OKUGANDJA KWA LONGEKIDHWA

Kakele komagano gopashimaliwa niinima yilwe yongushu, opu na omagano galwe omuntu ta vulu okugandja a ambidhidhe iilonga yUukwaniilwa muuyuni awuhe. Omagano ngoka oga kwatela mo iinima mbyoka ya popiwa pevi. Kutya nduno owa hala okulongitha omukalo gumwe nenge omikalo dhontumba, kwatathana tango noshitayimbelewa shoka hashi tonatele iilonga moshilongo sheni, opo wu mone kutya omikalo dhini hadhi longo moshilongo sheni. Molwaashoka iitegelelwa yopaveta nosho wo oompango dhiifendela odha yooloka miilongo niilongo, oshi li nawa wu pule omayele kwaamboka ye shi iinima mbyoka, omanga inoo tokola kutya oto longitha omukalo guni.

Omakwashilipaleko: Oto vulu okugandja edhina lyopaveta ndyoka hali longithwa kehangano lyOonzapo dhaJehova moshilongo sheni, opo ehangano li thigulule omakwashilipaleko goye nenge openzela yoye.

Uumbo wombaanga: Oto vulu okupula ombaanga, opo iimaliwa yoye mbyoka yi li kokambo koye nenge yopenzela nenge mbyoka wa pungulitha uule wethimbo lyontumba, yi thigululwe po kehangano lyOonzapo dhaJehova tayi tulwa kedhina lyopaveta ndyoka hali longitha, shi ikolelela komilandu dhoombaanga moshilongo sheni.

Iipambuliko nomikuli ndhoka omuntu i indilwa komahangano gontumba nenge kepangelo (stocks and bonds): Oto vulu wu yi gandje yi li omagano nenge wu nyole sha yela kutya ngele owa si iinima mbyoka nayi gandjwe kehangano lyOonzapo dhaJehova tayi tulwa kedhina lyopaveta ndyoka hali longitha moshilongo sheni.

Etungo nenge evi: Ngele owa hala okugandja etungo nenge evi omagano, kwatathana noshitayimbelewa tango. Oshitayimbelewa otashi ka tokola ngele etungo nenge evi otali vulu okulongithwa nenge otashi ka kala hwepo oku li landitha po, sho oshimaliwa tashi ningi shomayambidhidho giilonga yomuuyuni awuhe.

Omatestamendi noondokumende dhilwe dhopaveta dhi na ko nasha netopolo lyomaliko (Wills and Trusts): Oto vulu okunyola edhina ndyoka hali longithwa kehangano lyOonzapo dhaJehova moshilongo sheni, opo ehangano li thigulule po omaliko nenge iimaliwa yoye. Ngele to longitha omukalo nguka otashi vulika wu mone uuwanawa wontumba wu na ko nasha nokunanwa iifendela.

Ehangano lyopaveta ndyoka hali longithwa kOonzapo dhaJehova moshilongo sheni otali vulu okunyolwa metestamendi nenge moondokumende dhilwe dhopaveta dhi na ko nasha netopolo lyomaliko li ga thigulule po. Ihe kali na okunyolithwa li li omutopoli gwuuthiga woye nenge omukalelipo ngoka e na uuthemba wokuungaunga netopolo lyomaliko goye.

Opo wu mone uuyelele owundji, oto vulu okukwatathana noshitayimbelewa.