Omolwashike muuyuni mu udha uutondwe? — Ombiimbeli otayi ti ngiini?

Iikundaneki olundji ohayi popi kombinga yaantu mboka haya ulike kutya oye tondathane, haya longo omiyonena omolwuutondwe, ye hole elongithonkondo lyopamihoko nosho wo iita.

• Mo 15 Novomba 2023, oshifo kundaneki shedhina The New York Times, osha ti: “Komakwatathano gopaintaneta ngashingeyi oku na uutondwe, omolwomakuyunguto ngoka ga holoka pokati ka Israeli naGaza.”

• Mo 3 Novomba 2023, Dennis Francis, omupresitende gwOshigongi shAayehe shIigwanahangano okwa ti: “Okuza ngaa mo 7 Kotoba, opwa li pwa holoka uutondwe owundji ombadhilila nosho wo elongithonkondo, shoka sha etitha ontondo.”

Uutondwe, elongithonkondo nosho wo iita kayi shi iinima iipe. Nokuli Ombiimbeli oya popya yamwe yomonakuziwa ya ti: “otaa zi iitya iilulu ya fa omaholongo” noha ya humitha komeho iita nelongithonkondo. (Episalomi 64:3; 120:7; 140:1) Nonando ongawo, Ombiimbeli otayi yelitha wo kutya uutondwe mboka tu wete kunena, owu na eityo lya simana.

Uutondwe owu li endhindhiliko lyopethimbo lyetu

Ombiimbeli otayi holola omatompelo gaali kutya omolwashike uutondwe wu li apuhe kunena.

1. 1. Oya hunganeka kombinga yethimbo ndyoka ya ti kutya “ohole yoyendji otayi ka talala.” (Mateus 24:12) Pehala lyokuulika ohole, aantu ohaya ulike iikala mbyoka hayi ningitha aantu ya kale ye tondathane. — 2 Timoteus 3:1-5.

2. 2. Uutondwe owundji mboka wu li maantu kunena, otawu ulike kutya uuyuni owa nwethwa mo kuSatana Ondiyapoli. Ombiimbeli otayi ti kutya “uuyuni auhe ou li mepangelo lyomuhindadhi.” — 1 Johannes 5:19; Ehololo 12:9, 12.

Shimwe ishewe, Ombiimbeli otayi ulike wo kutya masiku Kalunga otaka hulitha po iinima mbyoka hayi tu ningitha tu kale tu tonde yalwe. Ota ka hulitha po wo okumona iihuna, hoka kwa etithwa kuutondwe. Ombiimbeli oya uvaneka kutya:

• Kalunga “ota ka theta omahodhi agehe momeho gawo. Oko noitaku ka kala we eso, oluhodhi, [elilo] nenge uuwehame. Oshoka iikulu oya hula po.” — Ehololo 21:4.