Pombanda kolumoho: Marek M. Berezowski/Anadolu Agency via Getty Images; pevi kolumoho: Halfpoint Images/Moment via Getty Images; pokati: Zhai Yujia/China News Service/VCG via Getty Images; pombanda kolulyo: Ismail Sen/Anadolu Agency via Getty Images; pevi kolulyo: E+/taseffski/via Getty Images
KALENI MWA TONATA!
Momumvo 2023, aantu oyendji oya li ya gwililwa po — Ombiimbeli otayi ti ngiini?
Momumvo 2023, muuyuni awuhe omwa li mwa holoka iiningwanima oyindji, mbyoka tayi ulike sha yela kutya otu li momasiku ngoka Ombiimbeli tayi ga ithana ‘omasiku gahugunina.’ (2 Timoteus 3:1) Tala nkene iiningwanima yokunena ya faathana naambyoka Ombiimbeli ya ti kutya otayi ka holoka pethimbo lyetu.
Ombiimbeli nosho wo iiningwanima muuyuni
“Iita nosho wo oonkundana kombinga yiita.” — Mateus 24:6.
“Omakuyunguto ge na ko nasha niikolokosha, onkee ngaa taga ende taga indjipala miitopolwa oyindji muuyuni.”a
Tala oshitopolwa “Olye ta ka hupitha aakwashigwana?” nosho wo “Omapangelo muuyuni oga longitha oshimaliwa sha konda poodola dhaAmerika ootililiyona 2 (N$39 324 700 000 000.00) miita.”
“Omakakamo gevi koombinga noombinga.” — Markus 13:8.
“Okuza ngaa petameko lyomumvo 2023, opwa holoka omakakamo gevi ge li 13 guunene woshiyelekitho shi vulithe pu 7 muuyuni awuhe, shoka inaashi ningwa nando onale momumvo gumwe.”b
Tala oshitopolwa “Ekakamo lyevi edhigu olya dhenge Turkey naSiria.”
“Iinima iitilithi.” — Lukas 21:11.
António Guterres, amushanga gwIigwana ya Hangana, okwa ti: “Ethimbo lyepupyalo lyonkalo yombepo muuyuni olya hula; nethimbo lyepupyalweelela lyonkalo yombepo olya thikana.”c
Tala oshitopolwa “Mo 2023 omwa ndhindhilikwa onkalo yombepo ya pupyala noonkondo pethimbo lyokwene muuyuni awuhe.”
“Oondjala.” — Mateus 24:7.
“Momumvo 2023, oyendji oya li ya gwililwa po, oshoka oya li ye shi mono oshidhigu okupalutha aanegumbo yawo.”d
Tala oshitopolwa “Iita nosho wo elunduluko lyonkalo yombepo, oya ningitha iikulya yi kale ya pumba muuyuni awuhe.”
“Omathimbo omadhigu.” — 2 Timoteus 3:1.
“Muuyuni awuhe, omuntu gumwe gwomaantu yahetatu, oku na uupyakadhi wopamadhiladhilo.”e
Tala oshitopolwa “Uuvu wopamadhiladhilo maagundjuka otawu lundu pombanda.”
Oshike twa tegelela mo 2024?
Kapu na omuntu e shi kutya oshike lela tashi ka ningwa mo 2024. Ihe iiningwanima mbyoka tayi holoka muuyuni, otayi ulike kutya masiku Uukwaniilwa waKalunga nenge tu tye epangelo lyomegulu, otali ka pingena po omapangelo gopantu nokuhulitha po iinima ayihe, mbyoka hayi etele aantu ya mone iihuna noya kale ya gwililwa po. — Daniel 2:44; Ehololo 21:4.
Manga twa tegelela shoka shi ningwe, uuna twa gwililwa po, otatu vulu okupula Kalunga ekwatho. Ombiimbeli otayi ti:
“Uuna nda tila, onde ku inekela, Omuwa Omunankondoawike.” — Episalomi 56:3.
Ongiini tatu vulu okuulika kutya otwa inekela muKalunga? Otatu ku hiya wu ilonge oshindji kombinga yeuvaneko lyOmbiimbeli li na ko nasha nonakuyiwa ombwanawa. Kambadhala okukonakona natse Ombiimbeli oshali, wu mone nkene ngoye noyaandjeni tamu vulu okumona mo uuwanawa momauvaneko gOmbiimbeli.
a Momasiku 30 Kotoba 2023, Emma Beals naPeter Salisbury oya popi moshifokundaneki shedhina Foreign Affairs, ya ti: “Muuyuni mbuka wiita, oshike hashi etitha omakuyunguto giikolokosha, ngoka ge li apuhe?”
b MuMei 2023, oonkundana dho-Earthquake News, odha ti: “Momumvo 2023, omwa holoka omakakamo gevi ogendji omanene.”
c Momasiku 27 Juli 2023, amushanga gwIigwana ya Hangana, “okwa li pomutumba gu na ko nasha nonkalo yombepo.”
d Opolohalama yIikulya mUuyuni oya ti: “Iikulya oya pumba muuyuni.”
e Omasiku 10 Kotoba 2023, Ehangano lyUundjolowele mUuyuni olya popi kombinga “yEsiku lyaantu mboka ye na uuvu wopamadhiladhili muuyuni.”