Oshike tashi ka ningwa po monakuyiwa?
OMOLWASHIKE SHA SIMANA OKUMONA EYAMUKULO? Etegameno ndyoka omuntu e na shi na ko nasha nonakuyiwa otali nwetha mo eihumbato lye kunena. Pashiholelwa, mboka kaaye na naanaa etegameno lyonakuyiwa otashi vulika ya kale ye na iikala yokutya: “Tu lyeni tse tu nweni, oshoka ongula otatu si.” (1 Aakorinto 15:32) Iikala ya tya ngaaka ohayi ningitha aantu ya kale haya li nohaya nu sha pitilila noya kale ye na iimpwiyu, ihe itayi eta ombili yashili yopamadhiladhilo.
Odhoshili kutya ngele onakuyiwa oye ethelwa miikaha yaantu yo yene, itapu kala etegameno ewanawa. Ombepo, omeya nevi oya nyatekwa noonkondo inaashi monika nando onale. Uumbanda wokutila iita mbyoka tayi longitha iikondjitho yopalute nomaponokelo gopaukulo otayi indjipala noonkondo. Muuyuni auhe aantu omamiliyona omayovi oye niwe komikithi nokoluhepo. Ihe nonando ongaaka, opu na omatompelo omawanawa okukala netegameno.
Nonando aantu itaya vulu okuhunganeka shi li mondjila shi na ko nasha nonakuyiwa, Jehova Kalunga oti ipopi mwene ta ti: “Okuza kontsapo onda hunganeke mbyoka tayi ya; onalenale onda popi mbyoka tayi ka ningwa.” (Jesaja 46:10) Jehova ota ti ngiini shi na ko nasha naashoka tashi ka ningwa monakuyiwa?
Shoka Ombiimbeli tayi ti
Jehova ita ka pitika nando evi nenge iinima mbyoka yi li ko yi hanagulwe po. Dhoshili, Ombiimbeli oyu uvaneka kutya Kalunga ota ka hanagula po “mboka taya yonagula po evi.” (Ehololo 11:18) Okupitila mUukwaniilwa we nenge epangelo lye lyomegulu, Jehova ota ka opaleka ombanda yevi ndjika yu udha uukolokoshi nokweeta po onkalelo ndjoka a li a lalakanena petameko. (Genesis 1:26-31; 2:8, 9; Mateus 6:9, 10) Oovelise tadhi landula dhOmbiimbeli otadhi gandja efano lyonakuyiwa sho tadhi popi iinima mbyoka masiku tayi ka guma kehe gumwe kombanda yevi.
Episalomi 46:8, 9. “Ileni, mu tale iilonga yOMUWA. Konekeni iikumithalonga mbyoka e yi longo kombanda yevi. Ota hulitha po omalugodhi kombanda yevi alihe; ota teya omatati, ta ndonyona omagonga, niikandekitho ote yi fike po.”
Jesaja 35:5, 6. “Omeho gaaposi otaga ka tsikuluka, nomakutsi goombolo otaga ka uva ko. Oshitiningili otashi ka nuka ngomenye, nelaka lyoshikokoma otali imbi kenyanyu. Omeya otaga ka tsipuka mombuga, nomontale otamu ka tondoka omilonga.”
Jesaja 65:21, 22. “Otaa ka tunga omagumbo, opo ya kale mo yo yene. Otaa ka tsika omiviinu, opo ya lye iiyimati yadho yo yene. Itaa ka tunga omagumbo, nayalwe taa ka kala mo, nenge ya tsike sha, nayalwe taa ka lya iiyimati.”
Daniel 2:44, KB. “Pomasiku gaakwaniilwa mbeyaka Kalunga nguka komegulu ota ka dhika uukwaniilwa itaawu ka teka po sigo aluhe nepangelo lyawo itali ka gandjwa koshigwana shilwe. Ihe owo otawu ka nyanyagula notawu ka teyagula omaukwaniilwa agehe noku ga hulitha po, ihe wo wene otawu ka kala sigo aluhe.”
Johannes 5:28, 29. “Ethimbo otali ya, uuna oonakusa ayehe mboka ye li moombila, taa ka uva ewi [lyaJesus]. Oyo notaa ka za mo.”
Ehololo 21:3, 4. ‘‘Kalunga mwene ota ka kala pamwe nayo nota ka ninga Kalunga kawo. Oye ota ka theta omahodhi agehe momeho gawo. Oko noitaku ka kala we eso, oluhodhi, [elilo] nenge uuwehame. Oshoka iikulu oya hula po.”
Nkene eyamukulo lyOmbiimbeli tali eta ombili yashili yopamadhiladhilo
Petameko otashi vulika onkalo ndjoka ya popiwa metetekelo yi kale ondhigu okwiitaalwa. Ihe omauvaneko ngoka oga za kuKalunga, hakaantu. Jehova Kalunga ‘iha fundju.’—Titus 1:2.
Ngele owi ilongo okukala wi inekela momauvaneko gaKalunga nokukala paipango ye, oto ka kala wu na ombili yopamadhiladhilo nonando owu li moonkalo oondhigu noonkondo. Iita, oluhepo, omikithi nonokuli nomaupyakadhi ngoka hage etwa kuukulupe nenge okukala wu wete wu li pokusa, kapu na nando oshimwe shomuyo tashi kutha po ombili yoye sigo aluhe. Omolwashike? Omolwaashoka oto ka kala wu na einekelo kutya Uukwaniilwa waKalunga otawu ka hulitha po omaupyakadhi agehe ngoka.
Ongiini to vulu okukala netegameno ndyoka lyomonakuyiwa? Owu na ‘okushituluka momadhiladhilo goye’ nokukala wu shi ‘kutya ehalo lyaKalunga olini naashoka oshiwanawa nosha gwana.’ (Aaroma 12:2, yelekanitha OB-1954.) Osha yela kutya owa pumbwa uuyelele wa gwedhwa po kutya omauvaneko gOmbiimbeli oge shi okwiinekelwa. Okuninga ekonakono lya tya ngaaka oku na oshilonga. Iinima owala iishona mbyoka ho ningi monkalamwenyo yoye tayi ku etele ombili yopamadhiladhilo.
[Omathano pepandja 7, 8]
Oohapu dhaKalunga otadhi ti shike kombinga yonakuyiwa?
Jesaja 35:5
Jesaja 35:6