“Iiyimati yombepo” otayi simanekitha Kalunga

“Osho ngeyi Tate ota simanekithwa, ne ngele tamu imi iiyimati oyindji.”—JOH. 15:8.

1, 2. (a) Oompito dhokuladhipika yalwe dhini tu na? (b) Omagano geni tu na ga za kuJehova taga hwepopaleke okuvula kwetu noku mu longela?

NATU tale koonkalo mbali: Omukiintu Omukriste okwa ndhindhilike kutya omumwameme gumwe omugundjuka ota monika a fa ti ipula noshinima shontumba. Okwa ningi elongekidho opo ya ka longe pamwe naye miilonga yomomapya. Manga taya zi megumbo limwe yu uka kekwawo, omumwameme omugundjuka okwa tameke oku mu lombwela shoka tashi mu nyenyetele. Konima yethimbo, mesiku olyo tuu ndyoka omugundjuka okwa galikana, ta pandula Jehova omolwohole yomumwameme omukuluntu, oshinima shoka osho naanaa a li a pumbwa. Pompito yimwe, aaihokani oya adhika opo ya galuka koshilongo shilwe hoka ya li ye ku uvitha. Sho ya li ya yi kokatuthi kontumba, oya li taya hokololelatha iimoniwa ya nyanyukwa, omumwatate gumwe omugundjuka okwa li te ya pulakene neitulomo. Konima yoomvula dhontumba, manga a li ti ilongekidha okuya a ka tameke oshinakugwanithwa she oshipe, okwa li a dhiladhila aaihokani mboka nosho wo oonkundathana ndhoka dha li dhe mu ningitha a kale a hala okuninga omutumwa.

² Otashi vulika oonkalo ndhoka tadhi ku dhimbulukitha gumwe ngoka a li a nwetha mo onkalamwenyo yoye nenge gumwe ngoka wa li we mu nwetha mo momukalo omwaanawa. Odhoshili kutya oonkundathana dhowala hadho hadhi lundulula onkalamwenyo yomuntu, ihe esiku kehe otu na oompito okuladhipika nokutsa yalwe omukumo. Natu tye ando opwa li sha tashi ku kwathele wu hwepopaleke okuvula kwoye nomaukwatya goye, opo wu kale wu li ekwatho enene kaamwatate naamwameme nowu longithwe kuKalunga. Mbela ando itashi ka kala oshiwanawa? Dhoshili, Jehova ohe tu pe omagano, sha hala okutya, ombepo ye ondjapuki. (Luk. 11:13) Sho ombepo yaKalunga tayi longo monkalamwenyo yetu, otayi imike mutse omaukwatya omawanawa ngoka taga humitha komeho iilonga yetu ayihe yokulongela Kalunga. Omagano ngaka kage shi tuu omawanawa!—Lesha Aagalati 5:22, 23.

3. (a) Ongiini okukokeka “iiyimati yombepo” taku simanekitha Jehova? (b) Omapulo geni tatu ka kundathana?

³ Omaukwatya ngoka ombepo ondjapuki hayi imike mutse otagu ulike kutya Onzo yombepo ndjoka, Jehova Kalunga, naye oku na omaukwatya ngoka. (Kol. 3:9, 10) Jesus okwa li a popi etompelo lya simana kutya omolwashike Aakriste ye na okukambadhala ya holele Kalunga sho a lombwele aayapostoli ye a ti: “Osho ngeyi Tate ota simanekithwa, ne ngele tamu imi iiyimati oyindji.”a (Joh. 15:8) Ngele tatu imike “iiyimati yombepo,” iizemo ohayi imonikila momukalo gwetu gwokupopya nomiilonga; naashika ohashi simanekitha Kalunga ketu. (Mat. 5:16) Omomikalo dhini iiyimati yombepo ya yooloka ko komaukwatya guuyuni waSatana? Ongiini tatu vulu okukokeka iiyimati yombepo? Omolwashike tashi vulika tu mone shi li eshongo oku shi ninga? Otatu ka tala omapulo ngaka sho tatu kundathana oombinga ndatu dhotango dhiiyimati yombepo mbika ngaashi: ohole, enyanyu nosho wo ombili.

Ohole ya kankamena kekotampango lya dhenga mbanda

4. Ohole yoludhi luni Jesus a longo aalanduli ye ya tule miilonga?

⁴ Ohole ndjoka hayi imikwa kombepo ondjapuki oya yooloka ko thiluthilu kohole ndjoka yi li apuhe muuyuni. Ngiini mbela? Oya kankamena kekotampango lya dhenga mbanda. Jesus okwa li a tsu omuthindo eyooloko ndika mEuvitho lyokOndundu. (Lesha Mateus 5:43-48.) Okwa li a mono kutya nokuli naalunde otaye ku ungaunga nayalwe ngaashi yalwe hayu ungaunga nayo. “Ohole” ya tya ngaaka inayi kwatela mo eiyambo lyolela, ihe oya kwatela mo owala okuningila omuntu uuwanawa mboka e ku ningila. Ngele otwa hala ‘okuninga aana yaTate yetu yomegulu,’ otu na okukala twa yooloka ko kuuyuni. Pehala lyokuungaunga nayalwe ngaashi tayu ungaunga natse, otu na oku ya tala ko nokuungaunga nayo ngaashi Jehova he ya tala ko nohu ungaunga nayo. Ihe ongiini tashi wapa tu kale tu hole aatondi yetu, ngaashi Jesus e tu lombwela?

5. Ongiini tatu vulu okuulukila ohole mboka haye tu tidhagana?

⁵ Tala koshiholelwa shimwe shOmbiimbeli. Paulus naSilas sho ya li tayu uvitha muFilippi, oya li ya kwatwa po e taya dhengagulwa noye edhililwa mondholongo moka ya li ya tulwa meti. Pethimbo opo tuu mpoka, otashi vulika ya li wo ya ningwa nayi komulangeli. Sho ya li ya mangululwa inaaye shi tegelela omolwekakamo lyevi, omiyelo dhondholongo e tadhi eguluka, mbela oya li ye wete ya mona ompito ombwanawa okugalulila omulumentu ngoka uuwinayi? Hasho nando. Okunakonasha kwawo nonkalonawa ye, sha hala okutya, ohole yawo yeiyambo oya li ye yi inyengitha ya katuke neendelelo ye mu kwathele opo ye shi ninge tashi wapa kuye nokuukwanegumbo we auhe ya ninge ooitaali. (Iil. 16:19-34) Aamwatate oyendji kunena ohaya landula omukalo gwa faathana ‘gwokuyambeka mboka taye ya tidhagana.’—Rom. 12:14.

6. Omomikalo dhini tatu vulu okuulukila aamwatate ohole yeiyambo mwene? (Tala oshimpungu pepandja 25.)

⁶ Ohole yetu yokuhola ooitaali ooyakwetu oya kwatela mo oshindji. “Ano natse wo otu na okuhupula oomwenyo dhetu omolwooyakwetu.” (Lesha 1 Johannes 3:16-18.) Ihe nando ongaaka, olundji ohatu vulu okuulika nokuli ohole nomiinima iishona. Pashiholelwa, ngele otwa popi sha nenge twa ningi sha shoka tashi yemateke omumwatate, otatu vulu okuulika ohole moku mu pa ombili. (Mat. 5:23, 24) Ongiini ngele gumwe okwe tu yemateka? Mbela ohatu ‘dhimine po’ yalwe nenge omathimbo gamwe ohatu ya kwatele onkone? (Eps. 86:5) Ohole yomuule ndjoka hayi imikwa kombepo ondjapuki otayi vulu oku tu kwathela tu siikile omayono omashona, sha hala okutya, tu dhimine po yalwe ‘ngashika Omuwa he tu dhimine po.’—Kol. 3:13, 14; 1 Pet. 4:8.

7, 8. (a) Ongiini ohole yokuhola aantu ya pambathana nohole yokuhola Kalunga? (b) Ongiini tatu vulu okukokeka ohole yetu yokuhola Jehova? (Tala ethano ndyoka li li pepandja 23.)

⁷ Ongiini tatu vulu okukokeka ohole yeiyambo mwene yokuhola aamwatate? Omokukokeka ohole yetu yokuhola Kalunga. (Ef. 5:1, 2; 1 Joh. 4:9-11, 20, 21) Ethimbo ndyoka hatu longitha paumwene mokulesha Ombiimbeli, mokutedhatedha nomokugalikana, kungawo, otatu kokeke ohole yetu yokuhola Tate yetu yomegulu. Onkee ano, otwa pumbwa okukonga ethimbo lyokuhedha popepi naKalunga.

⁸ Oku shi thaneka: Natu tye ando osha li tashi wapa okulesha Oohapu dhaKalunga, okutedhatedha kudho nokugalikana kuJehova owala powili yontumba esiku kehe. Mbela ando ito ka kwata nawa ethimbo ndyoka opo kaapu kale sha tashi piyaganeke ethimbo lyoye ndyoka ho longitha okupopya naJehova? Dhoshili, kapu na gumwe ta vulu oku tu keelela tu popye naKalunga megalikano, noyendji yomutse ohatu vulu okulesha Ombiimbeli ethimbo kehe twa hala. Onkee ano, otashi vulika twa pumbwa okukatuka onkatu meendelelo opo tu yande omaipyakidhilo gakehe esiku kaage tu imbe okuninga iinima yopambepo. Mbela oho longitha nawa ethimbo ngaashi tashi vulika kehe esiku opo wu hedhe popepi naJehova?

‘Enyanyu lyomombepo ondjapuki’

9. Ombepo ondjapuki ohayi tu kwathele tu kale nenyanyu lya tya ngiini?

⁹ Uukwatya uundhindhilikwedhi wiiyimati yombepo otawu kalelele mutse nonando opu na omaupyakadhi. Enyanyu ndyoka li li uukwatya uutiyali mboka tatu ka tala ngashingeyi, oli li oshiholelwa shimwe shoka tashi koleke uushili mboka. Enyanyu olya fa oshimeno shoka hashi kala sha ziza nawa nokuli nonando oshi li momudhingoloko kaagu li nawa niimeno. Oyendji yomaapiya yaKalunga kombanda yevi oya ‘taamba ko oohapu dhaKalunga nenyanyu lyomombepo ondjapuki.’ (1 Tes. 1:6) Yamwe oya taalelwa komaupyakadhi noluhepo. Ihe Jevoha ote ya nkondopaleke nombepo ye opo yi ‘idhidhimikile ashihe shoka tashi ya adha’ nenyanyu. (Kol. 1:11) Enyanyu ndyoka ohali etwa koshike?

10. Enyanyu lyetu ohali zi peni?

¹⁰ Eliko lyopambepo ndyoka Jehova e tu pa oli na ongushu tayi kalelele, inali fa “iinima tayi hulu po” yuuyuni waSatana. (1 Tim. 6:17; Mat. 6:19, 20) Oku tu nine etegameno linyanyudha lyonakuyiwa kaayi na ehulilo. Otwa nyanyukwa okukala oshitopolwa shuumwayinathana wopaKriste muuyuni auhe. Komeho gaayihe, enyanyu lyetu olya kankamena kekwatathano lyetu naKalunga. Otu uvite ngaashi David ngoka nonando okwa li ngaashi ontauki, okwa li a tanga Jehova meimbilo ta ti: “Okusilwa ohenda kungoye oku vulile ndje okukala nomufudho, notandi ke ku simaneka. Onda hala oku ku hambelela, manga ndi na omwenyo.” (Ps. 63:3, 4) Nokuli nuuna tu li muudhigu, omitima dhetu ohadhi kala tadhi tanga Kalunga nenyanyu.

11. Omolwashike sha simana okulongela Kalunga nenyanyu?

¹¹ Omuyapostoli Paulus okwa ladhipika Aakriste a ti: “Kaleni aluhe mwa nyanyukwa mokukala mOmuwa. Otandi shi tumbula natango: nyanyukweni!” (Fil. 4:4) Omolwashike sha simana kAakriste ya longele Jehova nenyanyu? Omolwompata ndjoka ya penduthwa kuSatana yi na ko nasha nuunamapangelo waJehova. Satana okwa ti kutya kapu na ngoka ta vulu okulongela Kalunga tashi zi komutima. (Job 1:9-11) Ngele otatu longele Jehova nuudhiginini, ihe inatu nyanyukwa, omayambohambelelo getu itaga ka kala ge mu opalela. Onkee ano, otatu kambadhala okupulakena kekumagidho lyomupisalomi ndyoka tali ti: “Longeleni OMUWA nenyanyu; ileni koshipala she mwa nyanyukwa!” (Eps. 100:2) Iilonga tayi longwa nenyanyu notashi zi komutima, otayi simanekitha Kalunga.

12, 13. Oshike tatu vulu okuninga opo tu kondjithe omaiyuvo omawinayi?

¹² Dhoshili, nokuli aapiya yaJehova mboka ye mu igandjela omathimbo gamwe ohaya kala ya teka omukumo nohaya kala kaaye na we etaloko ewanawa. (Fil. 2:25-30) Oshike tashi vulu oku tu kwathela pomathimbo ga tya ngaaka? Aaefeso 5:18, 19 otaya ti: “Udheni Ombepo Ondjapuki. Hokololelathaneni oohapu dhomapisalomi, omaimbilo noondjimbo oondjapuki dhopambepo. Imbileni Omuwa omaimbilo nomapisalomi, mu simanekeni momitima dheni.” Ongiini tatu vulu okutula miilonga omayele ngoka?

¹³ Uuna twa gwililwa po komaiyuvo omawinayi, otatu vulu okupula Kalunga megalikano nokukambadhala tu tedhatedhe kiinima mbyoka ya gwana okusimanekwa. (Lesha Aafilippi 4:6-9.) Yamwe oya mona kutya okwiizizima pevi omaimbilo gUukwaniilwa ya landula ongowela ohashi ya kwathele ya dhiladhile iinima iiwanawa nohashi kwathele omadhiladhilo gawo kaaga falafalwe. Omumwatate ngoka a li monkalo ndjoka ya li ye mu uvitha nayi noye mu teya omukumo okwa ti: “Onda li handi galikana aluhe tashi zi komutima, nonda li ndi ilonga momutse omaimbilo gUukwaniilwa omashona. Okwiimba omaimbilo ngaka omawanawa taga tanga Jehova kutya nduno omuule nenge omomutima, osha li she etele ndje ombili yokomutima. Natango embo Hedha popepi naJehova olya li lya piti pethimbo mpoka. Onda li nde li lesha iikando iyali momumvo gwa landula ko. Osha li sha fa omuti ngoka tagu talaleke omutima gwandje. Ondi shi shi kutya Jehova okwa yambeka oonkambadhala dhandje.”

‘Ombili ndjoka tayi mu mangele kumwe’

14. Ombepo ondjapuki ohayi tu kwathele tu kale nombili ondhindhilikwedhi yini?

¹⁴ Piigongi yetu yopashigwana, aatumwakalelipo ya za momaputuko gi ili nogi ili ohaya nyanyukilwa eendathano naamwatate naamwameme. Oshinima sha tya ngaaka ohashi ulike uukwatya wombili mboka hawu nyanyukilwa kaapiya yaKalunga kunena muukumwe wetu womuuyuni auhe. Olundji aatali ohaya kala ya kumwa uuna taya mono aantu mboka ya tegelela ya kale ye tondothane taya ‘ningi ashihe shoka taya vulu okukoleka uukumwe wawo womombepo ondjapuki omolwombili ndjoka tayi ya mangele kumwe.’ (Ef. 4:3) Uukumwe mbuka owu li shili oshinima oshindhindhilikwedhi mokutala koonkalo moka aapiya yaJehova oyendji ya li.

15, 16. (a) Petrus okwa li gwomeputoko lini, nongiini shoka sha li eshongo kuye? (b) Ongiini Jehova a li a kwathele Petrus a lundulule iikala ye?

¹⁵ Okuhanganitha aantu ya za momaputuko gi ili nogi ili oshi li eshongo. Opo tu kwathelwe tu mone uuyelele waashoka tu na okuninga tu adhe uukumwe mboka, natu konakoneni oshiholelwa shomethelemumvo lyotango shomuyapostoli Petrus. Iikala ye yi na ko nasha nAajuda mboka inaaya pita etanda oya li ya ndhindhilikwa moohapu dhe sho a ti: “Omu shi shi ne yene kutya elongelokalunga lyopaJuda itali mu pitika nando, Omujuda a talele po nenge e endathane nomupagani. Ihe Kalunga oku ulukile ndje kutya itandi vulu nando okutala omuntu gwontumba e na oshidhila nenge a nyata.” (Iil. 10:24-29; 11:1-3) Otashi vulika a li a taamba ko etaloko ndyoka lya li ko apuhe pethimbo mpoka kutya Ompango oya ti kutya omuntu oku na owala okukala e hole Aajuda ooyakwawo. Otashi vulika a li e shi tala ko kutya oshi li nawa kuye okutala ko mboka kaaye shi Aajuda ye li aatondi.b

¹⁶ Dhiladhila owala nkene Petrus a li u uvite kee na oshilonga sho ta yi megumbo lyaKornelius. Mbela omuntu ngoka a li e tonde mboka kaaye shi Aajuda ota vulu ngaa ‘okukwatathana kumwe’ nayo “omolwombili ndjoka tayi ya mangele kumwe”? (Ef. 4:3, 16) Eeno, omasiku omashona komeho gaashoka, ombepo ondjapuki yaKalunga oya li ya patulula omutima gwaPetrus noye mu ningitha a vule okutameka okulundulula iikala ye noku ethe po okayoya. Jehova Kalunga okwa li a yelithile Petrus memoniko kutya Ye iha tala ko aantu shi ikolelela komuhoko gwawo nenge kuukwashigwana. (Iil. 10:10-15) Onkee ano, Petrus okwa li a vulu okulombwela Kornelius a ti: “Ngame ngashingeyi onde shi tseya kutya Kalunga aantu ayehe ohe ya tala ye thike pamwe. Ngoka he mu tila noha longo shoka shu uka, Kalunga ote mu taamba, na kale ogwomoshigwana sha tya ngiini.” (Iil 10:34, 35) Petrus okwa li a lundulula etaloko lye nokwa hangana shili ‘nuumwayinathana.’—1 Pet. 2:17, NW.

17. Ongiini uukumwe mboka hawu nyanyukilwa koshigwana shaKalunga uundhindhilikwedhi?

¹⁷ Oshimoniwa shaPetrus oshe tu kwathela tu kale tu uvite ko omalunduluko omanene ngoka haga ningwa mokati koshigwana shaJehova kunena. (Lesha Jesaja 2:3, 4.) Aantu omamiliyona ya za ‘momihoko adhihe, momaludhi agehe, miigwana ayihe nomomalaka agehe’ oya lundulula okudhiladhila kwawo e taya tsu kumwe ‘nehalo lyaKalunga naashoka oshiwanawa, she mu opalela nosha gwana.’ (Eh. 7:9; Rom. 12:2) Oyendji yomwaambaka omathimbo gamwe oya li ya nwethwa mo kuutondwe noketopauko lyuuyuni waSatana. Ihe okupitila mokukonakona Oohapu dhaKalunga nokekwatho lyombepo ondjapuki, oyi ilongo ‘okulalakanena ayihe mbyoka tayi ya kaleke ye na ombili.’ (Rom. 14:19) Uukumwe otawu simanekitha Kalunga.

18, 19. (a) Ongiini kehe gumwe gwomutse ta vulu okukaleka po ombili nuukumwe megongalo? (b) Oshike tatu ka kundathana moshitopolwa tashi landula?

¹⁸ Ongiini kehe gumwe gwomutse ta vulu okuhumitha komeho ombili nuukumwe mboka wu li mokati koshigwana shaKalunga? Momagongalo getu ogendji omu na mboka ya tembukila mo okuza kiilongo yilwe. Otashi vulika yamwe ye na omikalondjigilile inaadhi fa dhetu nenge tashi vulika ihaaya popi elaka lyetu nawa. Mbela ohatu kambadhala ngaa tu tseyathane nayo? Shika osho Oohapu dhaKalunga tadhi popi. Paulus sho a li a nyolele kegongalo lyaRoma moka mwa li mu na ooitaali Aajuda naamboka kaaye shi Aajuda, okwa ti: “Taambathaneni ano, ngaashi Kristus e mú taamba, opo mú simaneke Kalunga.” (Rom. 15:7) Mbela megongalo lyeni omu na gumwe ngoka tashi vulika wa hala wu tseye nawa?

¹⁹ Oshike ishewe tatu vulu okuninga opo tu ethe ombepo ondjapuki yi longe monkalamwenyo yetu? Oshitopolwa tashi landula otashi ka kundathana epulo ndika sho tatu kundathana oombinga dhiiyimati yombepo ndhoka dha hupa ko.

[Omanyolo gopevi]

Oto yamukula ngiini?

• Ongiini tatu vulu okuulukila aamwatate ohole yeiyambo mwene?

• Omolwashike sha simana tu longele Jehova nenyanyu?

• Ongiini tatu vulu okuhumitha komeho ombili nuukumwe megongalo?

[Oshimpungu pepandja 25]

“Mbaka oyo Aakriste yashili”

Embo Between Resistance and Martyrdom—Jehovah’s Witnesses in the Third Reich otali popi kombinga yomatyekosha gomunandholongo gumwe omugundjuka Omujuda, ngoka ta hokolola oshikando she shotango a tsakanena nOonzapo dhaJehova konima yokuthika kwe mokamba yoonkwatwa muNeuengamme tali ti:

“Nziya sho tse Aajuda twa thiki moshitopolwa shimwe shokamba okuza kuDachau, Aajuda yalwe oya li ya tameke okuholeka kehe shimwe ya li ye na opo kaatu shi longithe. . . . Tse mboka kaatwa li [mokamba yoonkwatwa], otwa li hatu kwathelathana. Ihe mboka ya li mokamba, oya li ye li monkalo tayi ti omwenyo nenge eso, kehe gumwe okwa li owala hi idhiladhila ye mwene, ye ta dhimbwa yakwawo. Ihe dhiladhila owala shoka aailongi yOmbiimbeli ya li ya ningi. Pethimbo mpoka, oya li ya longo nuudhiginini mokupangela ominino dhomeya. Okwa li kwa talala noonkondo noya li ya thikama esiku alihe momeya ga ninga iikangwa. Kapwa li ngoka a li u uvite ko kutya oshike sha li hashi ya kwathele yi idhidhimikile onkalo ya tya ngaaka. Oya ti kutya Jehova okwe ya nkondopaleke. Oya li ya pumbwa lela iikulya ngaashi naanaa tse, molwaashoka oya li ya sa ondjala. Ihe oshike ya li ya ningi po? Oya li ya gongele iikulya ayihe mbyoka ya li ye na e taye yi itopolele nAakriste ooyakwawo mboka ya adhika owala opo ya thiki okuza kokamba yaDachau. Oya li ye ya hambelele noye ya thipi komilungu. Manga inaaya tameka okulya, oya galikana. Konima yaashono, ayehe oya li ya kuta noya nyanyukwa. Oya ti kutya kaya li we ya sa ondjala. Shoka osho sha li sha dhiladhilitha ndje kutya: Mbaka oyo Aakriste yashili.”

[Omathano pepandja 23]

Mbela oho kongo ompito esiku kehe opo wu vule okuhedha popepi naJehova?