Nkene to vulu okumona uuwanawa mongundu yeni yomomapya
1. Uuwanawa wuni twa li hatu mono pEkonakono lyEmbo lyEgongalo tatu vulu okumona natango mongundu yetu yiilonga yomomapya?
1 Mbela owa yuulukwa iinima yimwe mbyoka ya li hayi ningwa pEkonakono lyEmbo lyEgongalo? Oongundu odha li oonshona nawa naantu oya li haya kala ya manguluka nawa. Shika osha li she shi ninga oshipu okupanga uukuume nayalwe nosha li tashi tu kwathele tu koleke eitaalo lyetu. (Omayel. 18:24) Omutonateli gwekonakono lyembo okwa li e shi oonkalo dhetu nokwa li ha vulu okuladhipika ayehe pauhandimwe. (Omayel. 27:23; 1 Pet. 5:2, 3) Uuwanawa mbuka otatu vulu oku wu mona natango mongundu yetu yiilonga yomomapya.
2. Ongiini tatu vulu okukatuka tango onkatu tu pange uukuume naantu yomongundu yetu yiilonga yomomapya mboka ye li ekwatho kutse?
2 Katuka onkatu tango: Aantu mboka haya kala pongundu yiilonga yomomapya oye thike owala pwaamboka ya li haya kala pongundu yekonakono lyembo. Uuna tatu longo muukalele nayalwe tu na “elalakano limwe alike,” otatu vulu okupanga uukuume wopothingo nayo. (Fil. 1:27) Yangapi wa longa nayo mongundu yeni? Mbela oto vulu oku ye ‘egululila omutima gwoye’ moshinima shika? (2 Kor. 6:13) Oshikwawo, otatu vulu okuhiya yamwe yomongundu yetu ya kale po pEsiku lyElongelokalunga lyetu nenge ye ye ya lye pamwe natse. Momagongalo gamwe oongundu dhiilonga yomomapya ohadhi ningi omalufo okutelekela omupopi ngoka ta talele po egongalo. Omathimbo gamwe ongundu ohayi gongala pamwe okulya sha nokutsaathana omukumo nonando omupopi ke po.
3. Oompito dhini dhi li po dhokuninga omatalelopo guusita mongundu yeni yiilonga yomomapya?
3 Nonando egongalo ngashingeyi ohali gongala owala lwaali koshiwike, shika itashi ti kutya aauvithi kaye na okumona omatalelopo guusita ngaashi shito. Omutonateli gwongundu okwa langekwa po mongundu kehe a ladhipike ayehe pauhandimwe noku ya dheulila uukalele. Ngele omutonateli gwongundu yeni ina ninga natango oshilage mu longe pamwe naye muukalele, omolwashike itoo mu pula mu longe pamwe? Oshikwawo, omutonateli gwiilonga oku na okulonga muukalele noongundu dha yoolokathana lumwe moshiwike omwedhi kehe. Momagongalo moka mu na oongundu dhiilonga yomomapya oonshona, omutonateli gwiilonga ota vulu okulongekidha a kale ha talele po ongundu kehe lwaali momumvo. Mbela owi ilongekidha okuya muukalele uuna ta talele po ongundu yeni?
4. (a) Elongekidho lyiilonga yomomapya oli na okuunganekwa ngiini? (b) Omolwashike tu na okukala hatu gandja omagumbo getu mu kale hamu ningilwa elongekidho lyiilonga yomomapya?
4 Olundji ohashi kala nawa ngele momahuliloshiwike ongundu kehe ohayi ningi elongekidho lyayo yene lyiilonga yomomapya. Okukala mu na omahala ogendji mpoka hamu tsakanene omolwiilonga yomomapya otashi ka kala oshipu kaauvithi okuthika pethimbo hoka hamu ningile elongekidho nosho wo koshitopolwa hoka taku longwa. Aauvithi otaya vulu okuunganekwa nziya nokuya koshitopolwa nokaapu na okukwatakwata. Otashi ka kala wo oshipu komutonateli gwongundu okugandja eitulomo kaauvithi mboka ye li mongundu ye. Ihe otashi vulika pu holoke oonkalo moka oongundu mbali nenge dhi vulithe po dha pumbwa okwiimbwanga mumwe. Ngele egongalo alihe ohali tsakanene omolwiilonga yomomapya mOlyomakaya yotango yomwedhi nenge konima yEkonakono lyOshungolangelo, olundji ohashi kala shi li nawa ongundu kehe yi ikuutumbile, nomutonateli gwongundu kehe na topole aantu manga elongekidho lyiilonga inaali hula negalikano. — Tala oshimpungu “Mbela egumbo lyoye otali vulu okulongithwa?”
5. Nonando Ekonakono lyEmbo lyEgongalo kali po we, otatu vulu okukala tu na einekelo lini?
5 Nonando Ekonakono lyEmbo lyEgongalo kali po we, Jehova onkene ngaa te tu pe kehe shimwe shoka twa pumbwa, opo tu vule okulonga ehalo lye. (Heb. 13:20, 21) Uuna Jehova oye te tu sile oshimpwiyu, itatu ka pumbwa sha. (Eps. 23:1) Ngele ohatu kala pelongekidho lyiilonga yomomapya, Jehova ote ke tu laleka nuuyamba. Uuna tatu katuka tango onkatu e tatu “kunu ombuto oyindji,” otatu ka “teya oshindji.” — 2 Kor. 9:6.
[Oshimpungu pepandja 6]
Mbela egumbo lyoye otali vulu okulongithwa?
Omagongalo gamwe ohaga mbwanga mumwe oongundu dhago dhiilonga yomomapya momahuliloshiwike, molwaashoka kapu na omagumbo ga gwana mpoka tadhi kala hadhi gongalele. Elongekidho lyiilonga yomomapya oli li oshitopolwa shomakugongala gegongalo, onkee ano, oshi li uuthembahenda ngele ohali ningilwa maandjeni. Mbela egumbo lyoye otali vulu okulongithwa? Ino tya kutya itali vulu okulongithwa, molwaashoka to dhiladhila kutya itali opalele. Nale aakuluntugongalo ngele taya hogolola egumbo moka tamu kala hamu ningilwa ekonakono lyembo, oya li haya tala kutya olya gama peni nosho wo kiinima yilwe. Ngele owa hala egumbo lyoye li kale hali ningilwa elongekidho lyiilonga yomomapya, tseyithila omutonateli gwongundu yeni.