Iileshomwa moka mwa za omayamukulo gomapulo ngoka ge li mOkafo Onkalamwenyo yopaKriste niilonga yetu yokuuvitha
6-12 FEBULUALI
OMALIKO OKUZA MOOHAPU DHAKALUNGA | JESAJA 47–51
“Okuvulika kuJehova ohaku eta omalaleko nuuyamba”
(Jesaja 48:17) Kalunga kaIsraeli omuyapuki, Omuwa omukulili gwoye ota ti: “Ongame Omuwa Kalunga koye, ngoka tii ku longele shoka she ku opalela noku ku ulukila ondjila u na okweenda nayo.
ip-2-E ep. 131, okat. 18
Jehova ohe tu longo omolwuuwanawa wetu
‘Pulakena shili iipango yandje’
18 Omupolofeti ngoka a li a nwethwa mo kombepo yaJehova okwa po pi a ti: “(Ngashingeyi Omuwa Omupangeliawike okwa tumu ndje pamwe nOmbepo ye.) Shoka Kalunga a nunina Israel Kalunga kaIsrael omuyapuki, Omuwa omukulili gwoye ota ti: ‘Ongame Omuwa Kalunga koye, ngoka tii ku longele shoka she ku opalela noku ku ulukila ondjila u na okweenda nayo.’” (Jesaja 48:16b, 17) Oohapu ndhika otadhi ulike kutya Jehova oku na ko nasha naantu, nodha li dha shilipaleke oshigwana shaIsraeli shoka Kalunga a li ta ka tembudha mo muBabilonia. Oye Omukulili gwasho. (Jesaja 54:5) Jehova okwa hala Aaisraeli ya kale ye na ishewe ekwatathano naye nokuvulika kiipango ye. Elongelokalunga lyashili oli ikolelela kokuvulika komalombwelo gaKalunga. Aaisraeli itaya vulu okulonga shoka shi li mondjila, shila ongele owala ya longwa ‘ondjila ndjoka ye na okweenda nayo.’
(Jesaja 48:18) Ando to pulakene shili iipango yandje, andola omayambeko otage ku kungulukile ga fa omulonga tagu tondoka omeya, nuuyuuki otau tondokele kungoye wa fa omakuthikuthi gomefuta.
ip-2-E ep. 131, okat. 19
Jehova ohe tu longo omolwuuwanawa wetu
19 Jehova okwa hala oshigwana she shi yande uupyakadhi noshinyanyukilwe onkalamwenyo sho a popi a ti: “Ando to pulakene shili iipango yandje, andola omayambeko otage ku kungulukile ga fa omulonga tagu tondoka omeya, nuuyuuki otau tondokele kungoye wa fa omakuthikuthi gomefuta.” (Jesaja 48:18) Kashi shi tuu oshinima shopahole shoka Omushiti gwetu omunankondoadhihe a hala tu ninge! (Deuteronomium 5:29; Episalomi 81:14) Pehala Aaisraeli ya ye muupongekwa, otaya vulu okukala nombili ndjoka ya fa omeya taga tondoka momulonga. (Episalomi 119:165) Iilonga yawo yuuyuuki otayi ka kala ya fa omakuthikuthi ogendjigendji gomefuta. (Amos 5:24) Molwaashoka Jehova oye lela a li e na ko nasha noshigwana shAaisreali, okwa li e shi ulukile pahole ondjila ndjoka shi na okweenda nayo. Andola osha li tashi pulakene kuye!
(Jesaja 48:19) Oluvalo lwoye otalu indjipala lwa fa omawe gehekevi, naamwoye ongoomuma tadhi nyenge okuyalulwa. Edhina lyawo itali ka kana, itandi ke ya hanagula po.”
ip-2-E ep. 132, okat. 20-21
Jehova ohe tu longo omolwuuwanawa wetu
20 Omalaleko nuuyamba geni Aaisraeli taya ka mona ngele oyi itedhulula? Jehova ota ti: “Oluvalo lwoye otalu indjipala lwa fa omawe gehekevi, naamwoye ongoomuma tadhi nyenge okuyalulwa. Edhina lyawo itali ka kana, itandi ke ya hanagula po.” (Jesaja 48:19) Jehova ota dhimbulukitha aantu kombinga yeuvaneko lyoluvalo lwaAbrahama kutya otalu ka ninga olundji lwafa, “omawe gehekevi.” (Genesis 22:17; 32:12) Nonando oongawo, oluvalo lwaAbraham olwa kala olunashipotha, noka lwa li we talu vulu okugwanithilwa euvaneko ndyoka. Oshigwana shoka osha kala nokulonga iilonga iiwinayi nosha li shi na okuhanagulwa po shi ikolelela kOmpango yaJehova. (Deuteronomium 28:45) Ihe Jehova ina hala oshigwana she shi hanagulwe po, noina hala oku shi thiga po thiluthilu.
21 Omakotampango ngoka ge li metumwalaka ndyoka li na oonkondo otaga longo wo nokaalongeli yaJehova kunena. Jehova oye Onzo yomwenyo, noku shi nawa nkene tu na okulongitha onkalamwenyo yetu e vule kehe gumwe. (Episalomi 36:9) Okwe tu pa omilandu ndhoka tu na okulandula, ine shi ninga opo tu kale inaatu nyanyukwa, ihe oshi tu etele uuwanawa. Aakriste yashili ohaya ningi omatokolo gi ili nogi ili, ihe ohaya pula tango ekwatho kuJehova. (Mika 4:2) Omakotampango ge ohage tu gamene pambepo nosho wo ekwatathano lyetu naye, nohage tu gamene kaatu nwethwe mo kiilonga iiwinayi yaSatana. Uuna tatu ulike olupandu lwetu lu na ko nasha nomithikampango dhaKalunga, ohatu mono kutya Jehova ohe tu longo omolwuuwanawa wetu. Ohatu shi mono kutya “iipango ye kayi shi iidhigu kutse.” Onkee itatu ka hanagulwa po. — 1 Johannes 2:17; 5:3.
Konga omaliko gopambepo
(Jesaja 49:6) Omuwa okwa lombwele ndje a ti: “Ngoye omupiya gwandje, inashi ku gwanena, nge to galula owala omazimo gaJakob noto eta ko oonakuhupa yaIsrael. Otandi ku ningi uuyelele waapagani, ehupitho lyandje opo li thike nokooha dhuuyuni.”
Omanenedhiladhilo okuza membo lyaJesaja
49:6 — Ongiini Mesiasa e li “uuyelele waapagani” nonando sho a li kombanda yevi okwa li owala u uvithile oyanamati yaIsraeli? Shika osho shi li ngaaka omolwiilonga mbyoka ya li ya longwa kaalongwa ye konima yeso lye. Ombiimbeli otayi ulike kutya Jesaja 49:6 ota popi wo shi na ko nasha naalongwa ye. (Iilonga 13:46, 47) Nena Aakriste aagwayekwa mboka taya kwathelwa kongundu onene ndjoka tayi longele Kalunga oye li “uuyelele waapagani,” molwaashoka otaya gandja uuyelele kaantu sigo ‘okooha dhuuyuni.’ — Mateus 24:14; 28:19, 20.
(Jesaja 50:1) Omuwa ota ti: “Otamu dhiladhila nda tidha po aantu yandje, ya ye ngaashi omulumentu ta henge po omukadhi? Ngele osho, ombapila yehengano oyi li peni? Otamu dhiladhila nde mu landitha po muupika nda fa omuntu ta landitha po oyana, ya ninge aapika? Aawe, omwa yi muupongekwa omolwoondjo dheni yene; omwa tidhwa po molwomayono geni.
it-1-E ep. 643, okat. 4-5
Ehengathano
Ehengathano lyopathaneko. Ekwatathano lyopandjokana olya popiwa pathaneko mOmbiimbeli. (Jes 54:1, 5, 6; 62:1-6) Omwa popiwa wo ehengathano lyopathaneko, nenge okutidhwa po kwomukulukadhi. — Jer 3:8.
Uukwaniilwa waJuda owa li wu umbwa koshipundi, naJerusalem osha li sha hanagulwa po momumvo 607 K.E.N., naakalimo yasho oya li ya falwa muupongekwa muBabilonia. Muule womimvo dhontumba manga oshinima shoka inaashi ningwa, Jehova okwa li a hunganeke a lombwele Aajuda mboka yali taya ka kala muupongekwa a ti: “Otamu dhiladhila nda tidha po aantu yandje, ya ye ngaashi omulumentu ta henge po omukadhi? Ngele osho, ombapila yehengano oyi li peni?” (Jes 50:1) “Omukadhi” okwa li a tidhwa po, ihe hamolwaashoka Jehova a li a hulitha po ehangano lye noshigwana shaJuda nokutameka okuteya ondjokana, ihe omolwaashoka oshigwana shoka osha li sha yono ehangano ndyoka lyOmpango. Oshihupe shAaisreali osha li shi itedhulula nosha galikana opo Jehova a kale ishewe omusamane gwasho moshilongo shasho. Jehova okwa li a galulile oshigwana she mevi lyasho omolwedhina lye ngaashi u uvaneka, momumvo 537 K. E. N., konima sho sha kala muupongekwa omimvo 70. — Eps 137:1-9; tala oshitopolwa, ONDJOKANA.
Elesho lyOmbiimbeli
(Jesaja 51:12-23) Omuwa ota ti: “Ongame, eeno, ongame mwene handi mu hekeleke. Otamu vulu ngiini okukala mwa tila omuntu omusi, omuna gwomuntu, ngoka a fa omwiidhi tagu ganya? 13 Omwa dhimbwa Omuwa, omushiti gweni, ngoka a alele egulu nokwa dhike omakankameno gevi? Omolwashike tamu kala mwa tila ondjahi yaahepeki yeni, mboka ya hala ye mu yone po? Ondjahi yawo itayi mu adha we. 14 Oonkwatwa otadhi ka mangululwa mbala; otadhi ka kala kombanda yevi omimvo odhindji, otadhi ka kala niikulya dhe yi pumbwa. 15 “Ongame Omuwa Kalunga keni; otandi tukulutha efuta e tandi tutumike omakuthikuthi galyo. Edhina lyandje Omunankondoawike. 16 Onda alele egulu nonda dhike omakankameno gevi. Otandi lombwele Sion tandi ti: ‘One aantu yandje! Onde mu longo omalongo gandje notandi mu gamene noshikaha shandje.’ “ Oshitenga shondjahi yOmuwa 17 Jerusalem, penduka po! Iyelutha u yambuke po! Owa nu oshitenga shegeelo shoka Omuwa mondjahi ye e shi ku pe, u shi nwe. Owe shi tula kekothi, notashi ku tantalitha. 18 Kaku na ngoka te ku enditha, kaku na gulwe mokati kaantu yoye te ku kwatele komeho. 19 Iiponga yopaali ye ku lambele: oshilongo shoye osha mbugalekwa kiita, naantu yoye ya si po kondjala. Kape na nando ogumwe e ku uvitile ohenda. 20 Aamwoye aamati oya lala yi iyekelela poshikololo shepandaanda kehe, ya fa ohumba ya gwila mekelo. Oyu uvite ondjahi yOmuwa nomagando gaKalunga koye. 21 Pulakena kushika, muhepekwa ngoye ngoka wa kolwa, nando hakomaviinu. 22 Omuwa Kalunga koye ote ku popile nota ti: “Otandi kutha po oshitenga shoka nde ku pele mondjahi yandje. Ito ka nwa we omaviinu ngoka tage ku telaganitha. 23 Otandi ke ga nwetha mboka taye ku hepeke, mboka taye ku langitha momapandaanda notaye ku lyatagula wa fa iiyagaya.”
13-19 FEBULUALI
OMALIKO OKUZA MOOHAPU DHAKALUNGA | JESAJA 52–57
“Kristus okwa hepekwa, omolwetu”
(Jesaja 53:3-5) Okwa li a dhinwa nokwe ekelwahi kaantu, omulumentu gwomahepeko nomuvuntu. Okwa li a fa ngoka aantu ye mu isiikilile iipala yawo, yaaye mu tale. Okwa li a dhinwa, natse inatu mu simaneka nando. 4 Oshili, okwi itsike uuvu wetu, nuuwehame wetu e u humbata. Otwe mu tala a dhengwa kuKalunga, a geelwa nokwa hepekwa. 5 Ihe okwa tsuwa omolwomayono getu nokwa nyanyagulilwa oondjo dhetu. Egeelo olye mu ya, opo tu mone ombili, notwa aludhwa kiilalo ye.
Omupiya gwaJehova “okwa tsuwa omolwomayono getu”
“Okwa li a dhinwa” “noina simanekwa nando”
3 Lesha Jesaja 53:3. Dhiladhila owala kutya Omwana gwaKalunga okwa li u uvite ngiini sho a thigi po He, ngoka a kala ta longo naye nenyanyu, e te ya kombanda yevi a gandje omwenyo gwe gu li iikulila opo a hupithe aantu muulunde nomeso! (Fil. 2:5-8) Omayambo giinimwenyo ngoka gali haga yambwa kohi yOmpango yaMoses oga li owala omuzizimba gwaashoka sha li tashi ka gwanithwa po keyambo lyaJesus. (Heb. 10:1-4) Aajuda oya li andola ye na okutaambo ko Mesiasa omuuvanekwa noku mu simaneka, molwaashoka oya kala ya tegelela Mesiasa. (Joh. 6:14) Pehala lyoku taamba ko Kristus, Aajuda oya li ye mu ‘dhina’ noya li ye mu tala ‘inaa simana’ ngaashi owala Jesaja a hunganeke. Omuyapostoli Johannes okwa popi shi na ko nasha naJesus a ti: “Okwe ya kumboka yaandjawo, naamboka yaandjawo inaye mu taamba.” (Joh. 1:11) Omuyapostoli Petrus okwa li a lombwele Aajuda a ti: “Kalunga kaAbraham, kaIsak nokaJakob, oye a gandja esimano lyuukalunga komuntu gwe Jesus. One mwe mu gandja miikaha yaapangeli nomwe mu idhimbike koshipala shaPilatus, nonando Pilatus okwa li a tokola oku mu mangulula. Oye okwa li omuyapuki nomuyuuki, ihe ne omwe mu ekelehi.” — Iil. 3:13, 14.
4 Jesaja okwa li wo a hunganeke kutya Jesus ota ka kala ‘omuvuntu.’ Omathimbo gamwe, Jesus okwa li shili ha kala a vulwa sho e li muukalele, ihe kapu na uunzapo mboka tawu ulike kutya Jesus okwa li a kwatwa kuuvu nenge komukithi gwontumba. (Joh. 4:6) Ihe okwa li i igilila uuvu waantu mboka a li hu uvithile. Okwa li ha kala u uvitile aantu olukeno nokwa li a aludha aantu oyendji. (Mark 1:32-34) Kungawo, Jesus okwa li a gwanitha po ehunganeko ndyoka tali ti: “Oshili, okwi itsike uuvu wetu, nuuwehame wetu e u humbata.” — Jes. 53:4a; Mat. 8:16, 17.
A fa a “dhengwa kuKalunga”
5 Lesha Jesaja 53:4b. Aantu oyendji mboka ya li ko pethimbo lyaJesus kaya li yu uvite ko kutya omolwashike Jesus a li e na okuhepekwa nokusa. Oya li taya dhiladhila kutya Kalunga okwa geela Jesus, a fa andola te mu hepeke nomukithi gwontumba. (Mat. 27:38-44) Aajuda oya li taya lundile Jesus kutya okwa sheke Kalunga. (Mark. 14:61-64; Joh. 10:33) Ihe nonando oongawo, Jesus ka li omulunde noka li ha sheke Kalunga. Omipopyo ndhoka kutya Jesus okwa li ta ka dhipagwa molwaashoka a sheke Kalunga odhi na okukala dha li dha gwedhele ko kuuwehame we, molwaashoka Jesus okwa li e hole He noonkondo. Ihe nando ongawo, Jesus okwa li a halelela okugwanitha po ehalo lyaJehova. — Mat. 26:39.
(Jesaja 53:7, 8) Okwa hepekwa nokwa monithwa iihuna, ihe ina makula okana ke. Ongaashi onzigona tayi falwa koshidhipagelo, ongonzi tayi mwenenene omukululi gwayo, osho naye wo ina makula okana ke. 8 Okwa kuthwa po a thiminikwa nokwa pangulwa, ihe olye gwomepipi lye e shi dhiladhila? Oshoka okwa kuthwa mo mevi lyaanamwenyo; Omolwomayono goshigwana shandje okwa adhika kegeelo.
Omupiya gwaJehova “okwa tsuwa omolwomayono getu”
“Ongaashi onzigona tayi falwa koshidhipagelo”
10 Lesha Jesaja 53:7, 8. Sho Johannes omuninginithi a li a mono Jesus te ya kuye, okwi igidha a ti: “Tala, Onzigona yaKalunga, tayi kutha po oondjo dhuuyuni!” (Joh. 1:29) Sho Johannes a ti kutya tala Onzigona tu ulike kuJesus, otashi vulika a li ta dhiladhila koohapu dhaJesaja, ndhoka tadhi ti kutya Jesus okwa li ‘ngaashi onzigona tayi falwa koshidhipagelo.’ (Jes. 53:7) Jesaja okwa li a hunganeke kutya Jesus ota ka ‘yambela omwenyo gwe meso.’ (Jes. 53:12) Shihokitha, uusiku mboka Jesus a li a dhiki po Edhimbuluko lyeso lye, okwa li a pe aayapostoli ye aadhiginini 11 oshitenga shomaviinu, e ta ti: “Shika osho ombinzi yandje, ombinzi yehangano, tayi tilwahi omolwoyendji oyokudhima po oondjo.” — Mat. 26:28.
(Jesaja 53:11, 12) Konima yomahepeko gomwenyo gwe ota ka kala ishewe menyanyu; ota ka tseya kutya nani ina hepekwa osima yowala. Omupiya gwandje omuyapuki ota ka humbata egeelo lyoyendji, nomolwe otandi ya dhimine po. 12 Onkee ano otandi ke mu pa oshitendelwa mokati kaawa, oye nota ka topola iihakanwa pamwe naanankondo; oshoka omwenyo gwe okwe gu yambele meso, nokwa yalulilwa maakolokoshi. Okwa humbata po oondjo dhoyendji nokwa galikanene aayonaguli.
Omupiya gwaJehova “okwa tsuwa omolwomayono getu”
Omupiya “ota ka humbata egeelo lyoyendji”
13 Lesha Jesaja 53:11, 12. Jehova okwa popi kombinga yomupiya gwe omuhogololwa a ti: “Omupiya gwandje omuyapuki ota ka humbata egeelo lyoyendji, nomolwe otandi ya dhimine po.” Mbela shoka okwa li te ke shi ninga ngiini? Oshitopolwa shahugunina shovelise 12 oshe tu etela eyamukulo popepi kepulo ndyoka. Ovelise ndjoka otayi ti: ‘[Omupiya] okwa galikanene aayonaguli.’ Oyana yaAdam ayehe oya valwa aalunde, nenge tu tye “aayonaguli.” Onkee “ondjambi yuulunde” oyo eso. (Rom. 5:12; 6:23) Kungawo, aantu aalunde oya li ya pumbwa okuhanganithwa naJehova. Ontopolwa 53 yaJesaja oya yelitha nawa nkene Jesus a ‘galikanene’ nenge tu tye a popile ko aantu aalunde, sho ya ti: “Okwa tsuwa omolwomayono getu nokwa nyanyagulilwa oondjo dhetu. Egeelo olye mu ya, opo tu mone ombili, notwa aludhwa kiilalo ye.” — Jes. 53:5.
Konga omaliko gopambepo
(Jesaja 54:1) “Ligola, ngoye omuntimbe, ngoye ngoka inoo vala! Kugilila nokunyanyukwa newi lyopombanda, ngoye ngoka inoo thetwa, oshoka Omuwa ota ti, omuthigwapo oku na oyana oyendji ye vule aana yomuhokanwa.”
w06-E 3/15 ep. 11, okat. 2
“Eyele” ndyoka lya simana kutse
“Omuhokanwa” Sara nomwana Isak, otaya thaneke lye? Paulus oku ulike kutya Sara, “ngoka ihaa vala,” ota thaneke omukulukadhi gwaKalunga, oshitopolwa shehangano lye shomegulu. Omukiintu nguka gwomegulu okwa li ihaa vala manga Jesus inee ya kombanda yevi, omukiintu ngoka ka li e na “aanona” yopambepo kombanda yevi, sha hala okutya, aagwayekwa. (Aagalati 4:27; Jesaja 54:1-6) Ihe pOpentekoste 33 E.N., ongundu yaalumwentu naakiintu oya valululwa ye li oyana yomukiintu gwomegulu, ano ya li ya tililwa ombepo ondjapuki. Kungawo, Jehova okwa li a taamba ko aanona mboka ye li oyana noyali ya ningi aapangeli pamwe naJesus Kristus kohi yehangano epe. (Aaroma 8:15-17) Gumwe gwomaanona mboka, omuyapostoli Paulus, okwa nyola a ti: “Jerusalem shomegulu osho omukiintu omuhokanwa, meme yetu.” — Aagalati 4:26.
(Jesaja 57:15) Ongame Kalunga omuyapuki gwokombandambanda, ngoka ndi na omwenyo aluhe sigo aluhe. Onda kala kombandambanda muuyapuki, ihe onda kala wo paantu mboka yi ifupipika noyi itedhulula, opo ndi talaleke oomwenyo dhaaifupipiki nokuhekeleka omitima dha nyanyagulwa.
Kokeka eifupipiko lyashili
Oshiholelwa sha dhenga mbanda sheifupipiko
3 Jehova omunenene nokwa tumbala noonkondo, ihe “ota tonatele uuyuni auhe, a nkondopaleke mboka ye na omitima dhe mu inekela.” (2 Ondjalulo 16:9) Jehova oha ningi po shike nduno uuna a mono aalongeli ye aaifupipiki ya gwililwa po omolwomamakelo gi ili nogi ili? Ohe ya “tonatele” okupitila mombepo ye ondjapuki, opo “a kondopaleke mboka ye na omitima dhe mu inekela.” (Jesaja 57:15) Kungawo, aalongeli ye mboka ya talalekwa ohaya kala ye na oonkondo dhokutsikila noku mu longela nenyanyu. Shoka itashi holola tuu eifupipiko lyaKalunga!
Elesho lyOmbiimbeli
(Jesaja 57:1-11) Omuyuuki ota yonuka po, nokaku na omuntu te shi dhiladhila momwenyo gwe. [Aadhiginini, NW] otaa kuthwa po, nokaku na ngoka te shi pula, oshoka otaa kuthwa po, opo ya hupithwe muuwinayi. 2 Mboka ye ende muuyuuki, otaa yi mombili; otaa mono evululuko, sho taa lala meso. 3 Ihe ne, aamati aana yompulile onkiintu, oluvalo lwomuhondeli nolwanakuhola iipala, ileni huka. 4 Olye ngoka tamu mu sheke? Olye tamu nyonkele notamu mu yedhele mo omalaka geni? Ne kamu shi omahe gaanandumbo noluvalo lwaafundja? 5 Otamu longele iikalunga yoluvalo, sho tamu nikula momizile dhoomwandi nodhomuti kehe omutalala. Ohamu dhipaga nokuyamba aana yeni momasilu nomomakolombongo gomamanya. 6 Ohamu kutha omamanya gongolonga momasilu e tamu ga simaneke ga fa ookalunga. Ohamu ga tile omaviinu ga ninge iinuwandjambo e tamu ga etele oondjambo dhiikulya. Otamu dhiladhila kutya onda panda iinima mbyono? 7 Ohamu londo koondundu oondeendeka mu ka yambe omafikilondjambo nokukala moluhondelo. 8 Iiyelekela yeni yoshipagani omwe yi tula piiyelo meni lyomagumbo geni. Otamu iteka ndje, sho tamu ihula oonguwo dheni noku ka lala naaholi yeni koontala dheni dha tamununwa. Omwi ilandele ookuume, opo ya kutithe uuhalu weni nomwa tala omapenge gawo. 9 Omwa gwaya omugwayo nomagadhi guutiko e tamu yi mu ka longele Molek. Opo mu vule okumona iikalunga mu yi longele, omwa tumu aatumwa kokule, sigololo okuuyuni wokuusi. 10 Omwa vulwa komaendagulo geni, ihe inamu tya nando: “Otatu shi etha.” Omwa dhiladhila uuholume wiimenka otau mu koleke noitamu ka nkundipala we. 11 Iikalunga mbika iishike ye mu tilitha, opo mu lombwele ndje iifundja nomu dhimbwe ndje thiluthilu? Omwe etha okulongela ndje, sho nde mu mwenene ethimbo ele?
20-26 FEBULUALI
OMALIKO OKUZA MOOHAPU DHAKALUNGA | JESAJA 58–62
“Uvitha pombanda omumvo gwesilohenda lyOmuwa”
(Jesaja 61:1, 2) Ombepo yOmuwa Omupangeliawike oya lambele ndje, oshoka oye a gwayeke ndje, ndi uvithile oohepele onkundana ombwanawa, ndi aludhe mboka ye na omwenyo gwa nyanyagulwa, ndi igidhile aapongekwa emangululo, nondi pitithe mo oonkwatwa moondholongo. 2 Okwa tumu ndje, [ndi uvithe pombanda omumvo gwesilohenda lyOmuwa, OB-1954], uuna Omuwa ta hupitha aantu ye nota dhenge aatondi yawo. Okwa tumu ndje, ndi hekeleke ayehe mboka taa lili.
ip-2-E ep. 322, okat. 4
Uuyuuki otawu zi muSion
“Omumvo gwesilohenda, OB-1954”
4 Jesaja okwa nyola a ti: “Ombepo yOmuwa Omupangeliawike oya lambele ndje, oshoka oye a gwayeke ndje, ndi uvithile oohepele onkundana ombwanawa, ndi aludhe mboka ye na omwenyo gwa nyanyagulwa, ndi igidhile aapongekwa emangululo, nondi pitithe mo oonkwatwa moondholongo.” (Jesaja 61:1) Olye a pewa oshinakugwanithwa shokuuvitha onkundana ombwanawa? Otashi vulika oJesaja, mwaashoka sha popiwa tango, ngoka a nwethwa mo kuKalunga a nyolele oonkwatwa ndhoka dha li muBabilonia onkundana ombwanawa. Ihe Jesus okwa li a popi kombinga yegwanitho lyehunganeko lya simana sho a popi kutya oohapu ndhoka oye tadhi popi. (Lukas 4:16-21) Jesus okwa li a tumwa u uvithile oohepele onkundana ombwanawa, nokwa li a gwayekwa nombepo ondjapuki peninginitho lye. — Mateus 3:16, 17.
(Jesaja 61:3, 4) Okwa tumu ndje, ndi etele oonakulila enyanyu peha lyuupongo, ehambelelo peha lyoluhodhi. Otaa ka fa omiti ndhoka Omuwa mwene e dhi tsike. Otaa ka longa uuyuuki, naKalunga ota ka hambelelelwa shoka e shi ninga. 4 Otaa ka tungulula omakulukuma gonale, nokwoopaleka omaputu gootatekulu. Otaa ka ngongolola iilando ya mbugala, mbyoka ya hanagulwa po kaakulu yonale.
ip-2-E ep. 326-327, okat. 13-15
Uuyuuki otawu zi muSion
13 Okuza pOpentekoste 33 E.N., shu uka komeho, Kalunga okwa li a kunu “omiti ominene dhuuyuuki, NW,” ano tu tye aakriste aagwayekwa aalaadhi, mboka ye li moshilongo shopambepo shoshigwana she oshipe, ‘aantu yaKalunga.’ (Aagalati 6:16) Muule womimvo omathele, “omiti” odhi na okukala dhi thike paantu 144 000, dhi imike iiyimati yuuyuuki, opo dhi simanekithe Jehova Kalunga. (Ehololo 14:3) Mboka taya ka hugunina ye li “omiti” oya kala nokukoka okuza momumvo 1919, sho Jehova a yumudha mboka ya li ya hupu po ye li Isreali yaKalunga monkalo moka ya li inaayi ipyakidhila we. Sho Jehova e ya pe omeya ga gwana gopambepo, okwa li a kokeke okuti kwa simana kwomiti omiyuuki, tadhi imi iiyimati. — Jesaja 27:6.
14 Jesaja sho a tsu omuthindo iilonga ‘yomiti’ kutya oya shike, okwa tsikile ko a ti: “Otaa ka tungulula omakulukuma gonale, nokwoopaleka omaputu gootatekulu. Otaa ka ngongolola iilando ya mbugala, mbyoka ya hanagulwa po kaakulu yonale.” (Jesaja 61:4) Kohi yelombwelo lyomukwaniilwa Kores, gwaPersia, Aajuda aadhiginini mboka ya li ya galuka muupongekwa muBabilonia oya tungulula Jerusalem notempeli yasho, ndjoka ya kala ya mbonyagulwa po uule wethimbo. Okutungulula hoka okwa li wo taku ka ndhindhilikitha mo omimvo ndhoka dha li tadhi ka landula omumvo 33 nosho wo 1919.
15 Momumvo 33 E.N., aalongwa yaJesus oya li ya nikithwa olugodhi noonkondo sho a mangwa po, a hepekwa nokudhipagwa. (Mateus 26:31) Ihe etaloko lyawo olya li lya lunduluka, sho e yi iholele konima sho a yumudhwa. Sho ya tililwa ombepo ondjapuki, oya tameke okukala yi ipyakidhila niilonga yokuuvitha onkundana ombwanawa, “muJerusalem, muJudea alihe nomuSamaria sigo omiilongo ayihe yokombanda yevi.” (Iilonga 1:8) Kungawo oya tameke nokutungulula elongelokalunga lyashili. Momukalo gwa faathana, okuza momumvo 1919 wu uka komeho Jesus Kristus okwa li a ningitha oshihupe shaamwahe aagwayekwa shi tungulule “iilando ya mbugala, mbyoka ya hanagulwa po kaakulu yonale.” Uule womimvo omathele aasita yoongeleka dhUukwakriste inaya vula okulonga aantu oshili yaJehova, oya kala owala noku ya longa omalongo gopantu niinima mbyoka kaayi mo mOmbiimbeli. Aakriste aagwayekwa oya li ye etha po omikalondjigilile dhomalongelokalunga giifundja ndhoka dha nyata, opo okutotulula elongelokalunga lyashili ku vule okuya komeho. Oya li ya tameke oshikonga shokuuvithila aantu oshinenenene shoka sha li inaashi ningwa nando onale. — Markus 13:10.
(Jesaja 61:5, 6) Aantu yandje, aakwiilongo otaye ke mu longela. Oyo taa ka litha iimuna yeni notaa longo omapya geni niitsambe yeni yomiviinu. 6 Otamu ka ithanwa aayambi yOmuwa, aapiya yaKalunga ketu. Otamu ka nyanyukilwa uuyamba wiigwana, notaku tangwa taku tiwa oweni.
‘Aakwiilongo’ ya hangana melongelokalunga lyashili
5 Aantu yamwe otashi vulika ya kale tayi ipula noohapu ndhoka dhi li montopolwa 61, membo lyaJesaja, moka mu na ehunganeko ndyoka tali gwanithilwa egongalo lyopaKriste. Montopolwa 61, ovelise 6, omwa popiwa aantu mboka taya ka longa ye li “aayambi yOMUWA.” Ihe movelise 5 omwa popiwa “aakwiilongo” mboka taya ka kwathela “aayambi” nokulonga pamwe nayo. Ehunganeko ndika otu na oku li uva ko ngiini?
6 Otu shi shi nokutya “aayambi yOMUWA,” oyo Aakriste aagwayekwa mboka taya ka mona ompito yokuyumudhwa ‘meyumuko lyotango,’ oyo “otaa ka kala aayambi yaKalunga noyaKristus notaa ka pangela pamwe naKristus uule woomvula eyuvi.” (Eh. 20:6) Kakele kuyo, opu na Aakriste oyendji aadhiginini mboka ye na etegameno lyoku ka kala kombanda yevi. Aakriste mboka oye li aakwiilongo meityo lyopathaneko, nonando otaya longo epepe nepepe pamwe naamboka taya ka pangela megulu. Ohaya ambidhidha nenyanyu “aayambi yOMUWA,” nokulonga wo pamwe nayo ye li ‘aalongi yomapya’ gawo meityo lyopathaneko nosho wo ‘aalongi miitsambe yawo yomiviinu.’ Ohaya simanekitha lela Kalunga mokukwathela aagwayekwa miilonga yokuuvitha noyokulonga yalwe oshili. Odhoshili kutya aagwayekwa ayehe nosho wo ‘oonzi dhilwe’ ohaya longo aantu oshili noku ya kwathela pahole ya kale metsokumwe noshili ndjoka. — Joh. 10:16.
Konga omaliko gopambepo
(Isaiah 60:17) Otandi ku etele oshingoli peha lyoshikushu, oshisiliveli peha lyiiyela iiluudhe. Peha lyoshiti otandi ku etele oshikushu nopeha lyomamanya, iiyela iiluudhe. Aapangeli yoye itaye ke ku hepeka we; otaye ke ku lela nuuyuuki nombili.
w15 7/15 ep. 6-8, okat. 14-17
Longa nuudhiginini wu humithe komeho oparadisa yopambepo
14 Aakokele oyendji mboka ye li momagongalo getu, oya mona omalunduluko ngoka ga ningwa, opo ehangano lyaJehova li kale ewanawa shi vulithe nale. Otaya dhimbulukwa sho momagongalo mwa li owala omupiya gwegongalo, pehala lyolutu lwaakuluntugongalo. Sho miilongo mwa li owala omutonateli gwoshitayimbelewa, pehala lyOkomitiye yOshitayimbelewa. Naasho omupresidende gwo-Watch Tower Society oye a li ha gandja omalombwelo, oshoka kapwa li Olutuwiliki lwOonzapo dhaJehova. Nonando aamwatate mboka oya li haya kwathelwa kaamwatate aadhiginini, omuntu owala gumwe oye a li ha ningi omatokolo momagongalo, miitayimbelewa nokoombelewa dhetu oonene. Ihe okuza mo 1970, opwa ningwa elunduluko, opo ongundu yaakuluntugongalo yi kale noshinakugwanithwa shokuninga omatokolo, pehala lyomuntu owala gumwe oye ta ningi omatokolo.
15 Omolwashike omalunduluko ngaka ge etela ehangano uuwanawa? Omolwaashoka oga kankamena keuvoko lya yela lyOmbiimbeli. Pehala lyokukala nomuntu owala gumwe oye ta ningi omatokolo, ehangano ohali mono uuwanawa momaukwatya omawanawa gaakuluntugongalo ayehe, nenge ‘gaantu mboka ya gandjwa omagano’ kuJehova. — Ef. 4:8; Omayel. 24:6.
16 Dhiladhila owala komalunduluko ngoka opo ga ningilwe miileshomwa yetu. Ohatu nyanyukilwa okugandja iileshomwa iiwanawa muukalele, mbyoka tayi gandja ekwatho. Dhiladhila wo kunkene hatu longitha uuteknologi tu uvithe onkundana ombwanawa. Pashiholelwa, ko-jw.org ohaku yiwa kaantu oyendji nohaya mono ko uuyelele mboka ya pumbwa. Omalunduluko agehe ngaka otaga ningwa, oshoka Jehova oku na ko nasha lela naantu, noku ya hole.
17 Otwa pandula wo omalunduluko ngoka ga ningwa ngele tashi ya kokugongala, opo tu kale tu na ethimbo lyokuninga elongelokalunga lyuukwanegumbo nenge ekonakono lyopaumwene. Otwa pandula omalunduluko ngoka ga ningwa moopolohalama dhetu dhiigongi yoshikandjo noyoshitopolwa. Iigongi mbika ohayi hwepopala omumvo kehe. Otwa pandula wo sho hatu dheulwa moosikola dhOmbiimbeli dhi ili nodhi ili. Omalunduluko ngaka otage tu ulukile sha yela kutya Jehova oye ta wilike ehangano lye nota tsikile okuninga oparadisa yetu yopambepo ombwanawa shi vulithe nale.
(Jesaja 61:8, 9) Omuwa ota ti: “Ondi hole uuyuuki note tondo eyugo nuumbudhi. Muudhiginini wandje otandi ya futu notandi hangana nayo ehangano lyaaluhe. 9 Otaa ka kala ya simana mokati kiigwana. Shaa ngoka te ya mono, ota ka tseya kutya oyo aantu mboka nde ya yambeka.”
Omanenedhiladhilo okuza membo lyaJesaja
Omapulo gopamanyolo taga yamukulwa:
61:8, 9 — (Yelekanitha OB-1954.) — “Ehangano lyaaluhe” oshike, noolye “oluvalo”? Ndika olyo ehangano epe ndyoka Jehova a ninga nAakriste aagwayekwa. “Oluvalo” olwo “oonzi dhilwe” nenge omamiliyona ngoka taga pulakene ketumwalaka lyawo. — Joh. 10:16, OB-1954.
Elesho lyOmbiimbeli
(Jesaja 62:1-12) Itandi ka mwena molwaSion nomolwaJerusalem itandi ka kala nda tya thilu, sigo uuyuuki washo tau tende wa fa eluwa, nehupitho lyasho tali yeta lya fa onyeka. 2 Iigwana otayi ka ligamena uuyuuki woye, naakwaniilwa ayehe eadhimo lyoye. Oto ka lukwa edhina epe, ndyoka Omuwa mwene te ke li gandja. 3 Oto ka ninga oshishani sheadhimo moshikaha shOmuwa, negala lyuukwaniilwa meke lyaKalunga koye. 4 Ito ka ithanwa we “Omuhengwa,” nenge oshilongo shoye shi lukwe “Eputu.” Edhina lyoye epe olyo “Kalunga e na ombili naye.” Oshilongo shoye otashi lukwa “Ondjokana yi na elago,” oshoka Omuwa okwe ku hokwa nota kala a fa ombushiki koshilongo shoye. 5 Ngashika omumati ta hokana omufuko gwe, osho naanaa naku ku shita te ke ku hokana. Ngashika mbushiki ta nyanyukilwa omufuko gwe, osho wo Kalunga te ke ku nyanyukilwa. 6 Jerusalem, kedhingililokuma lyoye onda langeke ko aalangeli. Naa kale itaaya mwena uusiku nomutenya. Naa dhimbulukithe Omuwa omauvaneko ge. Inamu mu etha e ga dhimbwe. 7 Inamu mu pa evululuko, manga inaa tungulula Jerusalem e te shi ningi oshilando tashi tangwa kuuyuni auhe. 8 Omuwa okwa gana koshikaha she [shokolulyo] nokokwooko kwoonkondo dhe kutya iilya yoye itayi ningi we oondya dhaatondi yoye. Aakwiilongo itaa ka nwa we omaviinu goye we ga longele nuudhigu. 9 Ihe mboka taa teya iilya, oyo taye yi li nokuhambelela Omuwa. Mboka taa likola omandjembele, otaa ka nwa omaviinu momikala dhotempeli yandje. 10 Aajerusalem, pitii mo, pitileni miiyelo! Paleleni aagalukilimo epola! Tungeni onenendjila; umbii mo omamanya! Yeluthileni iigwana ombaaneli! 11 Shika Omuwa okwe shi tumbulile uuyuni auhe ta ti: “Lombweleni omuna omukadhona Sion tamu ti: ‘Omuwa ote ya e ku hupithe e na ondjambi ye note ke ku futa.’ “ 12 Otamu ka lukwa “Oshigwana oshiyapuki”, “Aakulilwa yOmuwa”. Ngoye Jerusalem oto ka ithanwa “Omuyuulukiwa,” “Oshilando inaashi ethiwa.”
27 FEBULUALI–5 MAALITSA
OMALIKO OKUZA MOOHAPU DHAKALUNGA | JESAJA 63–66
“Egulu epe nevi epe otali ke etela aantu enyanyu enene”
(Jesaja 65:17) Omuwa ota ti: “Tala, otandi shiti egulu epe nevi epe. Iiningwanima yonale otayi ka dhimbiwa thiluthilu.
ip-2-E ep. 383, okat. 23
‘Ligola pombanda omolwaayihe mbyoka tandi yi shiti’
23 Embo lyEhololo otali popi kombinga yemoniko ndyoka omuyapostoli Paulus a mono lyesiku lyaJehova ndyoka tali ya, ano uuna uuyuni mbuka tawu ka hanagulwa po. Konima yaashono, Satana ote ku umbilwa molumbogo lwomuule. (Ehololo 19:11–20:3) Konima sho Johannes a popi kombinga yemoniko ndyono, okwe endulula oohapu dhomehunganeko ndyoka lya nyolwa kuJesaja, a ti: “Ongame nonda mono egulu epe nevi epe.” Oovelise ndhoka dha ka landula ko mehokololo ndika lyemoniko ekumithi otadhi popi kombinga yethimbo ndyoka Jehova Kalunga ta ka lundulula thiluthilu oonkalo ndhoka dhi li kombanda yevi dhi ka ninge oombwanawa. (Ehololo 21:1, 3-5) Osha yela kutya, euvaneko lyaJesaja ‘lyegulu epe nevi epe’ otali ka gwanithwa po thiluthilu muuyuni uupe waKalunga! Ano kohi yepangelo ndyoka tali ka pangela okuza megulu, uulikumwe waantu uupe kombanda yevi otawu ka nyanyukilwa okukala moparadisa ndjoka tayi ka kala yopambepo naandjoka yi witike. Ehunganeko ndyoka tali hekeleke oondyoka kutya “iiningwanima yonale [uuwehame, okumona iihuna, niinima yilwe iiwinayi aantu hayi iyadha muyo] otayi ka dhimbiwa thiluthilu.” Kehe shoka tatu ka dhimbulukwa pethimbo ndyoka itashi ke tu uvitha nayi nenge shi tu ehameke noonkondo, oshinima shoka osho unene hashi gwilile po aantu oyendji kunena.
(Jesaja 65:18, 19) Nyanyukweni nokuligola pombanda omolwaayihe mbyoka tandi yi shiti. Otandi shiti Jerusalem shi ninge oshilando shenyanyu, naantu yasho otaa ka kala ye na elago. 19 Ngame otandi ka nyanyukilwa Jerusalem naantu yasho. Itamu ka kala elilagano nenge ewi lyonkugo.
ip-2-E ep. 384, okat. 25
‘Ligola pombanda omolwaayihe mbyoka tandi yi shiti’
25 Kunena, Jehova ota ningitha wo Jerusalem ‘shi ligole popanda.’ Ngiini mbela? Ngaashi twe shi mono, egulu epe ndyoka lya holoka momumvo 1914 otali kala li na aapangeli 144 000 mboka taya ka lela muukwaniilwa womegulu. Olya popiwa pahunganeko li li “Jerusalem oshipe.” (Ehololo 21:2) Shi na ko nasha naJerusalem oshipe Kalunga okwa ti: “Otandi shiti Jerusalem shi ninge oshilando shenyanyu, naantu yasho otaa ka kala ye na elago.” Jerusalem oshipe otashi ka longithwa kuKalunga shi etele aantu aavuluki omalaleko nuuyamba ogendjigendji. Aantu itaya ku uvika we taya lili, molwaashoka Jehova ote ke tu pa ‘shoka twa yuulukwa.’ — Episalomi 37:3, 4.
(Jesaja 65:21-23) Otaa ka tunga omagumbo, opo ya kale mo yo yene. Otaa ka tsika omiviinu, opo ya lye iiyimati yadho yo yene. 22 Itaa ka tunga omagumbo, yalwe ya kale mo, nenge ya tsike omuviinu dhi ka liwe kuyalwe. Omasiku gaantu yandje otaga ka kala omale ga fa omasiku gomuti. Aahogololwa yandje otaa ka kala ko olule nokunyanyukilwa iilonga yiikaha yawo yene. 23 Itaa ki ihepeka owala, noyana itaye ke ya valela omupya. Otandi ke ya yambeka pamwe noluvalo lwawo sigo aluhe.
Kevi otaku ka kala ombili uule woomvula eyuvi, nosigo aluhe!
‘OTAA KA TUNGA OMAGUMBO, NOKUTSIKA OMIVIINU’
4 Mbela opu na ngaa omuntu inaa hala okukala negumbo lye mwene omutaka, moka ye noyaandjawo taya kala yu uvite ya gamenwa? Kunena muuyuni oshidhigu okumona omagumbo ge li nawa ga gwana. Miilando oyindji omu udha aantu noonkondo. Oyendji yomuyo ohaya kala momahala gopakathimbo momalukanda giinyakwi nosho wo moombashu. Oyendji oye shi kutya kaye na esiku ya ka likole omagumbo gomakuma.
5 Sho Uukwaniilwa waKalunga tawu ka pangela, kehe omuntu ota ka kala e na egumbo lye mwene. Jesaja okwa hunganeka a ti: “Otaa ka tunga omagumbo, opo ya kale mo yo yene. Otaa ka tsika omiviinu, opo ya lye iiyimati yadho yo yene.” (Jes. 65:21) Ihe hamagumbo owala tatu ka mona. Aantu yamwe kunena, ohaya zi momagumbo gawo yene, nopu na yamwe mboka ye na omagumbo gondilo nogomafilitsa nokuli. Ihe ohaya kala mo ya tila oombotsotso nenge ye na uumbanda woku ga kuthwa uuna itaaya vulu oku ga futa. Ihe mepangelo lyUukwaniilwa kapu na ngoka ta ka kala ti ipula niinima mbyoka. Omupolofeti Mika okwa nyola a ti: “Kehe gumwe ota ka kala nombili mokati komiviinu nomikwiyu dhe, nokape na ngoka te mu halutha we.” — Mika 4:4.
Konga omaliko gopambepo
(Jesaja 63:5) Onda li nda kumwa, sho nda tala e te mono kutya kaku na nando ogumwe a kwatha ndje. Ihe ondjahi yandje oya koleke ndje, nondi imonene esindano ngame mwene.
Omanenedhiladhilo okuza membo lyaJesaja
63:5 — Ongiini ondjahi yaKalunga hayi mu koleke? Kalunga iha geye sha pitilila, oshoka okugeya kwe oku li pauyuuki. Ondjahi ye ohayi mu koleke nohayi mu inyengitha a pangule shi li pauyuuki.
(Isaiah 64:8) Ihe, Omuwa, ongoye tate. Tse eloya, ngoye omuhongi gwiiyuma. Owe tu shiti.
Pitika Egeeloputudho LyaJehova Li Ku Zule
NKENE OMUHONGI GWIIYUMA HA LONGITHA OONKONDOPANGELO DHE
3 Jesaja 64:8 okwa popi kombinga yankene Jehova ha longitha oonkondopangelo dhe uuna tu ungaunga nomuntu kehe nosho wo niigwana a longitha oshiholelwa, a ti: “OMUWA, ongoye tate. Tse eloya, ngoye omuhongi gwiiyuma. Owe tu shiti.” Omuhongi gwiiyuma oku na oonkondopangelo dhokuma eloya e te li hongo oshiyuma shoka a hala. Eloya itali vulu okulombwela omuhongi kutya nali hongwe oshiyuma sha tya ngiini. Osho wo shi li ngaaka pokati komuntu naKalunga. Omuntu ke na uuthemba wokupatana naKalunga ngaashi owala eloya kaali na uuthemba wokupatana nomuhongi gwiiyuma ngoka te li me li ninge oshiyuma. — Lesha Jeremia 18:1-6.
4 Sho Jehova a li tu ungaunga naIsraeli shonale okwa li u ulike kutya oku na oonkondo dhokuninga ngaashi omuhongi gwiiyuma ha ningile eloya. Ihe opu na eyooloko enene pokati kaJehova nomuhongi gwiiyuma gwopantu. Omuhongi gwiiyuma oha vulu okuhonga oludhi lwoshiyuma kehe shoka a hala. Mbela Jehova naye oha ningi aantu yamwe aawanawa yo yamwe aawinayi, nenge a ninge iigwana yimwe iiwanawa yo yimwe iiwinayi? Ombiimbeli otayi yamukula kutya ahawe. Jehova okwa pa aantu omagano ge na ondilo, ngoka ge li omagano gokukala ye na emanguluko lyokuninga omatokolo. E li Omupangeliawike, iha longitha oonkondo dhe momukalo ngoka tagu ningitha aantu ya kale itaaya vulu okulongitha omagano ngoka. Ihe aantu oye na okuhogolola ya zulwe kOmushiti, Jehova. — Lesha Jeremia 18:7-10.
5 Ongiini ngele aantu oya tindi okuzulwa kOmuhongi gwiiyuma Omunene molwaashoka ye na omanganga? Ongiini nduno ha longitha oonkondopangelo dhe e li Kalunga? Dhiladhila kwaashoka hashi ningilwa eloya ngele olya kala itaali vulu okuhongwa oshiyuma shoka sha halika. Omuhongi gwiiyuma ota vulu okuhonga oshiyuma shimwe shi ili ta longitha eloya ndyoka nenge e li ekelehi owala. Pakukala, uuna eloya kaali na we oshilonga, omuhongi gwiiyuma oye ha kala e na epuko. Shika hasho nando shi li ngaaka nOmuhongi gwetu. (Deut. 32:4) Uuna omuntu itii iyetha a zulwe kuJehova, epuko ohali kala aluhe lyomuntu ngoka. Jehova oha longitha oonkondopangelo dhe e li omuhongi gwiiyuma mokulundulula omukalo gwe gwokuungaunga naantu shi ikolelela kunkene tayi inyenge kokuzulwa kuye. Mboka hayi iyetha ya zulwe kuye ohaya kala ye na oshilonga. Pashiholelwa, Aakriste aagwayekwa oye li ‘iiyuma yesilohenda’ mbyoka ya hongwa yi ‘ninge iiyuma yi na ondilo.’ Mepingathano naashono, mboka haya tsu ondumbo naKalunga ohaya ka ninga ‘iiyuma yondjahi, mbyoka yo opala okuyonwa po.’ — Rom. 9:19-23, yelekanitha OB-1954.
Elesho lyOmbiimbeli
(Jesaja 63:1-10) “Olye ngoka te ya ta ziilile kuBozra shomuEdom? Olye ngoka a zala onguwo ya tiligana, te ende a tuwalala e na oonkondo odhindji? “Ongame ngu tandi popi muuyuuki ndi na oonkondo okuhupitha. 2 “Omolwashike onguwo yoye ya tiligana ya fa yomuntu ha lyata omandjembele metemba lyokukolela oomviinu?” 3 Omuwa ta yamukula ta ti: “Ongame awike nda lyatagula iigwana nda fa te kolo omandjembele, nokakwa li ngoka a kwatha ndje. Mondjahi yandje onde ya lyatagula, nombinzi yawo oya shanukile koonguwo dhandje. 4 Onda tokola kutya ethimbo lyokuhupitha aantu yandje olya thikana, nolya li ethimbo lyokugeela aatondi yawo. 5 Onda li nda kumwa, sho nda tala e te mono kutya kaku na nando ogumwe a kwatha ndje. Ihe ondjahi yandje oya koleke ndje, nondi imonene esindano ngame mwene. 6 Mondjahi yandje onda lyatagula iigwana ayihe e tandi yi tyankagula. Ombinzi yawo onde yi poolele mevi.” 7 Otandi hokolola ontalanteni yOmuwa, iilonga tuu mbyoka tayi mu hambelelitha. Aaisraeli okwe ya yambeke neyambeko enene, omolwesilohenda lye nohole ye yaa na ondjele. 8 Omuwa okwa ti: “Oshili, oyo aantu yandje; oyo itaa ka kotokela ndje.” Onkee ano e ya hupitha 9 komahepeko gawo agehe. Hamuyengeli, ihe Omuwa oye mwenemwene e ya hupitha. Mohole ye nomontalanteni ye okwe ya yululula mo. Okwa li e ya sile oshimpwiyu nonale, 10 ihe oye mu tsile ondumbo noya nikitha Ombepo ye ondjapuki uuthigwa. Osho a shituka omutondi gwawo e te ya kondjitha.