Nkene to vulu okutameka oonkundathana to longitha uufo

Okuza muJanuali 2018, kombanda yOkafo Onkalamwenyo yopaKriste niilonga yetu yokuuvitha okwa kala haku kala iiholelwa yoonkundathana. Otwa kala tatu kumagidhwa tu kale hatu kundathana naantu pehala lyoku ya pa owala iileshomwa. Uuvidio wiiholelwa yoonkundathana owa kala nokukwathela aauvithi nkene ye na okutameka oonkundathana taya longitha owala Ombiimbeli. Mbela shono osha hala okutya katu na we okulongitha iileshomwa sho tatu uvitha egumbo negumbo? Hasho nando! Pashiholelwa, otawu vulu oku tu kwathela lela tu tameke oonkundathana. Uuna tatu longitha uufo, otatu vulu okulandula omikalo ndhika:

1. Pula omapulo ngoka ge li kombanda yokafo.

2. Ulukila omuntu eyamukulo lya za mOmbiimbeli li li pombanda yepandja etiyali. Ngele ethimbo otali shi pitike, lesha e tamu kundathana uuyelele wumwe meni lyokafo.

3. Pa omuntu okafo, e to mu ladhipike e ka leshe nethimbo lye.

4. Manga inoo ya, mu ulukila epulo ndyoka li li kohi yokapalanyolo “Tala kepulo ndika,” e to ningi elongekidho mu ye mu kundathane eyamukulo okuza mOmbiimbeli oshikando tashi ya.

Ngele wa shuna ko, kundathaneni eyamukulo, e to mu thigile ishewe epulo ndyoka tamu ya mu kundathane oshikando tashi landula. Oto vulu okuhogolola epulo kepandja lyetu lyokointaneta nenge moshileshomwa shoka shi li kepandja lyahugunina lyokafo. Pompito ndjono nenge yilwe, oto vulu oku mu pa okambo Onkundana ombwanawa ya za kuKalunga nenge oshileshomwa shilwe shoka hatu longitha momapya.