MWAHA WA EKAAPA | SATANA OOKHALA CHIRYENE?
Ninnaphwanela Omoova Satana?
Echu ehirino mathepa naari ehininkha ti yoovila osuwela. Eyo enanwerya omphara muchu mootutuxa. Achu ancipale annakhwa mweelapo akhweya nthowa na ovolowela wa nwiya woopahula. Nyenya, hori woochuneya othanana. Ntakhara aakhalavo makhalelo a woona nwiya yoola ni wiisaakiha mukhatiinyu. Achu ancipale mwa miruku annakhalano ikhankoonya soolopola nave annawiriyanela moomaaleleya yoolopola yoothene.
Ntoko nwiya woopahula, Satana hanooneya, ti woovila achu oomusuwela, nave tawoopiha vancipale. Nyenya Muluku hanahiya onikhaviherya. Nyuwaano hamunaphwanela omoova Satana wakhala wi munnaphura samahala seiho Muluku onanivaheiye ntoko inacharela.
Owerya wa othanla. Yakobo 4:7 onnanleela: “Muhíheni musaserya, nave anarwa-otchawani nyuwo.” Naamwi Satana arino ikuru owo hanawerya wookhinyeereryaani weera echu yeeyo nyuwaano muhinachunaanyu weera. Nyuwaano munaphwanela othanla. Petro oopacerya 5:9 (BNM) onii: “Mmukhotxe, nulipa munroromeloni.” Muupuwele, Satana aamuhiya Yesu amanle okhooca saweeha raru. (Mateyu 4:11) Moolikana, nyuwaano munanwerya othanla oheemererya owetha wa Satana.
Onthamwene ni Muluku. Yakobo 4:8 onnanceenyerya ariki “mwachameleni Muluku.” Yehova mukhateiye onnoowopani wi mwaavyaavye opaka onthamwene ni yoowo. Munii mweere hai? Mukhalelo woophwanelela wi mpacerye, ori ohuserya sincipale vooloca sa yoowo orweela Mpiipiliyani. (Yohane 17:3) Yeeyo munahuseryaanyu vooloca sa Yehova enahaala oweerihaani omusivela yoowo, nave osivela yoowo onahaala wookhaviheryaani weera yoochuna awe. (1 Yohane 5:3) Vaavaa munamwaacamelaanyu Tiithi anyu a wirimu, owo onii aakhulele hai? Yakobo onnaloca: “[Muluku] onarwa-awachamelani nyuwo.”
Yoolaiherya ya waakiha. Masiposipo 18:10 (BNM.) ninnalakhanya: “Nsina na Apwiya [Yehova] nri ntoko mutxontxo wolipa anatxawelayamo atxhu awokololowa, ekhala mmuretxeleni.” Chiryene, eyo henataphulela wi nsina na Muluku nri ntoko echu enaruuha ekari. Opwaha yeeyo, enataphulela wi yaale anaroromela chiryene nsina na Muluku ananwerya oveka nikhaviheryo elukuluku eri yoothene.
Sootakiherya soophara muteko. Saweriwa Tarummwa 19:19 onnanleela echu yoohakalaliha vooloca sa Akiristu avyaani yaacharunwe o Efeso: “Nave anchipale a yawo yéra sawisachiherya yáthukumanya alivro aya eweyela vamithoni va othene; nave yáhálakhanya esisapo aya, ephwanya icharama sawéla masanaru makhumi khumi othanu.”a Akiristu yaale yaaheeyela echu eri yoothene yiiwanana ni onamulosiwe, moohipwacha esisapo aya. Yootakiherya yeela ti yaphaama wa hiyaano olelo. Elapo yooweiwa ni wiisaciherya ni onamulosiwe. Ophiyerya tho ichu ni saweera sa onamulosiwe inooniwa okhala ntoko soophwanelela. Mwa yeela, ti woochuneya omwalanano ichu ntoko seiho mu okumi anyu naamwi ori woovila.—Malamulo 18:10-12.
Roxelio, olociwe woopaceryani wa mwaha yoola, aaphiyerya iyaakha 50 aheemereryaka wi Satana ookhala. Nyenya owo aatoroka moonelo awe. Ntakhara heeni? Roxelio onnaloca: “Yaari ekwaha yoopacerya mu okumi aka okhalano Piipiliya, masuwelelo oorweela mu Soorempwa yaakikhaviherya osuwela wi Satana ookhala. Vano masuwelelo mamohamoha annakaakiha ovoloweliwa ni yoowo.”
Nyuwaano munnachuna woona nihiku nenlo Satana ohinahaaleiye okhalavo? Aai chiryene. Soorempwa sinnaloca elukuluku ya omwaahiyu vaavaa Musaserya, yoowo onaahuweliha ancipale, onahaaleiye ‘ovonyiwa mu’nia ya moro ni enshofre.’ (Yawupulula 20:10) Mweeparipari, mooro ni enxofre hasinawerya weeyela soopatuxiwa soomunepani. Mwa yeeyo, eniya ya mooro, enasiphela otoloxiwa woohimala. Satana harwaru akhala tho. Eyo enahaala okhala elukuluku yoohakalalihaxa wa yaale anamusivela Muluku!
Mu elukuluku yoophwanelela, titelelani ohuserya soothene munaweryaanyu vooloca sa Yehova ni iphiro sawe.bNkaanyiheryani ekumi yoohakalaliha enahaala okhalavo, vaavaa enahaalaaya waakhwaniheryeya eparipari yeela enii: “Satana hakhanle!”
[Masu a vathi]
a Wakhala wi icarama saweela saalakhanyeryiwe saari itenaariyu sa Roma, waaca wa ikhorowa iho saalikana ni waaca wa yoolivela ya muteko wa nihiku nimoha wa anamalapa 50.000!
b Wi musuwele sincipale vooloca sa Satana ni onamulosiwe, moone ekapitulu 10 ya liivuru Piipiliya Onahusiha Eheeni Chiryene? Mumveke Namoona a Yehova liivuru mmoha, naari mmwaalakhanye mu interneti www.jw.org.
[Eruku va epaaxina 6]
Yehova onnavaha nikhaviheryo noomunepani wi awaakiheeni
[Yooleeliherya va epaaxina 6]
“Masuwelelo oorweela mu Soorempwa yaakikhaviherya osuwela wi Satana ookhala. Vano masuwelelo mamohamoha annakaakiha ovoloweliwa ni yoowo”