Apwanne Yehova Onahaala Waakhula Mavekelo Aka?

1-2. Ntakhara heeni ilukuluku ikina nnanwerya woona wi Yehova hanaakhula mavekelo ahu?

“OHAKALALE tho mwa apwiya nave taneeraaya yoovahe seiho onakhwelaa mmurimani mwaa.” (Sal. 37:4, PMM) Ela yoororomeliha yootikhiniha! Apwanne nnaphwanela oweherya wi Yehova anivahe mwawaakuveya ichu soothene nnamvekaahu? Ntakhara heeni nnaphwanelaahu wiipakela nikoho nenla? Muthokororye sootakiherya inacharela. Murokora mmoha onnavekela wi awerye ovolowa mu Exikola ya Alaleeryi a Omwene. Nyenya sinnaviravo iyaakha sincipale owo ahaakhelaka nwopelo. Munna ori mmiravo nave onahooseya ni ereca etokweene onnamveka Yehova wi ampenuxe wi awerye opaka sincipale mmulokoni. Nyenya owo hanapenuwa. Asitiithi Eekristu annavekela wi mwanaya atitelele wunnuwa mu eparipari. Nyenya, mwaana owo onnalakelela ohiya omurumeela Yehova.

² Akhweya nyuwaano tho mohintoko omveka echu Yehova, nyenya muhaakhela. Ntoko yookhumelela, munanwerya ophiyerya makuchuwelo wi Yehova onaakhula mavekelo a achu akina ohiya mavekelo anyu. Naari munanwerya wuupuwela wi moopaka yoohesa. Murokora mmoha awiichaniwa Janiceb aahiisoona mmukhalelo yoola. Owo ni iyawe yaahivekela vooloca sa yoolakelela aya ya orumeela o Peteli. Owo ooloca: “Miyaano kaahilekecheya wi naahaala oya o Peteli moohilekela.” Nyenya yaahiviravo elukuluku yincipale mutheli ole ahiwompwale. Janice ooloca: “Kaari oothanana ni awaakanyeryeya. Miyaano kaaniikoha tiheeni kaapankaaka wi kimunyeenyeihe Yehova. Kaahivekela mooluluwanya wi n’ye o Peteli. Vano ntakhara heeni owo aahaakhunleiye nivekelo naka?”

3. Tiheeni nnahaalaahu othokororya mmwaha yoola?

³ Ikwaha ikina nnanwerya wiikoha waakhanle wi Yehova onnawiriyana mavekelo ahu. Ophiyerya tho wi alopwana oororomeleya akhalai yaahiipakela nikoho nimohamoha. (Yupu 30:20; Sal. 22:2; Hap. 1:2) Tiheeni enahaala woolekechaani wi Yehova onahaala waakhula mavekelo anyu? (Sal. 65:2) Wi niwerye waakhula nikoho nenla, nnaphwanela woopaceryani waakhula makoho ala: (1) Tiheeni nnaphwanelaahu oweherya wa Yehova? (2) Tiheeni Yehova onaweheryeiye wa hiyaano? (3) Ntakhara heeni nnanwerya otoroka ichu ikina nnavekaahu?

TIHEENI NNAPHWANELAAHU OWEHERYA WA YEHOVA?

4. Mwawiiwanana ni Yeremiya 29:12, tiheeni Yehova ororomelinheiye opaka?

⁴ Yehova onnaroromeliha waakhula mavekelo ahu. (Mwaalakhanye Yeremiya 29:12.) Muluku ahu onnaasivela alapeli awe oororomeleya, mwawiihiiha, owo harwa ahiya opwacha mavekelo aya. (Sal. 10:17; 37:28) Nyenya, eyo henataphulela wi owo onahaala onivaha soothene nnavekaahu. Akhweya nnanwerya oweherya ophiyerya elapo evyaani nihaakumve waakhela ichu ikina nivenkaahu.

5. Tiheeni Yehova onuupuweleiye vaavaa onawiriyaneiye mavekelo ahu? Mutharihe.

⁵ Yehova onnathokororya mukhalelo sooveka sahu siniiwananaaya ni yookhwela awe etokweene. (Yes. 55:8, 9) Makupa a yookhwela awe enaphitaanyerya osareiha elapo ni alopwana vamoha ni athiyana ari oohakalala ni awiiwanana vathi va olamulelo awe. Nyenya Satana onaloca wi yaahaala okhala yaphaama achu yiilamulelaka mukhataaya. (Map. 3:1-5) Wi ooniherye wi masu a Musaserya yaari atheru, Yehova aaheemererya wi achu yiilamuleleke mukhataaya. Nyenya, olamulelo wa achu wookumiherya makacamiho matokweene nnahoolelaahu olelo. (Ekl. 8:9) Ninniiwexexa wi Yehova haviihaavo makacamiho oothene yaala mu elukuluku yeela. Waakhanle wi oheerano yeela, achu yaawo ahinamurumeela yaahaala wuupuwela wi achu tanareheryerya makacamiho yaala. Awo yaahaala wuupuwela wi achu ananwerya wiilamulela ni okhumelela phaama.

6. Ntakhara heeni nnaphwanelaahu ororomela wi Yehova ilukuluku soothene onahaala opaka yeeyo eri yoosivela ni yawookololowa?

⁶ Yehova onanwerya waakhula sooveka soolikana mmikhalelo soohiyana. Ntoko yootakiherya, vaavaa Mwene Esekiya aatempeiye wiiceliwa, owo aahimveka Yehova wi ampenuxe. Mwawiihiiha, Yehova aahimpenuxa. (2 Mam. 20:1-6) Nto vaavaa murummwa Paulo aamvenkeiye Yehova wi aaviihevo “mwiiwa mmwiilini,” akhweya ereca yoomwiilini, Yehova haaviihalevo nikacamiho nenlo. (2 Ako. 12:7-9) Muthokororye tho yootakiherya ya murummwa Tiyaku ni Petru. Mwene Heroti aachuna owiipha oopiili. Muloko waahivekela ntakhara Petru, nave woonaru ntakhara Tiyaku tho. Nyenya Tiyaku aahiiphiwa, nto Petru aahoopoliwa mootikhiniha ni munkeelo mmoha. (Saw. 12:1-11) Nnanwerya wiikoha: ‘Ntakhara heeni Yehova aahimoopola Petru nave ahimoopola Tiyaku?’ Piipiliya hanaloca.c Echu nnaphwanelaahu ororomela ti yawi mukhalelo wa Yehova weerano ichu, ilukuluku soothene ti ‘wawookololowa.’ (Malam. 32:4, PMM) Nave noosuwela wi oothene yaahikhalano weemereryiwa wa Yehova. (Wup. 21:14) Mu ilukuluku ikina, akhweya Yehova hanahaala waakhula mavekelo ahu mmukhalelo naaweheryaahu. Nyenya woona wi ninnaroromela wi Yehova ilukuluku soothene onapaka yeeyo eri yoosivela ni yawookololowa, hannathoriha vooloca sa mukhalelo owo onathanleiye waakhula mavekelo ahu.—Yupu 33:13.

7. Tiheeni nnaphwanelaahu weererya osepa, nave ntakhara heeni?

⁷ Ninneererya osepa olikanyiha mukhalelo ahu ni mukhalelo wa akina. Ntoko yootakiherya, akhweya ninnamveka Yehova wi anikhaviherye mmukhalelo wooluluwanya. Nyenya eyo henataphulela wi yooveka ahu enahaala waakhuliwa. Voocharela, ninnasuwela wi muchu mukina ooveka echu emohamoha nave ennooneya wi Yehova ohaakhula nivekelo nawe. Murokora mmoha awiichaniwa Ana oohoolela yeela. Owo aahimveka Yehova wi ampenuxe iyawe, Mateyu, yoowo aarino iyaakha 39 wa ereca awe ya kanser. Mu elukuluku emohamoha, arokora eeli yaari aawuuluvalaxa yaanawaniha tho ni kanser. Ana aahivekela moohihiyererya ntakhara Mateyu ni arokora yaale eeli. Arokora yaale yaahipenuwa, nyenya iyawe aahikhwa. Wuupaceryani, Ana aaniikoha waakhanle wi arokora yaale yaapenunwe nthowa na nikhaviheryo na Yehova. Nave waakhanle wi Yehova aahaakhaviherya, ntakhara heeni owo aahaakhunleiye nivekelo nawe nawi iyawe apenuwe? Mweeparipari, hiyaano hansuwenle mukhalelo arokora yaale eeli yaapenunwaaya, nave noosuwela wi Yehova onahaala omaliha makacamiho oothene nave owo onnachuna ni murima woothene waaviiha mookhwani asinthamwene awe.—Yupu 14:15.

8. (1) Mwawiiwanana ni Yesaya 43:2, ti mwawiihai Yehova onanikhaviheryeiye? (2) Ti mwawiihai mavekelo ananikhaviheryaaya vaavaa nnahoolelaahu makacamiho? (Moone exilema Nivekelo Ninnanikhaviherya ovilela ilukuluku soovila.)

⁸ Yehova ilukuluku soothene onahaala onikhaviheryaka. Tiithi ahu oosivela Yehova, hanasiveliwa onoona nihooxeyaka. (Yes. 63:9) Naamwiihiiha, owo hananikhapelela wa makacamiho ahu oothene, yaawo anawerya olikanyihiwa ni mihice naari mooro. (Mwaalakhanye Yesaya 43:2, PMM.) Nyenya, owo oororomeliha onikhaviherya ‘olapuwa’ seiho, naari ohoolela moohakalala. Nave moohipwacha makacamiho nnahoolelaahu hiihava, owo onahaala onikhaviherya wi ilukuluku soothene okhale wooweryeya wa hiyo omurumeela yoowo. Yehova tho onnanivaha munepa awe waweela ni woowerya wi onikhaviherye ovilela. (Luka 11:13; Afi. 4:13) Ntoko yookhumelela, nnanwerya ororomela wi ilukuluku soothene nnahaala okhalano yeeyo ene nnachunaahu wi niwerye ovilela ni otitelela okhala oororomeleya wa yoowo.d

TIHEENI YEHOVA ONAWEHERYEIYE WA HIYO?

9. Mwawiiwanana ni Tiyaku 1:6, 7, ntakhara heeni nnaphwanelaahu ororomela wi Yehova onahaala onikhaviherya?

⁹ Yehova onaweherya wi nimuroromele yoowo. (Ahe. 11:6) Ikwaha ikina nnanwerya woona makacamiho okhala oovilaxa wi nivilele. Ophiyerya wi nnanwerya opacerya okhalano minikwa waakhanle wi Yehova onahaala onikhaviherya. Nyenya Piipiliya onnaniroromeliha wi moorweela wa ikuru sa Muluku nnanwerya owelela ‘ixiri.’ (Sal. 18:29, NN) Ohiya weemererya wi minikwa sinnuwe, nnaphwanela ovekela nivekaka nroromelo noolipa, nroromelaka wi Yehova onahaala waakhula mavekelo ahu.—Mwaalakhanye Tiyaku 1:6, 7.

10. Mvahe yootakiherya ya mukhalelo nneeraahu nipake ichu mwawiiwanana ni mavekelo ahu?

¹⁰ Yehova onaweherya wi neereke ichu mwawiiwanana ni mavekelo ahu. Ntoko yootakiherya, munna onanwerya omveka Yehova wi amukhaviherye ovahiwa ifolka wi awerye woonela muthukumano wa muceche. Ti mwawiihai Yehova aahaaleiye waakhula nivekelo nenlo? Owo onanwerya omvaha olipa murima wi aloce ni apatarau awe. Nyenya munna onaphwanela okhala oorehereya ochariha yeeyo onaphwaneleiye weera. Vakina vaya, onamuchuneya oveka mwawuuluulela. Ophiyerya tho wi owo akhweya onamuchuna otoroka elukuluku ya olapa ni namuteko mukina. Nave wakhala wooweryeya, onanwerya oveka ifeeriya seiho sihinahaala ochuna oliviwa.

11. Ntakhara heeni nnaphwanelaahu ovekelaka mwawuuluulela vooloca sa sawuukhula sahu?

¹¹ Yehova onaweherya wi nivekeleke mwawuuluulela vooloca sa ichu soochuneya wa hiyaano. (1 Ate. 5:17) Yesu aahooniherya wi mavekelo ahu makina hiyaahaala waakhuliwaka mu elukuluku yeeyo nnachunaahu. (Luka 11:9) Hamunaphwanela ovelavela! Mvekeleke ovinyerya vathi va murima, ni moohihiyererya. (Luka 18:1-7) Vaavaa nnatitelelaahu ovekela wa Yehova vooloca sa echu emohamoha, ninnooniherya wa Yoowo wi ninnaroromela wi mavekelo ahu tahi asiiyo. Ohiya yeeyoru, ninnooniherya nroromelo mu owerya wawe wi onahaala onikhaviherya.

NTAKHARA HEENI NNAPHWANELAAHU OTOROKA YEEYO NNAVEKAAHU?

12. (1) Nikoho taani nnaphwanelaahu wiipakela, nave ntakhara heeni? (2) Nni nooniherye hai wi ninnamucicimiha Yehova mmavekelo ahu? (Moone ekaaxa “Apwanne Sooveka Saka Sinnooniherya wi Kinnamucicimiha Yehova?”)

¹² Wakhala wi hinaakhenle yeeyo naavekaahu, nnanwerya wiipakela makoho ala mararu: Noopacerya: ‘Kinnavekela ntakhara ichu saphaama?’ Wiiliwiili ninnuupuwela nave ninnasuwela yeeyo eri yaphaama wa hiyaano. Nyenya ichu ikina nnavekaahu hini inikhaviherye moovira wa elukuluku. Wakhala wi ninnavekela wi nrehereryiwe nikacamiho mmukhalelo wammoori, akhweya wookhalavo mukhalelo waphaamaxa wa orehererya. Nave ichu ikina nnamvekaahu Yehova akhweya hinniiwanana ni yookhwela awe. (1 Yoh. 5:14) Muupuwele yootakiherya ya asitiithi yaale etharihiwe mu eparakrafu yoopacerya. Awo yaahimveka Yehova wi mwanaya atitelele okhala mu eparipari. Enakhala ntoko wi hiyaavo yoonanara mu yooveka yeela. Nyenya Yehova harwa amukhinyererya muchu omurumeela. Owo onachuna wi oothene ahu, ophitaanyerya aniihu, nthanle omulapela yoowo. (Malam. 10:12, 13; 30:19, 20) Mwawiihiiha, ohiya omveka Yehova wi mwanaya atitelele okhala mu eparipari, asitiithi ananwerya omveka Yehova wi aakhaviherye otannya murima wa mwanaya ni omuceenyerya omusivela Yehova ni okhala nthamwene Awe.—Wup. 22:6; Aef. 6:4.

13. Mwawiiwanana ni Ahepri 4:16, ti liini Yehova onahaaleiye onikhaviherya? Mutharihe.

¹³ Nikoho nanaawiili nnaphwanelaahu wiipakela ti nla: ‘Apwanne elukuluku yoophwanelela wi Yehova akivahe yeeyo kinavekaaka?’ Akhweya ninnoona wi ninnachuna naakhulo nawaakuveya wa yooveka ahu. Nyenya mweeparipari, Yehova oosuwela elukuluku yoophwanelela wi anikhaviherye. (Mwaalakhanye Ahepri 4:16.) Vaavaa sooveka sahu sihinaakhuliwaaya mwawaakuveya, nnanwerya wuupuwela wi naakhulo na Yehova ti nawi ‘Hooye.’ Nyenya naakhulo nnanwerya okhala ‘Nlelo hooye.’ Ntoko yootakiherya, muupuwele wanaawiili sa mmiravo yoole aavekenle wi apenuxiwe wa ereca awe. Waakhanle wi Yehova mootikhiniha ompenuxa, Satana aahaala oloca wi munna ole pahiru otitelenle omurumeela Yehova nthowa nawi aahipenuxiwa. (Yupu 1:9-11; 2:4) Mwawaaceererya, Yehova ooniroromeliha wi oothene anahaala openuxiwa wa ireca saya omwaahiyu. (Yes. 33:24; Wup. 21:3, 4) Ophiyerya elukuluku yeeyo, hannaphwanela oweherya openuxiwa mootikhiniha. Mwawiihiiha, munna ole aanwerya omveka Yehova wi amvahe ikuru ni murecele wampuwa wi atitelele ovilela naamwi iiceliwaka ni otitelela omurumeela Muluku moororomeleya.—Sal. 29:11.

14. Tiheeni muhusenryaanyu ni yaweereya ya Janice?

¹⁴ Munnamuupuwela Janice, yoowo aavekela wi arumeele o Peteli? Saavinre iyaakha thanu wi iiwexexe mukhalelo Yehova aakhunleiye nivekelo nawe. Owo ooloca: “Variyari va iyaakha seiho, Yehova ookihusiha ni okikhaviherya okhala Mukristu aphaama. Miyaano kaaphwanela wunnuwiha omuroromela waka yoowo. Nave kaaphwanela orehererya yoohuserya aka ya muchu mukhateiye. Ohiya yeeyoru, kaanaphwanela ohuserya wi ohakalala waka honarweela mu nipuro kinarumeelaakawo.” Ohoolo waya, Janice ni iyawe yaahiwompwa orumeela mmuteko wa weeceeca. Uupuwelelaka sa muculi, Janice ooloca: “Yehova chiryene ohaakhula mavekelo aka, nyenya mmukhalelo kahaaweheryaaka. Yaahiviravo elukuluku wi kiiwexexe wi naakhulo na Yehova yaari yamahala yooreera wa miyo, nave kinnathamalela vancipale nthowa na okhalano ekari ya woona osivela ni oreera murima wa Yehova.”

15. Ntakhara heeni ikwaha ikina nnaphwanelaahu ohikhala ooluluwanyaxa mu sooveka sahu? (Moone tho iruku.)

¹⁵ Nikoho naneeraru naahaala okhala nla: ‘Apwanne kaanwerya ovekela ntakhara echu ekina?’ Naamwi okhalaka waphaama opaka mavekelo ooluluwanya, akhweya nnanwerya wiiwexexa yookhwela ya Yehova wa hiyo wakhala wi hannakhala ooluluwanyaxa mu yeeyo nnavekaahu. Moone yootakiherya ya murokora ori muciye, yoowo aavekela ntakhara Exikola ya Alaleeryi a Omwene. Owo aachuna oya o Exikola wi awerye orumeela weiwo oriwo othowa otokweene. Nyenya vaavaa aatiteleleiye ovekela ntakhara oya o Exikola, owo aanwerya ovekela wa Yehova avekaka wi amukhaviherye woona ikari ivyaani sa waaceererya orummwa awe. (Saw. 16:9, 10) Voocharela, owo aanwerya opaka ichu mwawiiwanana ni nivekelo nawe moorweela wa omukoha ooweherya a ekulucu waakhanle wi wookhala muloko aacamenleiye oriwo othowa wa mapiyoneero. Naari aanwerya orepela Opeteli akohaka waakhanle wi wookhalawo nipuro nammoori oriwo othowa otokweene wa alaleeryi a Omwene.e

16. Tiheeni nnaphwanelaahu ororomela?

¹⁶ Ntoko nihusenryaahu, nnanwerya ororomela wi Yehova onahaala waakhula mavekelo ahu moosivela ni mwawookololowa. (Sal. 4:3; Yes. 30:18) Ikwaha ikina akhweya nnamwaakhuliwa mmukhalelo nahaaweheryaahu. Nyenya Yehova harwa aramusa mavekelo ahu. Owo onnanisivela vancipale nave harwa aninyanyala. (Sal. 9:10) Mwawiihiiha, mutitelele ‘omuroromela yoowo mahiku oothene,’ mmiinelaka murima anyu wa yoowo mu nivekelo.—Sal. 62:8, PMM.