Yesu Onnapaka Sootikhiniha Sincipale

Yesu aarwiile veelaponi ya vathi wi alaleerye michaka saphaama. Wi ooniherye yeeyo Yesu aahaaleiye weera ntoko Mwene, Yehova aamvaha munepa waweela wi apake sootikhiniha. Owo aanaapenuxa areca. Voothevene aayeiyevo, achu yaanamveka nikhaviheryo, nave aanaapenuxa. Achu ohoona yaanoona, oociyana maaru yaaniiwa, achu oorakala yaaneeca ni yaaphariwe ti masololo yaanataphuwa. Akina yaanapenuwa pahiru moorweela wa ophara yoowara awe. Achu yaanamuchara Yesu mapuro oothene. Naamwi Yesu achunaka wiichuuwa, owo aanaapwacha achu ilukuluku soothene.

Ekwaha emoha, achu yaamuruuha mulopwana oohiwerya weeca. Nyenya nthowa na waaciwavo, awo hiyawenrye ovolowa mpa mwemmo Yesu aareiyemo. Mwawiihiiha awo yaakhuvula vasulu va empa wi emvirihevo mulopwana owo. Vano Yesu aahi wa mulopwana owo: ‘Vinya weeceke.’ Owo aapacerya weeca nave aachu yaatikhina vatokovene.

Ekwaha ekina, Yesu aahaaphwanya alopwana khumi a mareca nave yaakhuwela eriki: ‘Muhusiha, munimorele ikharari.’ Khalai alipa a mareca hiyeemereryiwa owaacamela achu. Yesu aahaaruma wi eye mu empa ya mithukumano woona wi Nlamulo na Yehova naanaloca wi mulipa a mareca apenuwa onaphwanela oya mu empa ya mithukumano. Awo yaapenuwa mphironi. Mulopwana mmoha ooneiye wi aapenuwa, aakookela wa Yesu wi amuthamalele. Wa yaale khumi, pahiru mmoha taamuthamalenle Yesu.

Muthiyana mmoha yoowo saavinre iyaakha 12 arikimawiiceliwa, uupuwela wi hi apenuwe. Owo aaya waarivo achu, aatannya yoowara ya Yesu nave aapenuwa mwawaakuveya. Nto Yesu aakoha: ‘Taani okitannyile?’ Muthiyana ole aatepa othanana, nyenya aamwaacamela Yesu amuleela eparipari. Yesu aamuhakararya ariki: ‘Mwanaka, hawe ni murecele.’

Mutokweene mmoha nsina nawe Xairo aamveka Yesu ariki: ‘Mwanaka a mwaamuthiyana ohanle vakhaani okhwa.’ Yesu ahaakumve ophiya vaate va Xairo mwaana owo aakhwa. Vaavaa Yesu aaphiyaleiye, owo aahaaphwanya achu yaaruule wi yaahakararye amusi. Yesu aahaaleela: ‘Muhinle! Owo onamurupa.’ Aapharela ntata na nahano owo nave aaloca masu ala: ‘Nahano vinya.’ Owo aavinya mwawaakuveya nave Yesu aahaaleela asitiithi awe wi emvahe nahano yoolya. Waanyiherye ohakalala asitiithi awe yaaryaayano!