SECCIÓN 17
Jesús tlamachtia itech iTekiuajyo toTajtsin
Maski Jesús kiminojnotsa itech miyek tlajtlamach inomachtijkauan, san itech iTekiuajyo toTajtsin tlen melak kiminmachtia
¿TLEKA ouajla Jesús ipan tlaltikpaktli? Yejua okijto: “Kipiya ika nikteijlis yejon kuajli tlajtoltin itech itekiuajyo toTajtsin pampa ika yejuin onechajtitlankej” (Lucas 4:43, NM). Itech iTekiuajyo toTajtsin tlen Jesús otemachti, san naui matikitakan.
1. Jesús yeskia Tekiuaj. Jesús okijto ika yejua Mesías katka (Juan 4:25, 26). Noijki okijto ika yejua katka Tekiuaj akin Daniel okitak ipan tlatlachalistli. Okimijli itlatitlankauan ika yejkos tonajli ijkuak notlalis ‘kampa ueyixtiasʼ niman yejuamej nemiskiaj inakastlan pampa iuan tlanauatiskiaj (Mateo 19:28). Ika achijtsitsintin katkaj okintokayoti ‘xmiyekejʼ. Noijki otlajto itech “oksekimej borregos” akin xteuan tlapoualtin kampa xmiyekej (Lucas 12:32; Juan 10:16).
2. ToTajtsin iTekiuajyo san kichiuas tlen melauak. Jesús otlamachti ika ijkuak tlanauatis kipopolos tlen melak xkuajli onochiuj: tlen Satanás okichiuj ika itokatsin toTajtsin. ¿Kenon kichiuaskia? Kichipauas itech nochi tlen xkuajli yonoijto tlen ouajpeuj itech xochitlalpan Edén (Mateo 6:9, 10). Noijki ijkuak Cristo tlanauatis xakaj techikoitas, pampa okinmachti tlakamej niman siuamej, akin kipiayaj tomin niman akin xtlaj kipiayaj, xkintlapejpeniaya. Maski okuajtitlankej makiminojnotsaki israelitas, noijki okichiuj tlen ouel niman ijkon okimpaleui samaritanos niman tlaltikpakchanejkej itech oksekimej kalpamej. Yejua xijkon katka ken tlamachtijkej itech tlanauatijli akin techikoitayaj niman kimintlapejpeniayaj akin kiminmachtiayaj.
3. ToTajtsin iTekiuajyo xkichiuaskia ken kichiuaj akin Satanás kiminyekana. Jesús onen ijkuak judíos kipiayaj miyek tlauejli itech política pampa kiminyekanaya okse tekiuaj akin xompa chanej katka. Maski ijkon, xonokauili makikalaktikan ipan política (Juan 6:14, 15). Ijkuak otlajto iuan se tlanauatijketl, okijli: “Nejua xnitlamandaroua [xnitlanauatia] nikan ipan in tlaltikpaktli ken se rey” (Juan 18:36). Niman inomachtijkauan okimijli: ‘Xok nemouikaj ken yejuamej akin xnechneltokajʼ (Juan 15:19). Niman noijki Jesús xokinkauili makitekitiltikan tlen ika nomiktilo, nion maski ika kipaleuiskiaj (Mateo 26:51, 52).
“Oyaj opanotia ipan [...] kalpantsitsintin, tenojnotstinemiya niman teijlitinemiya kuajli tlajtoltin itech itekiuajyo toTajtsin.” (Lucas 8:1, NM)
4. Cristo tlanauatis ika tlasojtlalistli. Jesús okimijli inomachtijkauan kimpaleuis ika intlajyouilisuan (Mateo 11:28-30). Niman ijkon okichiuj. Okiminmakak miyek tlajtoltin tlen kimpaleuiskia maka melak kileuiskej tomin, ijkuak notekipachoskiaj, kenon nouikaskej iuan oksekimej niman kenon melak kipiyaskej pakilistli (Mateo, itlaxeloluan uejueyimej 5-7). Katka se tlakatl akin tetlasojtlaya niman nokauiliaya mayakan itech. Maski san akinon, xnomojtiaya yas itech pampa kimatstoyaj ika kiminkakiskia niman kualtsin kiminseliskia. ¿Akinon xkinekiskia kipiyas se tekiuaj ijkon?
Ika milagros tlen okichiuj Jesús okiteititi tlen kichiuas iTekiuajyo toTajtsin. ¿Tleka okichiuj milagros? Matikitakan.