O Mai I Fe a Tautolu?
KO E HA NE AOGA E TALI? Tokologa e tagata ne fakaako ko e mena tupumainoa e tau mena momoui he lalolagi. Nukua tala age ki a lautolu ko e tau mena kehekehe ne amanaki ti tutupu, ati tupumainoa ai e lanu tagata mo e tau manamanatuaga, lotomatala, mo e manako fakaagaaga.
Ka e manamanatu la: Kaeke ko e vala mooli a tautolu he tupumainoa ti nakai fai Tufuga, to kakano mogoia, ko e lanu tagata kua tuga e tama tokaveli. Liga nakai fai punaaga ne mua ue atu e pulotu ke fakatonu mai—nakai fai ke lagomatai a tautolu ke fakamafola e tau lekua ha tautolu. Liga to falanaki ni a tautolu ke he pulotu he tagata ke kalo mai neke lauia kelea he tau matematekelea he takatakai motu, ke fakamafola e tau fekehekeheaki fakapolitika, mo e takitaki ke he tau lekua fakatagata ha tautolu.
Kua tamai kia he tau mena nei ki a koe e mafola ke he loto? Ka nakai, ti manamanatu ke he taha mena foki. Nukua nakai mitaki hokoia ni ka kua fai kakano mooli.
Talahauaga he Tohi Tapu
Kua fakaako he Tohi Tapu ko e tau tagata ko e mena tufugatia ni he Atua. Ne nakai ko e vala a tautolu he tupumainoa ne nakai fakaalofa mo e nakai manamanatu. Ka ko e fanau he Matua fakaalofa mo e pulotu. Kitekite ke he tau talahauaga maaliali nei i loto he Tohi Tapu.
Kenese 1:27. “Ti eke ai he Atua e tagata ke he hana fakatai, ko e fakatai he Atua ne eke ai e ia; ne eke e ia a laua ko e tane mo e fifine.”
Salamo 139:14. “Kua fakaaue atu au kia koe, ha ko e mena eke au kia matakutakuina mo e ofo ki ai; ko e tau mena ne eke e koe ko e tau mena ke ofomate ki ai haia; kua iloa tonuhia e au e tau mena ia.”
Mataio 19:4-6. “Nakai kia totou e mutolu, ko ia ne eke e tagata ke he kamataaga, ne eke e ia a laua ko e tane mo e fifine. Mo e pehe mai a ia, Ko e mena ia ke toka ai he tane hana matua tane mo e hana matua fifine, ka e fakalataha mo e hana hoana; ati eke ai a laua mo tino taha? Haia kua nakai tuai tokoua, ka kua tino taha na laua; hanai, ko ia kua fakalataha he Atua, aua neke vevehe he taha tagata.”
Gahua 17:24, 25. “Ko e Atua ne eke e lalolagi mo e tau mena oti kana ha ha i ai, ha ko e Iki a ia he lagi mo e lalolagi, nakai haele a ia ke he tau faituga ne eke he tau lima; ti nakai ko e tau lima he tau tagata ke fekafekau ai kia ia, tuga e mena kua nofogati a ia ke he taha mena; kua foaki mai e ia e moui, mo e fafagu, mo e tau mena oti kana ke he tau mena oti.”
Fakakiteaga 4:11. “Ko e Iki [Iehova] na e, kua lata ni a koe ke tuku atu ki ai e fakahekeaga, mo e lilifu, mo e malolo; ha kua eke e koe e tau mena oti, ha ko e hau a finagalo foki ne ha ha i ai a lautolu; mo e eke ai a lautolu.”
Puhala ne Tamai he Tali he Tohi Tapu e Mafola Mooli he Loto
He iloa ko e Atua kua “fakahigoa mai ai e tau faoa oti kana ha he lagi” to maeke ke hiki e puhala ne onoono a tautolu ke he falu tagata. (Efeso 3:15) He moua e iloilo pihia ka fakaohooho foki e puhala kua onoono hifo ki a tautolu ni mo e tau lekua ha tautolu. To lauia e puhala manamanatu ha tautolu ke he tau faahi nai.
Ka fehagai mo e tau fifiliaga uka, to nakai tupetupe lahi mahaki a tautolu ke he fekehekeheaki he tau manatu he tau tagata. Ka e falanaki mauokafua a tautolu ke he fakatonuaga he Tohi Tapu. Ko e ha? Kakano “ko e tau Tohi Tapu oti kana mai he [a]gaga he Atua ia, kua aoga ni ke fakaako ai, ke fakatonu ai, ke akonaki ai, ke fakailoilo ai foki ke he tututonu, kia katoatoa ai e mitaki he tagata he Atua, kia taute ni a ia ke he tau gahua mitaki oti kana.”—2 Timoteo 3:16, 17.
Mooli, he fakagahua e fakatonuaga he Tohi Tapu kua putoia ai e laliaga mo e akonaki fakatagata. He falu magaaho kua liga talahau mai e takitakiaga i loto ke taute e tautolu e tau mena ke he puhala ne kua nakai felauaki mo e tau manako ha tautolu. (Kenese 8:21) Pete ia, kaeke ke talia e tautolu na tufugatia a tautolu he Matua fakaalofa he lagi, kua hako ni ke fakakatoatoa kua iloa e ia e puhala kua mua atu ke o ai a tautolu. (Isaia 55:9) Kua fakamafana mai he Kupu haana a tautolu: “Kia tua a koe kia Iehova mo e hāu a loto katoa; ka e aua neke falanaki a koe ke he hāu a pulotu. Kia manatu e koe a ia ke he hāu a tau puhala oti, ti fakahakohako ai e ia hāu a tau puhala.” (Fakatai 3:5, 6) Kaeke ke fakagahua e tautolu e tomatomaaga ia, ko e laulahi he tau tupetupe mo e tau fifiliaga ne feleveia mo tautolu to galo ai.
Ka feleveia mo e fili tagata, to nakai fakatauhele a tautolu ha ko e tau logonaaga tu tokolalo, he manamanatu kua liga fakateaga a tautolu ka fakatatai ke he tau tagata he taha lanu po ke taha aga fakamotu. Ka e to feaki e tautolu e onoonoaga lagotatai he fakalilifu he tagata a ia ni. Ko e ha? Kakano ko e Matua ha tautolu, ko Iehova ko e Atua, kua “nakai fakamailoga tagata . . . Ka ko e tau tagata he tau motu oti kana ne matakutaku kia ia mo e mahani tututonu, kua talia ai e ia.”—Gahua 10:34, 35.
Ko e mailogaaga nei foki ka puipui a tautolu mai he fakaatā e aga fili tagata ke fakapulefu e tau logonaaga ha tautolu ke he falu. To maama ia tautolu kua nakai fai fakavēaga aoga ke logona hifo kua mahomo hake ai ke he tau tagata he taha lanu, ha ko e Atua “kua eke foki e ia e tau motu oti he tau tagata ke he toto taha, ke nonofo ai ke he fuga kelekele oti kana.”—Gahua 17:26.
Mooli ni, he iloa ko e mena tufugatia a tautolu ti ko e Tufuga ia kua leveki mai ki a tautolu kua fakatoka e fakavēaga ke moua e mafola mooli he loto. Ka e lahi atu foki e mena kua lata ka manako a tautolu ke fakatumau ke mafola e loto.
[Blurb he lau 4]
Tupumainoa kia e lanu tagata?
[Fakatino he lau 5]
He iloa kua leveki he Tufuga ha tautolu a tautolu ka tamai e mafola mooli he loto