Tau Hūhū he Tau Tagata Totou

Ne pehē e aposetolo ko Paulo to “fakamomoui ai a Isaraela katoatoa.” (Roma 11:26) Kakano kia a ia to hoko ke he taha magaaho ti liga liliuina e tau Iutaia oti kana ke he faka-Kerisiano?

Nakai, ai pihia e kakano he talahauaga ha Paulo. Ko e motu, ko lautolu he ohi a Aperahamo ne nakai talia a Iesu ko e Mesia. Mo e tau tau he mole e mate ha Iesu, ne maaliali ai to nakai liliuina oti e tau Iutaia ke he faka-Kerisiano. Ka e mooli e talahauaga ha Paulo to “fakamomoui ai a Isaraela katoatoa.” Ke he puhala fe?

Ne pehē a Iesu ke he tau takitaki lotu Iutaia he vahā haana: “To uta kehe ia mutolu e kautu he Atua, ka e age ke he taha motu ke ta mai ai e tau fua hana.” (Mata. 21:43) Ha kua nakai talia he motu ko Isaraela a Iesu, to fuluhi atu a Iehova ke he motu foou, ko e motu fakaagaaga. Ne fakahigoa e Paulo e motu nei ko e “Isaraela he Atua.”—Kala. 6:16.

Kua fakamooli he falu kupu he tau Tohiaga Tapu Heleni Kerisiano ko e “Isaraela he Atua” ko e matakau he tau Kerisiano fakauku he agaaga ne 144,000. (Roma 8:15-17; Fakakite. 7:4) Ko e matakau nei to putoia a lautolu ne nakai ko e tau Iutaia ti fakamooli mai he Fakakiteaga 5:9, 10, ne fakakite ko lautolu e tau Kerisiano fakauku to moua “mai he tau magafaoa oti, mo e tau vagahau kehekehe, mo e tau motu, katoa mo e atu motu.” Ko e tau tagata he Isaraela fakaagaaga kua fifili pauaki ke eke mo “tau patuiki, mo tau ekepoa . . . kua eke foki a mautolu mo tau patuiki ke he lalolagi.” Pete kua fakavihia e Iehova a Isaraela ko e motu fifili, kua maeke agaia e tau tagata takitaha ke fakafeilo mo ia. Pihia e mena ne tupu ke he tau aposetolo mo e loga foki e tau Kerisiano fakamua atu. Mooli, ko e tau Iutaia pihia, tuga ne tau tagata oti, ne fakatau aki e toto ha Iesu Keriso.—1 Timo. 2:5, 6; Hepe. 2:9; 1 Pete. 1:17-19.

Ha kua laulahi e tau Iutaia he tino he senetenari fakamua ke nakai hokotia ke pule fakalataha mo Iesu ne nakai taofi he mena nei e finagalo he Atua he fakamooli. Kua nakai fakaai e mena nei, ha kua pehē a Iehova puhala he perofeta haana: “To pihia ni haku a kupu kua fina atu ai he gutu haku, nakai liu noa mai a ia kia au; ka to eke ni e mena kua loto au ki ai, to monuina foki ia ke he mena ne fakafano atu ai e au.”—Isaia 55:11.

Kua mooli e mena nei hagaao ke he finagalo he Atua ke fakatū e 144,000 ke pule fakalataha mo e Tama haana i luga he lagi. Kua fakamahino he Tohi Tapu to fakauku he Atua e numera katoatoa he 144,000. To nakai fai ka toe!—Fakakite. 14:1-5.

Ko e mena ia, he magaaho ne tohia e Paulo to “fakamomoui ai a Isaraela katoatoa,” ne nakai talahau tuai e ia to liliuina e tau Iutaia oti kana ke he faka-Kerisiano. Ka kua kakano a ia, to fakamooli e finagalo he Atua ke 144,000 he tau Isaraela fakaagaaga ka pule mo e Haana Tama, ko Iesu Keriso, i luga he lagi. He magaaho ni he Atua, ko e numera he “Isaraela katoatoa” to ha ha he tuaga ke fakamoui, fakahiku to pule ko e tau patuiki mo e tau ekepoa ke he Kautu faka-Mesia.—Efeso 2:8.

[Tau Fakatino he lau 28]

Ko lautolu ne fakauku kua “mai he tau magafaoa oti, mo e tau vagahau kehekehe, mo e tau motu”