Tuku Fakamua e Tau Mena kua Mua e Aoga
1 Ko e heigoa falu mena aoga kua lata mo e tau momoui fakaagaga ha tautolu? To putoia moli ke he tau mena nei e fakaakoaga fakatagata, fakalataha ke he fakapotopotoaga, liogi tumau, feoakiaga ati hake, mo e fekafekauaga Kerisiano. Kua nakai maeke ia tautolu ke tumau e malolo fakaagaga mitaki ka nakai tuku fakamua tumau e tau mena aoga he tau momoui ha tautolu.
2 Pete ia, kua tau a tautolu oti ke he tau manako he tino mo e lata ke fai akonakiaga. (Kala. 5:17) Nakai lata ia tautolu ke logona kua aoga lahi he tutuli e tau manako lotokai. (Iere. 17:9) Ko e mena ia, kaeke ke leveki e tautolu e tau loto ha tautolu mo e nakai fakahehe ai, to aoga lahi e kumikumiaga fakatagata tumau.—Fakatai 4:23; 2 Kori. 13:5.
3 Kumikumi e Loto Hau Ni: Maeke ia koe ke taute e mena nei he huhu ki a koe ni falu huhu fakamoli: Manako lahi nakai au ke totou e Kupu he Atua? (1 Pete. 2:2) Fakaaue nakai au ke he aoga he fano oti ke he tau feleveiaaga he fakapotopotoaga? (Hepe. 10:24, 25) Fakamakamaka nakai au ke he liogi? (Roma 12:12) Kumi nakai e au e fakalatahaaga he tau tagata loto fakaagaga? (Roma 1:11, 12) Ha ha nakai ia au e matagahua fakatagata ke fakapuloa e tala mitaki? (1 Kori. 9:16) Ko e tau tali fakamoli ka fakakite kua manako lahi a koe he tuku fakamua e tau mena kua mua e aoga.
4 Kumikumi e Fakaholoaga Hau he Aho: Kua lata ia koe ke fakatumau ke kumikumi e tau manako he loto hau he taute mua e tau mena aoga ma e fakaaogaaga he magaaho. Kua putoia ai ke he mena nei e fakaholoaga he magaaho he totou tumau e Tohi Tapu mo e tau fufuta oti he Ko e Kolo Toko mo e Awake!, ti pihia mo e tauteuteaga ma e tau feleveiaaga. Kua lata foki ke fakatoka e magaaho ma e fakaakoaga fakamagafaoa mo e liogi auloa. Kia fakakaupa e magaaho kua fakaaoga ke kitekite tivi po ke komopiuta. Kia mauokafua ke o atu ke he tau feleveiaaga oti he fakapotopotoaga, mo e fakatokatoka viko e falu mena i ai. Kia fakatokatoka e magafaoa katoa ke fakalataha ke he gahua he fonua he tau fahi tapu takitaha.
5 Nakai fakauaua, he tuku fakamua e tau mena kua mua e aoga he tau momoui ha tautolu to fakatupu moli e olioli.