Tau Fakaako Tohi Tapu kua Fua Mai e Tau Tutaki
1 “Ke lekua he ha ke nakai papatiso ai au?” he huhu he eunuka Aitiope ki a Filipo he mole e “fakamatala atu kia ia e tala mitaki kia Iesu.” (Gahua 8:27-39) Ke he mena tupu ke he eunuka, kua fita e ha ha ia ia e loto lahi ke he tau tohi omoomoi agaga he Atua, ti mole e moua e ia e lagomatai fakaagaga mai ia Filipo, kua mautali a ia ke eke mo tutaki. Ka e nakai maama oti he tau tagata kua lata ia lautolu ke kumikumi e lautolu ni e tau Tohiaga Tapu.
2 Fakaaue ai, kua foaki he fakatokatokaaga a Iehova e porosua, Ko e Heigoa e Manako he Atua ma Tautolu?, ke fakamalolo e tau tagata ke kumikumi e fekau he Tohi Tapu ke he vaha ha tautolu. Kua lata he vala tala he porosua ke kitia mitaki ke he tau tagata fiafia moli ne kua iloa tote e Tohi Tapu. Ko e kanavaakau mitaki nei kua talaga ke omoi e tau tagata ke manako ke kumikumi e Tohi Tapu.
3 Ka kamata e fakaakoaga Tohi Tapu, to lagomatai lahi ke liu fakamanatu e tau lagomataiaga mitaki lahi ne fakailoa he uho he Our Kingdom Ministry ia Iuni 1996 ke he puhala he taute e fakaakoaga mitaki ke he tohi Iloilo. Ke he fakaakoaga, manamanatu ke he holo ki mua ne kua taute he tagata fakaako ti maeke ia koe ke fifili ko e vala fe kua lata ke onoono lahi ki ai. Fakamalolo e tagata fakaako ke tauteute tuai e tau fakaakoaga hana, he kumi e tau kupu tohi. Ko e tau tali ne taute e ia ke he tau kupu hana ni kua fakaata e fakaaue mai he loto hana ma e kupu moli. Ko e mafiti he holo ki mua kua fa taute e lautolu ne fa totou foki e tau tohi he Sosaiete mo e o tumau he tau feleveiaaga he fakapotopotoaga. Fakamalolo ki a ia ke vagahau ke he ha tagata hagaao ke he mena hane ako e ia. Kia fakakite age mo e totonu e mena kua lata ia ia ke taute ke holo ki mua fakaagaga. Kua nakai lata ia tautolu ke leva e fakaako mo e tau tagata ne fakauaua. Kua lata he tau tagata fakaako ke fakalotomatala he ako, mauokafua tumau ke he kupu moli, mo e holo ki mua ke he tukuleleaga mo e papatisoaga.
4 Ke he falu kaina, molea e taha e fakaakoaga ne kua taute, ha kua igatia e tau tagata he magafaoa mo e fakaako kehekehe ai. Pete ia, he taute e fakaakoaga fakamagafaoa kua liga ke lata ai, ha kua lagomatai e magafaoa ke auloa fakaagaga.
5 Ko e poakiaga a Iesu ke o atu a tautolu ke taute tutaki. (Mata. 28:19) Ke taute pihia, kua lata ia tautolu, ke taute e tau fakaakoaga Tohi Tapu ka lagomatai e tau tagata fakaako ke tolomaki ki mua he hokotia ke huhu a lautolu, “Ke lekua he ha ke nakai papatiso ai au?”