Kia Eke a Tautolu mo Tau Faiaoga, Nakai ni ko e Tau Tagata Fakamatala

¹ Kua kitia ai kua “kaputia moli he Tau Fakamoli a Iehova e lalolagi aki ha lautolu a fakamatalaaga.” Kua maeke fefe e mena nei? Nakai ha ko e malolo he tagata, ka e he agaga he Atua ne gahuahua he tau fekafekau hana he fakaaoga ai e lautolu e tau puhala kehekehe ke fakakatoatoa ha lautolu a matagahua ke fakamatala mo e fakaako.​—Saka. 4:6; Gahua 1:8.

² Ko e puhala mitaki lahi e tau tohi ke fakakatoatoa ha tautolu a gahua fakamatala. Ke he tau tau ne mole, kua piliona e tau tohi, tau pepa ikiiki, tau porosua, tau mekasini, mo e tau tuleke ne lomi mo e tufatufa he Tau Fakamoli a Iehova ke lagomatai ke fakatuogo e tala mitaki he Kautu. Kua fakakite he tau hokotakiaga i loto he 1997 Yearbook kua holo muatua ki mua e tauteaga he tau tohi. Ke talahau, kua molea e 91 e miliona he tau lagaki he New World Translation kua fita he lomi. He tau taha ni kua holo ki luga e numera he lomiaga he tau mekasini Kolo Toko mo e Awake! ke 7.1 e pasene. I Sihamani, ne holo hake ke 35 e pasene he tau tauteaga he tau mekasini. Ti molea e fafati tolu he tau mekasini ne taute i ai ma e fonua Rusia.

³ Ko e ha ne manako lahi ke he tau tohi loga? He lalolagi katoa, kua lahi mahaki e talia ke he fakamafanaaga ne tuku mai ki a tautolu ke fakamatala atu ke he ha mena ni ne nonofo ai e tau tagata. Ha kua tokologa ia tautolu ne fakaholo ki mua ha tautolu a gahua fakamatala​—ke he tau kavi nofo tagata, ke he tau puhala tu, mo e he tau kavi pisinisi​—kua loga lahi e tau tohi ne fa e toka mo lautolu ne fakakite e manako fiafia. Tokologa ia lautolu nei ne tote po ke nakaila logona ia e fekau he Kautu he mogo fakamua. Ke feleveia e manako nei, kua toka he tau fakapotopotoaga e tau tohi kehekehe ke fakaaoga he tau puhala oti he fekafekauaga.

⁴ Ko e Heigoa e Foliaga ha Tautolu he Tufatufa e Tau Tohi? Ko e foliaga ha tautolu, nakai ke toka ni he tau tohi. Kua ua e vala ne putoia ki ai e matagahua ke taute tutaki​—ko e fakamatalaaga mo e fakaakoaga. Fakamua, kua fai kotofa a tautolu ke fakamatala e tala mitaki he Kautu, he fakailoa ke he tau tagata ko e amaamanakiaga ni haia ma lautolu. (Mata. 10:7; 24:14) Ko e ha tautolu a tau tohi ne fakave ke he Tohi Tapu, ko e tau puhala kua kitia tonu mo e mitaki lahi ke fakalagalaga aki e manako fiafia mo e tuku age e iloilo hagaao ke he Kautu ke he falu.

⁵ Ke ua aki, kaeke ke taute e tautolu e tau tutaki, kua lata ia tautolu ke fakaako e tau mena oti kana ne poaki e Iesu. (Mata. 11:1; 28:19, 20) Kua aoga agaia e tau tohi ke he ha tautolu a fakapuloaaga he kupu moli ke he tau loto he tau tagata fakaako, he lagomatai a lautolu ke eke mo tau tutaki.

⁶ Ko lautolu ne talia e tau tohi ka liga eke mo ‘tau tagata fakanogonogo he kupu,’ ka e nakai hokotia ke eke mo tau tagata omaoma ki ai kaeke ke tiaki noa a lautolu. (Iako. 1:22-25) Tokogaogao ni ka eke mo tau tutaki ane mai ke fai tagata ke lagomatai a lautolu. (Gahua 8:30, 31) Kua lata a lautolu mo e faiaoga ke lagomatai a lautolu ke kitia ni e lautolu e kupu moli ne moua i loto he tau Tohi. (Gahua 17:2, 3) Ko e ha tautolu a foliaga ke lagomatai a lautolu ke hohoko ke he tukuleleaga mo e papatiso mo e ke fakaako a lautolu ke maeke ke fakaako falu.​—2 Timo. 2:2.

⁷ Kua Lahi Mahaki e Manako ke Loga Atu e Tau Faiaoga: He magaaho ne fakamatala a tautolu, kua fakailoa e tautolu e tala mitaki ke he tau tagata. Ti ko e fakaakoaga, kua lata ke fakaako e tagata ke holo ki mua. Ha kua taute ai he fakamatalaaga e falu ke iloa e fekau he Kautu, kua lagomatai he fakaakoaga e tau tagata takitokotaha ke talia e tala mitaki mo e fakafita ki ai. (Luka 8:15) Kua mua atu e mena ne taute he faiaoga mai he fakamatala; kua fakamaama, talahau fakamitaki, fakakite e tau fakamoliaga, mo e kua fakamakamaka a ia.

⁸ Kua tokologa a tautolu kia eke mo tau faiaoga, nakai ni ko e tau tagata fakamatala. (Hepe. 5:12a) Ko e vala aoga lahi he gahua ha tautolu ko e tufatufa e tau tohi, ka e ke fakafita fakalahi ke he foliaga ke ua aki he fekafekauaga ha tautolu kua falanaki ni ke he tau mena ne taute e tautolu ko e tau faiaoga. Pete ni kua fiafia a tautolu he magaaho ka toka e tohi, ka ke fakakatoatoa ha tautolu a fekafekauaga, kia nakai manatu a tautolu kua oti he naia e foliaga ha tautolu. (2 Timo. 4:5) Ke toka e tau tohi, ko e tau puhala mitaki a ia ke hafagi aki e tau hala ke fakaako e kupu moli ke he falu.

⁹ Taute e Tau Ahi Atu ke Kamata Aki e Tau Fakaakoaga Tohi Tapu: Liga kua toka hifo e tautolu oti e tau tohi loga, tau porosua, mo e tau mekasini, ti tohi hifo e tau ahi atu. Kia setulu ai e tautolu e magaaho ke liu tumau ke fakalagalaga e manako ia. Ko e matapatu kakano ne liliu ai a tautolu nakai ke toka ni he tau tohi ka e ke fakamafana e tau tagata ke totou mo e moua e aoga mai he tohi kua ha ha ia lautolu. To holo ki mua nakai e tuaga fakaagaga ha tautolu ane mai ke liu atu e taha tagata he taha magaaho ke he taha magaaho ke lagomatai a tautolu ke moua e iloilo tonuhia?​—Ioane 17:3.

¹⁰ Kia muitua ke he tau manako fiafia oti fakalataha mo e amanakiaga ke kamata e fakaako Tohi Tapu he porosua Ko e Heigoa e Manako he Atua ma Tautolu? po ke he tohi Iloilo ne Takitaki Atu ke he Moui Tukulagi. Kua fakakite mai he tau tohi ua nei e fekau he Kautu ke he puhala mukamuka ke maama. Haia i loto he porosua Manako e tauteaga ma e fakaakoaga, kua kaputia ai e tau matapatu fakaakoaga he Tohi Tapu. Kua taute he tohi Iloilo e tagata ke fakaako e kupu moli ke he puhala matafeiga lahi, ka e mukamuka, maama, mo e hako tonu.

¹¹ Ko e polokalama fakaako kua fakamukamuka, tuga ne fakamaama he uho he Our Kingdom Ministry ia Iuni 1996, kua fakamukamuka ai ke lata he faiaoga ke fakaako atu mo e ma e tagata ne fakaako ke fai iloaaga. Kia tokamau e uho ia ke liu kikite e tau puhala pauaki ne kua kitia moli ke mitaki. Ko e falu talahauaga ne foaki i ai kua putoia ai e puhala ke fakakite e tokaga moli ke he tagata fakaako, ko e oti he na fe e manatu ka tutala ki ai he tau fakaholoaga takitaha, maeke fefe ke tali e tau huhu noa, puhala ke tauteute fakamua tokoua e faiaoga mo e tagata fakaako ma e fakaakoaga, mo e puhala ke fakataki atu e tagata fakaako ke he fakatokatokaaga a Iehova. He muitua ke he tau talahauaga, to maeke he tokologa ia tautolu, fakalataha mo e tau tagata fou, ke takitaki e tau fakaakoaga holo ki mua.

¹² Tau Hokotaki Mitaki Mai he Fonua: Kua kitia moli ai e porosua Manako mo e tohi Iloilo ke eke mo tau lagomataiaga mitaki lahi ke fakamafiti e gahua taute tutaki. He mogo ne moua e porosua Manako, ne fakaaoga agataha ai he matakainaga tane i Polivia ke kamata aki e fakaakoaga mo e tagata tane. Fa e mahina ne mole he fonoaga he maaga motu, kua haia e tagata fakaako nei mo e tau tagata fiafia ne amanaki ke papatiso!

¹³ Tokologa kua tukulele e tau momoui ha lautolu ki a Iehova he oti e fakaako ha lautolu he tohi Iloilo. He taha fakapotopotoaga i Anakola, ko e numera he tau fakaakoaga Tohi Tapu ne takitaki he tau tagata fakapuloa kua holo mai he 190 ke he 260 mo e tau tagata ne o atu ke he feleveiaaga kua lafi ua e numera mai he 180 ke he 360 he fa ni e mahina mai he magaaho ne kamata e tohi Iloilo ke fakaaoga he kavi ia. Ti nakai leva, kua lata ai ke fakatu foki taha fakapotopotoaga.

¹⁴ He oti e fakaakoaga fakamua hana ke he tohi Iloilo, ne taha e matakainaga tane ne talahau ko e mena “mukamuka [ke takitaki ai] kaeke ke huhu he tagata ne takitaki ni e tau huhu, totou falu Tohi ne lata, mo e iloa moli kua maama he tagata ne fakaako.” Pete ni kua fa manamanatu a ia ko e tau matakainaga lotomatala lahi ni ka takitaki e tau fakaakoaga Tohi Tapu holo ki mua mo e to nakai fakaai ke taute pihia e ia, ne mailoga e ia kua maeke foki ia ia, he talahau: “Ka maeke ia au, maeke foki he falu.”

¹⁵ He kua takitaki e tau fakaakoaga Tohi Tapu, ko e vala he ha tautolu a fekafekauaga, ati fakakatoatoa ai e tautolu e foliaga ke taute e tau tutaki. Ko lautolu ne fakalotomatala ke fakalataha ke he vala nei he fekafekauaga kua moua e makona moli mo e palepale lahi. Kia ui pihia foki ki a tautolu kua ‘fakamatala e tautolu e kautu he Atua, mo e fakaako atu e tau mena he Iki ko Iesu Keriso, mo e fakamalolo ni.’​—Gahua 28:31.