Kautu e Fakamatala he Telefoni

¹ Ko e foliaga ha tautolu ko e Tau Fakamoli a Iehova he nakai fakalataha teao ke he fakamatala he tala mitaki ka e pihia foki ke hoko ke he tau tagata oti ka maeke e fekau he Kautu. (Gahua 10:42; 20:24) He matutaki e gahua he taha fale ke he taha fale ko e matapatu puhala ke hokotia ke he tau tagata, kua mailoga e tautolu nakai ko e puhala fakapapahi ni anei kua maeke ia tautolu ke moua e tau tagata oti. Ti ke ‘fakakatoatoa ni ha tautolu a feua,’ kua fakaaoga foki e tautolu falu puhala​—putoia e fakamatala he telefoni—​ke kumi e tau tagata tuga e tau mamoe.​—2 Timo. 4:5.

² He tau motu loga, kua nonofo e tau tagata ke he tau poko-fale tokoluga, tau fale nonofo magafaoa tokologa, po ke tau maaga ne puipui lapatoa e tau gutuhala, ti kua uka lahi ke taute e puhala mahani ha tautolu he fakamatala he taha gutuhala ke he taha gutuhala ke hokotia ke he tau tagata. Pihia foki mo e tau matakavi nukua maeke ia tautolu ke gahua he taha fale ke he taha fale, kua lahi agaia e numera he tau tagata ne nakai nonofo i kaina. Pete ia, tokologa e tau tagata fakailoa kua kautu lahi he hokotia ke he tau tagata nei he telefoni. He magaaho pogipogi he gahua he taha fale ke he taha fale, taha e hoa mau ne hiva e tagata ne nakai nonofo i kaina. He mole liliu atu ke he Fale he Kautu, ne kumi e laua a lautolu nei he pepa telefoni. Ne hea e laua e tau numera ti moua valu e tagata he kaina!

³ Fakauaua kia a koe ke putoia e fakamatala he telefoni he fekafekauaga hau? Taha e matakainaga tane ne talahau: “Nakai manako au ke he ha tagata ke hea mai ke he kaina haku ke fakafua mai ha mena taha ki a au, ti fita he ha ha ia au e manamanatuaga totoko hagaao ke he puhala fakamatala nei.” Pete ia, he mole e ua ni e hea telefoni, ne pehe a ia: “Fiafia lahi au ki ai! Ai manatu au to tupu e mena ia, ka e fiafia lahi au! Kua totoka e tau tagata he telefoni, ti ha ha ia koe e magaaho katoa. Ko e mitaki ha ia he mena nei!” Kua pihia foki e tali he matakainaga fifine: “Ai fiafia moli au ke fakamatala he telefoni. Kua moli, nakai loto au ke taute. Ka e taute e au mo e moua e fua mitaki mahaki. Ha ha ia au 37 e liu ahi atu mai he fakamatala he telefoni mo e loga atu e tau fakaakoaga kua maeke ia au ke leveki ki ai!” Ka makai a koe ke lali e fakamatala he telefoni, to maeke foki ia koe ke kautu.

⁴ Fakatokatoka ma e Fakamatala he Telefoni: Ko e gahua fakamatala he fakapotopotoaga kua hau i lalo he takitakiaga he leveki fekafekau. Falanaki ni ke he puhala kua lata, to fifili he kau he tau motua taha motua po ke fekafekau lagomatai kua lata ke gahua auloa mo ia he fakatokatoka e fakamatala he telefoni. Ko e matakainaga tane kua leveki e tau matakavi kua lata foki ke fai vala, ha ko e to kotofa e ia e tau matakavi mo e fakafou tumau e tau fakamauaga. Pihia foki, to fiafia e leveki ahiahi ke he holo ki mua he fakaholoaga.

⁵ Ka fai matakavi ne nakai maeke ia koe ke fakamatala ke he taha gutuhala ke he taha gutuhala, kua lata ke tauteute e tau matakavi gahua telefoni. Ko e matakainaga tane kua fifili ka tohi hifo fakamatafeiga e tau kaina nukua hiki ke he tau matakavi ia, ti kua lata ke tuku fakaikiiki e tau matakavi nei ke maeke ke gahua tumau. Ko e tau mepe he tau matakavi oti ia kua lata ke fakamaimailoga aki e talahauaga ko e kavi pauaki kua foaki ma e fakamatala he telefoni.

⁶ Moua mai i fe e koe e tau numera telefoni? To foaki atu he pepa telefoni he matakavi e loga he tau numera ia. Ka fai pepa telefoni pauaki he tau fale tokoluga kua liga maeke ia koe ke moua mai e tau numera i ai. Ka ai pihia, kua liga maeke ke lagaki mai e tau higoa he tau tagata mai he pepa fakamau higoa he fale tohi ti kumi e tau higoa ke he pepa telefoni.

⁷ Kia matakite e tau motua ke he fiafia lahi he gahua nei he fakatokatoka ma lautolu kua fai iloaaga ke he fakamatala he telefoni ke fakamahani e falu, liga he puhala ke he fakaholoaga Lagomatai he Tau Paionia e Falu. Ko e vala he tau mena kua lata mo e fakapotopotoaga he tau magaaho oti he Feleveiaaga Fekafekau ka foaki katoatoa ke fakatupu e kautuaga he puhala fakamatala nei.

⁸ Ka ahiahi leveki atu e tau motua ke he tau tagata tatakoto fale po ko lautolu ne gagao, kua lata ke mataala a lautolu ke fakamalolo a lautolu nei ke fakalataha ke he fakamatala he telefoni. Liga ke taute he motua e tau ahi atu gahoa ka e kitekite e tagata fakailoa. Ti maeke mogoia he tagata fakailoa ke olioli e magaaho ka taute e liu ahi atu. Tokologa ne kamata ke he puhala nei kua fakaaoga e tau minuti gahoa he tau aho takitaha ke he gahua nei, ti fiafia moli a lautolu ki ai.

⁹ Tau Lagomataiaga ke Kautu: He fakafano e Iesu e tau tutaki hana ke fakamatala, ne “fakafano atu [e ia] a lautolu ke takitokoua.” (Luka 10:1) Ko e ha? Ne iloa e ia ko e gahua takitokoua ka feakoaki ai mo e fefakamaloloaki ai. Mena taha ia foki ni e fakamatala he telefoni. He gahua takitokoua, maeke ia koe ke ako mai he taha, fakatutala e tau fua hau ne moua, ti foaki e tau lagomataiaga ke lata mo e fakatutalaaga ka hau. Pihia foki ke he magaaho ka tutala he telefoni, kia felagomataiaki a mua ke kumi e vala tala kua latatonu.

¹⁰ Ke fakaholo ki mua e manamanatuaga mo e onoono hokulo kua mahino, nofo he mena ke maeke ia koe ke fakatoka e tau tohi fakamatala​—ko e Tohi Tapu, tohi Reasoning, porosua Iloilo, tau mekasini, mo e falu atu foki​—i mua hau. Tohi hifo falu talahauaga, ti toka he mena ke kitia e koe. Kia mautali ke tohi hifo katoa mo e tonutika e tau fakamauaga, pihia mo e aho mo e magaaho he aho ka maeke ia koe ke iloa e magaaho ka liu atu ke kitia e tagata fiafia.

¹¹ Kua fa fakaeneene e tau tagata ka logona e leo kehe he telefoni. Ti mafanatia, kapitiga, mo e fakailoilo. Ko e leo ni hau ka maeke he tagata he kaina ke fifili e aga mo e moli hau. Totoka mo e vagahau mai he loto. Vagahau fakatekiteki mo e maama mo e fakalahi e leo ke logona. Age taha magaaho ma e tagata he kaina ke vagahau. Fakaaoga e higoa katoa hau, ti talahau e maaga ne nofo ai a koe. Nakai manako a tautolu ke he tau tagata ke manamanatu ko tautolu ko e tau tagata tohi koloa. He nakai talahau ko e hea a koe ke he tau kaina oti he falu fale pauaki, talahau fakamahino e hea hau.

¹² Tau Fakataitaiaga he Telefoni: Loga e tau feleveiaaga he lau tohi 9-15 he tohi Reasoning ka hiki he fakamatala he telefoni. Liga pehe a koe: “Kua hea atu au he telefoni ha kua nakai maeke ia au ke fina atu tino ki a koe. Ko e kakano he hea haku ke moua e manatu hau ke he huhu fulufuluola lahi.” Ti talahau e huhu.

¹³ Ko e fakataitaiaga fakamua i lalo he mataulu “Crime/Safety” ka fakaaoga ke he puhala nei: “Fakaalofa atu. Ko au ko ․․․․․․․․. Nofo au he matakavi nei. Manako au ke talahau atu ki a koe nakai ko e fakafua au he ha koloa taha po ke taute e kumikumiaga. Kua hea atu au ha ko e tupetupe haku hagaao ke he manatu he haohaoaga fakatagata. Loga e tau kolokolovao kua viko takai ia tautolu, ti kua lauia e tau momoui ha tautolu. Manatu nakai a koe to ha i ai e magaaho ma e tau tagata oti ke maeke ke o he puhala tu he po mo e logona e haohao mitaki? [Fakaata ma e tali.] Fakaata mai au ke totou e mena ne mavehe mai he Atua ke taute.”

¹⁴ He fakaaoga e talahau atu fakahako ke foaki e tau fakaakoaga Tohi Tapu he telefoni nukua fai fua mitaki. Liga fakatata e fakaakoaga ke he tau minuti gahoa. Foaki ke ahi atu ke he hana kaina ke matutaki e fakaakoaga, po ke kaeke ke tehatehaua e tagata, foaki ke matutaki e fakaakoaga he telefoni he taha aho kehe.

¹⁵ Ka fakaoti e koe e fakatutalaaga, tokaloto taha mena ka takitaki a koe ke ahi atu e tagata he hana kaina po ke he fakahu atu taha tohi. Ka tehatehaua e tagata ke atu e kaina hana, tala age to liu a koe ke vilo. Liga ke taute e koe e tau hea gahoa ato logona e ia e mafanatia ke uiina a koe ke he kaina hana.

¹⁶ Kia Fakailoilo: Ne kamata he matakainaga fifine 15 e tau he moui e fekafekauaga hana he magaaho pogipogi he hea telefoni. Ne tutala a ia ke he fifine ne talia e tohi Iloilo. He ta atu he matakainaga fifine e tohi ke he kaina, ne manako e fifine ke iloa e puhala ne iloa he fuata e numera telefoni hana, ha ko e mena nakai tu he pepa telefoni. Ne hea hehe he matakainaga fifine! Ne fakafeleveia fakamitaki he fifine e fakaakoaga mo e mogonei ko e tagata fakailoa nakai la papatiso.

¹⁷ Ne moua he matakainaga fifine e matakavi gahua he telefoni ka e nakai gahua ai ke tolu e fahitapu ha kua matakutaku. Ko e heigoa ne age ki a ia e malolo ke kamata? Ne manatu e ia e Awake! ia Ianuari 22, 1997, ne mataulu “Ka Lolelole Au, Ti Malolo Au.” Ne hagaao ke he Fakamoli kua fakamatala he telefoni pete ne tau matafatia fakatino. Ne pehe e matakainaga: “Ne liogi au ki a Iehova mo e ole ma e malolo. Ne ole au ki a ia ke foaki mai ki a au e tau kupu hako ke taute e fakataiaga haku.” Ko e heigoa e fua he hana aho fakamua he fakamatala he telefoni? Kua hokotaki e ia: “Ne tali e Iehova e liogi haku. Ne fanogonogo e tau tagata ki a au, ti fakatoka e au ma e liu ahi atu.” Nakai leva ti fua e fakamatala telefoni hana ke he fakaako Tohi Tapu. Ne fakahiku e ia: “Ne liu fakaako foki e Iehova au ke falanaki ki a ia, nakai ni ki a au.”​—Fakatai 3:5.

¹⁸ Ko e talahau e kupu moli he telefoni kua eke mo puhala kautuaga he fakamatala e tala mitaki. Tauteute fakamitaki, mo e fakalataha loto katoatoa. Ua fakalolelole kaeke ke nakai to mitaki e tau laliaga gahoa fakamua. Liogi ma e puhala ha Iehova, ti fakatatai e tau manatu mo e falu kua fakamatala ke he puhala fiafia nei. Fakalataha mo e manako ke nakai tonoa taha tagata he matakavi ha tautolu, kia taute fakamakutu e tautolu e fekafekauaga ha tautolu mo e fakamafiti.​—Roma 10:13, 14.