Fakailoa e Higoa mo e Tau Gahua ha Iehova
1 “Kia fakaheke atu a mutolu kia Iehova; kia ui atu ā ke he hana higoa; kia fakailoa atu e mutolu ke he tau motu hana tau mena ne eke. . . . Kia kolikoli e tau loto ha lautolu kua kumi kia Iehova.” (Sala. 105:1, 3) Ko e salamo ne tohi e tau kupu ia kua moua e olioli lahi fakatagata he tala age ke he falu hagaao ki a Iehova mo e “hana tau mena ne eke.” Ko e heigoa e tau mena ne eke e ia? Ko lautolu haia ne fakalataha ke he tuaga patuiki mua ue atu he Atua mo e ‘fakamatala atu hana fakamouiaga.’—Sala. 96:2, 3; 145:11, 12.
2 Hane hohoko atu a tautolu ke he magahala he Fakamanatuaga he 2001, liga loga e tau kakano ke fiafia a tautolu hagaao ke he tau gahua ne taute e Iehova mo tautolu. Pihia fefe? Nakai fakauaua ai, ko e Kaiaga Afiafi he Iki, ko e fakamanatuaga mua ue atu he tau ma e tau Kerisiano moli oti. Nakai fai magaaho foki tuga anei hagaao ke he aoga, amaamanakiaga, po ke fakakatoatoaaga. Ko e magaaho anei ma tautolu oti ke manatu e tau mena ne taute e Iehova mo Iesu ke foaki mai e puhala ma e fakamouiaga ha tautolu. Ko e mena ia he magahala he Fakamanatuaga, kua amanaki pauaki a tautolu ke kitia e puna hake he fekafekauaga he fonua, ha ko tautolu hane ‘fakailoa e fakamouiaga’!
3 To Paionia Fakaku Nakai a Koe? Ia Aperila kua mole, ko e numera ne fakamau ko e 1,780 nukua eke mo tau paionia fakaku. He tau nei, maeke nakai ia tautolu ke taute a Mati mo Aperila mo mahina ke fakalahi ki mua e gahua he fekafekauaga? Lima e Aho Faiumu ia Mati, ti lima e Aho Tapu ia Aperila. He pulega ke gahua katoa e tau aho he matahiku vahatapu, tokologa e tagata fakailoa kua gahua tupe tumau ne hokotia a lautolu ke he gahua paionia fakaku. Ke hokotia ke he fafatiaga he 50 e tula he mahina, kua lata he paionia ke fakaevalesi kavi ke 12 e tula he vahatapu. Manamanatu fakamitaki ke he tau setulu lagomatai he puha he lau 4. Maeke kia he taha he tau lagomataiaga nei ke lata mo e tau tutuaga hau? Ka nakai, kia hikihiki e setulu hau ni ke paionia ia Mati mo Aperila.
4 Kua lata e tau motua ke kamata mogonei ke fakamalolo e fakamakaukau mo e lagomataiaga ke malikiti e gahua. Taha e fakapotopotoaga he tau kua mole ne huhu oti e tau motua mo e tau fekafekau lagomatai he paionia fakaku, 64 mai he 121 e tagata fakailoa ne paionia ia Aperila! Ne fiafia foki e fakapotopotoaga he kitia tokoono e tagata fakailoa nakai la papatiso kua kamata ke hokotaki ia Mati mo Aperila. Moli, ko e magaaho mitaki lahi ma e tau fanau mo lautolu ne fou ke huhu ke he tau motua kaeke kua lata a lautolu ke kamata he fakalataha ke he gahua fakamatala atu.
5 Ta Mai he Laliaga Lahi e Tau Monuina: Ko e tau fakapotopotoaga kua fakatoka e tau foliaga pauaki mo e fakalahi e laliaga kua olioli e tau monuina loga. Kua mataaki pauaki e falu fakapotopotoaga ke gahua oti e tau matakavi nakai gahua tumau, hagaaki ke he tau puhala kehekehe he fakamatala, po ke taute e fakamatala he telefoni—ko e puhala lauia mitaki ke moua e tau tagata ne nakai nonofo i kaina mo e tau fale tu mamao.
6 Kua lata moli kia he malolo tino matematekelea po ke fuakau ke taofi ha tagata mai he putoia fakalahi ke he fekafekauaga ka maeke? Nakai pihia oti. Ma e fakatai, ko e matakainaga fifine motua 86 e tau tau he moui ne moua he kanesa ne paionia fakaku ia Aperila pete ne fufula e tau hui hana. Kua maeke he fakamatala he telefoni ke fakalataha katoatoa a ia ke he fekafekauaga, fakatupu ki mua hana fakaheke ki a Iehova. Ko e lauiaaga fakalagalaga anei ki a ia mo e hana fakapotopotoaga.
7 Tauteute Fakamitaki ma e Fakamanatuaga: To fakahoko e Fakamanatuaga he tau nei ia Aperila 8. Ha ko e Aho Tapu anei, kua lata ke tokologa atu ka fakalataha mai. Liga tokologa ue atu e tau tagata ka o mai kaeke ke taute e tautolu e vala ha tautolu (1) he fakalataha atu a tautolu ni mo e (2) uiina e falu ke fakalataha mo tautolu he Fakamanatuaga. Ko hai ka uiina e tautolu?
8 Kitekite ke he tau fakamauaga fakatagata hau he fekafekauaga ke he fonua ma e tau higoa ha lautolu ne fakakite e fiafia ke he kupu moli, pete ni e nakai ahi tumau atu a koe ki a lautolu. Ua po ke tolu e fahitapu ato hoko ke he Fakamanatuaga, kia hagaaki he ahi atu ki a lautolu nei mo e uiina he Fakamanatuaga. Ka ata a koe, tala age to hau a koe ke uta a lautolu ka manako ke fakalataha atu.
9 He falu fakapotopotoaga, ne nakai fakaaoga oti e tau uiina he Fakamanatuaga. Ko e tau tohikupu he fakapotopotoaga kua lata ke iloa mitaki ke fakatoka mai e tau uiina he magaaho kotofa ke tufatufa ai. Liga manako a koe ke lomi po ke tohi fakamitaki e magaaho mo e matakavi ma e Fakamanatuaga i kelekele he uiina. Po ke tuku hifo foki e koe e kaina he Fale he Kautu i loto he laupepa fakailoa kaeke ko e matakavi haia ka fakahoko e Fakamanatuaga hau. Ko e fakamanatu atu, kua lata ke fina atu tino ke ta atu e tau uiina he Fakamanatuaga ke he tagata he kaina.
10 Manatu a Lautolu ne Nonofo Tua: Ko e olioliaga ka tukulele e tagata fakaako Tohi Tapu ki a Iehova mo e fakamailoga e mena nei he fakatomo ke he vai. He tau tau takitaha, falu he toloaga ha tautolu kua tiaki e feoakiaga mo tautolu, ti fakagata e lautolu e talahau atu ke he falu hagaao ke he higoa mo e tau gahua ha Iehova. Fai kakano a tautolu ma e kapeletu. Pete e tokologa ne nonofo tua ne nakai tiaki e kupu moli, ne mamutu e fakamatala ha lautolu ha ko e fakaloleloleaga, tau lekua fakatagata, po ke falu tupetupe he moui. (Mata. 13:20-22) Ko lautolu he tuaga lolelole fakaagaga kua lata ke lagomatai ke liliu mai ke he fakapotopotoaga neke faiola he fakatokaaga ha Satani a lautolu. (1 Pete. 5:8) Ko e magahala he Fakamanatuaga nei kua manako a tautolu ke taute e laliaga pauaki ke lagomatai a lautolu ne nonofo tua ke lata ke liu gahuahua foki ke he fakamatala he tala mitaki.
11 Kua lata he tohikupu he fakapotopotoaga ke fakamataala ke he tau takitaki he fakaakoaga tohi a lautolu he matakau ha lautolu kua nonofo tua. To takitaki he Komiti Fekafekau he Fakapotopotoaga e fakatokatokaaga ma e tau ahiahi-leveki ke o atu ki a lautolu oti kua nonofo tua. Ka mailoga nukua lata he tagata ke moua e aoga mai he fakaakoaga Tohi Tapu fakatagata, kua lata he leveki fekafekau ke fakatokatoka ma e lagomatai, he mole atu e tutala mo e falu tagata he komiti fekafekau he ko hai ka latatonu ke taute e fakaakoga. Pete ni kua nakai lata e fakaakoaga ke loa e magaaho, ko ia ne kotofa ke taute ka hokotaki e magaaho, tau liu ahi atu, mo e fakaakoaga Tohi Tapu.
12 Ia Aperila kua mole, ko e matakainaga fifine ne gahua he taha fale ke he taha fale ne foaki e tau mekasini ke he tagata tane fuata he puhalatu. Ne talahau e ia ko e hoana hana ko e Fakamoli nofo tua. Ne huhu a ia ko e mena fe ne toka ai e Fale he Kautu ti uiina e matakainaga fifine ke ahi atu a ia mo e hoana hana. Ko e fua, ne fakalataha e hoa mau ke he feleveiaaga hake mo e talia e fakaakoaga Tohi Tapu.
13 Mautali ma e Gahua Lahi Atu! Kua lafi he salamo ne fakapuloa kua lata ia tautolu ke fakailoa e higoa mo e tau gahua ha Iehova: “Kia lologo atu a mutolu kia ia, kia uhu lologo a mutolu kia ia; kia talahau atu a mutolu hana tau mana oti. Kia fiafia a mutolu ke he hana higoa tapu.” (Sala. 105:2, 3) Kia fakatata e tautolu e tau manatu ha tautolu ma e higoa lahi atu ha Iehova mo e hana “tau mana oti” he fakatupu ki mua e tau laliaga ha tautolu ke he fekafekauaga, he taute e magahala Fakamanatuaga nei ke homo ue atu!
[Puha he lau 4]
Tau Puhala Kehekehe ke Setulu 12 e Tula he Fahitapu ke Paionia Fakaku
Aho Tau Tula
Aho Gofua 1 2 - -
Aho Ua 1 - 3 -
Aho Lotu 1 2 - 5
Aho Tuloto 1 - 3 -
Aho Faraile 1 2 - -
Aho Faiumu 5 4 3 5
Aho Tapu 2 2 3 2
Katoatoa: 12 12 12 12
To gahuahua nakai taha setulu nei ma hau? Ka nakai, he ha he taute ni e koe e setulu hau?