Ko e Gahua ne Lalago he Atua
1 Ke he tau fekafekau he Atua he vaha nei, tokogahoa ne moua e fakaakoaga, maukoloa, po ke talahaua kehe lahi he fakatokaaga nei. Ma e kakano ia, falu tagata ne fakaheu e fekafekauaga ha tautolu ko e mena fakateaga. (Isaia 53:3) Pete ia, ko e gahua fakaakoaga Tohi Tapu kua taute e tautolu ne tamai e mafanatia mo e amaamanakiaga ke he tau tagata miliona he lalolagi katoa. Maeke fefe e tau tagata noa ke moua e tau fua kehe lahi pihia? Ha ko e lalagoaga ni he Atua. (Mata. 28:19, 20; Gahua 1:8) Ko e “tau mena lolelole he lalolagi kua fifili he Atua” ne fakamaama he aposetolo ko Paulo, “ke fakama ai e tau mena malolo.”—1 Kori. 1:26-29.
2 Ko e tau aposetolo mo e falu Kerisiano he senetenari fakamua ne tokologa lahi ne ‘nakai ako mo e goagoa.’ (Gahua 4:13) Ka e, ne tumau e ha lautolu a fakamalolo ke he poakiaga ha lautolu ke fakamatala e tala mitaki, ti fakamonuina e Iehova e tau laliaga ha lautolu. Pete ni e tau mena uka mo e totokoaga, ‘kua tupu ue atu ai, mo e malolo e kupu ha Iehova.’ Nakai fai mena ke taofi e gahua ha kua lalago ai he Atua. (Gahua 5:38, 39; 19:20) Ko e mena taha ia ni ke he vaha fou nei. Nakai maeke foki he totokoaga mauokafua he tau pule malolo ke taofi e tala mitaki mai he holo mo e tupu ki mua.—Isaia 54:17.
3 Uta Oti e Tau Fakahekeaga ke he Atua: Foaki kia he tuaga talia mo tau fekafekau he Atua ki a tautolu e kakano ke hula ki a tautolu ni? Nakai pihia. Hagaao ke he fekafekauaga Kerisiano, ne tohi e Paulo: “Ha ha ia mautolu e koloa nai ke he tau kapiniu kelekele, kia ha ha he Atua e lahi ue atu he malolo, ka e nakai mai ia mautolu.” (2 Kori. 4:7) Ne loto fakaaue a Paulo he maeke ia ia ke taute e fekafekauaga hana ha ko e malolo ne foaki age ni he Atua.—Efeso 6:19, 20; Filipi 4:13.
4 Kua mailoga pihia foki e tautolu na maeke ni ha ko e “lagomatai ne moua [e tautolu] mai he Atua” ati fakakatoatoa ai e gahua fakamatala. (Gahua 26:22) Ha ko e fakapuloaaga pihia ke he lalolagi katoa, ne fakaaoga e Iehova a tautolu ke he puhala malolo ke fakafano e luelue ke he tau motu—ko e fakamailoga he fakafiliaga ka lulululu mafiti ka hoko mai. (Hakai 2:7) Ko e monuina ha ia ha tautolu ke eke mo ‘tau ekegahua fakalataha mo e Atua’ ke he heleheleaga fakaagaga mua ue atu!—1 Kori. 3:6-9.