Eke mo Lagomatai Mitaki he Gutuhala
1. Ko e heigoa e tau aoga ne moua mai he gahua mo e hoa he gahua he fonua?
1 He taha magaaho, ne fakafano e Iesu e tau tutaki 70 ke fakamatala, ti ‘fakafano e ia a lautolu takitokoua.’ (Luka 10:1) Nakai fakauaua ne fakaatā he fakatokaaga nei e tau tutaki haana ke lagomatai mo e fakamalolō e taha mo e taha ke fakamatala. Ka ō a tautolu mo e taha tagata fakailoa ke he gahua he fonua, liga foaki fēfē e tautolu e lagomatai?
2. Ka fakamatala e hoa, fēfē e puhala mo e ko e ha kua lata ia tautolu ke fanogonogo?
2 He fanogonogo: Fanogonogo fakamitaki he fakamatala e hoa haau. (Iako. 1:19) Ka totou e kupu tohi, muitua ki ai he Tohi Tapu haau. Ono ki a ia ne fakamatala, ko e hoa haau po ke tagata he kaina. Ka fanogonogo fakamitaki a koe ke he fakatutalaaga, liga fakamalolō he mena nei e tagata he kaina ke taute pihia.
3. Magaaho fe ka toka e hoa ha tautolu ke tutala?
3 Manamanatu ke he Magaaho ke Vagahau: Kaeke ko tautolu mo e taha hane fakamatala atu, kua fakalilifu e tautolu a ia he fakaatā a ia ke tutala. (Roma 12:10) Kua lata ia tautolu ke kalo he fakatauhele. Ka nimo e manatu haana po ke fakalagā he tagata he kaina e totoko po ke hūhū ti ole lagomatai e hoa ha tautolu, kia lali a tautolu ke lafi ke he tau talahauaga he hoa ha tautolu ka e nakai kamata e taha matakupu kehe. (Fakatai 16:23; Fakama. 3:1, 7) Ka tutala a tautolu, kua lata e tau kupu ha tautolu ke lafi ke he manatu hane fakamatala.—1 Kori. 14:8.
4. Ko e heigoa ka lafi ke he olioli mo e kautū ha tautolu ke he gahua he fonua?
4 He magaaho ne oti e gahua fakamatala he tau tutaki toko 70 ne gahua takitokoua, ne “liliu mai [a lautolu] mo e fiafia.” (Luka 10:17) To moua foki e tautolu e olioli mo e kautū he gahua he fonua ka fanogonogo mo e iloa e tautolu e magaaho ke tutala ka lagomatai e tautolu e falu he ō atu ke he gutuhala.