Fakaholo ki Mua e Lotomatala Haau he Fekafekauaga​—Fakamau Hifo e Fiafia he Tagata

“A koe kia koe ni, katoa mo e hau a fakaako atu.” (1 Timo. 4:16) Ko e fakatonuaga omoomoi nei mai he aposetolo ko Paulo ki a Timoteo kua fakakite mai kua lata ke holo ki mua e tau laliaga ha tautolu, pete ni ko e tagata fakamatala kua leva po ke foou. Ke lagomatai a tautolu ke taute pihia to ha ha i ai e fakaholoaga ka kitia mai he Ha Tautolu a Fekafekauaga he Kautu ne matapatu “Fakaholo ki Mua e Lotomatala Haau he Fekafekauaga.” Ko e tau vala takitaha to fakatutala ke he taha lotomatala aoga mo e falu manatu lagomatai ke feaki ai. Ke he mahina ia kua fakamafana ki a tautolu oti ke fakagahuahua e lotomatala ia. Ka oti e mahina, to fai vala he Feleveiaaga Fekafekau ha tautolu ka tuku mai ke fakailoa e tau kakano ne aoga ai ki a tautolu e lotomatala aoga ia. Ko e mahina nei kua fakamafana mai ki a tautolu ke lali ke fakamau fakamitaki e fiafia he tagata.

Kakano kua Aoga Ai: Ke fakamooli ke he kotofaaga ha tautolu, kua lata ke mahomo atu e gahua, nakai ko e fakamatala ni hokoia. Kua lata ke liliu mo e fakaako atu ki a lautolu ne fakakite e fiafia mo e fakamalū e tega he kupu mooli ne kua tō e tautolu. (Mata. 28:19, 20; 1 Kori. 3:6-9) Kua lata mogoia ke liu kumi e tagata, fakatutala ke he haana a tau manatu ti lafi atu ki ai e fakatutalaaga he magaaho fakamua. Ko e mena haia, ka feleveia mo e tagata ne fiafia, kua lata tonu ni ke fakamau hifo haana fiafia.