Eke e Magahala he Fakamanatuaga Nei mo Mena Fiafia!
1. Ko e heigoa taha puhala ke fakatolomaki haau a fiafia he magahala he Fakamanatuaga?
1 Manako nakai a koe ke fakatolomaki e haau a fiafia he magahala ia Mati, Aperila mo Me? Taha puhala ke taute e mena ia ko e fakalaulahi e fekafekauaga haau mo e, ka maeke, paionia fakakū. To lafi fēfē e mena nei ke he haau a fiafia?
2. Maeke fēfē ka fakalaulahi e fekafekauaga ha tautolu ke fakatolomaki e fiafia?
2 Fakatolomaki Haau a Fiafia: Ne tufugatia e Iehova a tautolu mo e iloilo ke moua e fiafia mo e makona mai he tapuaki ki a ia ke fakakatoatoa aki ha tautolu a manako fakaagaaga mai he loto. (Mata. 5:6) Kua tufuga foki e ia a tautolu ke he puhala ke moua e fiafia ka foaki atu ke he falu. (Gahua 20:35) Ko e fekafekauaga kua fakaatā a tautolu ke taute ua e mena—tapuaki ke he Atua mo e lagomatai e tau tagata. Ko e kakano he mena ia, ka fakatolomaki ke he fekafekauaga to fua mai ai e fiafia lahi. Ke lafi ki ai, ka lahi e fakamatala ha tautolu, to lahi foki e lotomatala ha tautolu. Ka moua e tautolu e lotomatala, to atihake e mauokafua mo e fakatote hifo ha tautolu a hopoate. To lahi e magaaho ha tautolu ke fakamatala mo e kamata e tau fakaako Tohi Tapu. Maeke he tau mena oti nei ke fakatolomaki e fiafia ke he fekafekauaga.
3. Ko e ha e tau mahina ha Mati mo Aperila kua mitaki lahi ke gahua paionia fakakū?
3 Mati mo Aperila ko e tau mahina mitaki lahi ke paionia fakakū ha kua maeke a tautolu ke fifili 30 po ke 50 e tulā fafati. Ke lafi ki ai, kamata he Aho Faiumu ia Mati 22, mo e matutaki ato hoko ke he Fakamanatuaga he Aho Gofua, Aperila 14, to fakalataha a tautolu ke fiafia auloa ke he matagahua pauaki ke uiina e falu ke fakalataha mai ke he Fakamanatuaga. To gō e tau fakapotopotoaga he fiafia lahi, ha kua tokologa kua gahua mo e “loto fakalataha” ke gahua fakalahi he fonua ke he magaaho kua kotofa.—Sefa. 3:9.
4. Ka manako a tautolu ke paionia fakakū, ko e heigoa ha tautolu kua lata ke taute?
4 Mautauteute Mogonei: Ka nakai la taute e koe, fakatoka taha magaaho ke liu kikite ke he fakaholoaga haau ke kitia e tau hikihikiaga kua lata ke taute ke maeke ia koe ke fakalaulahi haau a fekafekauaga he taha po ke loga e mahina. Kia tuku ke he liogi. (Iako. 1:5) Tutala hagaao ke he mena ia mo e haau a magafaoa mo e falu i loto he fakapotopotoaga. (Fakatai 15:22) To liga moua e koe pete ne tau paleko he malolō tino po ke fakaholoaga gahua, to maeke foki a koe ke logona e fiafia ha ko e paionia fakakū.
5. Ko e heigoa ka fua mai kaeke ke fakalaulahi ha tautolu a fekafekauaga he magahala he Fakamanatuaga?
5 Manako a Iehova ke he haana tau fekafekau ke fiafia. (Sala. 32:11) Ka eketaha a tautolu ke fakalaulahi e fekafekauaga he magahala he Fakamanatuaga nei, nakai ni fakatolomaki ha tautolu a fiafia ka e to fakafiafia foki ha tautolu a Matua he lagi.—Fakatai 23:24; 27:11.