Veveheaga 9

Moui Magafaoa Fakamua ha Iesu

KE HE magaaho ne moui a Iesu i Nasareta, ko e maga tote mo e fakateaga. Ko e matakavi matiketike i Kalilaia, nakai mamao mo e pahua fulufuluola i Isereelu.

Ko e magaaho ha Iesu ne liga ua e tau he moui ne ta mai e Iosefa mo Maria a ia mai i Aikupito, ko ia ni e tama ha Maria he magaaho ia. Ka e nakai leva e pihia. Ne hoko ni ti fanau mai a Iakopo, Iosefa, Simona, mo Iuta, ko e tau matua foki a Maria mo Iosefa ke he tau tama fifine. Ko e fakahikuaga ko e toko ono e lafu tehina mo e tau lafu mahakitaga ha Iesu.

Ne fai faoa foki a Iesu. Kua fita he iloa e tautolu hana a kasini ne fakamua ia ia ko Ioane, ne nofo mamao ke he loga e tau maila i Iutaia. Ka e nofo tata i Kalilaia a Salome, ko e tehina ha Maria. Ne mau a Salome mo Sepetaio, ti ko e tau tama tane tokoua ha laua, ko Iakopo mo Ioane, ko e tau kasini ha Iesu. Ne nakai iloa e tautolu, ke he magahala ne tutupu hake a lautolu, ko e lahi nakai e magaaho ha Iesu ne fakalataha mo e tau fanau tane nei, ka ko e tau kapitiga tata lahi a lautolu he magaaho fakamui.

Ne mamafa e gahua ha Iosefa ke leveki aki e magafaoa lahi hana. Ko ia ko e tagata ta fale. Ne feaki e Iosefa a Iesu ko e hana ni a tama tane, ti ko e mena haia ne ui ai a Iesu ko e “tama he tagata ta fale.” Ne fakaako e Iosefa a Iesu ko e tagata ta fale foki, ti iloilo foki a ia. Ko e mena haia he magaaho fakamui ne pehe e tau tagata hagaao ki a Iesu, “Ko e tagata tafale hanai.”

Kua uho e tapuakiaga ki a Iehova ko e Atua ke he magafaoa ha Iosefa. Ke lata mo e Fakatufono he Atua, ne fakaako e Iosefa mo Maria e fanau ha laua aki e tau fakaakoaga fakaagaga ‘he magaaho ka nonofo a lautolu i fale, ka o a lautolu he puhalatu, ka tatakoto a lautolu, mo e ka mamatike ai a lautolu.’ Ne ha ha i ai e sunako i Nasareta, mo e nakai fai fakauaua a tautolu ne uta tumau e Iosefa hana magafaoa ke he tapuakiaga i ai. Ka e nakai fakauaua foki ne fiafia lahi a lautolu he fenoga tumau ke he faituga a Iehova i Ierusalema. Mataio 13:​55, 56; 27:56; Mareko 15:40; 6:3; Teutaronome 6:​6-9.

▪ Ko e tokofiha e lafu tehina mo e lafu mahakitaga ha Iesu, mo e ko hai e tau higoa he falu ia lautolu?

▪ Ko hai e tau kasini mahuiga tokotolu ha Iesu?

▪ Ko e heigoa e gahua tino ha Iesu ne taute, mo e ko e ha?

▪ Ko e heigoa e tau fakaakoaga lata tonu ne foaki e Iosefa ma e hana magafaoa?