Vala 6
Ko e Ha ne Fakaata he Atua e Matematekelea
1, 2. Fakakelea fefe he tau mamatua fakamua ha tautolu e kamataaga mitaki ne foaki he Atua ki a laua?
KO E heigoa e mena ne hepe ai? Ko e heigoa e mena ne hoko ti fakakelea aki e kamataaga mitaki kua foaki he Atua ke he ha tautolu a tau mamatua fakamua ke he Parataiso he kaina ko Etena? Ka e ko e ha ne nakai ko e mafola mo e lagotatai he Parataiso, kua ha ha i ai e mahani kelea mo e matematekelea kua fakakite ke he afe he tau tau?
2 Ko e kakano ko Atamu mo Eva kua fakaaoga fakahehe e ha laua a finagalo tokanoa. Kua galo ia laua e moli kua nakai tufuga a laua ke monuina ka vevehe kehe mai he Atua mo e hana a tau matafakatufono. Kua fifili a laua ke tu tokotaha mai he Atua, manamanatu ai ko e mena nei kua fakaholo mitaki ki mua e ha laua a tau momoui. Ti kua o kehe a laua ki fafo he nofoaga tapu he Atua he fakakaupaaga he finagalo tokanoa he Atua.—Kenese, veveheaga 3.
Ko e Matakupu he Pule Okooko ke he Lalolagi Katoatoa
3-5. Ko e ha ne nakai ni moumou he Atua a Atamu mo Eva mo e liu ai kamata fakafou?
3 Ko e ha ne nakai moumou ai he Atua a Atamu mo Eva mo e kamata fakafou aki e taha kau tokoua fou? Kakano ha ko e hana a pule okooko ke he lalolagi katoatoa, ko e mena ia, ko e hana a tonu ke pule kua nakai maeke ke tuku age ke he taha kua paleko mai.
4 Ko e huhu hanei: Ko hai kua lata ke pule, mo e ha hai e pule kua hako? Ko e hana a malolo ue atu mo e ko e Tufuga ke he tau mena momoui oti kua foaki ke he Atua e hako ke pule ki a lautolu. Ha kua pihia e totonu lahi hana, ko e hana a pule kua mitaki ma e tau mena momoui oti. Ka e ko e pule he Atua he magaaho nei kua paleko mai. Ti pihia, kua fai mena hepe kia mo e hana a tufugatia—ko e tagata? To mui mai e kumikumi ha tautolu ke he huhu kua putoia ai fefe e tua malolo he tagata.
5 Ha kua tu tokotaha e tagata ke he Atua, ko e taha huhu kua fakakite: Kua maeke ke tagata ke mitaki ka nakai pule mai e Atua? Kua iloa moli he Tufuga e tali, ka e ko e puhala moli ma e tau tagata ke kumi kua fakaata kia lautolu e tokanoaaga katoatoa ne manako a lautolu ki ai. Kua fifili e lautolu e puhala ia mai he ha lautolu ni a finagalo tokanoa, ti kua fakaata he Atua e mena ia.
6, 7. Ko e ha ne fakaata he Atua e tokanoaaga katoatoa ke leva lahi?
6 Ha kua fakaata e tagata ke lahi e magaaho ke fakagahua e tokanoaaga katoatoa, kua fakatu he Atua he tau magaaho oti kua mitaki nakai e tau tagata i lalo hifo he pule he Atua po ke kia lautolu ni. Ti ko e magaaho kua fakaata kua lata ke leva lahi ke ata e tau tagata ke hoko ke he mena ne manatu a lautolu ko e tapunu he ha lautolu a tau mena fakapolitika, gahuaaga, fakasaiene, mo e tau mena ne moua mai fakaekekafo.
7 Ti ko e mena ia, kua fakaata he Atua e pule tonu ke he tagata ti hoko mai ke he vaha ha tautolu ke fakakite e nakai fai fakauaua ke he pule fakatagata kua tu tokotaha ke kautu. Ko e tagata kua ha ha i ai e fifiliaga ke he vahaloto he totonu mo e favale, fakaalofa mo e vihiatia, vahaloto he tututonu mo e nakai tututonu. Ka kua ha ha foki ia ia e fakakiteaga mo e tau fakamoliaga he hana fifiliaga: mitaki, mo e mafola, mahani kelea mo e matematekelea.
Totokoaga he Tau Mena Momoui Fakaagaga
8, 9. (a) Mahafagi fefe e totoko ke he nonofoaga he tau mena momoui fakaagaga? (e) Ko hai foki mai ia Atamu mo Eva ne fakaohooho e Satani ke totoko?
8 Ha ha i ai e taha mena kua lata ke manamanatu. Ko e ha tautolu a tau mamatua fakamua kua nakai ni ko laua ne totoko ke he tau pule he Atua. Ka ko hai foki kua momoui ke he magahala ia? Ko e tau mena momoui Fakaagaga. Ato tufuga he Atua e tau tagata, kua tufuga e ia e moui kua tokoluga mua atu, ko e numela lahi he tau agelu, ke nonofo ke he takaiaga he lagi. Kua tufuga foki a lautolu mo e finagalo tokanoa, mo e pihia foki ke he manako ke kitia e pule he Atua.—Iopu 38:7; Salamo 104:4; Fakakiteaga 5:11.
9 Ko e Tohi Tapu kua fakakite e totokoaga kua hafagi ai ke he mena momoui fakaagaga. Ko e mena fakaagaga kua manako katoatoa ke he tokanoaaga. Ti kua manako foki a ia ke tapuaki e tau tagata ki a ia. (Mataio 4:8, 9) Ko e agelu nei ne totoko kua eke ai mo fakamoliaga he fakaohooho a Atamu mo Eva ke totoko, talahau ai pikopiko kua taofi he Atua e taha mena mitaki ma laua. (Kenese 3:1-5) Ti kua fakahigoa ai ko e Tiapolo (Pikopiko) mo e Satani (Kelipopo). Fakamui, kua uhu e ia e falu a tau mena momoui fakaagaga ke totoko. Kua fakahigoa ai a lautolu ko e tau temoni.—Teutaronome 32:17; Fakakiteaga 12:9; 16:14.
10. Ko e heigoa e fua mai he totokoaga he tau tagata mo e tau mena momoui fakaagaga?
10 Ha kua totoko e tau tagata ke he Atua, kua foaki a lautolu ke he fakaohoohoaga ha Satani mo e hana a tau temoni. Ko e mena haia ne fakahigoa ai he Tohi Tapu a Satani ko e “atua he lalolagi nai,” kua “fakapouli . . . e tau manatu ha lautolu kua nakai tua.” Ti ko e Kupu he Atua kua talahau “ko e lalolagi oti ha he pule hana kua mahani kelea.” Kua fakahigoa foki ni e Iesu a Satani ko e “iki he lalolagi nai.”—2 Korinito 4:4; 1 Ioane 5:19; Ioane 12:31.
Ua e Matakupu
11. Hagaao ke he taha matakupu fe foki ne paleko e Satani e Atua?
11 Kua fakatupu foki e Satani taha matakupu ke paleko ke he Atua. Kua lauia ai he tuku e ia, ko e Atua ne hepe ke he puhala ne tufugatia e Ia e tau tagata mo e nakai fai tagata ne manako ke taute e mena hako he magaaho ne tuku ai ke he fakatupetupeaga. Ke he moli, kua talahau e ia ka ha ha i lalo hifo he kamatamata to ha ha ia lautolu e kaiaalu ke he Atua. (Iopu 2:1-5) Ke he puhala nei kua fai huhu a Satani ke he tua malolo he tufugatia he tagata.
12-14. To fakakite fefe he tau magaaho e moli, hagaao ke he tau matakupu ua ne fakatupu mai e Satani?
12 Ko e mena ia, kua fakaata he Atua e leva he tau magaaho ma e tau mena momoui lotomatala oti ke kitia ko e fakahako fefe e matakupu nei pihia foki mo e pule okooko he Atua. (Fakatatai Esoto 9:16.) Ko e mena kua kitia he fakamauaga tala tuai he tagata kua fakakite mai fakamoli hagaao ke he ua e tau matakupu nei.
13 Fakamua, to fakakite mai fefe he tau magaaho hagaao ke he matakupu he pule okooko he lalolagi katoatoa, ko e hakotonu e Atua ke pule? Maeke ke tau tagata ke pule mitaki ki a lautolu ka nakai mai he Atua? To fai fakatokatokaaga ke pule he tagata nakai mai he Atua kua fakaohooho aki e lalolagi fiafia ke tokanoa mai he felakutaki, kelipopo, mo e nakai fakafili tonu? To maeke nakai ke utakehe e mativa ka e foaki e fakamonuinaaga ma e tau tagata oti? To fai nakai ke fakakautu mai he gagao, fuakau, mo e mate? Ko e pule he Atua kua talaga ke taute e tau mena oti.—Kenese 1:26-31.
14 Hagaao ke he matakupu ke ua aki ko e heigoa he magaaho ka fakakite mai kua lata ma e tufugatiaaga he tagata? Ko e hepe kia he Atua ke tufuga e tau tagata ke he puhala ne taute aki a ia? To fai nakai ia lautolu ke taute e mena hako ki lalo hifo he kamatamata? To fai tagata nakai ke fakakite e manako ke he pule he Atua ka e nakai mai he pule tu tokotaha he tagata?
[Fakatino he lau 13]
Ne kua fakaata he Atua e tau magaaho ma e tau tagata ke o mai ke he tapunu he ha lautolu a tau mouaaga
[Credit Line]
Sutele: Fakamatapatu ke he ata he NASA